San Lucas 14

Attho Jesúspaꞌ aꞌkrraterran poesheñarr yakma ñeñth xha ananen

1Allempoña xherrerr pamtharr allempo amesenet. Jesúsñapaꞌ awoꞌ allchaꞌ rrallmeꞌchapretenanaꞌ poesheñarr fariseo ñeñth atarr amhchaꞌtarethtetsa. Xhap all paꞌpakllopaꞌ poꞌpotantañña fariseoneshaꞌ ñetñapaꞌ atarr kowanaꞌtyesapet Jesús. 2Allñapaꞌ alloꞌtsen poesheñarr yakma ñeñth xha ananen. 3Jesúsñapaꞌ all serrpareꞌtos epoet fariseoneshaꞌ ñamha ñeñth alloꞌtsaꞌyen ñeñth atarr etsoteneꞌ ñoñets ñeñth ateth anareth judioneshakop. Ñañapaꞌ attha aꞌphthoꞌtosanet eꞌñe poꞌtomña, allochñapaꞌ oꞌch eñoch ñatoꞌ errothenchaꞌ anapet. Ñeñthpaꞌ ateth otosanet:

—¿Errothenaꞌtña sotenña sa, taꞌm pokteꞌtheꞌ oꞌch naꞌkrratos atsnañeth añe yethro allempo yamesen? ¿Attheꞌt otenña ñoñets ñeñth ateth anareth, ñatoꞌ amatheꞌ?

4Fariseoneshaꞌñapaꞌ ama eseshayeꞌ anapoetso amaꞌt poesheñarrotha. Allempoña Jesúspaꞌ aꞌphllamkoꞌtosan atsnañeth. Eꞌñe aꞌphllamkoꞌtweꞌpaꞌ xha korrerrtsa allentha moeñer paꞌpakllo. 5Allempoña Jesúspaꞌ alla oterranerr fariseoneshaꞌ:

—Sapaꞌ ñerraꞌm sashanor amapaꞌ sewaksher shoraꞌnets arrorotho all chorren oñ, amaꞌtchaꞌña sechtereña alloth eꞌñe allorokma amaꞌt añe yethro allempokma yamesen.

6Ñetñapaꞌ ama errothenayeꞌ otenayeꞌ enteñeto amaꞌt eꞌñe poesheñarrotha.

Attho awaꞌñarethtet oꞌch rrallmeꞌchapreteñetaꞌ ñeñth senaꞌtetsa

7Allempoña ñeñth awaꞌñarethneshaꞌ ñetñapaꞌ aña atarr moenenet oꞌch anorryesoset allekma anen ñeñth atarr amhchaꞌnaꞌtpoꞌ entyenet. Jesúsñapaꞌ entapanet ñeñth ateth moenenet ñet oꞌch xha ommoꞌchyesoset. Allempoñapaꞌ ateth otapanet:

8—Ñerraꞌm esempo awaꞌñarethes oꞌch serrallmeꞌchapreteñaꞌ ñeñth senaꞌtetsa, sommoꞌcheñothpaꞌ amach arra sanorratsetyesoso allekma anen ñeñth atarr amhchaꞌnaꞌtpoꞌ entyenet. Ñetña chentaꞌpaꞌ oꞌch wapoet ñamet. 9Aneꞌtañ ñeñth sewaꞌñeneꞌ allowenes ñañapaꞌ oꞌch wapa pesho oꞌch otaph: “Theꞌpaꞌ oꞌch petanterra arroth, all phanen theꞌpaꞌ oꞌ wapaña ñeñth panorrpoeꞌ peneꞌ all phanen ñeñth atarr amhchaꞌnaꞌtpoꞌ entyenet.” Phaña allempopaꞌ atarrchaꞌ pepenkëñoth petanterra oꞌch aweph allchaꞌ phanorros allekma anorryen ñeñth ama esosheꞌmayeꞌ entyeneto. 10Sapaꞌ atethchaꞌña sepha ñerraꞌm esempo waꞌñenset. Allempo sexhap all waꞌñenset sapaꞌ allach sanorros allekma anorrxhaꞌtyen ñeñth ama esosheꞌmayeꞌ entyeneto. Allñapaꞌ oꞌch wapa aneꞌtañ, ñapaꞌ atethchaꞌ otoseph: “Masheñchaꞌ phapaꞌ arrchaꞌ phanorros allekma anen ñeñth atarr amhchaꞌnaꞌtpoꞌ entyenet.” Atthochña allowen awaꞌñarethneshaꞌpaꞌ oꞌch entapet phapaꞌ atarr amhchaꞌnaꞌtpoꞌ entyenpet. 11Tharroꞌmar allowen ñeñth eꞌñe kowen entetsa eꞌñe pommoꞌcheñoth ñetña tsapathonethpaꞌ amach esosheꞌmayeꞌ entereto. Tharraña allowen ñeñth ama esosheꞌmayeꞌ entetso theꞌ, ñeñthña tsapathonethpaꞌ atarrchaꞌ kowen enteret.

12Allempoñapaꞌ ateth otan aneꞌtañ ñeñth waꞌñeneꞌ:

—Ñerraꞌm esempoch phorrtaten rreñets ñeñthchaꞌ serraꞌmoen aromtaña amapaꞌ ellerroneth amach eꞌñe aña pewaꞌñatsto ñeñth eꞌñe parro peyemtena ñamha ñeñth pemoꞌnasheñ pepen ñamha poꞌpotantañ ñeñth eꞌñe phamoꞌtseshaꞌ pepen amaꞌt ñamha alloꞌmarneshaꞌ ñeñth atarr ekhllayorethet. Tharroꞌmar ñerraꞌm ñeñtha pewaꞌñenpaꞌ ñetpaꞌxhoꞌña tsapathoneth oꞌch alla waꞌñerrpet phamha. Atthoch tsaꞌterrpet. 13Tharraña ñerraꞌm esempoch phorrtat rreñets añeꞌnachña pewaꞌñaꞌyes ñeñth atarr wokchañetyets ñamha achokrañaxhno ñamha ñeñth chekaꞌreꞌpaxhno ñamha aporoꞌyethexhno. 14Atthochña phapaꞌ atarrchaꞌ kosheñtsoꞌtseneph tharroꞌmar ñetpaꞌ amach errothenoth alla tsaꞌterrpeto. Phapaꞌ esempowañenchaꞌña atsaꞌtaretheph allempoch atantatarethterra allowen ñeñth eꞌñe pokteꞌ es phaꞌyestseꞌth.

Arrpaꞌ all atmaꞌntatarethtena aneꞌtañ ñeñth atarr aton yexhkatateneꞌ rreñets

15Allempo eꞌmoeñet Jesús ateth serrpareꞌtatwanet, poesheñarrña ñeñth parro anorrxhenet ñeñth parro rrallmeꞌchenet, ñañapaꞌ ateth otan Jesús:

—Atarrchaꞌ kosheñtsoꞌtseney alloweney ñeñtheychaꞌ rrallmeꞌchapreterreꞌ Yompor all amhchaꞌtarethtena poeꞌntaño.

16Jesúsñapaꞌ tomaꞌntaterraneterr, ñeñthpaꞌ ateth oterraneterr:

—Eñall poesheñarr aneꞌtañ ñañapaꞌ oꞌch yexhkatatan atarr shonteꞌ aton rreñets. Allempoñapaꞌ otyesan shonteꞌ acheñeneshaꞌ ñeñthchaꞌ rrallmeꞌchapretenayaꞌ esempoch eꞌñe aꞌpotatwan rreñets. 17Oꞌña xhap allempo eꞌñe aꞌpotatwan rreñetspaꞌ ñañapaꞌ moeñan paꞌtarwasañer ñeñthchaꞌ waꞌñaꞌyenayaꞌ allowen acheñeneshaꞌ ñeñth otarethtatsa awaña. Ñeñthña paꞌtarwasañerpaꞌ ateth otosan acheñeneshaꞌ:

—Theꞌpaꞌ oꞌkaꞌye eꞌñe aꞌpotarethetwaña rreñets sonaxhaꞌt oꞌch serrallmeꞌchapretenaꞌ. 18Tharraña ñeñth awaꞌñarethexhnopaꞌ ñetñapaꞌ ama eseshaꞌ tatso. Ñewa, ñeñth ñanom poesheñarrpaꞌ ateth ot: “Napaꞌ theꞌpaꞌ oꞌkaꞌye nerañtha pats, oꞌchkaꞌye awen oꞌch nekwaꞌyeñaꞌ. Photwerchaꞌ phamoꞌmteꞌ peretnerrnepaꞌ, napaꞌ amachkaꞌye neto.” 19Poꞌpsheñeñpaꞌxhoꞌña ateth ot: “Napaꞌxhoꞌña oꞌkaꞌye nerañtha xharrana toro poꞌyuntowen eꞌñe epnaꞌttsokma; oꞌchkaꞌye awen oꞌch netpach tarwasateꞌ. Photwerchaꞌ phamoꞌmteꞌ peretnerrnepaꞌ, napaꞌ amachkaꞌye neto.” 20Poꞌpsheñeñpaꞌxhoꞌña ateth ot: “Napaꞌ errtenkaꞌye senaꞌtetsa ñeñthoꞌmarña napaꞌ amachkaꞌye eshek neto.” 21Ñeñthña atarwasañer ateth otyes acheñeneshaꞌpaꞌ ñañapaꞌ awerr pamoꞌmtayesho, serrpareꞌtatwerran pamoꞌmteꞌ ateth otyeset ñeñth waꞌñaꞌyeseñ. Aneꞌtaññapaꞌ ñeñthña atarr atsrreꞌmateꞌ. Patsrreꞌmoeñothpaꞌ ateth oterranerr paꞌtarwasañer: “Theꞌpaꞌ oꞌch awerrperr eꞌñe thayekma ñamha all anetso allekma atarr chopeñeꞌchyen shonteꞌ acheñeneshaꞌ. Allothchaꞌña pewapaterr wokchañneshaxhno ñamha achokrañaxhno ñamha aporoꞌyethexhno ñamha chekaꞌrepaxhno.” 22Paꞌtarwasañerñapaꞌ atethxhoꞌ perrerr. Allempo werra ateth otwerranerr pamoꞌmteꞌ: “Nomporchaꞌ ñeñth ateth photenpaꞌ theꞌpaꞌ oꞌ eꞌñe ateth nephowa. Tharraña allchaꞌ anorrxhaꞌtyes ñeñthchaꞌ rrallmeꞌchosetspaꞌ orameñ.” 23Pamoꞌmteꞌñapaꞌ ateth otererr: “Theꞌpaꞌ oꞌch alla awerrperr allampañoꞌmar all shonteꞌ thoñexhno allekma chopeñeꞌchyen acheñeneshaꞌ. Allñapaꞌ atarrchaꞌ photareꞌtyes acheñeneshaꞌ onetepaꞌ arr nepakllo atthoch eꞌñe chorra acheñeneshaꞌ arr nepakllo. 24Poꞌñoxh theꞌ napaꞌ oꞌch notas, ñeñth ñanom newaꞌñatyeseñpaꞌ ñetña theꞌñapaꞌ amaꞌt eꞌñe poesheñarrothetapaꞌ amach rrallmeꞌchapreterrneto atthoch kosherret nesho.”

Añ poktetsa oꞌch eꞌñe yeswanem ñeñth eꞌñe yokpa atthoch yokther Cristo eꞌñe poktakma

25All oñemyen Jesúspaꞌ shonteꞌ acheñeneshaꞌ kothaꞌwaneneꞌ. Ñañapaꞌ kowaꞌnmanet alleneth shontenetpaꞌ ateth otnomanet:

26—Ñerraꞌm eseshaꞌ moeneꞌ oꞌch kotherren eꞌñe poꞌñoxh, añ nemnen oꞌch atarr nanak morrentennet. Elloch metaneñet attho atarr morrenteñet pompor, amaꞌt ñamha pachor, amaꞌt ñamha poethapor ñamha poechemereshaꞌ, paꞌmoꞌnasheñneshaꞌ, poꞌxhaneshaꞌ. Attho atarr morrentennet ello metaneñet attho atarr morrentenet ñañeñeta ñeñth attho korrenet arr patsro. Ñerraꞌm erraꞌtsen ama attheyeꞌ nemorrentenayepaꞌ nañapaꞌ amach errothenoth neyochreshaꞌ neperraneto. 27Tharroꞌmar ñerraꞌm erraꞌtsen ama eꞌñeyeꞌ sewanmaye ñeñth ateth moenenet eꞌñe ñokpoeta atthoch kotherrnet eꞌñe poktakma, nañapaꞌ amach errothenoth neyochreshaꞌ neperraneto. Ñeñthpaꞌ añ tomaꞌntena ateth ñerraꞌmrratheꞌ xho sechechnen sekorsoch allchaꞌ semoeroxhta samha. 28Ñeñthoꞌmarña ñerraꞌm erraꞌtsenothes moeneneꞌ oꞌch neyochreshaꞌ neperres, añ poktetsa xhoch ñanom sokthapeꞌch, eꞌñetheꞌ pokteꞌ senteñ oꞌch seswanom ora allowen ñeñth ateth notenes. Ñeñthpaꞌ atethchaꞌ netmaꞌntacha ateth ñerraꞌmrratheꞌ eseshas moeneneꞌ oꞌch sathomat sepakëll atarrpoꞌpaꞌ añ sepalltena xhoch ñanom sanorr allchaꞌ sokthapeꞌch errpontheꞌ tsaꞌtena. Ñatoꞌ eñalltheꞌ allpon kelle atthoch mameshapaꞌ oꞌch saꞌpoeꞌ. 29Ñerraꞌm ama ateth ñanom sokthapeꞌchenopaꞌ ñatoꞌ oꞌch sathomatañ ñanom alloch echarr sorrat sepakëll, ñerraꞌm xha sewañapes kelle atthoch saꞌpañ sepakëllpaꞌ atthach sekaxhpoeꞌ. Acheñeneshaꞌña ñeñth senteneꞌpaꞌ xhach cheꞌtatsetaset; 30ñetñapaꞌ atethchaꞌ otyeset: “Añ acheñerpaꞌ oꞌ thomataneñña atarrpoꞌ paꞌpakëll, alla wañapes kellepaꞌ ama esoyeꞌ aꞌpatano paꞌpakëll.” 31Ñeñthara kothaphñatser oꞌch alla netmaꞌntacha poꞌpoñoneth. Ateth ñerraꞌmrratheꞌ poesheñarr amhchaꞌtareth ñerraꞌm añ kothapeꞌchen oꞌch kellaratan poꞌsolltarer epoet poꞌpsheñeñ amhchaꞌtareth poꞌsolltarer xhoch ñanom anorr allchaꞌ eꞌñe kowen kothapeꞌch. Allempopaꞌ atethchaꞌ ot: “Napaꞌ eꞌñekaꞌ xharraꞌ mila nechen nesolltarer; poꞌpsheñeñña amhchaꞌtarethpaꞌ echenan poꞌsolltarer epoch xharraꞌ mil. Taꞌm, pokteꞌtheꞌ oꞌch nemñe xharraꞌ mil nesolltarer ñeñthchaꞌ poktapoeꞌ epoch xharraꞌ mil solltarneshaꞌ ñeñthchaꞌ yewapoya. Taꞌmkaꞌye aꞌmchechatwettheꞌkaꞌye —shonteꞌ.” 32Allempoña oꞌch ateth kothapeꞌchwapaꞌ ñerraꞌm ama erroth apenayeꞌ eñchepaꞌ allempo ama aponmarethtenetaꞌ ñañapaꞌ oꞌch moeñan allponsheña ñeñthchaꞌ ateth otosawet: “Yapaꞌ añekop yen oꞌch yaꞌpoktaterr ñoñets eꞌñe kowen eꞌñe attha, amach yekhllarannaꞌtatsto.” 33Ñeñthoꞌmar notenes, ñerraꞌm eseshas ama eꞌñe pokteyeꞌ senteñe oꞌch seswanom ora ñeñth allpon sechen, nañapaꞌ amach errothenoth neyochreshaꞌ neperrso.

Arrpaꞌ all atmaꞌntatarethtet ateth ñerraꞌm pos oꞌch wañ poꞌposerrteñapaꞌ oꞌwañchaꞌ sherbhaꞌ

(Mt. 5.13; Mr. 9.50)

34‘Ñewa, yapaꞌ yeñoteñ pospaꞌ atarr kowen sherbenan allowen acheñeneshaꞌ arr patsro. (Allowen ñeñth poꞌñoxh neyochreshaꞌ nepen ñetñapaꞌ atarr sherbenet atthet ñerraꞌmrratheꞌ pos atarr kowen sherbeney.) Tharraña pospaꞌ ñerraꞌm oꞌch wañerr poꞌposerrteña amach errothenoth ellopaꞌ yaꞌposerrtatere. 35Atthoña amach es sherberro amaꞌt eꞌñe koñeꞌtha. Amaꞌt atthoch yetnarrataterr allo patspaꞌ amaꞌt ñeñthekpapaꞌ amach sherberro; ñeñthoꞌmarña amaꞌt ñeñthekpapaꞌ amach yaññoꞌtatsche. Ñeñthoꞌmarña oꞌch yewaporeꞌter aꞌyo. Ñerraꞌm eseshastheꞌ neꞌmhñoteneꞌpaꞌ xhaponasepaꞌch seyoxhro ñeñth ateth neyxhatenes.

Currently Selected:

San Lucas 14: ame

Highlight

Copy