San Mateo 24

Attho Jesúspaꞌ eñotatanet eꞌñech aꞌmataꞌtarethetwerra Partsopoꞌ all Jerusaléño

(Mr. 13.1-2; Lc. 21.5-6)

1Jesúsñapaꞌ xhaꞌnerrerr Parets paꞌpaklloth. Alla awenerr allempoñapaꞌ ponemhya poeyochreshaꞌ. Ñetñapaꞌ allentha kowatyeset ñeñth atarr koxhneshaꞌtyetsa allo orratarethtena Partsopoꞌ. 2Allempo Jesúspaꞌ ateth otanet:

—Amaꞌt senteñeñ ora allowen ñeñth koxhneshareꞌ tharraña napaꞌ oꞌch notas: Poꞌñoxhkaꞌye xherrchaꞌ allempoch eꞌñe aꞌmataꞌtarethetwerra. Amaꞌt eꞌñe poemharra mapyetpaꞌ amach aꞌpoerroña all allo orratenet Partsopoꞌ eꞌñechkaꞌye poktakma aꞌkoyeꞌtarethetwerra.

Attho Jesúspaꞌ eñotatanet shonteꞌch entyerret paꞌnamen ñeñthchaꞌ eñotaterrawet oꞌ xherrmoch allempoch mellapoterra

(Mr. 13.3-23; Lc. 21.7-24; 17.22-24)

3Ñeñtha otwanenanetpaꞌ allentha awen Olivophno. Allñapaꞌ anorrwen, poeyochreshaꞌñapaꞌ oꞌ alla waxherrñañeterr, eꞌñe ñapthochayet. Ñetñapaꞌ ateth otwereterr:

—Yapaꞌ yemneñkaꞌye oꞌch photey ¿esempoꞌtchaꞌña ateth perra? Ñamha ¿esoꞌtchaꞌ yentyerrña ñeñthchaꞌ yeñotaterreꞌ allempoch pewerrmocha oꞌch mellapoterra?

4Jesúsñapaꞌ ateth otanet:

—Eꞌñech señoterra, allochñapaꞌ amach eseshaꞌ seshkërraye. 5Tharroꞌmar shonteꞌch orrterrtsa ñeñthchaꞌ ayxhaꞌnataterreꞌ nesoꞌcheñ, ñeñthchaꞌ otyerrets: “Napaꞌ ñeñthenkaꞌyeña Cristotets.” Ñetñapaꞌ shonteꞌch shekëret acheñeneshaꞌ. 6Ñamha allempoña sapaꞌ seꞌmareꞌtyerrchaꞌ oꞌ kellareñtsotyerr allampañoꞌmar, ñamha seꞌmareꞌtyerrchaꞌ oꞌ kellareñtsotyerra ora errapharen anetsoꞌmar. Saña allempopaꞌ amach xha seyorenatsto amaꞌt eꞌñe mamesha. Ñeñthpaꞌ atethchaꞌkaꞌye eꞌñe poꞌñoxh perra. Tharraña allempopaꞌ amach xhenaꞌ allempoch eꞌñe mellapoterra. 7Paꞌnamen acheñ ñeñth eꞌñe poꞌpoñeꞌttsokma mereñtsoretpaꞌ ñetpaꞌ kellarannaꞌterretchaꞌ. Ñamha paꞌnamen anetsoth amhchaꞌtarethexhnopaꞌ kellaraterranchaꞌ poeyochreneshaxhno. Orrterrach allemeñ moexheñets oꞌch eꞌñe chaporrñatsotyerr errapharen. Ñamha orrterrach paꞌnamen atsnañtsoxhno ñeñth atarr apatannaꞌtpoꞌ. Pellaꞌyerrach pats ora errapharen. 8Ñeñth ateth oꞌ notwas theꞌpaꞌ ñeñthña allempopaꞌ ñeñthchaꞌña ñanom moeroxhtaterrawetña allempo.

9‘Allempoña sapaꞌ pomoerrsetchaꞌ atthoch errothwanen perrset allchaꞌña moetsatyerrset. Atarrchaꞌ eꞌmoñeꞌterres allowen acheñeneshaxhno tharroꞌmar sapaꞌ nakaꞌyeña eꞌñe sameꞌñena. 10Ñamha shonteꞌch acheñ allempo ñeñthchaꞌ kexhpoerreꞌ Yompor. Eꞌñe ñagattsetapaꞌ eꞌmoñeꞌtannaꞌterretchaꞌ atthothchaꞌ pomatatannaꞌtyerret. 11Ñamha allempopaꞌ orretyerrach shonteꞌ ñeñthchaꞌ ayxhaꞌnaterrtsa ñetpaꞌ añoꞌ aꞌmhtenet Yompor poꞌñoñ. Tharraña poꞌñoxh amach Yomporeyeꞌ poꞌñoñ aꞌmhterreto, ñetpaꞌ atthachña shekëretña shonteꞌ acheñeneshaꞌ. 12Allempopaꞌ atonterrach errapharen paꞌnamen sosyaꞌtsañexhno allochña atarr athpareꞌterrñañet Yompor poꞌñoñ. Ñeñthoꞌmarña shonteꞌ acheñpaꞌ oꞌwañchaꞌ alloꞌna morrentannaꞌtnenet. 13Tharraña amaꞌtchaꞌ errothwanen apharethterret, eseshaꞌch eꞌñe awantaꞌwanmoeꞌ ñeñthchaꞌ ama nekexhpoerraye, ñeñthñapaꞌ ñeñthchaꞌña aꞌkeshphatarethterrtsa. 14Ñamha allempopaꞌ añ kowen ñoñets attho ayochreshathtena Yompor ñeñthchaꞌña ñanom serrpareꞌtatyeretña acheñeneshaꞌ ora errapharen allowanen añe patsro. Atthochña eñotateretña ora allowen paꞌnamen acheñeneshaꞌ ñeñth poꞌñoxh ateth oteney Yompor. Allempochña poꞌñoxh mellapoterra.

15‘Ñewa, awath Daniel ñeñth aꞌmhtayeꞌth Yompor poꞌñoñ, ña poꞌkellkopaꞌ ateth oteꞌth: “Xherrchaꞌ allempo amaꞌt ñeñth ama masosyayeꞌ enteno Yomporpaꞌ ñeñthñapaꞌ xherrchaꞌ all amaꞌt ñeñth eꞌñe Partsokpa anaretheñ. Ñeñthpaꞌ ñeñthachkaꞌyeña eꞌñe aꞌchenkatwerrawet.” Ñewa, ñeñthchaꞌ lleyerreꞌ añ ñoñetspaꞌ ñetñapaꞌ eñoteretepaꞌch. Ñeñthoꞌmarña ñerraꞌm esempoch senter oꞌ xhap all ñeñth eꞌñe Partsokpa anarethpaꞌ 16allempoña ñeñth allpon Judeoꞌtsaꞌyen ñetñapaꞌ allorokmoepaꞌch yetrraꞌterret, awanerretepaꞌña aspenthareroneth. 17Ateth ñerraꞌmrratheꞌ poesheñaꞌtets ñatoꞌ ñetña allempopaꞌ enoꞌtsaꞌyenetchaꞌ paꞌpakllato, ñetñapaꞌ sowetepaꞌchña thekma tharraña amachña beꞌthosatsetnomoetoña poꞌponreto atthoch yoratsreꞌtnomoet. 18Ñamha poesheñaꞌtets ñeñth paꞌmroꞌtsenpaꞌ allempoña ñetpaꞌ amachña onatsterreto atthoch erretaꞌ paꞌshtamoet. 19Allempopaꞌ atarrchaꞌ llekëñets añekop ñeñth axhomenareꞌ koyaneshaꞌ ñamha ñeñth allowen emarethetholleshaxhno. (Tharroꞌmar ñokpoetpaꞌ atarr thorrapoꞌ atthoch yetrraꞌtet ñamet.) 20Ñamha Yomporchaꞌña semaꞌyocha allochñapaꞌ amach xha wapoto allempoch seyetampesya ñamha amachkaꞌye aña yethro seyetatsto allempokma samesen. 21Allempopaꞌ orrterrach moeroxhteñets ñeñthchaꞌ atarr moeroxhtaterreꞌ allowen acheñeneshaꞌ. Ñeñth amaꞌt awathapaꞌ ama poemoeroxhtareto ateth atarr nanak womenk. Amaꞌt allempotheñ eꞌñe errteꞌ ayexhkatarethta añ patser ama poemoeroxhtareto ateth. Allempoña ellopaꞌ amach ateth alla moeroxhterreteꞌthe amaꞌt errponaña. 22Allempoch atarr amoeroxhtatarethterret. Tharraña allempoña Yomporpaꞌ ñach oterrets theꞌpaꞌ allowach. Ñerraꞌm amach oto allowachpaꞌ allempoña amaꞌt poesheñarrapaꞌ amach eseshaꞌ keshperrtso. Tharraña ñeñthña ameꞌñenaya ña ñeñth akrenpaꞌ ñokpoetñapaꞌ oterrchaꞌ theꞌpaꞌ allowach.

23‘Ñewa, allempoch orameñ moeroxhteñetspaꞌ ñerraꞌm eseshaꞌ soteꞌ: “Arroꞌtsenkaꞌyeña Cristo”, amapaꞌ oꞌch otaset: “Tharroꞌtsenkaꞌye Cristo”, sañapaꞌ amach sameꞌñatstaneto. 24Orretyerrachkaꞌye ñeñthchaꞌ otyerrets ñapaꞌ ñoꞌña Cristotets. Tharraña ñeñthpaꞌ atthachkaꞌye shekareꞌtyerranña acheñeneshaꞌ. Orretyerrach ñamha ñeñthchaꞌ otyerrets ñapaꞌ ñoꞌña aꞌmhteneꞌña Yompor poꞌñoñ, tharraña ñeñthpaꞌxhoꞌña eꞌñech atthekma shekareꞌtyerran acheñeneshaꞌ, amachña Yomporeyeꞌña poꞌñoñ aꞌmhteno. Ñeñthchaꞌ ateth shekareꞌtyerrets, ñetñapaꞌ orrtatyerretchaꞌ ñeñth amaꞌt awatha acheñeneshaꞌpaꞌ ama poentare, atthochña kowanrrortateretña acheñeneshaꞌ. Amaꞌt ñeñth Yompor paꞌkrarnesharpaꞌ moeneñetañchaꞌ ñeñtheꞌnachña shekërret. 25Señochepaꞌch amaꞌt ama xhenaꞌ moeroxhteñtsopopaꞌ napaꞌ oꞌ eꞌñe notwas sa. 26Ñeñthoꞌmar theꞌpaꞌ notenes: Ñerraꞌm allempoch ateth oterrset: “Tharroꞌtsenkaꞌyeña Cristo aꞌyo all amayo”, sañapaꞌ ñatoꞌtña sesenaꞌña all oꞌch senteñaꞌ. Amapaꞌ ñerraꞌm atethchaꞌ oterrseterr: “Tharroꞌtsenkaꞌye Cristo oꞌpono pokollo”, sañapaꞌ ñatoꞌtña sesenaꞌña all oꞌch senteñaꞌ. 27Tharroꞌmar ñerraꞌm esempo xherr allempoch nowerra na Ñeñthen Acheñetosets eꞌñe allowen acheñeneshaꞌpaꞌ entapoerrnetchaꞌ tharroꞌmar allempopaꞌ atethchaꞌ nephater ñerraꞌmrratheꞌ meratsteꞌ, oꞌch meratsta womenkpaꞌ eꞌñech aꞌpoetareswan ora enet errapharen, amaꞌt alloth wena atsneꞌ amaꞌt eꞌñe allowanen emoena. 28Ñeñthpaꞌ eꞌñechkaꞌye ateth perraña ñeñth ateth senten theꞌ ñerraꞌm erroꞌtsen ñeñth rromoeꞌpaꞌ allchaꞌkaꞌyeña shonterraña tseꞌm.

Atethchaꞌ perra allempoch werra Cristo Ñeñth Acheñetosets

(Mr. 13.24-37; Lc. 21.25-33; 17.26-30, 34-36)

29‘Oꞌchña wañerr ñeñth moeroxhteñetspaꞌ allempoñapaꞌ eꞌñech allorokma mayerr atsneꞌ. Arrorrpaꞌxhoꞌña oꞌwañchaꞌ atsnom. Rantoxhnopaꞌxhoꞌña shorxhaꞌterrchaꞌ entoth. Ñamha ñeñth womenk orraꞌyetsa ento theꞌ allempoña amaꞌt ñeñthpaꞌ pellaꞌyerrach. 30Allempoñapaꞌ orrterrach ento ñeñthchaꞌ señotaterreꞌ nakaꞌyeña oꞌ nowerra Ñeñthen eꞌñe Acheñetosets. Allempochña nanak llekanrrorterra allowen paꞌnamen acheñeneshaxhno ñeñth añe patsroꞌtsen. Entapoerrnetchaꞌ na Ñeñthen Acheñetosets oꞌch neswamperra osoth eꞌñe entoth. Eꞌñe nepartsoteñowen eꞌñech nekowenteñeshaꞌ nowerra. 31Nemñerchaꞌ nemhllañotheñnaneshar ñetchaꞌña poktoraꞌnerrtset atarr womenk. Ñetchaꞌña aꞌyapaxhaꞌwerret allemhatheñ ñeñth akren Nompor nokop eꞌñech paꞌtatsshemhtoꞌmarowen allothekma orrnotena. Eꞌñech allemhatheñ aꞌyapaxhaꞌweretchaꞌ eꞌñe allowanen añ patsroth.

32‘Ñamha theꞌpaꞌ señochepaꞌch ñeñth ateth pena higoch. Ñewa, esempoch senteñ higoch oꞌch emhkhachyen poetakretholleshaꞌ allothchaꞌ oꞌch alla tapnaꞌtyerrerr pasopaner, sañapaꞌ ñeñthchaꞌña señotateneꞌ oꞌ xhenmoch allempoch worateterrerr. 33Atthekmach perra ñerraꞌm esempoch sentyerr ñamha ñeñth allponoꞌ notwas, sapaꞌ ñeñthchaꞌña señotaterreꞌ poꞌñoxh oꞌkaꞌye xherrmoch allempoch eꞌñe etsotwerra, oꞌkaꞌye eꞌñe allameꞌttsamerra. 34Napaꞌ poꞌñoxh oꞌch notas, acheñeneshaꞌ ñeñth eꞌñe korretsa theꞌ ñetña amach eꞌñe rromwenetaꞌpaꞌ allempokmach eꞌñech etsoterra allowen añexhno. 35Esempowañen añ enet ñeñth senten theꞌpaꞌ eꞌñech chenkaꞌwerra; patspaꞌxhoꞌña atthekmach perra eꞌñech chenkaꞌwerra. Tharraña naña neñoñpaꞌ amach chenkërro amaꞌt eꞌñe awatha.

36‘Tharraña ñeñth yethroch nowerrapaꞌ ñeñthñapaꞌ ama eseshayeꞌ eñotenaye. Amaꞌt erroꞌtsentheꞌ atsneꞌ amaꞌt erroꞌtsen tsapro ñeñthpaꞌ amaꞌt mellañotheñneshaꞌ ñeñth poeꞌntañoꞌtsaꞌyen ñetpaꞌxhoꞌña amaꞌt poesheñarrothetapaꞌ amaña eseshayeꞌña eñotenaye allempoch nowerrerr poꞌpocheño. Amaꞌt na ñeñthen Yompor Poechemeren napaꞌxhoꞌña theꞌpaꞌ ama neñoteñe, ñapthaña Nompor Parets eñoteneꞌ.

37‘Tharraña allempoch nowerra poꞌpocheño na Ñeñthen Acheñetosets, allempopaꞌ eꞌñech ateth perret eꞌñe ateth peteꞌth awath allempo korreꞌth Noé. 38Ñewa, allempopaꞌ ama es poexhaꞌyeneto aña eꞌñe kothapeꞌcheteꞌth attho atarr paꞌnamen moenenet ñeñthchaꞌ rraꞌyenet, orrareꞌtyeseteꞌth, senaꞌtanatyena yakmaneshaxhno, koyaneshaxhnopaꞌxhoꞌña apanatyeseteꞌth ñeñth yoranatyesaweteꞌth. Ñetñapaꞌ ñeñtha eꞌñe kowen enteteꞌth. Attheñapaꞌ xhap allempo beꞌthosos Noé poꞌwarkopawo. 39Ama es poexhaꞌyeseteꞌthe machayothepaꞌtchaꞌ chopha oñ errakmañen, atthoña añyanatwerranet oñ allowenet. Atthekmach perra ñerraꞌm esempoch nowerra na Ñeñthen Acheñetosets. Machayothachkaꞌye nowerra. 40Ñamha allempopaꞌ atethchaꞌkaꞌye perra; poesheñaꞌtetspaꞌ anmarethterrach; amaꞌt ñeñth eꞌñe pamoꞌts phannenetañ ñeñthñapaꞌ allach asaꞌnmarethterra. Ñatoꞌ allempopaꞌ alloꞌtsenchaꞌ epsheña yakma paꞌmro, poesheñarrñapaꞌ anmarethterrach poꞌpsheñeññapaꞌ allach asaꞌnmarethterra. 41Amapaꞌ ñatoꞌ allempo alloꞌtsenchaꞌ epsheña koyaneshaꞌ ñeñth parro poetseꞌtets mapyo, ñeñthpaꞌxhoꞌña poesheñarrpaꞌ anmarethterrach poꞌpsheñeññapaꞌ allach asaꞌnmarethterra.

42‘Ñeñthoꞌmarña theꞌpaꞌ oꞌch notas: Xhokmoepaꞌch señoseꞌrtenna tharroꞌmar sapaꞌxhoꞌña ama señotenno esempoch nowerra na ñeñthen eꞌñe Separtseshar sepen. 43Napaꞌ eꞌñech machayotha nowerra ateth pena eñeth allempo attha es sepxhaꞌyena machayothach waponasa oꞌch yoratsreꞌtensaꞌ. Tharraña sa ñeñthes apakllathes señochepaꞌch ñerraꞌm señoteñeñ eꞌñech esempo tsapro waponasa eñeth, sapaꞌ xhochña señoseꞌrtenañ atthoch amach semnacheña oꞌch toramphsas sepakllo oꞌch beꞌthosamphsasa oꞌch yorwennasaꞌ ñeñth allpon semorrentyena. 44Ñeñthoꞌmar notenes sapaꞌxhoꞌña xhokmoepaꞌchña señoseꞌrtenna tharroꞌmar allempoch attha es sepxhaꞌyenapaꞌ allempochña nowerra na Ñeñthen Acheñetosets.

Atethchaꞌ apharethterra atarwasañ ñeñth eꞌñe kowen etsoteneꞌ ateth yecheña pamoꞌmteꞌ ñamha atethchaꞌ apharethterra poꞌpoñ atarwasañ ñeñth ama etsotaye ñeñth ateth yecheña pamoꞌmteꞌ

(Lc. 12.41-48)

45Jesúsñapaꞌ alla tomaꞌntaterraneterr poꞌpoñoneth, ateth oterraneterr:

—Allowenespaꞌ atethchaꞌ sepha eꞌñe kowen ateth ñerraꞌmrratheꞌ poesheñarr yakma ñeñth atarr ameꞌñañathtetsa ñamha eꞌñech eñotenan ñeñth atarr sherbets. Ñeñthña yakmarpaꞌ añ yechenaya pamoꞌmteꞌ eꞌñe alla paꞌpakllo. Añchaꞌ poꞌtarwas pen xhokmach apaꞌyesan allowen poꞌpotantañ pamoꞌmteꞌ paꞌtarwasañer poerraret allpon ñeñth poktetsa poesheñaꞌttsokop. Ñapaꞌ atthekmach penanet, xhokmach apoenanet ñerraꞌm esempoch xherrerr allempo ateth anareth ñokop oꞌch alla apaꞌyerraneterr poꞌpocheño. Ñapaꞌ xhokmach ateth pena amach kexhpoenaneto tharroꞌmar ñapaꞌ eꞌñe eñoteñ atthoch eꞌñe koshatenan pamoꞌmteꞌ. 46Ñeñthña atarwasañpaꞌ atarrchaꞌ koshatapoerran pamoꞌmteꞌ. Ñerraꞌm esempoch werra oꞌch alla entwenan paꞌtarwasañer ama xho kexhpoenano ñeñth poꞌtarwas apaꞌnemh awañmoꞌchotheñ. 47Poꞌñoxh oꞌch notas, ñeñthña yakmar atarrchaꞌ koshatweñ pamoꞌmteꞌ. Añchaꞌ koshaterreꞌ oꞌch nower amhchaꞌtareth ñeñthchaꞌ kowamphsapreteꞌ ñeñth allpon echyen pamoꞌmteꞌ. 48-49Tharraña ñeñthña atarwasañer allempo ama werraꞌ pamoꞌmteꞌ ñerraꞌm ñapaꞌ attha oten poeyoxhro, namoꞌmteꞌpaꞌ amach awen werro, allempoña ñapaꞌ xhach ashtapechyenan atarwasañexhno ñeñthchaꞌ rratañ. Ñañapaꞌ ñerraꞌm atthach allemeñ rrapretyen ñamha atthach orrareꞌtapretyen allchaꞌ atarr posaꞌtareꞌtyen, ñeñthña atarwasañ atethpaꞌ amaꞌt mameshapaꞌ ama kowenayaye. 50Ñeñthña atarwasañer ñerraꞌm ñapaꞌ atthach ottatseꞌtyena amach es poexhaꞌyeno amach eñoteñe ñeñthe yethroch werra pamoꞌmteꞌ amaꞌt erroꞌtsenchaꞌ yethro wena. 51Machayothachña werra pamoꞌmteꞌpaꞌ atarrchaꞌ koñchatwer, allach moeñwer all ñeñth oꞌpatenaya allowen ñeñth poꞌñoxh ama ameꞌñetso ñeñth attha shekareꞌtyets. Allñapaꞌ allchaꞌ yawanrrorterret panmoeñothet atserrpaꞌ rrasoꞌtyesosetchaꞌ paꞌs.

Currently Selected:

San Mateo 24: ame

Highlight

Copy