1 Corintios 11

1'Ana che ri binic alak pacha' ri nubinic ri'in, jela' pacha' ri'in e can'an che ri nubinic pacha' rubinic ri Cristo.

Pixabanic chique riglesia echiri' caquimol quib

2Quinqui'cot uc' alak ma na mesc'utam ta alak ri nupixabanic y takem lo alak ri c'utunic nuk'alajisam chiwach alak. 3Pero c'o ri cuaj queta'maj alak: Ri Dios e ujolom pa chapatal wi ri Cristo. Jec'ula', ri Cristo e ujolom pa chapatal wi rachi yey rachi e ujolom pa chapatal wi rixok. 4We juna achi uch'ukum c'u rujolom echiri' cu'an orar o cu'an k'alajisanic, ruc' wa' cuc'utu na jinta xi'in ib ruc' chwach ri Cristo, ri Jun e ujolom pa chapatal wi. 5No'j we juna ixok na uch'ukum ta rujolom echiri' cu'an orar o cu'an k'alajisanic, ri' q'uixbal che ri jun e ujolom pa chapatal wi, ma e junam ri' pacha' k'atom ronoje ruwi'. 6Ma we juna ixok na cuch'uk ta rujolom, ri' asu chuk'ata ronoje ruwi'. Pero we q'uixbal che rixok ca'an lic ch'uti'n che ruwi' o cak'at ronoje ruwi',#11:5-6 Rojertan jun che tak ri k'atbal tzij puwi juna ixok cu'an ri na utz taj, e cak'at ronoje ruwi', c'utubal re rumac. más ne utz c'u ri' e chuch'uku rujolom.

7No'j rachi na takal ta che cuch'uk rujolom, ma rire e cuc'utubej uwach ri Dios y ruma rachi cak'alajin runimal uchomalil ri Dios. Yey rixok e uchomalil rachi.#11:7 We juna ixok utz u'anom y lic cach'a'tibex chi utz, wa' yacbal uk'ij ri rachijil. 8Ma ri nabe achi na petinak ta che ri nabe ixok; e ri nabe ixok che ri nabe achi petinak wi.#11:8 Ri Dios xu'an ri nabe achi ruc' ulew; no'j rixok x'an ruc' jun ubakil ri nabe achi. Gn. 2:21-23 9Yey ri Dios na xu'an ta rachi re rachbi'il rixok ma e xu'an rixok re rachbi'il rachi.#11:9 Wa' e ri Adán y ri Eva. Gn. 2:18 10E uwari'che takal che rixok cuch'uk rujolom, ma wa' e c'utubal re uya'om rib pa takanic, jela' c'u ri' cak'alajinic lic utz u'anom chiquiwach conoje ri ticawex y chiquiwach ne ri ángeles. 11Na ruc' ta c'u ri', janipa ri kacojom rubi' ri Kanimajawal lic keta'am, rachi y rixok quicabichal c'o quiwach chwach ri Dios y lic quebajawaxic. 12Ma che ri nabe achi petinak wi ri nabe ixok yey cuma rixokib quebalax rachijab. Pero ronoje ri c'olic, petinak ruc' ri Dios.

13Ch'obo pe alak rakan puwi wa': ¿Utz nawi we juna ixok na uch'ukum ta rujolom echiri' cu'an orar chwach ri Dios? 14Lic rewi na takal ta chique rachijab lic canima'kir ri quiwi'. 15No'j rixokib takal chique lic nima'k ri quiwi', ma e quichomalil ri' ya'tal ruma ri Dios re ch'ukubal ri quijolom. 16Ruc' c'u ronoje wa xinch'a'tibej, we c'o junok caraj cach'o'jin puwi', xew cambi'ij che: Ri nic'aj chic iglesias re ri Dios na junwi ta ri quina'oj puwi wa' chwa ri canc'ut ri'in.

Pixabanic puwi ri cena re cuxtabal rucamic ri Kanimajawal Jesucristo

17Ruc' wa pixabanic canjek bi utz'ibaxic che alak wo'ora, na quinqui'cot ta ruc' ri 'anom alak. Ma echiri' camol ib alak, na utz ta ri quilitaj chixo'libal alak, ma xa e ca'an c'ax chi'ibil ib alak. 18Nabe na cambi'ij che alak, nutom na junam ta c'u'x alak echiri' camol ib alak pubi' ri Cristo. Yey cancojo laj katzij, 19ma e c'o jujun caquich'obo más c'o quiwach chiquiwa jujun chic. Yey quilitaj na c'u wa' cha' jela' cak'alajinic china tak ri lic utz qui'anom chwach ri Dios, ma ri' na je ta la' caqui'ano. 20Ec'uchiri' camol ib alak, na e ta re catij alak ri sakil cena re ri Kanimajawal. 21Ma ri ca'an alak e chujujunal cutijila' nabe ruwa'im, tob e c'o c'u jujun quecanaj can ruc' numic yey e c'o ne ri quek'abaric. 22¿Sa' c'u ri' wa'? ¿Na jinta neba ocho alak pa cawa' wi alak? ¿Su'chac c'u ri' echiri' camol ib alak pubi' ri Cristo, cac'ak bi alak quik'ij rutinamit ri Dios; ma e caya alak quiq'uix ri na jinta c'o cuc'? ¿Sa' c'u ri cambi'ij che alak? ¿Canyac cami k'ij alak ri' ruma ri ca'an alak? ¡Na canyac ta k'ij alak!

23Ri nuc'ulum ri'in puwi ri sakil wa'im e ri nuc'utum chi che alak, yey wa' e junam ruc' ri ubi'im can ri Kanimajawal Jesucristo. Ma la' la'k'ab echiri' ri Jesús xc'ayixic, xuc'am ri pam, 24xutioxij che ri Dios y xuwech'o, jec'uwa' xubi'ij: «Chic'ama' y chitija', ma e nucuerpo wa' ri caya' pa camic iwuma ri'ix. Ec'uchiri' qui'an tak wa' chikawach apanok, chi'ana' re cuxtabal we ri'in» xcha ri Jesús.#Mt. 26:26; Mr. 14:22; Lc. 22:19 25Jec'ula' xu'an che ri c'olibal c'o vino chupa. Q'uisbal re ri cena, xuc'am ri c'olibal c'o vino chupa y jec'uwa' xubi'ij: «Wa ri ri' e ri c'ac' tzij#Jer. 31:31-34 cajiquibax uwach ruc' ri nuquiq'uel. Janipa laj quitij ri vino re wa cena, chi'ana' cuxtabal we ri'in» xcha ri Jesús.#Mt. 26:27-28; Mr. 14:23-24; Lc. 22:20 26Janipa c'u laj camol ib alak cha' catij alak wa pam y cakum alak wa vino, e catajin alak ri' che utzijoxic rucamic ri Kanimajawal c'a echiri' cac'un tanchi Rire.

27E uwari'che china ri cutij wa pam y cukum wa vino re ri Kanimajawal yey na ruc' ta xi'in ib cutijo, ri' c'o ri k'atbal tzij re ri Dios puwi' ma e camacun chirij ri Kanimajawal echiri' cuc'ak bi uk'ij rucuerpo y ruquiq'uel. 28Ruma c'u ri', china ri caraj cutij wa pam y cukum wa vino, nabe na lic chuna'a rib sa' ru'anom. 29Ma china ri cutij wa pam y cukum wa vino re ri Kanimajawal yey na cuch'ob tana chi utz we wa' e que'elawi rucuerpo ri Kanimajawal; ri' chiribil rib cuc'am lo ri k'atbal tzij re ri Dios puwi'. 30Ruma e c'o jujun jela' qui'anom, e q'ui ri e yewa'ib y ri na jinta quichuk'ab chixo'libal alak, yey e c'o ne ri ecaminak chic. 31No'j we ta nabe na cakana' kib ri'oj chikibil kib, ri' na cajawax ta chic cuk'at tzij ri Dios pakawi' ma kayijbam chi kib chwach. 32No'j we na caka'an ta wa', ri Dios cuk'at tzij pakawi' wo'ora re cojuk'ilo cha' chikawach apanok na cuk'at ta tzij pakawi' junam cuc' ri e aj mac. 33E uwari'che nu hermanos, echiri' camol ib alak che utijic ri cena re ri Kanimajawal, choye'ej na ib alak cha' junam catij alak wa'. 34Yey we c'o junok che alak lic canumic, wo'ka lo chirocho cha' na capetisaj ta alak ri k'atbal tzij re ri Dios pawi' alak ruma ri ca'an alak echiri' camol ib alak. C'a c'o cuaj canyijba' chiwach alak, pero c'ate cojch'a't puwi' echiri' quinopon uc' alak.

Currently Selected:

1 Corintios 11: acrT

Highlight

Copy