1 Corintios 5

Ri Pablo cuch'a'bej quipa riglesia ruma ri mac re jun hermano

1Eta'matal chi c'ut c'o jun chixo'libal alak xu'an rixokil che ruca'm uchu. Yey wa catajin che u'anic lic na e ta q'uenok, ma wa' na quilitaj tane chiquixo'libal ri na queta'am ta uwach ri Dios. 2Y na ruc' ta c'u ri', ¡ralak lic 'anom nim che ib alak! ¿Su'be na xbisoj ta alak wa' wa mac? Ma ri xraj e ta xesaj bi alak chiquixo'libal rutinamit ri Dios ri ca'anaw wa'.

3Ri'in nuk'atom chi tzij puwi ri x'anaw re wa' wa mac. Y tob ne na in jinta uc' alak chiwachil, e cuna' nuc'u'x ri'in pacha' in c'o uc' alak. 4Cambi'ij c'u che alak, molo ib alak chupa rubi' ri Cristo ruc' ruchuk'ab Rire; yey mic'ow chic'u'x alak, ri'in e pacha' in c'o chixo'libal alak tob na in jintaj. 5Ec'u ri ca'an alak e caya alak wa aj mac puk'ab ri Satanás#5:5 “Caya alak wa aj mac puk'ab ri Satanás”: Ri xraj ri Pablo e ri xmacunic cuna' chuc'u'x ri mac xu'ano, cac'un c'u sak chwach y cutzelej utzij. 1 Jn. 5:19 cha' jela' casach uwach ri rayibal re ruti'jil y jela' cacolobetaj chupa ruk'ijol ruc'unibal ri Kanimajawal.

6Lic na utz taj catac'aba' k'ij alak ma c'o mac chixo'libal alak. ¿Na eta'am ta neba alak e jubik' levadura cusipowirisaj upa ronoje ri k'or? Wa' e que'elok, we c'o mac chixo'l alak yey we na quesax taj, ri jujun chic quepachab ruc'. 7Ri pam re ri nimak'ij Pascua, wa' 'anom ruc' c'ac' k'or na jinta levadura che; jec'uri'la' ralak, chesaj ib alak chupa ri na utz taj re ri k'e'l binic silabic alak cha' cu'an alak jun sakil tinamit re ri Dios. Yey ralak alak chi sakil utinamit ri Dios, ma ri Cristo ya xcam pakac'axel ri'oj jela' pacha' ri bexex re Pascua, ri xcamisaxic echiri' ri Dios xebucolobej rutinamit Israel.#Éx. 12; 1 P. 1:18-19 8Ec'u wo'ora ruma ri xu'an ri Cristo, ka'ana jun sakil nimak'ij chwach ri Dios ruc' ri kabinic kasilabic, cha' jela' oj pacha' ri pam re Pascua na jinta levadura che, ruma kaya'om can ri na utz taj, wa' e ri ch'ulilaj mac xojc'oji' wi ojertan, y pa sakil wi chojc'ola chupa ri K'ijsak.

9Chupa ri jun nucarta nutakom bi, ximbi'ij pan che alak machbilaj alak ri caquetz'abej uwa quik'ij cuc' jujun chic na quic'ulel taj. 10Wa ximbi'ij na e ta que'elok xa jumul quesaj ib alak cuc' conoje raj maquib, ri na quicojom ta rubi' ri Cristo. Wa' e ri caquiyoj quib cuc' jujun chic, ri lic e rayinel, ri e elek'omab y ri e aj tioxab. Ma we c'o junok caraj caresaj rib chiquixo'l conoje raj maquib, ¿su'anic c'u ri' cac'oji' wara che ruwachulew? 11Ruc' ri xintz'ibaj xuaj ximbi'ij y e cambi'ij wo'ora: Machbilaj alak junok cubi'ij ralc'o'al ri Dios yey caretz'abej uwa uk'ij ruc' jun chic na uc'ulel taj, o junok aj rayinel, aj tiox, aj ch'aminel, k'aba'rel o elek'om. Cuc' wa' wa ticawex jela' quibinic quisilabic, tob ne xa wa'im ma'an alak cuc'. 12Ma pak'ab ralak c'o wi cak'at alak tzij paquiwi ri hermanos re ri iglesia alak. Pero ¿c'o nawi panuk'ab ri'in o pak'ab ralak ri cak'at tzij paquiwi ri na quicojom ta rubi' ri Cristo? Na jintaj, 13ma e ri Dios ri cak'ataw tzij paquiwi rique. Ec'u la' la jun aj mac c'o piglesia, chesaj bi chixo'libal alak.

Currently Selected:

1 Corintios 5: acrT

Highlight

Copy