1 Corintios 4

Mojoc il che ri caquich'ob ri winak chikij

1Lic chirajawaxic wi conoje ri ticawex caqueta'maj e ri'oj xa oj to'bel pa ruchac ri Cristo, y ya'tal c'u chike cakac'ut sa' ri caraj cuk'alajisaj ri Dios chique ri ticawex. 2Jela' pacha' lic chirajawaxic che juna aj chac lic cuchapabej chi utz ri ya'om puk'ab ruma ri rajaw; jec'ula' ri' chirajawaxic caka'an ri'oj ruc' ri ya'tal pakak'ab ruma ri Kajawal. 3Ec'u ri'in na quinoc ta il che tak ri cabi'ij alak che ri chac nu'anom, we utz o na utz taj. Na quinoc tane il che tak ri caquibi'ij ri ticawex che wa'. Yey na ube tane chwe ri'in cambi'ij we utz ri chac nu'anom. 4Ma canna' chinuc'u'x e quintajin che u'anic ri caraj ri Kanimajawal; na ruc' ta c'u ri', xew che Rire takal wi cubi'ij we utz o na utz ta ri chac nu'anom. 5E uwari'che mak'at tzij alak paquiwi ri raj chac ri Dios, we c'o cutikoj o na jinta cutikoj ri chac qui'anom; e choye'ej alak ruc'unibal ri Kanimajawal Jesucristo, ma echiri' cac'un Rire, cuk'alajisaj ronoje ri c'amaja' queta'maxic. C'a ec'uchiri' cak'alajinic sa' ri c'o pa canima' ri ticawex. Y chiquijujunal c'ut caquic'ul che ri Dios ri yacbal quik'ij e chirij ri qui'anom.

6Hermanos, ruc' ri c'ambal na'oj nuya'om lo chwi ri Apolos y panuwi ri'in, xuaj campixabaj alak cha' camaj alak uyaquic quik'ij ri ticawex xew e chirij ri tz'ibital can chupa Rutzij Upixab ri Dios puwi ri ya'tal che alak ca'an alak. Ma we jela' ca'an alak, na jinta c'o ri cu'an nim che rib ruma utakem junok yey e cuc'ak bi quik'ij ri nic'aj chic.#1 Co. 3:19-23 7We c'o junok u'anom nim che rib chixo'libal alak, cantz'onoj che: «¿Su'chac cach'ob la e lic c'o wach la chiquiwa ri nic'aj chic? ¿C'o nawi majom la xa tuquel la? Jintaj, ma janipa ri c'o uc' la y ri majom la, e ri Dios ya'yom che'la. Y we xa ya'tal che'la, ¿su'chac c'u ri' catac'aba' k'ij la?»

8Ralak cana' alak pacha' na jinta chi c'o cajawax che alak. E cana' ralak alak chi beyom y alak chi nimak takanelab; yey na cajawax ta chi ne ri to'bal ke'oj che alak. Lic chom c'ut we ta pa sakil wi 'anom chi takanelab che alak ruma ri Dios cha' junam cojtakan uc' alak.

9No'j chinuwach ri'in, ri oj utako'n ri Jesús na jinta co kawach. Ma ri Dios oj ucojom oj q'uisbal chique ri ticawex. E pacha' oj c'o chuxe' k'atbal tzij re camic y cojc'am bi re cojcamisaxic, yey conoje xa cojquitzutza' chic, tob ticawex, tob ne ángeles. 10E ri'oj ruma katakem ri Cristo cabi'x chike sachinak kana'oj; no'j ralak cach'ob alak rakan lic c'o na'oj alak chiquiwa ri jujun chic quicojom rubi' ri Cristo. E ri'oj e pacha' lic na jinta kachuk'ab, no'j ralak lic c'o chuk'ab alak. E ralak lic yacom k'ij alak, no'j ri'oj lic c'akom bi kak'ij. 11Ec'u la' lic katijom lo numic y tzajin chi', lic ne na jinta kak'u'. Cojch'ayic y na jinta kocho pa cojc'oji' wi. 12Lic ne cojcosic ma cojchacun ruc' ri kak'ab.#Hch. 18:3 E tak ri winak cojquiyajo, no'j ri'oj cakatz'onoj ri utz paquiwi'. Echiri' cojternabex ruc' c'axc'obic, ri'oj lic cakacuyu. 13Echiri' tzel cojquich'a'tibej, cakac'ul uwach ruc' chomilaj ch'a'tem. C'a chupa ne wak'ij ora e pacha' chi oj ak'es na jinta uchac che ruwachulew ma lic c'akom bi kak'ij cuma ri winak.

14Cantz'ibaj c'u ronoje wa' na e ta re canya q'uix alak; xa e re campixabaj alak ma pacha' alak walc'o'al lic c'ax canna' alak. 15Ma tob lic e q'ui ri quec'utun chiwach alak chwi ri Cristo, na ruc' ta c'u ri', ri kaw alak na e ta q'ui, xew ri'in, ma in ri nabe xintzijoj ri Utzilaj Tzij che alak yey ruma c'u la', xcoj alak rubi' ri Cristo y xu'ana alak ralc'o'al ri Dios. 16Ruma c'u wa', cambi'ij che alak: 'Ana e alak ri nu'anom ri'in ruc' ri nubinic nusilabic chwach ri Dios. 17E uwari'che nutakom bi uc' alak ri Timoteo, ri lic c'ax canna'o ma e pacha' nuc'ajol chupa rubi' ri Cristo. Rire lic cu'an chi utz ri takom che ruma ri Kanimajawal. Echiri' copon uc' alak, cu'tzijoj tanchi che alak ri nubinic nusilabic ri'in ruc' ri Cristo, ma jela' nuc'utum pa tak chawi in ic'owinak wi y pa tak riglesias.

18E c'o jujun chixo'libal alak lic qui'anom nim che quib, ma e chiquiwa rique na quinopon ta chi ri'in uc' alak. 19Pero na quinmayin ta che quinopon uc' alak we e caraj ri' ri Dios. Yey echiri' quinoponic, quebe'nuwila na c'u ri qui'anom nim che quib, we pakatzij wi caquirik u'anic janipa ri quibi'im. 20Ma na xa ta ruc' ch'a'tem cak'alajin wi we junok pakatzij wi c'o chupa rutakanic ri Dios, ma e cak'alajin ruc' ruchuk'ab ri Dios che rubinic usilabic. 21Cantz'onoj c'ut: ¿Sa' ri más utz? ¿Quinopon uc' alak cha' qui'n'ana juna k'ilonic lic c'ax o e canc'ut ri rutzil nuc'u'x y ri ch'u'ch'uj nuc'u'x chiwach alak? Pak'ab alak c'o wi.

Currently Selected:

1 Corintios 4: acrT

Highlight

Copy