1 Corintios 3
3
Konoje kachbi'il kib chupa ruchac ri Dios
1Hermanos, echiri' xinc'oji' uc' alak, na xinch'a't ta uc' alak jela' pacha' quinch'a't cuc' ticawex catakan ri Ruxlabixel ri Dios pa canima'; ma e xinch'a't uc' alak jela' pacha' quinch'a't cuc' ticawex c'a caquitakej tak ri rayibal re ri quiti'jil, ri c'amaja' c'o quiq'uiyibal chwach ri Cristo. 2Jela' pacha' ca'an che juna ralco ac'a, na caya' ta wa che ma xew cutij utz'um; jec'ula' xin'an ri'in, xinya c'utunic lic na c'ayew taj che alak, ma c'amaja' carik alak uc'ulic ri c'utunic takal chique ri c'o chi quiq'uiyibal chwach ri Dios. Yey c'amaja' ne carik alak umajic usuc' wa', 3ma c'a takem alak tak ri rayibal re ri ti'jil alak. Ma chixo'l alak e c'o ri c'ax quic'u'x chiquij jujun chic y e c'o ri e aj ch'a'oj. ¿Na junam ta neba ri binic silabic alak ruc' ri quibinic tak ri winak na queta'am ta uwach ri Kakaw y e caquitakej ri xa re ruwachulew? 4Ma chixo'l alak e c'o ri caquibi'ij: «In re ri Pablo» yey jujun chic caquibi'ij: «In re ri Apolos.»
5Cantz'onoj c'u che alak: ¿Sa' ruwach ri Pablo? ¿Y sa' ruwach ri Apolos? Ri'oj oj nimanel chwach ri Dios yey ruma ri chac xka'an uc' alak, xcoj alak rubi' ri Cristo. Ri'in y ri Apolos xa e xka'an ri chac uya'om ri Kanimajawal chike. 6E ri'in xintzijoj ri Utzilaj Tzij che alak pacha' cu'an juna awanel; y ri Apolos xuto' alak cha' catiqui' alak chi utz chwach ri Dios pacha' cu'an juna aj tico'n echiri' cu'an ja'anic. Pero ri q'uiyibal alak, e ri Dios xya'wic. 7¿China c'u ri' ri más c'o uwach? ¿E nawi ri xticow re? ¿E nawi ri xja'an re? Na e taj, ma e ri Dios, ri caq'uiyisan re. 8Ri caticow re y ri caja'an re, xa jun quiwach; yey chiquijujunal caquic'ul ri rajil uc'axel e chirij ri chac xqui'ano. 9Ec'u ri' ri'oj xa oj umocom ri Dios yey ralak e pacha' alak rulew cachacux uwach ruma ri Dios.
Jenela' ralak e pacha' alak juna ja catajin ri Dios che uyaquic. 10Yey Rire e xya'w panuk'ab xinjek ruchac chixo'libal alak. E pacha' juna aj yacal ja, nabe cutz'ak ruparakan ri ja; tec'uchiri' jun chic aj chac culem ri xan puwi'. Jec'ula' ri'in nabe xintic riglesia; tec'uchiri' c'o jun chic xuto' alak cha' caq'uiy alak chwach ri Dios. Ri chirajawaxic wi e chiquijujunal raj chac caquilo su'anic quechacunic cha' quel chi utz ri chac. 11Ma na utz ta q'uenok we c'o junok cucoj jun chic uparakan ri ja junwi chwa ri cojotal chic; yey ruparakan ri ja cojotal chic, e ri Kanimajawal Jesucristo.
12Puwi ruparakan juna ja c'o ri cuchapabej oro, plata o chomilaj abaj; y c'o ri cuchapabej tz'alam, xlab o q'uim. 13Che tak wa' wa cachapabexic c'o ri cacowin chupa ri ak' y c'o ri na cacowin taj; jec'ula' ri chac u'anom junok pubi' ri Cristo, ma pa ri k'ij re ri k'atbal tzij, ri Dios cuk'alajisaj we utz ri chac u'anom o na utz taj. 14We ri chac u'anom c'o ucowil, cuc'ul c'u ri' ri rajil uc'axel cuya ri Dios; 15no'j we na jinta ucowil, ri' na jinta rajil uc'axel cuc'ulu. Casach c'u uwach ri' ruchac, tob rire c'a cacolobetajic, e pacha' junok cucolobej rib echiri' cac'at ri rocho.
16¿Na eta'am ta neba ralak, alak rocho ri Dios yey e ri Ruxlabixel ri Dios ri jekel uc' alak? 17E uwari'che we c'o junok cusach uwach ri rocho ri Dios,#3:17 “Cusach uwach ri rocho ri Dios”: Wa' e que'elawi echiri' junok cusach uwach ruchac ri Dios chiquixo'l rutinamit. ri Dios cusach uwach ri ca'anaw wa'. Ma ri rocho ri Dios e santo; yey wa' e ralak. 18Mac'o musoc rib chiribil rib. Ma we c'o junok cuch'obo lic reta'am chi ronoje che ruwachulew, chirajawaxic ri' chu'ana che rib pacha' junok na jinta c'ana reta'am, cha' e careta'maj runa'oj ri Dios. Jec'ula' cu'ana lic c'o una'oj pakatzij wi. 19Ma runimal na'oj re ruwachulew na jinta c'ana uwach chwach ri Dios. E pacha' ri tz'ibital can chupa Ruch'a'tem ri Dios:
E tak ri c'o quina'oj re socoso'nic,
ri Dios cu'an chique quetzak chupa ri quino'jibal. Job 5:13
20Yey je tanchi wa' tz'ibital canok:
Ri Dios reta'am na jinta uchac
ri quina'oj ri caquich'obo lic queta'am chi ronoje Sal. 94:11
cacha'. 21E uwari'che lic na utz ta q'uenok we c'o junok cu'an nim che rib xa ruma e utakem juna achi. Ma e ri Dios ya'yom ronoje che alak. 22Uya'om che alak re to'bel e alak, ri Apolos y ri Pedro yey inuya'om ne ri'in. Uya'om ne che alak ruwachulew, ri c'aslemal, ri camic, janipa ri catajin wak'ij ora y ri catajin lok. Ronoje c'u ri' ri ya'tal che alak, ruc' ri Dios petinak wi. 23Ec'u ralak, alak re ri Cristo; yey ri Cristo, re ri Dios.
Currently Selected:
1 Corintios 3: acrT
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
