1 Corintios 2

1Hermanos, ri'in echiri' xinopon uc' alak cha' cantzijoj ri Utzilaj Tzij re ri Dios, na xintzijoj ta wa' ruc' nimak tak ch'a'tem y unimal na'oj xa re ruwachulew. 2Ri xinch'obo e xew cantakej utzijoxic ri Kanimajawal Jesucristo y rucamic Rire chwa ri cruz. 3Y echiri' xinc'oji' uc' alak, xinna'o na jinta nuchuk'ab chiwibil wib, yey xinjek ne quinbirbot ruma ri nuxi'in ib ma xinna'o na canrik ta u'anic janipa ri caraj ri Dios chwe. 4Ec'u rutzijoxic xin'ano na e ta ruc' unimal na'oj xa re ruwachulew y chomilaj tak ch'a'tem casocoso'nic, ma e ruc' ri Ruxlabixel ri Dios y ruchuk'ab Rire 5cha' na cacubi' ta c'u'x alak ruc' ri Cristo xa ruma unimal na'oj re ruwachulew, ma e ruma ruchuk'ab ri Dios.

Ri Ruxlabixel ri Dios cuk'alajisaj Runa'oj ri Dios chike

6No'j echiri' oj c'o chiquixo'l ri lic quijiquibam quic'u'x ruc' ri Dios, ri cakatzijoj caka'an ruc' unimal na'oj. Na e ta ruc' unimal na'oj xa re ruwachulew, na e tane ruc' na'oj que ri nimak tak takanelab che ruwachulew, ri xa casach quiwach. 7Ma ri cakak'alajisaj e ri unimal na'oj re ri Dios, yey wa' na eta'matal ta rojertan.#Col. 2:2-3 Echiri' c'amaja' ne ca'an ruwachulew, Rire uch'obom chi ulok cuya wa na'oj chike re yacbal kak'ij. 8Wa' wa na'oj re ri Dios na xquimaj ta usuc' ri nimak takanelab re ruwachulew. Ma ta e la' xquimaj usuc', na caquiya tane ri' chwa ri cruz ri Kajawal, ri lic nim uk'ij. 9E jela' pacha' ri tz'ibital can chupa Ruch'a'tem ri Dios:

E tak ri winak na caquimaj ta usuc'

ronoje ri utz ujiquibam uwach ri Dios

chique ri lic c'ax quena'w re Rire.

E tak wa' wa utz lic na jinta junok iliyom re,

na jinta junok tayom re

y na jinta ne junok no'jiyom wa' Is. 64:4

cacha'. 10Yey ri Dios uk'alajisam chi wa' chike ri'oj ruma ri Ruxlabixel. Ma ri Ruxlabixel Rire ronoje reta'am, cumaj ne usuc' ri sakil una'oj ri Dios. 11Chiquixo'l tak ri winak, ¿c'o nawi junok reta'am sa' ri cuch'ob juna chic ticawex? Na jintaj. Ma xew wa ticawex reta'am sa' ri c'o pa ranima'. Jec'ula' na jinta junok reta'am runa'oj ri Dios, ma xew ri Ruxlabixel ri Dios eta'mayom re wa'. 12Yey wo'ora, ri kana'oj ri'oj na junam ta ruc' ri quina'oj ri na queta'am ta uwach ri Dios. Ma ri'oj e kac'ulum ri Ruxlabixel ri Dios cha' caketa'maj ronoje ri chomilaj sipanic uya'om Rire chike. 13Yey wa' wa cakatzijoj, na e ta ruc' ch'a'tem kamajom chiquij ri ticawex, ma e ruc' ri uc'utum ri Ruxlabixel ri Dios chike. Y jec'ula' e cakak'alajisaj runa'oj ri Dios ruc' ch'a'tem re ri Ruxlabixel ri Dios. 14Ec'u rachi na jinta ri Dios pa ranima', na cuc'ul ta uc'u'x ri cubi'ij ri Ruxlabixel ri Dios che, ma chwach rire wa' xa sachibal na'oj; yey na cumaj ta usuc', ma wa' xew camajtaj usuc' we cak'alajisax ruma ri Ruxlabixel ri Dios. 15No'j we ri Ruxlabixel ri Dios catakan pa ranima' junok, ri' cumaj usuc' sa' ri utz chwach ri Dios, y na cak'at ta c'u tzij puwi'. 16Ruch'a'tem ri Dios jenewa' cubi'ij:

¿C'o nawi junok majayom usuc' ronoje runa'oj ri Dios Kajawxel?

¿C'o nawi junok caya'w una'oj Rire? ¡Na jintaj! Is. 40:13

cacha'. Pero chike ri'oj ya'tal runa'oj ri Cristo.

Currently Selected:

1 Corintios 2: acrT

Highlight

Copy