San Mateo 22

Attho atmaꞌntatarethtena poesheñarr amhchaꞌtareth poetareꞌtatan shonteꞌ rreñets ñeñthchaꞌ rret allempoch senaꞌta poechemer

1Jesúsñapaꞌ alla tomaꞌntaterraneterrpaꞌ ateth oterraneterr:

2—Yompor poꞌkowenña ñeñth attho ayochreshathtena ña poeꞌntañoth ñeñthpaꞌ oꞌch netmaꞌntacha ateth ñerraꞌmrratheꞌ poesheñarr amhchaꞌtareth. Ñeñthña amhchaꞌtarethpaꞌ oꞌ poetareꞌtatan shonteꞌ rreñets ñeñthchaꞌ nanak rret allempoch senaꞌta poechemer. 3Oꞌña aꞌpotatwan rreñetspaꞌ oꞌ moeñan paꞌtarwasañreneshaꞌ oꞌch otyeñetaꞌ ñeñth awaꞌñareth oꞌch rrapretenetaꞌ rreñets. Oꞌña otyeswarethtetpaꞌ ñetñapaꞌ arepaꞌtchaꞌ eseshayeꞌ sechatso oꞌch awet all. 4Poꞌpocheñopaꞌ oꞌ alla moeñerranerr poꞌpotantañ paꞌtarwasañreneshaꞌ. Ama senetaꞌpaꞌ ateth otapanet: “Sotoschaꞌ acheñeneshaꞌ ñeñth awaꞌñareth: ‘Amhchaꞌtarethkaꞌye sagotateneꞌ, atethkaꞌye oten: Rreñetspaꞌ oꞌ eꞌñe naꞌpotatwe. Wakshexhno ñamha beserexhno ñeñth neꞌsoyaꞌtatyen oꞌ eꞌñe nemtsatwe ñamha oꞌkaꞌye eꞌñe naꞌpotatwe. Theꞌpaꞌ sonaxhaꞌtepaꞌtoꞌ awoꞌch serrapreteñaꞌ.’ ” 5Awaꞌñarethneshaꞌñapaꞌ arepaꞌtchaꞌ aꞌkwaꞌpsenayeꞌ eñchetoña ñeñth waꞌñenawet. Ñeñthapaꞌ awanemyeset ñopaꞌtets. Poesheñarrpaꞌ awoꞌ paꞌmro, poꞌpsheñeñpaꞌ awoꞌ pomatsreꞌtatsa. 6Poꞌpotantaññapaꞌ ñeñthapaꞌ oꞌ rremapoñetña paꞌtarwasañreneshaꞌpaꞌ errothwanen pet, attheñapaꞌ oꞌ moetsanatwet. 7Amhchaꞌtarethñapaꞌ ñeñthña atarr atsrreꞌmateꞌ. Allempoñapaꞌ oꞌ moeñan ñamha poꞌsolltar-reneshaꞌ ñeñthchaꞌ aꞌkllatenayaꞌ ñeñth amtsañexhno, ñeñthchaꞌ aꞌpoyatatwenayaꞌ ñamha paꞌnetser. 8Allothña amhchaꞌtarethpaꞌ ateth oterranerr poꞌpotantañ paꞌtarwasañreneshaꞌ: “Rreñtsoxhnoña poꞌñoxhpaꞌ epayeꞌkaꞌye. Tharraña ñeñthña awaꞌñarethpaꞌ ñetpaꞌ amakaꞌye kowenayeꞌ nentenaneto. 9Theꞌpaꞌ orras samha alloꞌtsen thoñexhno tharroꞌmar allpaꞌ shonteꞌ chopeñeꞌchyen acheñeneshaꞌ. Allowen errponchaꞌ sentyes oꞌch sotyesapanet onetepaꞌ arr oꞌch rrapretennetaꞌ rreñets ñeñth shonteꞌ naꞌpotaten.” 10Allempoña alla awanerrerr paꞌtarwasañreneshaꞌ, ñetñapaꞌ añ kothaꞌyeset thoñ. Ñeñth allpon poktaꞌyeset thoñoꞌmar eꞌñe sechatyeswawet, amaꞌt atsrreꞌmñathexhno ñamha ñeñth kowen acheñ. Attheñapaꞌ oꞌ xha shontosa ñeñth waꞌñenet. Allña pokollo all senaꞌtena poechemerpaꞌ eꞌñe kexhkosa ñeñth awaꞌñareth.

11‘Amhchaꞌtarethñapaꞌ allentha beꞌthos oꞌch entapan ñeñth waꞌñatyen ñeñthchaꞌ rrallmeꞌchosets all. Allñapaꞌ entan poesheñarr yakma. Ñañapaꞌ ama añeyeꞌ chorreno shetamoets emarr ñeñthekma chorrenet all attho koshapreteñet ñeñth senaꞌtetsa. 12Amhchaꞌtarethñapaꞌ ateth och: “Esoꞌmareꞌtña masheñe pebeꞌthenña arr amakaꞌye añeyeꞌ pechorreno shetamoets emarr atthoch phokshaprecha ñeñth senaꞌtetsa.” Ñañapaꞌ ama eñoro. 13Allempoña amhchaꞌtarethpaꞌ otan paꞌtarwasañreneshaꞌ: “Sewankoñ paꞌtak ñamha potpaꞌ xhosa waporeꞌterreꞌ aꞌyoth chekmetoth. Allñapaꞌ allchaꞌ yawanrrorterret, panmoeñothet atserrpaꞌ rrasoꞌtyerretchaꞌ paꞌs.” 14Tharroꞌmar amaꞌt shonteñña ñeñth awaꞌñarethpaꞌ tharraña poesheñaꞌttsaña ñeñth eꞌñe kowen aꞌkrareth.

Attho aꞌphthoꞌchet Jesús, pokteꞌtheꞌ oꞌch tsaꞌtet impuesto

(Mr. 12.13-17; Lc. 20.20-26)

15Allempoña fariseoneshaꞌpaꞌ awanerra. Ñetñapaꞌ xha atarr kothapeꞌchatannaꞌtenetaꞌ. Ñetpaꞌ aña atarr eꞌnenet atthoch eꞌñe poeshkëñothetpaꞌ amaꞌt parrochapaꞌ oꞌch eñorachet Jesús ñeñth ama pokteyaye. Allochñapaꞌ atthothchaꞌña otteñeꞌchet. 16Ñetñapaꞌ eꞌñe aꞌnawa moeñet ñet poeyochreshaꞌ epoet ñamha poesheñaꞌtets Herodes poeyochreshaꞌ. Ñetña xhapoet Jesúseshopaꞌ eꞌñe poeshkëñothet ateth otoset:

—Maestrochaꞌ yapaꞌ yeñoteneph phapaꞌ ama peshkëno amaꞌt mamesha ñamha ñeñth attho peyxhaten Yompor pokthaphña ñeñthpaꞌxhoꞌña eꞌñe kowenakma, ama shekëñtsoyaye amaꞌt mamesha. Ñamha phapaꞌ ama aña ñapoeth pemorrenteno ñeñth atarr amhchaꞌnaꞌtpoꞌ entyen allowen acheñeneshaꞌ. Allowen acheñ eꞌñe kowen pentweñ. 17Ñeñthoꞌmarña theꞌpaꞌ yapaꞌ yemneñ oꞌch peñotatapoey erraꞌtsentheꞌña eꞌñe poꞌñoxh kowentetsa. ¿Pokteꞌtheꞌ penteñña pha oꞌch yetsaꞌta impuestos añekop ñeñth amhchaꞌtarethtetsa all anetso Romo ñeñth ama judioneshayaye? Ñatoꞌ amatheꞌ pokteyayeña yokop ñeñthey judioneshay oꞌch yetsaꞌcha amhchaꞌtareth romoꞌmarneshaꞌ ñeñth ama judioneshayaye.

18Jesúsñapaꞌ eñotapanet ñeñth ateth kothapeꞌchyenetañ ñokop, ñañapaꞌ ateth otanet:

—Sapaꞌ atarr ashkarñathes, esoꞌmareꞌtña semneñña oꞌch seshkareꞌtenen. 19Ñewa, amaꞌt attheseñpaꞌ segatenkaꞌye poetallarr kelle ñeñth alloch setsaꞌta impuestos.

Allempoñapaꞌ gachet poetallarr kelle ñeñth otenet denario. 20Ñañapaꞌ ateth oterraneterr:

—Ñewa, sapaꞌ oꞌch soten, ¿eseshaꞌt sentenña ñeñth atmaꞌntarethtetsa all? ¿Eseshaꞌt paꞌsoꞌcheñ akellkarethtetsa all?

21Ñetñapaꞌ atet ochet:

—Amhchaꞌtarethkaꞌye atmaꞌntarethtetsaña all, ñamha ñokaꞌyeña paꞌsoꞌcheñ ñeñth akellkarethtetsa all.

Jesúsñapaꞌ alla oterraneterr:

—Ñeñthepñapaꞌ añ poktetsa oꞌch yaph amhchaꞌtareth ñeñth ño ñeñth ateth poktetsa gobiernokop, tharraña ellonethña ñeñth Yomporo oꞌch yaph ñamha ñeñth ateth poktetsa ñokop.

22Ñetña ateth eꞌmoeñet Jesús ateth anapoenanetpaꞌ attha kowanrrorteñet tharroꞌmar Jesúspaꞌ atarrkaꞌye kowen anapoenanet. Attheñapaꞌ kexhpaꞌwaneretpaꞌ awanerret.

Attho aꞌphthoꞌchet Jesús, ñerraꞌm poꞌñoxhtheꞌ atanterrapoꞌ rromoth, taꞌm, allempopaꞌ errothenchaꞌña yeperra

(Mr. 12.18-27; Lc. 20.27-40)

23Ñeñthe yethrokma waxhaꞌtoña ñamha patantarr ñeñth saduceoneshatets. Ñewa, ñeñth saduceoneshatets ñetñapaꞌ elloneth echenet pokthaphña ñeñthoꞌmarña ñetpaꞌ ateth otenet amatheꞌ errothenoth yetanterroña rromoth amaꞌt errponaña. Ñetñapaꞌ ateth otoset Jesús:

24—Añ Maestrochaꞌ ñeñthkaꞌyeña ateth otyeꞌthña Moisés ñeñth poktetsa ñeñthchaꞌ ateth yepha. Ñerraꞌm esempo rroma yakma oꞌch saꞌnman poethapor tharraña ñerraꞌm ama chemereꞌtnomopaꞌ, añ poktetsa paꞌmoꞌnasheñchaꞌ alla yorerreꞌña poꞌnorrar allochñapaꞌ atthoch eñalleterraña ñeñthchaꞌ poechemer perr paꞌmoꞌnasheñeñ. Ñeñthpaꞌ atethkaꞌye kellkaꞌnmonayña awath Moisés. 25Ñewa, theꞌpaꞌ eñall kanxherrsheña yamoꞌts ñeñth eꞌñe poktakma paꞌmoꞌnasheñekmoet. Ñeñth poesheñarr popoꞌnaretpaꞌ oꞌ yoran koyaneshaꞌ ñeñth poethapor phaꞌ. Eꞌñe allponmatatsapaꞌ oꞌ rroma, attha saꞌnman poethapor ama chemereꞌtnomo. Allempoña ñeñth poꞌrroxhoꞌmerpaꞌ oꞌ yorerran paꞌmoꞌnasheñeñ poethapor. 26Eꞌñe allponmatatsapaꞌ ñapaꞌxhoꞌña oꞌ rromoerrerr ñamha, ñeñthpaꞌxhoꞌña ama chemereꞌtnomo. Allempoña poꞌpsheñeñ paꞌmoꞌnasheñpaꞌ oꞌ alla yorerranerr ñamha poꞌnorrar. Eꞌñe allponmaterrtsapaꞌ ñapaꞌxhoꞌña oꞌ rromoerrerr ñamha, ñeñthpaꞌxhoꞌña ama chemereꞌtnerrerro oꞌ attha rromoerrerr. Eꞌñe atthekma phowet kanxherrsheñoꞌmaretpaꞌ eꞌñe poeyorwarochetña ñeñthara poesheñarr koyaneshaꞌ. Allowenetpaꞌ eꞌñe atthekma pet rromayestset amaꞌt poesheñarrothetapaꞌ amakaꞌyeña chemereꞌtnomoeto. 27Allempoñapaꞌ xho rromatsña ñamha koyaneshaꞌ. 28Theꞌña ñerraꞌm poꞌñoxhtheꞌ atanterrapoꞌ rromothpaꞌ añña koyaneshaꞌñapaꞌ allempopaꞌ ¿eseshaꞌtchaꞌña eꞌñe ñapoeth poethapor perreꞌ tharroꞌmar allowenet kanxherrsheñoꞌmaretpaꞌ eꞌñekaꞌye poeyorwarochet?

29Jesúsñapaꞌ atet otapanet:

—Xhakaꞌye atarr sepanteñ tharroꞌmar amakaꞌye xhennasoña seyoxhro ñeñth eꞌñe poꞌñoxh ateth yexhateney Yompor poꞌñoñ ñeñth ateth anwareth awathotheñ. Ñamha aña sepantateneꞌ tharroꞌmar sapaꞌ ama sepokteññañe Yompor poꞌwamenk. 30Tharroꞌmar esempowañen allempoch tanterret poꞌpocheño, allempopaꞌ amaꞌt poesheñarrotheta amach senaꞌterreto, amaꞌt koyaneshaꞌpaꞌxhoꞌ amach eseshayeꞌ apoerraye ñeñthchaꞌ yorerrawet. Tharroꞌmar allempopaꞌ eꞌñech atthet ñerraꞌm Yompor poꞌmhllañotheñnaneshar ñeñth poeꞌntañoꞌtsaꞌyen. 31Sapaꞌ amaꞌtña selleyare ñeñth ateth oteꞌth awath Yompor eꞌñe sokop atthoch señoch poꞌñoxhpaꞌ amaꞌt ñeñth oꞌ kollaꞌwapaꞌ ñetñapaꞌ korretseta. 32Ñewa, ñeñthpaꞌ ateth oteney Yompor: “Napaꞌ na ñeñthen Poꞌyomporer pen Abraham ñamha Isaac ñamha Jacob amaꞌt ñetpaꞌ oꞌ rromwet awathotheñ.” Ñewa, yapaꞌ yeñoteñ Yomporpaꞌ ama añeyeꞌ Poꞌyomporer penaye ñeñth rromoets eꞌñe poktakma, ñapaꞌ añkaꞌyeña Poꞌyomporer peneꞌ acheñ ñeñth korretsetach. Atthoña Yomporpaꞌ eꞌñe allameꞌttsa entenanet allowen ñetñapaꞌ eꞌñe bethtetseta.

33Allempoña allowen acheñeneshaꞌ ñeñth eꞌmoeneꞌ Jesús attho emmaꞌwan saduceoneshaꞌ, ñetñapaꞌ ateth otannaꞌtyeset:

—¡Errothenothwañakaꞌyeña atarr es eñoten, attho atarr kowen yexhatyeney!

Añmapaꞌ ñeñth ñoñets ñeñth atarr sherbets, eꞌñe metanaꞌtwenan allowen poꞌpoñexhno ñoñets

(Mr. 12.28-34)

34Ñamha allempo fariseoneshaꞌ eꞌmareꞌchet attho Jesús emmaꞌwan saduceoneshaꞌ ñetñapaꞌ apxhannaꞌtet parro. 35Allempoña poesheñarrothet ñeñth atarr etsoteneꞌ ñoñets ñeñth ateth anareth ñañapaꞌ otenanaꞌ Jesús. Ñeñthpaꞌ tharroꞌmarña ateth aꞌphthoꞌtos ñetpaꞌ xhokaꞌye moeneñet oꞌch topachet Jesús. 36Ñeñthpaꞌ ateth otos:

—Maestrochaꞌ ¿erraꞌtsenaꞌt ñoñtsor ñeñth ateth anareth ñeñth atarr sherbets ñeñth ello metanaꞌtweneꞌ ora allowen poꞌpoñexhno ñoñets ñeñth eꞌñe parro atthekma anareth?

37Jesúsñapaꞌ ateth otaph:

—Añkaꞌyeña ñeñth ello atarr sherbets, ñeñth ñoñetspaꞌ ateth oten: “Atarrepaꞌch yemorrenteña Yeyomporer ñeñth Yepartseshar yepen eꞌñe ora yeyoxhrokmañen. Ñamha eꞌñe yekamkëñoth yemorreñchach, amaꞌt ñamha ora yokthaphñowen.” 38Ñeñthpaꞌ ñeñthkaꞌye ñoñets ñeñth poꞌñoxh atarr sherbets, ñeñthpaꞌ ellokaꞌyeña metanaꞌtwenan poꞌpoñexhno ñoñtsoxhno. 39Allothpaꞌ poꞌpoñ ñoñets ñeñth atarr sherbets ñeñthpaꞌ ateth oten: “Atarrchaꞌ yemorrenteña yamoꞌts eꞌñe ateth atarr yemorrentena yañeña.” 40Añ epoꞌmar ñoñets ñeñthña eꞌñe etsotatweneꞌ allowen poꞌpoñexhno ñoñtsoxhno ñeñth ateth anaꞌyesareth, ñamha allowen Yompor poꞌñoñ ñeñth aꞌmhtaꞌyeseteꞌth awath.

Attho Cristo ñeñth Poꞌpartseshar peꞌth David awath, elloñapaꞌ oꞌ alla poꞌmhreneñ per

(Mr. 12.35-37; Lc. 20.41-44)

41Allempoña fariseoneshaꞌpaꞌ ñetñapaꞌ alloꞌtsenareta all apxhenet eꞌñe ñochayet, 42Jesúsña allpaꞌ ateth otanet:

—Sapaꞌ ¿errothenaꞌt sotenña sa añekop ñeñthchaꞌ Cristotosets? ¿Eseshaꞌt soten ñeñthchaꞌ poꞌmhreneñ perreꞌña ñeñthchaꞌ Cristotosets?

Ñetñapaꞌ ateth ochet:

—Davidchaꞌkaꞌye poꞌmhrenñoth wapaña ñeñthchaꞌ Cristotosets. 43Ñañapaꞌ alla oterraneterr:

—Ñerraꞌm poꞌñoxhchaꞌ David poꞌmhreneñ perreꞌpaꞌ sapaꞌ amaꞌt señoteñeña Davidpaꞌ allempo eñoracheꞌth Parets Poekamkëñ ñapaꞌ atethkaꞌye oteꞌth poꞌmhrenñekop ñeñthara ñeñthchaꞌ Cristoterrets: “Ñapaꞌ ñeñthkaꞌyeña Nepartseshar nepen.” David allempopaꞌ atethkaꞌye eñoseꞌthña añekop ñeñthchaꞌ Cristoterrets:

44Yompor Paretspaꞌ ateth otennan ñeñth eꞌñe Nepartseshar nepen na (ñeñthara ñeñthchaꞌ Cristoterrets): “Theꞌpaꞌ oꞌch phanorrwerr arr nekowenroth allchaꞌ pekowentapreterrna. Atthochña amaꞌt ñeñth peꞌmoñeꞌteneꞌ napaꞌ oꞌch eꞌñe nameꞌñatwerranet allochñapaꞌ oꞌch ateth perret ñeñth pemnen pha.”

45Ñeñthpaꞌ atethkaꞌye oteꞌthña David, ñeñthchaꞌ Cristoterretspaꞌ ñeñthkaꞌyeña Poꞌpartseshar peꞌthña amaꞌt allempotheñ. Ñewa, amaꞌt señoteñeña Cristo ñeñth Poꞌpartseshar peꞌth Davidpaꞌ ñeñthña theꞌpaꞌ oꞌ alla poꞌmhreneñ per ñamha.

46Ñetñapaꞌ amaꞌt poesheñarrothetapaꞌ ama eseshayeꞌ anapoenayeꞌ entaye. Ñeñthoꞌmarña allempotheñpaꞌ amaꞌt poesheñarrothetapaꞌ ama eseshayeꞌ aꞌphthoꞌtenayeꞌ enterraye.

Currently Selected:

San Mateo 22: ame

Highlight

Copy