2 San Pedro 3

Esempoch werrmocha Cristopaꞌ orrterrach ñeñthchaꞌ achmhareꞌterreꞌ Yompor

1Theꞌñapaꞌ masheñneshachaꞌ ñamha noxhaneshachaꞌ oꞌch notas, poꞌpocheño oꞌ alla nekellkërrnaserr carta. Tharroꞌmar añekop nemneñ oꞌch alla nokthapeꞌchaterrserr, oꞌch alla neyerpaterrserr sokthaphña eꞌñe kowen. 2Ñamha oꞌch alla noterrserr, añ poktetsa amach sepsatsche ñeñth otyeꞌth ñeñth aꞌmhtaꞌyesayeꞌth Parets poꞌñoñ. Ateth otyeꞌthpaꞌ atethchaꞌ etsoterra esempowañen. Ñamha amach sepsatsche ateth oꞌ otwas ñeñth Yompor poellsensarneshaꞌ. Ñetpaꞌ oꞌ yexhatwaset Yepartseshar Cristo poꞌñoñ ñeñthpaꞌ atethchaꞌ sepha, ñeñthara Cristo Yaꞌkeshphatañer yepen.

3Ñanom oꞌch señoch añ, ñerraꞌm esempoch oꞌ werrmocha Cristopaꞌ wapach ñeñthchaꞌ achmhareꞌteneꞌ Yompor pokthaphña. Ñeñthpaꞌ atthach kothapeꞌchen ateth moenatseꞌtyenet ñeñth kowen entenet poꞌchets. 4Pachmhareꞌteñothpaꞌ oꞌch otet: “Cristopaꞌ otnerr esempopaꞌ awoꞌch werra. Theꞌñapaꞌ ¿esoꞌmartheꞌ amoꞌ werroꞌ? Amaꞌt yatañneshañpaꞌ oꞌ kollaꞌwenet; themeꞌttsen yenten ora errapharen eꞌñe atthera ateth orrteꞌth awathotheñ allempo errteꞌ ayexhkatareth pats.” 5Ñetpaꞌ moeneñet oꞌch poeswerret attho awath Yompor eꞌñe poꞌñoñotha oꞌ yexhkatwan enet. Patspaꞌxhoꞌña eꞌñe poꞌñoñotha yexhkaꞌwa. Ñamha eꞌñe oñothpaꞌ yexhka añ pats. 6Awathpaꞌxhoꞌña eꞌñe poechopeñoth oñpaꞌ chenkaꞌwa pats allempo eꞌñe chorra oñ errapharen. 7Ñamha Yompor poꞌñoñothpaꞌ theꞌpaꞌ amaꞌt patspaꞌ esempowañenpaꞌ poywerrchaꞌ. Enetpaꞌxhoꞌña atthekmach poywerrchaꞌ ñamha. Aña kowen esempowañenchaꞌ akrarethetwerra allowen acheñeneshaꞌ. Allempochña mellapoterra. Ñeñthña ama ameꞌñenaye ñapaꞌ oꞌch moeñanet koñcheñtso.

8Tharraña theꞌña masheñneshachaꞌ ñamha noxhaneshachaꞌ amach attha es sepxhatsto. Añchaꞌña oꞌch señoch; Yomporpaꞌ entenan amaꞌt mil char ateth ñerraꞌm pamtharra. Amaꞌt ñeñth ñapaꞌ pamtharr enten, yokopñapaꞌ yenteñ ateth ñerraꞌm mil char. 9Poesheñaꞌtets acheñpaꞌ otenet oꞌ meten shonteꞌ char amoꞌ werro. Tharraña yapaꞌ yeñoteñ Yepartseshar xhokmach aꞌpoktatan poꞌñoñ oꞌch werra. Yapaꞌ yeñoteñ tharroꞌmar amoꞌ werro añ kowen ñatoꞌ esempoch oꞌch yokthapeꞌchwerr ello kowen Yomporekop alloweney. Ñapaꞌ nanak moerenya ama moeno amaꞌt eseshapaꞌ oꞌch chenkërra.

10Tharraña amaꞌt amoꞌ werro, esempopaꞌ machayothach werra. Ateth ñerraꞌm eñeth amach es yepxhenopaꞌ machayothach wapa tsapo. Eꞌñech ateth perraña ñamha Yepartseshar Cristo, eꞌñech machayotha werra. Allempopaꞌ wañerrchaꞌ enet. Eꞌñe poepotrrareñothpaꞌ wañchaꞌ. Wañchaꞌ ora ñeñth orretyetsa ñamha amaꞌt ora allpon eñall, pañnaꞌtwerrchaꞌ ñamha eꞌyowach. Tsoꞌñapaꞌ ñach eꞌñe eꞌyatwerreꞌ allowen ñeñth eñall. Patspaꞌxhoꞌña ñamha ora ñeñth ayexhkatareth arr patsropaꞌ poywach.

11Oꞌch poywapaꞌ oꞌch eꞌyowa ora esokmañen. Ñeñthoꞌmarña sapaꞌ añ poktetsa sokop. Oꞌch sokthapeꞌcherr eꞌñe kowen Partsokop, ñamha oꞌch sepomwerra sañeña eꞌñe Yomporekop. 12Ñamha añ poktetsa oꞌch sekwameꞌteñ esempoch yoroxhtatwer Yompor. Sapaꞌ oꞌch sethorreññaña atthochña mameshapaꞌ oꞌch werra. Esempoch yoroxhtatwer allempopaꞌ ñachña aꞌkrratwerreꞌ enet. Oꞌch aꞌkrratwerran enetpaꞌ allempochña potlleꞌchwerr eꞌñe poktakma. Ñamha ora ñeñth orretyetsa entopaꞌ ñeñthpaꞌxhoꞌña eꞌñech poywawerr. Oꞌch poywawerrpaꞌ oꞌch eꞌyowerra poktakma. Tsoꞌñapaꞌ ñach eꞌñe eꞌyatwawerreꞌ ora allowen ñeñth eñall. 13Tharraña yapaꞌ yekweñ oꞌch etsoterra ateth otnerrey. Ñapaꞌ ña yotnerreꞌ, eñalleterroꞌch poꞌpoñ enet etserrareꞌ, Patspaꞌxhoꞌña oꞌch eñalleterra etserra. Allñapaꞌ añach orrtatsa ñeñth eꞌñe kowenareꞌ es phaꞌyets.

14Ñewa, masheñneshachaꞌ ñamha noxhaneshachaꞌ oꞌch sekwameꞌteñ. Sekwameꞌteñothpaꞌ oꞌch semaꞌyoxhrena atthoch entwerres Yompor eꞌñe pokteꞌ, atthoch amach eñalle ñeñthchaꞌ sepenkateꞌ. Oꞌch kowen sentannena epas samoꞌtseshaꞌ. 15Ñamha oꞌch señoch eꞌñe esoꞌmartheꞌ amoꞌ werro Yepartseshar Cristo. Ñapaꞌ atarr moerenana allowen acheñeneshaꞌ. Ñapaꞌ moeneñ yapaꞌ oꞌch yameꞌñatwera acheñeneshaꞌ atthoch yekeshphaꞌwerra alloweney. Ñeñthara oꞌ kellkonas ñamha masheñ Pablo poꞌcartoth. Eꞌñe Yompor poeñotateñothey ateth kellkonas ñamha. Yapaꞌ nanak yemoerannena. 16Ora allpon Pablo poꞌcartothpaꞌ oꞌ eñotatey atethchaꞌ perra esempo. Patheꞌtets ñoñets ñeñth kellkëꞌth Pablopaꞌ nanak echarr yenteñ oꞌch yeñoch eꞌñe ateth oteney. Poesheñaꞌtets acheñ ñeñth ama tama es eñotopaꞌ atarr moññeꞌtoñeteꞌth Pablo poꞌñoñ. Tharroꞌmar ñetpaꞌ ama tama kosheññañeto Yompor poꞌñoñ ñeñthoꞌmarña xhokmach moeneñet oꞌch eꞌnaxhaterrñañet ateth oteney Pablo poꞌcartoth. Ñamha poꞌpoñ Yompor poꞌñoñ ñetpaꞌ xhokma moeneñet oꞌch eꞌnaxhaterrñañet ateth oteney. Ñetpaꞌ atthothchaꞌ aꞌchenkatatwerret ñetañeña.

17Ñeñthoꞌmarña masheñneshachaꞌ ñamha noxhaneshachaꞌ theꞌ napaꞌ oꞌ notwas necartoth amaꞌt ama etsotenaꞌ ateth notenes, atthochña señoch. Theꞌñapaꞌ señotaꞌthach allochñapaꞌ amach shekaseto attho es panten ñeñth athpareꞌtets. Saña theꞌpaꞌ amach sekexhpatsterrñañe Yompor poꞌñoñ ateth atarr sameꞌñena theꞌ. 18Añchaꞌña eꞌñe Yompor poemoereñothpaꞌ alloꞌnepaꞌch sesen kothapeꞌchnomoeꞌ eꞌñe kowen, ñamha alloꞌnepaꞌch sesen yemoetnomaya Yepartseshar Jesucristo ñeñthara Yaꞌkeshphatañer yepen. Yaꞌyeꞌchoxhtatoñepaꞌch thayotheñ eꞌñe errponowañen. Theꞌpaꞌ ñeñthach notas, ñeñthpaꞌ atthetepaꞌch Nompore. Allowa.

Pedro

Currently Selected:

2 San Pedro 3: ame

Highlight

Copy