2 San Pedro 2
2
Ñeñth ashkañtetsa amach Yomporeyeꞌ poꞌñoñ serrpareꞌteno
(Jud. 4-13)
1Theꞌpaꞌ oꞌch notas ñamha poꞌpoñ. Awathpaꞌ orrteꞌth ashkañ ñeñth ama Yomporeyeꞌ poꞌñoñ orrtateteꞌthe, ñeñthpaꞌ attha shekaneꞌth israelenaꞌtarneshaꞌ. Sapaꞌxhoꞌña atthekmach orrtonasa ñeñth amach Yomporeyeꞌ poꞌñoñ aꞌpotheno. Eꞌñe aꞌnawapaꞌ oꞌch yexhatas poꞌpoñ pokthaphña. Tharroꞌmarchaꞌ ñetpaꞌ ateth pet atthothchaꞌ aꞌchenkatatwerres. Oꞌch aꞌnasotamphsasa attho Yepartseshar Cristopaꞌ ñeñthña tsaꞌterroyaña yoꞌchñar. Tharraña ñetpaꞌ machayothach aꞌchenkatatwerret ñañeñeta. 2Esempoch orrta, shonteꞌch acheñ ñeñthchaꞌ ameꞌñaya atethchaꞌ yexhatanet. Ashkañpaꞌ eꞌñech pokteꞌ entan amaꞌt ñeñth atarr yexheneꞌ sosyaꞌtsañ. Ñeñthoꞌmarña eꞌñe ñothoth acheñeneshaꞌpaꞌ oꞌch achmhareꞌteññañet Cristo poꞌñoñ ñeñth poꞌñoxh Yompor poꞌñoñ. 3Eꞌñe poeyeꞌcheñothpaꞌ oꞌch shekaset atthoch yorampeswas sekhllayor. Eꞌñe pokthaphñothpaꞌ shekasetchaꞌ. Tharraña amaꞌt awathotheñ Yomporpaꞌ oteꞌth awoꞌch moeñanet koñchaꞌpoetso. Yomporpaꞌ ama orrena oteꞌthe, ama poeno poꞌñoñ; ateth oten, atethchaꞌ pha. Ñeñth ama Yomporeyeꞌ poꞌñoñ yexhatetsopaꞌ chenkaꞌwerretchaꞌ.
4Tharroꞌmar awathpaꞌ amaꞌt Yompor poꞌmhllañotheñnaneshar allempo athpareꞌcheteꞌthpaꞌ ama eseshaꞌ keshphatseꞌthe. Yomporpaꞌ allempoña waporeꞌtaneteꞌth oꞌpono koñchaꞌpoetso, allñapaꞌ all ewankarethtenet chekmeto. Allothpaꞌ amach xhaꞌnerreto, allothña esempowañenpaꞌ aꞌkoñchatarethterrach. 5Ñamha acheñeneshaꞌ awathpaꞌ ama eseshaꞌ keshphatso allempo nanak athpareꞌcheteꞌth Yompor. Ñañapaꞌ eꞌchophamphsanet oñ, ora errapharen patso. Ñaptha Noé aꞌkeshphat epoet kanxherrsheña ñeñth pamoꞌtseshaꞌ. Tharroꞌmar Noépaꞌ serrpareꞌteꞌth ñeñth ateth poktetsa Yomporekop. 6Ñamha awathpaꞌ ñeñth yexhatseꞌth anetso ñeñth paꞌsoꞌcheñ Sodoma ñamha Gomorra, Yomporpaꞌ ethomamphsanet paꞌnetser. Attho ethomampeswerranet paꞌnetserpaꞌ allowenetpaꞌ eꞌñe poktakma poywerret. Ora eꞌñe tsapñereꞌtwet, oꞌ aꞌchenkatwerranet eꞌñe poktakma. Attho theꞌpaꞌ eñotatenan poꞌpsheññexhno ñerraꞌm oꞌch athpareꞌteñet Yomporpaꞌ atthekmach perraneterr. Ñeñthoꞌmarña yeñoteñ erraꞌtsenchaꞌ orrtateneꞌ ñeñth ama Yomporeyeꞌ poꞌñoñ aꞌpotheno, ñetpaꞌxhoꞌña atthekmach chenkaꞌwerret ñamet. 7Tharraña Yomporpaꞌ aꞌkeshphatan poesheñarr ñeñth paꞌsoꞌcheñ Lot ñeñth eꞌñe pokteꞌ es phatseꞌth. Ñañapaꞌ epayeꞌ entenan pamoꞌtseshaꞌ atthoꞌ phaꞌyeseteꞌth ñeñth nanak sosey enten Yompor. Ñapaꞌ epayeꞌ llekacheteꞌth. 8Ñapaꞌ eꞌñe kowen kothapeꞌcheꞌth. Pamoꞌtseshaꞌñapaꞌ nanak phaꞌyeseteꞌth ñeñth ama kowenayaye. Ñañapaꞌ epayeꞌ entapretaneteꞌth ñeñth kothapeꞌcheteꞌth ñet, ñamha epayeꞌ eꞌmapretaneteꞌth attho eñosatseꞌtyeseteꞌth. Ñañapaꞌ epayeꞌ llekaneteꞌth tharroꞌmar ñapaꞌ eꞌñe kowen kothapeꞌcheꞌth poeyoxhro. 9Ñeñthoꞌmarña Yomporpaꞌ eñoteñ atthoch aꞌkeshphatan ñeñth eꞌñe pokteꞌ es pets, ñerraꞌm esempo oꞌ wapanet topateñets womenk. Ñamha eñoteñ atthoch moeroxhtatan ñeñth ama pokteyeꞌ es petso. Alloꞌnach moeroxhtatnenanet esempowañenchaꞌ akrarethetwerra allowen acheñeneshaꞌ. Allempopaꞌ moeñwerranetchaꞌ koñchaꞌpoetso.
10Poꞌñoxhpaꞌ koñchatanchaꞌ ñeñth aña maꞌyoxhrenaya ñeñth attha moenatseꞌtyets eꞌñe poꞌchtsoth, attho nanakchaꞌ sosyareꞌ yexhaꞌyenet, añach eꞌñe yomenet ñeñth eꞌñe ñet pokthaphñet. Ñeñthoꞌmarña amaꞌt Yepartsesharpaꞌ ama amhchaꞌnaꞌtpawoyeꞌ enteñeto, atthoña amaꞌt ñamha allowen ñeñth awamenkathetyetsapaꞌxhoꞌña eꞌñe achmhareꞌtweñet. Amach amhchaꞌnaꞌtpawoyeꞌ enteñeto. 11Tharraña Yompor poꞌmhllañotheñnaneshar amaꞌt nanak awamenkathet, ñamha amaꞌt nanak amhchaꞌtarethet, ñetñapaꞌ amaꞌt Yomporeshoꞌtsenet, ama sasareꞌteñetoña ñeñth awamenkathtetsa.
12Tharroꞌmar ñeñth ama Yomporeyeꞌ poꞌñoñ yexhatetso ñetñapaꞌ sasareꞌtenet tharroꞌmar ama es eñoteneto, eꞌñe atthet ñerraꞌm es berr ñeñth ama es eñotetso. Ateth moenaꞌyenetpaꞌ atethchaꞌ penet. Ñeñth ateth eñalletetsa ateth ñerraꞌm es berr; tsapathonethpaꞌ oꞌch rromoeñet. Oꞌch rromoetpaꞌ oꞌch moetset. Ñeñth ama Yomporeyeꞌ poꞌñoñ yexhatetsopaꞌ ñetpaꞌxhoꞌña esempowañen atthekmach aꞌkllatwarethterret. 13Tharroꞌmar atthoch atsaꞌtatwarethterret allowen poꞌchñaret. Tharroꞌmar eꞌñech ellapeneteꞌth koshatseꞌtatset ñeñth ama pokteyaye. Amaꞌt attho rrallmeꞌchapretasetpaꞌ nanakchaꞌ penkatenset tharroꞌmar ñetpaꞌ nanak sosyareꞌ es penet. Eꞌñech poksheñeshaꞌ moeneñet oꞌch shekaset.
14Ñeñth ama Yomporeyeꞌ poꞌñoñ yexhatetsopaꞌ xhokmach moeneñ oꞌch kowaꞌyesan koyaneshaꞌ atthoch nanak kañoreshaꞌtenet. Amach wañeno attho kothapeꞌchenet sosey. Nanakchaꞌ shekëñet koyaneshaꞌ ñeñth ama tama es eñoto atthoch agëñet. Añach yexhenet attho es yeꞌchatseꞌtyenet. Tharraña ñeñth ateth petsapaꞌ oꞌpatatarethetchaꞌ koñcheñets. 15Tharroꞌmar ñetpaꞌ oꞌ poeswerret ñeñth poktetsa. Oꞌ saꞌnmet Yompor nanak ellaphar. Ñetpaꞌ kothaꞌneñet ateth peꞌth Balaam ñeñth Beor poechemer. Ñapaꞌ awathpaꞌ añach kowen enteꞌth oꞌch phaꞌyesa ñeñth ama pokteyaye alloña ganeꞌth shonteꞌ kelle. 16Allempoña ateth peꞌth Balaam ñeñth ama pokteyaye, pashanorñapaꞌ oꞌ cheꞌptareꞌch, atthoꞌ eños ateth ñerraꞌm acheñ eñets, amaꞌt ashenpaꞌ yeñoteñ ama eñeno. Oꞌña eñoswapaꞌ Balaamñapaꞌ allempotheñña oꞌwañ ateth phaꞌyesan sosey.
17Ñeñth ama Yomporeyeꞌ poꞌñoñ yexhatenetopaꞌ ñetñapaꞌ amach es sherberrtso. Ñetpaꞌ amaꞌt atthetañ ñerraꞌmrratheꞌ oñ alloth potenpaꞌ theꞌñapaꞌ oꞌ masowa. Ñetpaꞌ amach es sherbhatso amaꞌt atthetañ ñerraꞌmrratheꞌ os, tharraña ñerraꞌm oꞌ matach mhorr aꞌyopaꞌ, amach wato. Tharraña ñeñth ateth petsapaꞌ oꞌpatatarethchaꞌ all ama machekmeto oꞌpono. 18Ñamha nanakchaꞌ ommoꞌchenet attho phaꞌyenet ñeñth nanak sosyareꞌ. Ñamha oꞌch aꞌsecheñet poꞌpsheñeñ atthoch oꞌch phachet ñeñth nanak moenenet poꞌchets atthothchaꞌ aꞌpsatarethterret, allempoñapaꞌ oꞌchxhoꞌ alla poerrerret. Shonteꞌ acheñ ñeñth eꞌñe etserra poeswanmoeꞌ ñeñth ateth yexhaꞌyeseteꞌth ñeñth nanak sosyareꞌ, tharraña allempoñapaꞌ oꞌch alla moenereterr ñeñth oꞌ poeswanmoetañ awath pokthaphñet. 19Ñeñth ama Yomporeyeꞌ poꞌñoñ yexhatetsopaꞌ oꞌch alla oterraneterr: “Ama palltenoña oꞌch es yeswanom. Yapaꞌ eꞌñe kowenoꞌtseney. Yokoppaꞌ ama eñalleña ñeñthchaꞌ yeyoreꞌterreꞌ.” Amaꞌt ateth oteneñ ñeñth athpareꞌtetspaꞌ tharraña napaꞌ oꞌch notas, ñeñth atethpaꞌ aña yexhenet eꞌñe ñet pokthaphña ñeñth nanak sosyareꞌ. Tharroꞌmar ñerraꞌm erraꞌtsen es yeyxhateneꞌ ñeñthpaꞌ ñeñthaña pomnaren yepeneꞌ. 20Atthekma ñerraꞌm ya. Oꞌ yeñotwer Yepartseshar Jesucristo, ñeñthara Yaꞌkeshphatañer yepen. Yeparrokmateñoth Cristo oꞌ yeswanom sosyaꞌtsañ. Tharraña ñerraꞌm yoꞌchñarpaꞌ alla aꞌpsaterrey Yompor poꞌñoñpaꞌ yañapaꞌ elloña nanakchaꞌ yoroxhenoꞌtseney. 21Awathpaꞌ yoroxhenoꞌtseney tharroꞌmar ama yentare ñeñth poktetsa Partsokop. Theꞌñapaꞌ oꞌ yenter ñeñth poktetsa. Tharraña ñerraꞌm theꞌpaꞌ oꞌch alla yepoerrerra ñamha oꞌch alla yepoeswerrñañ poꞌñoñ ateth oteney Parets, theꞌñapaꞌ yañapaꞌ elloña nanakchaꞌ yoroxhenoꞌtseney. 22Yapaꞌ poꞌñoxh ñerraꞌm oꞌch alla yepoerrerra xha yottena ñerraꞌmrratheꞌ ochek. Yapaꞌ oꞌch alla yepoerrerra “ateth ñerraꞌm ochek oꞌch aꞌtatsta; oꞌch aꞌtatsetwapaꞌ thematenpaꞌ oꞌch alla poerrerra alloꞌtsen paꞌtatsña.” Amapaꞌ xha yottena ñerraꞌm ateth pena ñamha chañcho. “Chañchopaꞌ oꞌch apa; oꞌchña apwapaꞌ oꞌchxhoꞌ alla poerrerra atstso allchaꞌ eꞌyaphnaꞌtwerra oꞌch alla atsotseñeꞌchwerr.” Amaꞌt awathotheñ ateth oteteꞌth ateth pena ochek, ñamha ateth pena chañcho.
Currently Selected:
2 San Pedro 2: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
