Hebreos 6

1-3Alloꞌnepaꞌch yesen eꞌñe yexhaꞌnmoeꞌ Yompor pokthaphña amaꞌt ñeñth atarr echarr. Allochñapaꞌ yepeñoth ateth moenen ñapaꞌ eꞌñech poꞌn enteneyña Yompor. Ñewa, sapaꞌ oꞌ eꞌñe seyxherr ñeñth ñenmath yexhataset Cristokop, atthoch sekexhpaꞌwerrña ñeñth ateth seyexhkatyeseñ ñeñth ama aꞌkeshphatañeyaye. Añkaꞌyeña oꞌ ello sokthapeꞌcherr kowen Yomporekop xhokaꞌyeña oꞌ sameꞌñera. Oꞌ señoterr ñamha ñeñth ateth yapatarethtena Yomporekop, ñamha attho xhokma yenen yot ñesheto ñeñth ameꞌñatsa. Ñamha oꞌ saꞌyxhatarethterra atthoch yetanterra ñamha atthoch esempowañenpaꞌ yaꞌkrarethterrach alloweney errothenchaꞌ entyeswerrey Yompor, ñatoꞌ kowentheꞌ yephaꞌyen, ñatoꞌ amatheꞌ kowenayeꞌ yepeno. Ñeñth oꞌ yexhatwanmaset awañotheñ Cristokoppaꞌ amachña ñeñthaña alla seserrpareꞌtameꞌterreꞌthe. Añchaꞌña alloꞌnepaꞌchña yesen eñotnomoeꞌ poꞌpoñexhno Yompor pokthaphña ñerraꞌm Yomporchaꞌ yemnateꞌ.

4-6Tharroꞌmar yeñoteñ ñerraꞌm eseshaꞌ oꞌ xhapoña poeyoxhro ñeñth kowen enten Yompor ñamha ñerraꞌm oꞌ agapan Yompor ñeñth apoeney atthochña yapaꞌ korretsayach thayotheñ errponowañen poeꞌntaño, ñamha ñerraꞌm oꞌ agapan Yompor Poekamkëñ ñamha ñerraꞌm xho yomenana Yompor poꞌñoñ ñamha ñerraꞌm eñotwanman Yompor poꞌwamenk ñeñth ama awañañatheyaye, tharraña ñerraꞌm oꞌch alla poerrerret, ñetpaꞌ amach errothenoth alla yokthapeꞌchaterraneteꞌthe atthoch kothapeꞌcherret etserra kowen Yomporekop. Tharroꞌmar ñeñth acheñerpaꞌ añ tomaꞌntena ñeñth atarr moeneneꞌ oꞌch alla korsoꞌtamperranerr poꞌpocheño Yompor Poechemer; atthoña oꞌ alla achmhareꞌtererr alloꞌtsaꞌyen shonteꞌ acheñeneshaꞌ. 7Ñeñth ateth petsapaꞌ oꞌch netmaꞌntacha ñeñth ateth pena pats. Ñewa, allempo eꞌñe kowen wapotamphsatenan Yompor pats ñerraꞌm oꞌch chepares paꞌnamen narmetsoxhno ñeñthchaꞌ koshateneꞌ pamoꞌmteꞌ ñeñth nareꞌteneꞌ, Yomporña xhokma aꞌthoreneꞌ ñeñth pats eshekchaꞌ paꞌnamen yexhkëtsa all. 8Tharraña ñerraꞌm aña cheparsats paꞌnamen ajaxhno ñeñth ama kowenayaye, ñeñthña patspaꞌ amach es sherbeno. Yomporeshothpaꞌ arrnomarethterrach atthoch aꞌpoyarethterra.

Attho eꞌñe yeyemteñoth Yompor xhokmach yekwen ñeñth oꞌpatatyenya

9Tharraña amaꞌt ateth notensoñ masheñneshachaꞌ sa ñeñthes atarr nemorrentena, napaꞌ nekwenes ñamha neñotenes sapaꞌ oꞌch alla sorrtatyerr eꞌñe kowenareꞌ ñeñth ateth orrtatyen allowen ñeñthchaꞌ keshperrtsa. 10Tharroꞌmar Yomporpaꞌ eꞌñe pokteꞌ es pennay. Ñapaꞌ xhokma poꞌñoxh entenes ñeñth ateth sethorraꞌyena ñokop ñamha attho semorrenteññaña allowen ñeñth poeyochreshaꞌ pen Parets. Ñeñthoꞌmarña eꞌñe sameꞌñeñoth ñapaꞌ eꞌñe kowen seyenpaꞌyeñ allowen masheñeshaxhno ñeñth poeyochreshaꞌ pen ña, amaꞌt themeꞌttsen atthekma sepena. 11Añña atarr nemnen amaꞌt allowenespaꞌ alloꞌnepaꞌchña sesen orrtatyesnomoeꞌ ñeñth kowen enten Yompor, eꞌñechña soksheñeshokmañen sorrtatyeswanom allowen ñeñth kowen enten Yompor eꞌñe ateth soksheñoth xhokma seyenpaꞌyeñ ñeñth poeyochreshaꞌ pen Parets. Atthoña eꞌñe seyemteñoth Yompor sekwen ñeñth oꞌpatatenya. 12Atthochña amach xha sekhllatsto Yomporekop, añchaꞌña sepena samha ñeñth ateth phaꞌyena poꞌpotantañexhno ñeñth pameꞌñeñothet Yomporpaꞌ amaꞌt errothwanenoꞌtsaꞌyenet ñetpaꞌ xhokma awantaꞌwaneñet. Atthochña eꞌñe oꞌpatweññañet Yompor ñeñth oteney Yompor ñeñthchaꞌ apwerrey.

13Tharroꞌmar yapaꞌ yeñoteñ xhokmach apwerrey ñeñth ateth oteney. Ñewa, yeñoteñ Yompor awathpaꞌ ateth otaneꞌth Abraham ñeñthchaꞌ ateth perrñañ tsapathoneth poꞌmhrenñekop. Eꞌñe ñañeña paꞌsoꞌchño ateth otan Abraham tharroꞌmar ama eñalle poꞌpoñ ñeñth atarr awamenkatheshaꞌ ateth ñerraꞌm ña allchaꞌ aꞌpoktatan poꞌñoñ. 14Ñeñthoꞌmar eꞌñe ña paꞌsoꞌchño ateth otan Abraham: “Na poꞌñoxhpaꞌ atarrchaꞌ nebensareꞌtamphsaph atthochña naꞌmhraterrnaph ñeñthchaꞌ pemhreneñ peperr.” 15Ñeñthoꞌmarña Abrahampaꞌ eꞌñe poeyemteñoth Yompor poꞌñoñ ateth oteñ ñapaꞌ ama kexhpoeñe, xhokma kowenan ñeñth ateth oteñ Yompor. Ñeñthoꞌmarña Abrahampaꞌ poꞌñoxh agapater Yompor ñeñth ateth ocheꞌth awathotheñ. 16Ñewa, yapaꞌ yeñoteñ acheñ arr patsro ñerraꞌm es moenenet oꞌch es otenet eꞌñe poꞌñoxh, ñetpaꞌ oꞌch otenet eꞌñe añ paꞌsoꞌchño ñeñth atarr awamenkatheshaꞌ. Ñerraꞌm ateth penetpaꞌ atthoña eñoteñet ñeñth ñoñetspaꞌ oꞌ anarethta, oꞌwañchaꞌ alloꞌna otnareꞌtannaꞌtnenet poꞌñoñoꞌmaret. 17Yomporpaꞌxhoꞌña eꞌñe atthekma nan poꞌñoñ eꞌñe ña paꞌsoꞌchño tharroꞌmar ñapaꞌ moeneñ oꞌch eñotateney amachña aꞌpoꞌpoñetamperryeña poꞌñoñ, alloweney ñeñthey oꞌpatatena ñeñth ateth oteney oꞌch apoerrey. 18Ñeñthoꞌmar yeñoteñ Yomporpaꞌ eꞌñe epoch eñotateney eꞌñe poꞌñoxh atethchaꞌ perrnay, ñamha Yompor poꞌñoñpaꞌ ama xhoyeꞌ shekënye. Ñeñthoꞌmarña eꞌñe yeyemteñoth ñapaꞌ yeñoteñ poꞌñoxhpaꞌ aꞌkeshphatwerreychaꞌ ñeñth ateth oteney. Ñeñthoꞌmarña yekweñ amaꞌt alloweney ñeñthey eꞌneneꞌ ña ñachña yaꞌkeshphatwerreꞌ. 19Ñeñthoꞌmarña yeñoteñ ñeñth yekwen ya oꞌch aꞌkeshphatwerrey Yompor ñeñthpaꞌ eꞌñe poꞌñoxh, ñeñth ama awañañayaye. Ñeñthoꞌmarña yeñoteñ eꞌñe yeyemteñoth ña yekamkëññapaꞌ eꞌñe kowenoꞌtsen amach errothenoth chenkërro. Yeyemteñoth Yompor ñeñthpaꞌ añ tomaꞌntena ñeñth orreneꞌ barco oño ñeñth otenet ancla. Allochña barcopaꞌ amach errothenoth chenko. Ñeñth attho yeyemteña Yompor ñeñthña anclatetsña yekamkëñekop ñamha ñeñthpaꞌ eꞌñe poꞌñoxh allo eꞌñe womenk orrena yekamkëñ tharroꞌmar ñeñthpaꞌ Yomporeshoth anareth eꞌñe allowanen ñeñth alloꞌtsen Parets paꞌpakllo poeꞌntaño, eꞌñe allowanen alloꞌtsen besom allo yottampeññañet Parets poꞌponer. Allkaꞌyeña anarethtenaña ñeñth tomaꞌntenaya ancla attho ya yeyemteña Yompor. 20Tharroꞌmar eꞌñe all Partseshopaꞌ allña oꞌ xherrña Jesús ñeñth oꞌ otamperrya allchaꞌ aꞌpoktatosnay eꞌñe kowen yokop Pomporesho. Allñapaꞌ oꞌ korneshatwerr Partsesho. Attho oꞌ korneshatwerr ñeñthpaꞌ amach wañerro amaꞌt errponaña. Eꞌñe ateth oꞌ allsensarethterra oꞌch korneshatwerr ñerraꞌmrratheꞌ ateth korneshateꞌth awath Melquisedec.

Currently Selected:

Hebreos 6: ame

Highlight

Copy