El Apocalipsis 12

Attho Juanpaꞌ entan poesheñarr koyaneshaꞌ ñeñth emareth, poeꞌmarethollpaꞌ ñeñthara Cristo, añyaññapaꞌ moeneñeñ oꞌch añyampes poeꞌmaretholl

1Allempoña all poeꞌntañopaꞌ all orrtena ñeñth amaꞌt awatha amaꞌt poesheñarrotheyapaꞌ ama yentare. Ñeñthpaꞌ ñeñthchaꞌña yeñotaterreꞌ ñeñthchaꞌ ateth perra esempowañen. Allñapaꞌ all orrtena poesheñarr koyaneshaꞌ; añ poꞌkasheꞌm pen atsneꞌ. Paꞌrrphoñapaꞌ alloꞌtsen ñamha arrorr. Poñothñapaꞌ echoyoꞌmeth. Poꞌchoyoꞌmhopaꞌ all orrtena xharraꞌ ranto poechena epa. 2Ñeñthña koyanesharpaꞌ axhomen, oꞌ xhen allempoch eñalletatan poeꞌmar. Attho atsotenana poeꞌmarpaꞌ xha rranareꞌtena, atarr allpatateñ poeꞌmar. 3Allempoña all poeꞌntaño all orrtena poꞌpoñ ñamha ñeñth amaꞌt awathapaꞌ ama yentare. Ñeñthpaꞌ añ orrtetsa añyañ ñeñth atarr amhchaꞌnoxhen. Ñeñth añyañpaꞌ atarr añekmoen ñamha atarr tsamaꞌth orrtena. Poñpaꞌ kanxherrmhaga. Kanxherrmhagoꞌmar poñpaꞌ eꞌñe echoyoꞌmetharerocheꞌ. Ñamha poꞌwkorpaꞌ alloꞌtsen xharraꞌ. 4Paꞌsmeꞌll ñeñth chetareꞌtnen alloña tarraꞌwanenanña shonteꞌ rantoxhno eꞌñe aꞌshoreꞌtwaneñ patso. Ñeñth allpon ranto ñeñth entoꞌtsen, allpon aꞌshoreꞌtwareth ñeñth otenet la tercera parte. Ñeñthña añyañpaꞌ alla thomos eꞌñe koyaneshesho ñeñth atsotenaya poeꞌmar all koweñ ñerraꞌm oꞌch eñalletatan poeꞌmarpaꞌ ñach añyamphseꞌ. 5Allempoña koyaneshaꞌpaꞌ oꞌ eñalletatan poeꞌmar ñeñthpaꞌ asheñorr. Allempo eñalletwa ñeñth asheñorrothollpaꞌ eꞌñe allempokma aꞌtapachet Yompor poꞌkonaño tharroꞌmar ñapaꞌ ñach anarethterrtsa ñeñthchaꞌ amhchaꞌtarethterrtsa allowen paꞌnamen acheñeneshakop. Eꞌñech poꞌyoroxhenñoth amhchaꞌtarethterranet, ateth ñerraꞌmrratheꞌ ñapaꞌ aꞌsrepereth oꞌch amhchaꞌnoxhtanaꞌterranet. 6Allempoña koyaneshaꞌpaꞌ allorokma oꞌ yeta oꞌ xhap allaphar all amaratho. Allña Yomporpaꞌ eꞌñe kowen aññoꞌtatoñ allchaꞌ kowampeñet allchaꞌ rrateñet allponmat yeth ñeñth otenet mil doscientos sesenta yeth.

Attho kellarenet Yompor poeꞌntaño

7Allempoña kellarenet Yompor poeꞌntaño. Ñeñth paꞌmhchaꞌtarether pen allowen ñeñth eꞌñe kowen mellañotheñneshaꞌpaꞌ añ paꞌsoꞌcheñ Miguel. 8-9Miguelñapaꞌ all kellara poꞌmhllañotheñnanesharowen. Kellareñet añyañ, añyaññapaꞌ oꞌ kellara ñamha poeyochreshowen. Miguelpaꞌ chetannaꞌtet parro epoet añyañ all Yompor poeꞌntaño. Ñewa, ñeñth poeyochreshaꞌ pen añyañ ñeñthpaꞌxhoꞌña mellañotheñneshaꞌ tharraña ñeñth mellañotheñerpaꞌ ama kowenayaye. Tharraña añyañ attho kellaran Miguelpaꞌ ñapaꞌ ama gano. Ñeñthoꞌmarña añyañpaꞌ waporeꞌchet entoth poeyochreshowen aꞌshorarethterret patso. Atthothña awaporeꞌtarethtaña añyañ amaꞌt atarr nanak amhchaꞌnoxheneñ. Ñewa, añyañpaꞌ ñeñth shecheph awathotheñ ñeñthara yoten oneñeth ñamha ñeñth otenet Satanás ñeñth atarr ashkañtetsa ora errapharen añe patsro.

10Allempoña napaꞌ oꞌ alla neꞌmoerrerr poꞌpoñ ñoñets ñeñth atarr eꞌmorrtetsa womenk all Yompor poeꞌntaño. Ñeñth ñoñetspaꞌ ateth oten:

—Theꞌñapaꞌ poꞌñoxh oꞌ xhap allempoch keshphaꞌwerra allowen acheñeneshaꞌ ñeñth poeyochreshaꞌ pen Yompor, tharroꞌmar oꞌch alla oꞌpaterrana poꞌwamenk eꞌñe poktakma oꞌch alla amhchaꞌtarethterra ñapoeth epoet Poechemer ñeñth Cristo ñeñth nen ña ñeñthchaꞌ amhchaꞌtarethtapretenaya. Añ oneñeth ñeñth xhokma attha tomaꞌtampesyeneꞌ masheñneshaxhno all Yomporesho yetho amaꞌt ñamha tsapomeꞌtets ñeñthñapaꞌ oꞌ awaporeꞌtarethta. 11Ñeñth masheñneshaxhnor ñeñth ameꞌñenaya Yompor, ñetñapaꞌ oꞌ eꞌñe aꞌmchechweret oneñeth ñeñth tomaꞌtampesyenawet eꞌñe attha. Añ aꞌmchechaterreꞌ ñeñth attho Cristo rroma, ashatarethta poꞌrras ñeñth tomaꞌntenaya Carnero ñeñth moetseteꞌth ochñartsokop. Ñamha añ aꞌmchechaterreꞌ ñeñth attho masheñneshaxhno xhokma eñosyenet eꞌñe kowen ñeñth ateth pena Cristo poꞌkowenña. Amaꞌt amoeroxhtatarethetyenetpaꞌ ñetpaꞌ ama kexhpoeñeto attho eñosyenet eꞌñe kowen Cristokop, tharroꞌmar ñetpaꞌ ama mechaꞌteneto amaꞌt mamesha oꞌch rromoet eꞌñe pameꞌñeñothet Cristo. 12Atarr kosheñets Yompor poeꞌntaño allowenakop ñeñth alloꞌtsaꞌyen. Tharraña atarr llekëñets allowenakop ñeñth yexhaꞌyetsa añe patsro amaꞌt ñamha ñeñth oñoꞌtsaꞌyen. Tharroꞌmar oneñethpaꞌ oꞌ sowamperranet eꞌñe paꞌtsrreꞌmoeñeshaꞌ. Ñapaꞌ eñoteñ eꞌñech mameshapaꞌ oꞌch alla awaporeꞌtarethterrerr.

Attho añyañpaꞌ atthera kothareꞌtenan koyaneshaꞌ ñeñth oꞌ eñalletatwan poechoyor

13Allempoña añ añyañ ñeñthara oneñeth oꞌ eñota ñapaꞌ oꞌ awaporeꞌtarethta entoth, ña paꞌtsrreꞌmoeñothpaꞌ oꞌ alla kothareꞌterranerr koyaneshaꞌ ñeñth oꞌ eñalletatwan poechoyor asheñorrotholl. 14Tharraña koyaneshaꞌpaꞌ allempo kothareꞌtererr añyañpaꞌ ñeñthña koyaneshaꞌpaꞌ oꞌ apet eppaꞌya paꞌpoeꞌ ñeñth ateshaꞌ águila paꞌpoeꞌ. Ñeñthpaꞌ alloch anomamphsana poꞌyalloph ñeñthara añyañ oꞌch saꞌnemh oꞌch xhap bhaxhayo all amaratho all aññoꞌteññañet ñokop eꞌñe kowen allchaꞌ kowampeñet. Eꞌñech maꞌpa char ñamha poꞌpoñerrerr poeshmet char, ñeñthpaꞌ allponmatchaꞌ rrachet all. 15Allempoña añ poꞌyallophpaꞌ eꞌñe poenamoth xhaꞌnmatan shonteꞌ oñ ateth ñerraꞌmrratheꞌ poꞌñes apellchetsa. Ñapaꞌ xha otapañ ñeñthchaꞌ rremoerrayaꞌ koyaneshaꞌ ñeñth kothareꞌten atthoch aꞌñoꞌshach. Tharraña ñeñthpaꞌ ama atthetache. 16Amaꞌt patspaꞌ yenpan koyaneshaꞌ, atthoña taraꞌnom all eshaꞌtanña oñ eꞌñe masowa ñeñth allpon xhaꞌnmat poꞌyalloph poenamoth. 17Ñeñthña atarr atsrreꞌmateꞌña añyañ, ello alla atarr eꞌmoñeꞌterranerr koyaneshaꞌ. Allempoñapaꞌ awoꞌ alloꞌtsaꞌyen poꞌpotantañ koyaneshaꞌ poechoyoreshaꞌ oꞌch kellarosanet ñamet. Tharroꞌmar ñetpaꞌxhoꞌña xhokma ameꞌñeñet Yompor poꞌñoñ ñeñth ateth anareth ñamha xhokma kotheññañet Jesucristo pokthaphña.

Currently Selected:

El Apocalipsis 12: ame

Highlight

Copy