San Lucas 15

Acheñ ñeñth ama ameꞌñetsopaꞌ arrpaꞌ all atmaꞌntatarethtet ateth ñerraꞌm carnero ñeñth chenkëtsa

(Mt. 18.10-14)

1Shonteꞌ ñeñth cobrets kelle gobiernokop ñeñthara ñeñth atarr shekareꞌtyets ñamha shonteꞌ ochñatheneshaꞌ, ñetñapaꞌ waxhaꞌtet Jesúsesho oꞌch eꞌmhñoteññañetaꞌ ñeñth ateth serrpareꞌtatenan allowen acheñeneshaꞌ. 2Añña fariseoneshaꞌ ñamha ñeñth atarr etsotayenayeñ ñoñets ñeñth ateth anareth judioneshakop, ñetñapaꞌ amaꞌt mameshapaꞌ ama pokteyeꞌ enteñeto. Ñetñapaꞌ attha sasareꞌteñet Jesúspaꞌ ñeñthpaꞌ ateth otannaꞌtyenet:

—Añ acheñer amaꞌt ñeñth atarr ochñatheneshaꞌpaꞌ esoꞌmartheꞌña eꞌñe kowen agapyenanet, ñamha alla rrallmeꞌchapreteñet.

3Ñeñthoꞌmar Jesúspaꞌ alla tomaꞌntaterraneterr; ñeñthpaꞌ ateth oterraneterr:

4—Sapaꞌ ñerraꞌm eseshas echeneꞌ shonteꞌ secarneror, xharroch xharraꞌ sechen tharraña ñerraꞌm pomokarrña machayotha saꞌchenkachpaꞌ amaꞌt ateth sepeno. Oꞌch sesaꞌnom allowen poꞌpotantañ ñeñth oꞌ noventa nuebhamha all amayo amaꞌt atarr aꞌyopaꞌ oꞌch awes eꞌnerrayaꞌ pomokarr ñeñth chenkëtsa. Allchaꞌ seꞌnameꞌtyeraꞌpaꞌ atthothach senter. 5Allña senterpaꞌ oꞌch senatner, eꞌñech soksheñeshokmañen saner. 6Oꞌchña sexhapater sepakllopaꞌ allñapaꞌ oꞌch sexhoreꞌtwer samoꞌtseshaꞌ oꞌch onaxhaꞌtet. Allñapaꞌ oꞌch sotwerr: “Theꞌpaꞌ oꞌch sokshapreterrna necarneror, theꞌpaꞌ oꞌ nenterrña ñeñth naꞌchenkaten.” 7Ñeñthoꞌmarña theꞌpaꞌ notenes: Yamoꞌmteꞌ ñeñth poeꞌtañoꞌtsen atthekmach atarr nanak kosherrana amaꞌt poesheñarra acheñ ñeñth atarr ochñath ñerraꞌm esempoch oꞌch kothapeꞌcherret ello eꞌñe kowen ñokop. Elloch metanaꞌtwerran ñeñth attho koshenana poꞌpotantañ ñeñth shonteꞌ ñeñth eꞌñe pokteꞌ es phaꞌyenet ñokop amaꞌt ñetpaꞌ shontet ateth ñerraꞌm noventa nueve carnero ñamha ñetpaꞌ amaꞌt ama pallteneto oꞌch kothapeꞌcherret ello kowen.

Arrpaꞌ all atmaꞌntatarethtena poetallarr kelle ñeñth aꞌchenkaten pamoꞌmteꞌ

8‘Ñeñthara kothaphñats, theꞌpaꞌ ñatoꞌ atethchaꞌ netmaꞌntacha poꞌpoñoneth ateth ñerraꞌm poesheñarr koyaneshaꞌ ñerraꞌm echenan xharratlla poꞌkhllayor ñeñth atarr morrentena. Ñerraꞌm xho aꞌchenkach poetallarrpaꞌ amaꞌtchaꞌ aꞌllchatanoña poꞌlampareñ atthoch tarrapoꞌtenan paꞌpakëll allchaꞌ eꞌnameꞌtyerran poetallarr poꞌkhllayor. Atthothchaꞌña enter. 9Oꞌchña enterpaꞌ allempoñapaꞌ oꞌch agotan pamoꞌtseshaꞌ eꞌñe pakmaneshocheꞌ, atethchaꞌ otanet: “Theꞌpaꞌ oꞌch sokshapreterrna ñeñth poetallarr nekhllayor ñeñth naꞌchenkat, theꞌpaꞌ oꞌ nenter.” 10Theꞌpaꞌ oꞌch noterrserr, elloña atarrchaꞌ nanak koshateret Yompor poꞌmhllañotheñreneshowen ñerraꞌm esempo amaꞌt poesheñarra acheñ ñeñth atarr ochñathpaꞌ oꞌch kothapeꞌcherret ello eꞌñe kowen Yomporekop.

Arrpaꞌ all atmaꞌntatarethtena poesheñarr yakma poechemer ñeñth atarr ottatsñath

11Elloña Jesúspaꞌ alla tomaꞌntaterraneterr, ñeñthpaꞌ ateth oterraneterr:

—Eñall poesheñarr acheñ echenan epsheña poechemer. 12Ñeñthña poechoyomer penpaꞌ ateth otan pompor: “Apachaꞌ ñeñth ora allpon pechen theꞌ napaꞌ nemneñ oꞌch phapoen eꞌñe thayekma ñeñth allpon phoꞌpatatenna.” Allempoña pompor ora ñeñth allpon echyenpaꞌ oꞌ apaꞌyesan epsheñoꞌmar poechemereshaꞌ ñeñth allpon oꞌpatatyenanet eꞌñe poesheñaꞌttset. 13Eꞌñe allponmatatsa ñeñthña poechoyomer penpaꞌ oꞌ eꞌñe pomwawanman ora allowen ñeñth allpon aph pompor allo agapan shonteꞌ kelle atthoch ta bhaxhayo poꞌpoñ anetso. Allempoña xhap bhaxhayopaꞌ allñapaꞌ sosyaꞌtsañexhna ateth phaꞌyesos. Atthoña amaꞌt shonteꞌ poꞌkhllayor ñeñth anem oꞌ eꞌñe aꞌgastaꞌwawe eꞌñe pottatseꞌteñoth. 14Oꞌ eꞌñe aꞌgastaꞌwan ora poꞌkhllayorpaꞌ allempoña allpaꞌ oꞌ orrta moexheñets all ñeñthe anetsro. Ñañapaꞌ oꞌwañ errayeꞌ entan poerrar ñeñthchaꞌ rren. 15Allempoña ñapaꞌ oꞌ awoꞌ alloꞌtsen aneꞌtañ all eꞌnyenan tarwas. Aneꞌtaññapaꞌ aña aph poꞌtarwas oꞌch awyesos aꞌyeneth allchaꞌ kowampesyesoñ poꞌchañchor. 16Ña paꞌchporrñothpaꞌ atarr moeneñ oꞌch rrapretosan chañcho poerrar atthoch yetosa. Amaꞌt chañchopaꞌ paꞌtalleꞌtsa poerrar pen ñapaꞌxhoꞌña ñeñthaña atarr moenen oꞌch rros tharraña amaꞌt chañcho ama eseshayeꞌ apoenaye poerrar ñeñthchaꞌ rraꞌ. 17Attheñapaꞌ machayotha xhapoña poeyoxhro, ateth ot: “Apa paꞌtarwasañer amaꞌt shontetpaꞌ echyenet poerrar, ello poechareꞌtyena. Naña arrpaꞌ oꞌ nerromoerrmoch nachporrñoth. 18Theꞌpaꞌ oꞌch awerren apoesho; theꞌ napaꞌ atethchaꞌ notwer: Apachaꞌ, napaꞌ oꞌ nephowa ñeñth ama kowenayaye Yomporekop amaꞌt ñamha phokop. 19Napaꞌ ama kowenayayno atthoch pechemer pephapoerren. Theꞌ napaꞌ aña poktetsa nokop phapaꞌ phaꞌtarwasañrach pephapoerren.” 20Oꞌña ateth kothapeꞌchwa ello eꞌñe kowen Yomporekoppaꞌ allempoñapaꞌ awen pomporesho.

‘Amaꞌt atarr ellapharmeñ allempo entapoeñ pompor eꞌñe poemoereñoth mata poktapoeñpaꞌ aꞌxhonoꞌtapoeñ, tsoꞌtstsapaꞌtapoeñ. Ñeñthpaꞌ ateth womhchaꞌtapoenan poechemer attho eꞌñe kowen agapapoeñ. 21Poechemerñapaꞌ ateth otweñ: “Apachaꞌ, napaꞌ oꞌ nephowa ñeñth ama kowenayaye Yomporekop amaꞌt ñamha phokop. Na theꞌpaꞌ ama kowenayayno atthoch pechemer pephapoerren.” 22Tharraña pomporñapaꞌ eꞌñe allorokma otan poeñañreshaxhno: “Oꞌch senaꞌ eꞌñe thayekma shetamoets ñeñth atarr kowen koxhneshaꞌ, oꞌch sechorratapoennana nechemer. Oꞌch senatapoeñ ñamha anillo potapho, oꞌch senatapoeñ ñamha sapatets paꞌtko. 23Oꞌch sennanaꞌ ñamha newaksher ñeñth atarr neꞌsoyaꞌtaten oꞌch semtse oꞌch yerrallmeꞌch oꞌch yokshameꞌtamphsapoeña. 24Tharroꞌmar añ nechemer amaꞌt oꞌ rromwañ, theꞌñapaꞌ oꞌ alla tanterra. Amaꞌt oꞌ chenkaꞌwañpaꞌ theꞌñapaꞌ oꞌ alla nenter.” Allempoñapaꞌ atarr nanak koshameꞌtamphsapoeñet.

25‘Ñewa, poꞌpsheñeñ poechemer ñeñth popoꞌnar ñañapaꞌ paꞌmroꞌtsen allempo xhen poechoyomer. Allempoña err paꞌmroth eꞌñe yaꞌrroterrtsa pokollopaꞌ oꞌ eꞌmwerran koshamhñats all rekërkënet ñamha asheꞌrarañ. 26Allempoñapaꞌ xhoreꞌtwerran cheshachorpaꞌ aꞌphthoꞌtwer: “¿Esoꞌmareꞌtña koshameꞌtenet? ¿Esoꞌtña atarr koshameꞌtampenet?” 27Cheshachorñapaꞌ ateth otapoer: “Oꞌ wena pemoꞌnasheñ, phomporpaꞌ oꞌ moetsatan becer ñeñth seꞌsoyaꞌtaten tharroꞌmar atarr koshapoenana poechemer. Ama xhoyeꞌ rromoeno, eꞌñe womech agapapoeñ.” 28Ñañapaꞌ ñeñtha atarr atsrreꞌmatwerreꞌ ama moeno oꞌch beꞌthoswerr all oꞌ xhen paꞌmoꞌnasheñ. Attheñapaꞌ xhaꞌnom pomporpaꞌ allach otereꞌth: “Pebeꞌthoswerr.” Ñañapaꞌ ama moeno oꞌch beꞌthoswerr. 29Ñañapaꞌ ateth otwerran pompor: “Napaꞌ peñotenen oꞌ shonteꞌ char eꞌñe kowen nameꞌñenpha; napaꞌ amaꞌt parrochapaꞌ ama esempo nathpareꞌtenpe. Tharraña amaꞌt ateth nepenpeñpaꞌ nañapaꞌ amaꞌt esempapaꞌ ama phapoennoña amaꞌt pathrra cabra atthoch nokshameꞌta namha epan ñeñth parro neyemoetyena na. 30Theꞌña oꞌ wena ñeñth pechemermaꞌth pepen amaꞌt ora oꞌ aꞌgastaꞌwonaph pekhllayor eꞌñe poekañoreshaꞌteñoth, theꞌña phapaꞌ oꞌ pemtsatapoeñ becer ñeñth yeꞌsoyaꞌtaten.” 31Pomporñapaꞌ ateth otererr: “Poꞌñoxh, nechemerchaꞌ, phapaꞌ xhokma arroꞌtseney parro. Amawakaꞌye, nechemerchaꞌ, peñoteñetheꞌ ñeñth allpon nechenpaꞌ eꞌñerramcheꞌ phokma. 32Ñeñthoꞌmarña theꞌpaꞌ añ poktetsa oꞌch yokshameꞌtamphsapoeña pemoꞌnasheñ, oꞌch atarr nanak yokshena tharroꞌmar amaꞌt oꞌ rromwañ theꞌñapaꞌ oꞌ alla tanterra; amaꞌt oꞌ chenkaꞌwañ theꞌñapaꞌ oꞌ alla yenter.”

Currently Selected:

San Lucas 15: ame

Highlight

Copy