San Mateo 23

Attho Jesúspaꞌ aꞌmethareꞌtenan fariseoneshaꞌ ñeñth ateth yexhenet ñetpaꞌ ñeñthpaꞌ ama kowenayeꞌ entapretenaneto Yompor

(Mr. 12.38-40; Lc. 11.37-54; 20.45-47)

1Allempoña Jesúspaꞌ alla serrpareꞌtaterran allowen acheñeneshaꞌ ñamha eꞌñe ña poeyochreshaxhno. Ñeñthpaꞌ ateth otanet:

2—Añña fariseoneshaꞌ epoet ñamha ñeñth atarr etsotayeneꞌ ñoñets ñeñth ateth anareth, ñetpaꞌ añekpa anarethtenet ñetchaꞌ señotateneꞌ ñoñets ñeñth ateth nonaseꞌth Moisés awath. 3Ñeñthoꞌmarña sokoppaꞌ eꞌñe pokteꞌ oꞌch sephowena ñeñth ateth otenset, amachña xhaña sathpareꞌteñe. Tharraña sapaꞌ amachña ateth sephatsto ñeñth ateth phatseꞌtyenet ñet. Tharroꞌmar amaꞌt atarr kowen serrpareꞌtenetañpaꞌ amakaꞌyeña eꞌñeyeꞌ ateth peneto ñeñth ateth serrpareꞌtatenset. 4Ñetpaꞌ xhakaꞌye atarr atontatennasetña ñoñets ñeñthchaꞌ eꞌñe ateth sephoweneñ ñetpaꞌ ñeñthakaꞌyeña nennaset ñeñth atarr thorrapoꞌ sentyen. Ñeñthpaꞌ atethchaꞌ netmaꞌntacha ñetpaꞌ xhakaꞌye ottenet ñerraꞌmrratheꞌ añ wankënnaset ñeñth atarr eñerr seꞌmoen atthoch sechechnomh. Tharraña ñet amaꞌt mameshapaꞌ amaña anmapretenseto, amaꞌt potaphothetapaꞌ ama echantapretnenseto ñeñth chechatnenset. 5Fariseoneshaꞌ allowen ñeñth ateth etsotayeneñpaꞌ ñeñthpaꞌ eꞌñe pommoꞌcheñotheta ateth penet allochñapaꞌ acheñeneshaꞌñapaꞌ eꞌñech kowen entyeñet ñeñth attho atarr thorraꞌyenetañ Yomporekop. Tharraña ñeñthpaꞌ eꞌñekaꞌye orrena. Ñamha ñetpaꞌ xhakaꞌye ateshatomoerrtatenet poremh allñapaꞌ all kellkëññañetañ Yompor poꞌñoñ amaꞌt ñeñthpaꞌxhoꞌña allokaꞌyeña wankatoꞌtenet. Tharraña ñeñthpaꞌ eꞌñe añekpa ateth penet atthoch acheñeneshaꞌpaꞌ eꞌñech kowen entenanet. Tharraña ñeñthpaꞌ eꞌñe orrena ateth penet ñeñth attho ommoꞌchenet. Ñamha ñetpaꞌ añeꞌnakaꞌyeña allpochaꞌphtatenet ñeñth xheraꞌrrtenet paꞌshtamoeto paꞌrrpeꞌmoneth. Tharraña ñeñthpaꞌxhoꞌña eꞌñe añekpa ateth penet eꞌñe pommoꞌcheñothet. 6Ñamha ñetpaꞌ ñerraꞌm xho rrallmeꞌchapretenetpaꞌ añakaꞌye atarr moenenet oꞌch anorrxhaꞌtyenet allekma anorryen ñeñth atarr amhchaꞌnaꞌtpoꞌ entyen allowen acheñeneshaꞌ. Ñamha ñetpaꞌ eꞌñe atthekma penet amaꞌt all judioneshaꞌ poꞌprawo. 7Ñamha ñetpaꞌ eꞌñe pommoꞌcheñothet añeꞌnaña atarr moenenet acheñeneshaꞌpaꞌ oꞌch womhchaꞌtyesapanet poeꞌmhchaꞌnañothet ñerraꞌm esempo chopeñeꞌchyenet thoñoꞌmar allekma shontena acheñeneshaꞌ. Ñamha pommoꞌcheñothetpaꞌ añeꞌnaña atarr moenenet oꞌch otanet acheñeneshaꞌ ñetpaꞌ eꞌñoꞌ partsesharerochet.

8‘Tharraña sayeꞌña neyochreshachaꞌ ñatoꞌtña semnenaꞌña oꞌch otas acheñeneshaꞌ sapaꞌ eꞌñoꞌ partseshareroches. Ñamha sa allowenespaꞌ eꞌñechña semoꞌnasheñekma sephannena, tharroꞌmar sa allowenakpaspaꞌ napthakaꞌyeña Separtseshar sepenen na ñeñthen Cristotosets. 9Ñamha arr patsro amaꞌt poesheñarra amach seyomporer sephatstaneto. Tharroꞌmar sapaꞌ eꞌñekaꞌye pathrraña Sompor ñeñth poeꞌntañoꞌtsen. 10Ñamha sapaꞌ amach semnatsche amaꞌt poesheñarra eꞌñe poexhoreꞌteñothetaspaꞌ oꞌch otaset: Naꞌyochretherneshachaꞌ. Tharroꞌmar sa allowenakpaspaꞌ napthakaꞌyeña Saꞌyochreshather sepenen na ñeñthen Cristotosets. 11Tharroꞌmar ñeñth poꞌñoxh kowen amhchaꞌtarethtetsa sesho ñeñthpaꞌ ñeñthkaꞌyeña atarr thorretsaña poꞌpotantañekop atthoch orrtatanet ñeñth atarr sherbets ñokpoet. 12Tharroꞌmar allowen ñeñth eꞌñe kowen entetsa eꞌñe pommoꞌcheñoth ñeñthña tsapathonethpaꞌ amach esosheꞌmayeꞌ entereto. Tharraña allowen ñeñth ama esosheꞌmayeꞌ entetso theꞌ ñeñthña tsapathonethpaꞌ atarrchaꞌ kowen enteret.

13‘Atarr nanak llekëñtsoꞌtsenes fariseoneshachaꞌ ñamha samha ñeñthes eꞌñe etsotayenayeñ ñoñets ñeñth ateth anareth judioneshakop tharroꞌmar sapaꞌ sommoꞌcheñotheꞌna atarr seshkareꞌtyen. Tharroꞌmar amaꞌt sapaꞌ amakaꞌye senteññañeña Yompor poꞌkowenña, ellonethpaꞌxhoꞌña xhokma sepatareꞌteñña poꞌpotantañ ñeñth eꞌneneꞌ Yompor poꞌkowenña. Xha saꞌnpampeñña acheñeneshaꞌ atthoch ñetpaꞌxhoꞌña amach enterrñañeto Yompor poꞌkowenña ñeñth attho atarr ayochreshathtena ña poeꞌntañoth.

14‘Atarr nanak llekëñtsoꞌtsenes fariseoneshachaꞌ ñamha samha ñeñthes eꞌñe etsotayenayeñ ñoñets ñeñth ateth anareth judioneshakop, tharroꞌmar sapaꞌ sommoꞌcheñotheꞌna seshkareꞌtyeñ. Amaꞌt rrethorrnaneshaꞌpaꞌ ñeñtheꞌnaña seprratampesyenña paꞌpakëll. Elloña eꞌñe sommoꞌcheñothpaꞌ aña atarr semnen oꞌch ateth sepena ñerraꞌm atarr kowen acheñres ñeñthoꞌmarña all semaꞌyochena allekma shontena acheñeneshaꞌpaꞌ amach thematenayaya semaꞌyocheno. Ñeñthoꞌmarña na theꞌpaꞌ oꞌch notas, sapaꞌ elloña atarrchaꞌ saꞌkoñchatarethterra.

15‘Atarr nanak llekëñtsoꞌtsenes fariseoneshachaꞌ ñamha samha ñeñthes eꞌñe etsotayenayeñ ñoñets ñeñth ateth anareth tharroꞌmar sapaꞌ sommoꞌcheñotheꞌna atarr seshkareꞌtyen. Sapaꞌ xhokma sechopeñeꞌchyen errakmañen patsoꞌmar, sephchatyena amaꞌt ñamha saꞌpoꞌmar. Ñeñthpaꞌ añekpa ateth sepena atthoch sameꞌñatyesya amaꞌt eꞌñe poesheñaꞌttsa eꞌñe sa sokthaphña ñeñthes judioneshas. Ñeñth allpon sameꞌñatyenapaꞌ ñetñapaꞌ aña seyxhatyenanet ñeñth ama kowenayaye ñeñth eꞌñe ateth sepena samha. Ñeñthoꞌmar ñetpaꞌxhoꞌña ello atarr nanak oꞌpatatarethtenet koñcheñets, eꞌñe epocheꞌttsokma soꞌpatatenanet koñcheñets.

16‘Atarr nanak llekëñtsoꞌtsenes tharroꞌmar amaꞌt ñeñth ama sexhenoyo seyoxhro sañapaꞌ ñeñthara seyxhateñña poꞌpotantañexhno. Ñeñthpaꞌ eꞌñe ateth sepena ñerraꞌmrratheꞌ aporoꞌyethekmas echaꞌnmannetsa. Amaꞌt seyxhateneñ ñeñth poꞌñoxhpaꞌ amakaꞌye attheyaye. Ñeñthpaꞌ ateth soteneñ: “Ñerraꞌm eseshaꞌ neneꞌ poꞌñoñ ñerraꞌm aña Parets paꞌpakëll paꞌsoꞌchño nenan poꞌñoñ saña ñeñthpaꞌ xha soten añoꞌ esoyaye ama pallteno oꞌch eꞌñe poꞌñoxh aꞌpoktatan poꞌñoñ.” Tharraña poꞌpoñpaꞌ ateth soteneñ: “Ñerraꞌmña añ oro paꞌsoꞌchño yenaꞌ yeñoñ ñeñth Parets paꞌpaklloꞌtsen allempoña poꞌñoxhpaꞌ xhokmach eꞌñe yaꞌpoktat yeñoñ.” 17Sapaꞌ atarr otatsñathes, ama añeyeꞌña sexhenoyoña seyoxhro ñeñth kowen enten Yompor. Xhakaꞌye sottena ñerraꞌmrratheꞌ aporoꞌyethekmas. Amaꞌt señoteñeña ateth sherben oropaꞌ eꞌñekaꞌye atthekma sherbenña ñamha Parets paꞌpakëll. Tharroꞌmar allempo neteꞌth oro Parets paꞌpakllo, ñeñthña oropaꞌ añkaꞌye eꞌñe kowen aꞌpoktatayeꞌth Partsokop ñeñthara Partsopoꞌ. 18Ñamha poꞌpoñpaꞌ ateth soteneñ: “Ñerraꞌm eseshaꞌ neneꞌ poꞌñoñ eꞌñe altar paꞌsoꞌchño allekma neñet ñeñth amtsarethtetsa Yomporekop, ñeñthpaꞌxhoꞌña xha soten añoꞌ esoyaye, ama pallteno oꞌch eꞌñe poꞌñoxh aꞌpoktatan poꞌñoñ.” Tharraña poꞌpoñpaꞌ ateth soteneñ: “Ñerraꞌmña añ paꞌsoꞌchño yenaꞌ yeñoñ ñeñth amtsarethtetsa Yomporekop ñeñth nenet altaro enoth, allempoña poꞌñoxhpaꞌ xhokmach eꞌñe yaꞌpoktat yeñoñ.” Tharraña amaꞌt ateth sotatseꞌtyeneñpaꞌ ñeñthpaꞌ amakaꞌye poꞌñoxhoyaye. 19Sapaꞌ ama añeyeꞌ sexhenoyoña seyoxhro ñeñth kowen enten Yompor. Xha sottena ñerraꞌmrratheꞌ aporoꞌyethekmas. Amaꞌt señoteñeña altarpaꞌxhoꞌña atarrkaꞌye sherben. Eꞌñe atthekma sherben ñerraꞌmrratheꞌ ñeñth amtsarethtetsa Yomporekop ñeñth nenet all altarro enoth. Tharroꞌmar altarpaꞌ ñeñthkaꞌyeña aꞌpoktateneꞌña Yomporekop ñeñth nenet all. 20Ñeñthoꞌmarña yeñoteñ ñerraꞌm esempo yenen yeñoñ altar paꞌsoꞌchño, ama eꞌñe ñaptha altar paꞌsoꞌchño yenenoña yeñoñ; añowenkaꞌyeña yenenña yeñoñ eꞌñe paꞌsoꞌchño allowen ñeñth naꞌyenet all, allekma sherbhaꞌyenet Yompor. 21Ñamha ñerraꞌm esempo yenen yeñoñ Partsopoꞌ paꞌsoꞌchño, ama eꞌñe ñaptha Partsopoꞌ paꞌsoꞌchño yenenoña yeñoñ. Yomporeꞌnakaꞌyeña paꞌsoꞌchño yenenña yeñoñ tharroꞌmar ñapaꞌ eꞌñekaꞌye ño paꞌpakëll. 22Ñamha ñerraꞌm yenen yeñoñ Yompor poeꞌntañ paꞌsoꞌchño, Yomporeꞌnakaꞌye paꞌsoꞌchño yenenña yeñoñ amaꞌt ñamha Yompor poꞌkonañeꞌnakaꞌye paꞌsoꞌchño yenenña yeñoñ tharroꞌmar enetpaꞌ Yomporkaꞌye poꞌkonañ peneꞌ tharroꞌmar allpaꞌ alloꞌtsenkaꞌyeña Yompor.

23‘Atarr nanak llekëñtsoꞌtsenes fariseoneshachaꞌ ñamha sa ñeñthes eꞌñe etsotayenayeñ ñoñets ñeñth ateth anareth judioneshakop tharroꞌmar sapaꞌ sommoꞌcheñotheꞌna atarr seshkareꞌtyen. Ora allowen ñeñth senaremh sepen amaꞌt xhokma sapoeñeñ Yompor allpon ñeñth poktetsa ñokop —mentapan, anísopan, cominopan— sapaꞌ xha sepsenña ñeñth ñoñtsor ñeñth ateth anareth ñeñthkaꞌyeña ello nanak sherbets. Ñeñthpaꞌ atthoch eꞌñe kowen es sephaꞌyeññañ poꞌpotantañ. Ñeñthña sapaꞌ xhaña sepseñ. Ñamha atthoch semoerannaꞌta ñeñthpaꞌxhoꞌña sañapaꞌ xhakaꞌyeña sepseñ. Ñamha atthoch poꞌñoxh eꞌñe kowen sameꞌñañathtena Yomporekop ñeñthpaꞌxhoꞌña sañapaꞌ xhakaꞌyeña sepseñ. Sapaꞌ eꞌñe ñeñthaña sepalltena. Ñamha attho xhokma es sapaꞌyen Yomporekop ñeñthpaꞌxhoꞌña xhokmach ateth sepena amach xha sepsatstere. 24Sapaꞌ amaꞌt ama xhoyeꞌ xhennaso seyoxhro ñeñtha atarr semneñ oꞌch seyxhach poꞌpotantañ acheñeneshaꞌ. Ñeñthpaꞌ eꞌñe ateth sepena ñerraꞌmrratheꞌ aporoꞌyethekmas echaꞌnmannetsa. Añ ñoñets ñeñth ateth anareth sokop ñeñth setseten eꞌñe soꞌna sokthaphña amaꞌt ñeñthpaꞌ atarr koñeꞌthoth sherben Yomporekop, sañapaꞌ ñeñthakaꞌye atarr semneñ oꞌch seyxhateñ poꞌpotantañ. Tharraña añ ñoñtsor ñeñth atarr nanak sherbets Yomporekop, saña ñeñthpaꞌ ama xhennasoña seyoxhro amaꞌt eꞌñe mamesha. Ñeñthpaꞌ oꞌch netmaꞌntacha ateth ñerraꞌmrratheꞌ ñeñth atarr es añetholl allpon ñerraꞌm xhopoꞌyetholl saña ñeñthpaꞌ xhakaꞌyeña seyorasoteñ tharraña ñeñthña atarr añekmoen allpon ñerraꞌm wakësh#23.24 Ñewa, Jesús añ tomaꞌntatanet camello ñeñth payara penet all paꞌnyo, ñeñth eꞌñe allpon ñerraꞌmrratheꞌ wakësh. sapaꞌ ñeñthaña sañyen eꞌñe attha.

25‘Atarr nanak llekëñtsoꞌtsenes fariseoneshachaꞌ ñamha sa ñeñthes eꞌñe etsotayenayeñ ñoñets ñeñth ateth anareth judioneshakop. Sapaꞌ eꞌñe seꞌpameꞌteneñña setaza enothpaꞌ oꞌponothñapaꞌ ama seꞌparroꞌteñe. Seplatopaꞌxhoꞌña enotha eꞌñe seꞌpataꞌteñ oꞌponothñapaꞌ ama seꞌpataꞌteñe. Eꞌñe ateth sepena samha. Eꞌñe saꞌkowentatena ñeñth enoꞌmar ñeñth ateth seyxhena sa allochñapaꞌ atthoch entenes allowen acheñeneshaꞌ sapaꞌ eꞌñoꞌ kowenes, tharraña oꞌpono seyoxhropaꞌ amakaꞌyeña saꞌkowentateñe, allñapaꞌ eꞌñe chorren shonteꞌ sosyaꞌtsañexhno ñeñth attho eꞌñe seshkëñotheꞌna xhokma es seprratampesyen, atarr es seyeꞌchapretannena, ñeñthñapaꞌ eꞌñekaꞌye sokpa. 26Ñeñthes fariseoneshas, sapaꞌ ama añeyeꞌ sexhenoyoña seyoxhro ñeñth kowen enten Yompor. Xhakaꞌye sottena ñerraꞌmrratheꞌ eꞌñe aporoꞌyethekmas. Sokoppaꞌ añkaꞌyeña poktetsa, ñanomchaꞌña oꞌponoth seꞌpameꞌtña setaza, seplatopaꞌxhoꞌña ñanomchaꞌña oꞌponoth seꞌpatach. Allochñapaꞌ oꞌch eꞌñe kowenta emoshemhtoꞌmar.

27‘Atarr nanak llekëntsoꞌtsenes fariseoneshachaꞌ ñamha sa ñeñthes eꞌñe etsotayenayeñ ñoñets ñeñth ateth anareth judioneshakop. Sapaꞌ eꞌñe atthes ñerraꞌm apampaña ñeñth aꞌwallamaꞌthtampenet. Enothpaꞌ eꞌñech kowen orrtenañ. Oꞌponothñapaꞌ eꞌñech chorren arromñathap ñamha paꞌnamen ñeñth nanak sosey. 28Sapaꞌxhoꞌña eꞌñerramcheꞌ atthesña samha. Poꞌñoxhkaꞌye ñeñth ateth sorrtatyen acheñeneshaꞌñapaꞌ eꞌñe ateth entenset ñerraꞌmrratheꞌ sapaꞌ eꞌñe kowenareꞌ es sephaꞌyen. Tharraña oꞌponoña seyoxhropaꞌ eꞌñe aña shontetsa alloch sommoꞌchyena, atarr seshkareꞌtannaꞌtyena, paꞌnamen sorrtatyen ñeñth amaꞌt mamesha ama kowenayeꞌ entapretenso Yompor.

29‘Atarr nanak llekëñtsoꞌtsenes fariseoneshachaꞌ ñamha sa ñeñthes eꞌñe etsotayenayeñ ñoñets ñeñth ateth anareth judioneshakop tharroꞌmar sa theꞌpaꞌ sathomaten enoth ñeñth atarr kowen senten sa all pampaꞌyeseteꞌth ñeñth aꞌmhtaꞌyesayeꞌth Yompor poꞌñoñ. Ñamha añeꞌna saꞌkowentampesyen all pampaꞌyeseteꞌth ñeñth acheñeneshar ñeñth eꞌñe pokteꞌ es phaꞌyeseteꞌth. 30Saña theꞌpaꞌ ateth sotyeneñ: “Ñerraꞌm allempokmach yeꞌñalletañ allempo korreꞌth yatañneshañ, attho ñetpaꞌ moetsanacheteꞌth ñeñth aꞌmhtaꞌyesayeꞌth Yompor poꞌñoñ, yañapaꞌ amatheꞌ esoꞌmar yemtsapretaneto.” 31Ñeñth ateth sotyeneñpaꞌ theꞌña eꞌñe sa señoñothpaꞌ oꞌ saꞌmethamphsa eꞌñe sañeña poꞌñoxh sapaꞌ poꞌmhrenñeskaꞌye ñeñth moetsanatayeꞌth awath ñeñth aꞌmhtaꞌyesayeꞌth Yompor poꞌñoñ. 32Ñeñthoꞌmarña sa theꞌpaꞌ ñeñthakaꞌyeña eꞌñe setsoteññañ satañneshañ ñeñth allpon sosyaꞌtsañexhno ñeñth eꞌñe mothetnomnas awathotheñ eꞌñe sa satañneshañ.

33‘Sapaꞌ ama kowenayayso atarr ashkarñathes, xha sottena ñerraꞌmrratheꞌ shechpha sompor sepen. Sapaꞌ errothenowachñakaꞌyeña sekeshperratheꞌ. Sapaꞌ añakaꞌye soꞌpatenaya koñcheñets ñeñth parrareꞌ tsoꞌ all oꞌpono. 34Ñeñthoꞌmarña theꞌ napaꞌ oꞌch nemñerrnas ñeñthchaꞌ aꞌmhtaꞌyerreꞌ neñoñ, ñamha ñeñth atarr eñotañ nephaꞌyen, ñamha ñeñth atarr etsotayeneꞌ neñoñ ñeñth ateth anareth awathotheñ. Tharraña saña ñeñthpaꞌ xhachkaꞌyeña semtsanatwerrnan ñeñth patantaꞌtets, poꞌpotantaññapaꞌ eꞌñech sekorsoꞌtampeswerrnan. Poꞌpotantañña sapaꞌ xhach senalleꞌtyeswerrnan eꞌñe all sa seprawoꞌmar. Atarr seꞌmoñeꞌtenanet ñeñthoꞌmarña xhokma sokthareꞌtenanet anetsoth oꞌch saꞌyetatwanet ñetñapaꞌ oꞌch awanemyeset poꞌpoñ anetsoꞌmar. 35Atthokaꞌyeña ora allowen ñeñth eꞌñe pokteꞌ es phaꞌyestseꞌth ñeñth amtsanatyesarethtatseꞌth ashatarethetyeseteꞌth poꞌrras, sañapaꞌ allempotheñ eꞌñe saꞌyowarethtena amaꞌt themeꞌttsen, sa ñeñthes korretsa theꞌ, amaꞌt allempotheñ amtsarethta Abel ñeñth ama es yexhkatetso amaꞌt koñeꞌtha tharrempowa allempo semtser ñamha Zacarías ñeñth Berequías poechemer. Ñeñthña sapaꞌ alla semtser Parets poꞌponro poechaꞌpetaroth alloꞌtsen altar allothekma sherbeteꞌth Yompor. Amaꞌt allowen ñeñth amtsanatyesarethtatseꞌth allempo sañapaꞌ eꞌñe allempotheñ saꞌyowarethterra. 36Poꞌñoxhkaꞌye notenes, acheñeneshaꞌ ñeñth korretsa theꞌ ñetñapaꞌ atsaꞌtatarethterretchaꞌ eꞌñe ora allpon atserrphatseꞌtyesoneteꞌth ñeñth eꞌñe pokteꞌ es phaꞌyestseꞌth Yomporekop.

Attho Jesúspaꞌ poellkëñothan jerusaléñoꞌmarneshaꞌ atarr yaꞌnaꞌtosanet

(Lc. 13.34-35)

37‘Theꞌpaꞌ eꞌñe nellkëñoth oꞌch notas sa ñeñthes jerusaléñoꞌmarneshas, ñeñthes moetsanatyesayeꞌth ñeñth aꞌmhtaꞌyesayeꞌth Yompor poꞌñoñ, sa ñeñthes rrollapechyesayeꞌth ñeñth amñarethtatseꞌth sesho, theꞌña napaꞌ oꞌch notas: Napaꞌ atarr atonocheꞌtats nemneñeñ oꞌch naꞌyapaxhaꞌwerrsoñ allowenes nesho atthoch eꞌñe kowen nekwampensoñ. Nemneñeñ oꞌch naꞌyapaxhaꞌwerres ateth ñerraꞌmrratheꞌ atollop aꞌyapaxheneꞌ poechoyoreshaꞌ oꞌch eꞌñe setoꞌtwanet. Tharraña sañapaꞌ amaꞌt eꞌñe mameshapaꞌ amaña semno. 38Theꞌñapaꞌ all seyxhena sa, Yomporñapaꞌ oꞌch aꞌypoꞌñerres. 39Tharroꞌmar theꞌpaꞌ oꞌch alla noterrserr: Na poꞌpocheñopaꞌ amach alla senterrneꞌthe. Esempowañenñapaꞌ senterrenchaꞌ, allempoñapaꞌ atethchaꞌ soterren: “Ayeꞌchoxhtatpawepaꞌch Jesucristo ñeñth wapatsa ñeñth llesensen Yeyomporer.”

Currently Selected:

San Mateo 23: ame

Highlight

Copy