El Apocalipsis 11

Attho epsheña ñeñth poeyochreshaꞌ pen Paretspaꞌ ñetchaꞌña eñerrtset Yomporekop

1Allempoña napaꞌ apnet tepapets ñeñth atarr allpochaꞌph eꞌñe ateth ñerraꞌm karrots. Ñamha allpaꞌ ateth otnet:

—Theꞌpaꞌ oꞌch aweph oꞌch petpoeññañaꞌ Yompor paꞌpakëll allo, ñamha altar ñeñth alloꞌtsen. Ñamha oꞌch peꞌñotenaꞌ errosheñatheꞌ ñeñth maꞌyochetsa all. 2Tharraña amach petpamphsatscheña ñeñth aꞌyotheꞌtsaꞌyen chaꞌpetoth. Tharroꞌmar all ñetpaꞌ aparethtetchaꞌ poꞌpoñ acheñ ñeñth ama ameꞌñetso. Ñetñapaꞌ athmamaꞌterretchaꞌ all anetso ñeñth anareth Partsokop. Paꞌtatsoch xharramha poechena epmha arrorr allponmatchaꞌ aꞌsosyateñet all ñeñth anarethtetsa Partsokop. 3Ñamha allempopaꞌ oꞌch nemñe epsheña ñeñth neyochreshaꞌ nepen. Nach awamenkath phawet atthoch aꞌpothet ñeñthchaꞌ ateth perra esempowañen. Mil doscientos sesenta yeth allponmatchaꞌ serrpareꞌtennanet neñoñ. Poellkëñothet chorretchaꞌ paꞌshtamasheꞌm. Arrpaꞌ allowa ñeñth ateth otnet all Yompor poeꞌntaño.

4Ñewa, añ epsheñoꞌmar ñeñthchaꞌ eñerrets Yomporekop ñetpaꞌ atmaꞌntatarethtenet epcha olivoch ñamha epa all orratenet werare ñeñth eꞌñe thomxhets all Yomporesho, ñeñthara Yompor ñeñth pomnaren phoweneꞌ allowen acheñeneshaꞌ arr patsro. 5Ñamha añ epsheña ñeñthchaꞌ eñerrets Yomporekop, ñerraꞌm amaꞌt esesha ñeñth moeneneꞌ oꞌch erroth pet añ epsheña, ñetñapaꞌ poenamothpaꞌ oꞌch xhaꞌnmatet tsoꞌ worteꞌ ñeñthchaꞌ eꞌnweꞌ ñeñth eꞌmoñeꞌtenawet. Ñeñthoꞌmar yeñoteñ ñerraꞌm eseshaꞌ eꞌmoñeꞌtenawet, ñetñapaꞌ eꞌñech rromwet poktakma. 6Ñamha añ epsheña ñeñthchaꞌ eñerrets Yomporekop, ñetpaꞌ atarrchaꞌ awamenkathet. Eꞌñe ñet poꞌwamenkoth epatareꞌteñet oꞌ entoth atthothchaꞌ ama wateno eꞌñech allponmat eñorenet Yomporekop. Ñamha eꞌñe ñet poꞌwamenkoth oññapaꞌ oꞌch aꞌpnaseret errasats. Ñamha eꞌñe ñet poꞌwamenkothet oꞌch xhapaterret añ arr patsro paꞌnamen ñeñthchaꞌ amtsañterrtsa. Amaꞌt esempo allempo ateth moenenet ñet, allempokmach ateth pet. 7Tharraña ñerraꞌm esempoch eꞌñe eꞌnwet ñeñthchaꞌ allpon eñoret arr patsro, allempoñapaꞌ oꞌch xhaꞌnom ñamha ñeñth berrmaꞌthtetsa ñeñth atarr bellak. Arrothchaꞌ xhaꞌnom arrorothoth ñeñth atarr oꞌpononeth arrorothtena pats. Oꞌchña xhaꞌnompaꞌ oꞌch kellarosan añ ñeñth epsheña ñeñthchaꞌ eñerrets Yomporekop. Ñeñth berrmaꞌthtetsa ñachña ganatsa oꞌch moetsan añ ñeñth epsheña. 8-9Añña epsheña ñeñth amtsarethpaꞌ atthach oꞌshsheꞌmoet thoño allekma chopeñeꞌchen allowen acheñeneshaꞌ. Eꞌñe maꞌpamoet ñamha poꞌpoñ poeshmet yeth allach oꞌshsheꞌmoena all atarr anetso, ñeñthara anetser Jerusaléñ all korsoꞌtamphset Yepartseshar Jesucristo awath. Ñeñthña anetserpaꞌ ñatoꞌ oꞌch netmaꞌntacha ñerraꞌmrratheꞌ ñeñth ateth peteꞌth anetso Sodoma ñamha anetso Egipto. Añña epsheña ñeñth amtsareth atthach oꞌshsheꞌmoet all amach eseshaꞌ moenateto oꞌch pampoet. Allñapaꞌ allchaꞌ waxhena shonteꞌ paꞌnamen acheñeneshaꞌ ñeñthchaꞌ kowanrrorteneꞌ, shonteꞌ paꞌnamen mereñtsorexhno ñeñth eñosyets poꞌpoñeꞌttsokma ñoñtso. Shonteꞌ paꞌnamen anetsoxhno alloth waxhena. 10Acheñeneshaꞌ ñeñth yexhaꞌyetsa errapharen arr patsro ñetñapaꞌ oꞌch koshameꞌtampesyet añ epsheña arromñath. Atarrchaꞌ nanak kosherret. Poksheñeshothetña ñetpaꞌ oꞌch es apannaꞌtyeset eꞌñe attha. Ñetpaꞌ añekopchaꞌña atarr koshenet tharroꞌmar oꞌ rroma añ epsheña ñeñth atsrreꞌmoxhen entenet ñeñth yoreꞌtatenawet poꞌchñaret eꞌñe poeserrpareꞌteñothet Yompor poꞌñoñ. 11Allempoña oꞌch met maꞌpamoet ñamha poꞌpoñ poeshmet yeth, añña ñeñth epsheña machayothepaꞌtchaꞌ alla tanterret tharroꞌmar Yomporña alla tantaterreꞌ. Allowen acheñeneshaꞌ ñeñth kowanrrorteneꞌpaꞌ atarrepaꞌtchaꞌ nanak yorenet. 12Allempoña tanterret epsheñoꞌmaret, eꞌmoet ñoñets ñeñth eꞌmorrtetsa atarr womenk entoth. Ñoñetsñapaꞌ ateth otenanet:

—Saꞌtap arr ento.

Ñetñapaꞌ oꞌxhoꞌ aꞌtapoet, ospaꞌ ñeñthña anmawet ento. 13Kowanrrortets ñeñth eꞌmoñeꞌtenawetpaꞌ eꞌñe allempokmaña pella pats womenk. Allña anetsopaꞌ shonteꞌ matnaꞌt pokoll, allpon otenet la décima parte. Ñamha kanxherr mil acheñeneshaꞌ ñeñth allpon kollaꞌwatsa. Ñeñthña allpon keshphatsapaꞌ atarr yorenet. Poeyorñothetpaꞌ eꞌñe allempokma amhchaꞌnaꞌtpoꞌ eñchet Yompor ñeñth poeꞌntañoꞌtsen. Allñapaꞌ kowentatoñet.

14Allempopaꞌ oꞌ metwaña ñeñth poepañ ñeñth allkatañtetsa, tharraña señochepaꞌch palltena poꞌpoñ patherr ñeñthchaꞌ thekma allkatañtatsa ñeñthchaꞌ poemaꞌpañ.

Allempoch poktoraꞌwerr mellañotheñ eꞌñe allowanen allempochña amhchaꞌtarethetwerra Yompor arr patsro

15Allempoña poꞌpsheñeñ mellañotheñ ñeñth poꞌkanxhrroñpaꞌ oꞌ poktorerrerr ñamha. Poktoraꞌwerrtserrpaꞌ entoñapaꞌ atarr womenk eꞌmorrterrerr ñeñth eñoretsa all ento. Ñeñthpaꞌ ateth otenet:

Ñeñth allpon amhchaꞌtarethetyetsa arr patsro theꞌñapaꞌ oꞌwañchaꞌ alloꞌna amhchaꞌtarethetnenet tharroꞌmar ñeñth attho amhchaꞌtarethetyenetpaꞌ ñeñthpaꞌ allochña amhchaꞌtarethterra Yompor epoet ñamha Poechemer ñeñth Cristo. Ñeñthchaꞌ attho amhchaꞌtarethterra Yomporpaꞌ ñeñthpaꞌ amach awañañathterro amaꞌt errponaña.

16Allempoña añ ñeñth epoch xharrasheña ñeñth poechetsa paꞌtats ñeñth anorrxhets all eꞌñe ñet poꞌkonañeto alloth sherbeñet Yompor all poeꞌntaño, ñetñapaꞌ rremaꞌrrartenet Yomporeshoneth ateth maꞌyocheñet Yompor. 17Ñetñapaꞌ ateth otenet:

Pha Yompore ñeñtheph atarr nanak Partsoph ñeñtheph Yepartseshar yepeneph, ñeñtheph xhokma eñalleph amaꞌt awathotheñ ñamha ñeñthephchaꞌ alla werrtserr poꞌpocheño añe patsro, yañapaꞌ atarr yeparasyosoꞌteneph tharroꞌmar theꞌpaꞌ oꞌch alla phoꞌpaterra pha pewamenk atthothchaꞌ oꞌch alla atarr phaꞌmhchaꞌtarethterra.

18Shonteꞌ paꞌnamen acheñeneshaꞌ, paꞌnamen anets alloꞌtsaꞌyenet, ñet paꞌtsrreꞌmoeñothetpaꞌ eꞌñe eꞌmoñeꞌtwenpet, tharraña theꞌpaꞌ oꞌ xhap allempoch pekoñchatwerranet. Ñamha theꞌpaꞌ oꞌ xhap allempo onañchareth añekop ñeñth kollaꞌwetsa awathotheñ allempoch peñotatwerranet ñeñth ateth phaꞌyeseteꞌth. Añña ñeñth thorraꞌyestseꞌth attho aꞌmhtonapeteꞌth peñoñ ñeñth eꞌñe peyochreshaꞌ pepeꞌth, theꞌñapaꞌ oꞌ xhap allempoch petsaꞌtwerranet. Amaꞌt allowen ñeñth phameꞌñayeꞌth pha amaꞌt ñeñth atarr asherben entyeseteꞌth ñamha ñeñth ama asherben enteteꞌthe, theꞌñapaꞌ oꞌ xhap allempoch petsaꞌtwerranet allowenet ñeñth phameꞌñenaya pha. Ñamha theꞌpaꞌ oꞌ xhap allempoch eꞌñe phaꞌchenkatwer allowen ñeñth aꞌchenkatañtetsa añe patsro.

19Allempoña añ Yompor paꞌpakëll ñeñth entoꞌtsenpaꞌ eꞌñe kowen atorarethtena. Oꞌponoña all nentoñ Yompor poꞌtsapot all xhokma aññoꞌtenet ñeñth akellkareth ñeñth aꞌpoktat Yompor yokop. Allñapaꞌ meratstena, tatsllaren maꞌmoreten womenk, pellena pats ñamha ateth wechen womenk.

Currently Selected:

El Apocalipsis 11: ame

Highlight

Copy