2 Corintios 6

Ñeñth thorretsa Yomporekoppaꞌ añ poktetsa ñokop xhokmach orrtatenan ñeñth eꞌñe pokteꞌ enten Yompor

1Theꞌpaꞌ attho yethorraprecha Yompor, napaꞌ oꞌch notas, amach eꞌñe orrena sagapatstoñe Yompor poemoereña. 2Ñewa, ñeñthpaꞌ ateth oteney Yompor poꞌñon ñeñth anwareth awathotheñ, ñeñthpaꞌ Yompor ateth otets:

Allempo sexhoreꞌtenen napaꞌ eꞌñe neꞌmhñotenes ñeñth ateth sotenen, tharroꞌmar allempopaꞌ oꞌ xhap ñeñth poktetsa oꞌch sagërren. Nañapaꞌ oꞌch nagërres samha. Atthoña napaꞌ awoꞌt neyenpas tharroꞌmar allempopaꞌ oꞌ xhap ñeñth poktetsa atthoch naꞌkeshphaterres.

Ñeñthoꞌmarña na theꞌpaꞌ oꞌch notas, oꞌ eꞌñe xhap allempo ñeñth poktetsa oꞌch sagër Yompor, tharroꞌmar theꞌpaꞌ oꞌ xhap allempoch aꞌkeshphaterrey.

3Ñewa, yapaꞌ yeñoteñ ñeñthey ameꞌñetsa ñerraꞌm oꞌch yephaꞌyen ñeñth ama pokteyaye Yomporekop ñeñthña ama ameꞌñetsopaꞌ xhach yaꞌnpareꞌteñ atthoch ameꞌñerret ñamet. Ñeñthoꞌmarña yapaꞌ ama yemno amaꞌt mamesha oꞌch yaꞌnpareꞌch amaꞌt poesheñarra allochñapaꞌ atthoch ameꞌñeret ñamet Yompor. Ñamha ya attho yethorrena Yomporekoppaꞌ ama yemno oꞌch ateth entapretyet ñeñth ama kowenayaye. Allochñapaꞌ amach achmhareꞌteññañeto Yompor poꞌtarwas eꞌñe ya ateth yephatseꞌtyeñoth. 4Yapaꞌ añña yemnen amaꞌt errothenoꞌtsenya xhokmach yemneñ oꞌch yeñotach acheñeneshaꞌ poꞌñoxh eꞌñe kowen yethorrena Yomporekop ñeñth ateth poktetsa yokop ñeñthey thorretsa Yomporekop. Ñeñthpaꞌ añexhno ñeñthchaꞌña eñotaterrawet: allpon es yewapoyapaꞌ xhokmach yaꞌwanteñ eꞌñe kowen, amaꞌt allpon attho yemoeroxhtameꞌtyena, amaꞌt allpon ñeñth yepalltaꞌyena, xhokmach yaꞌwanteñ allowen. Amaꞌt ora allowen ñeñth allpon ñeñth allkatañtetsa, tharraña ñeñthpaꞌ xhokmach yaꞌwanteñ. 5Ñamha attho ashtaꞌyenyet, attho yottampenyet, attho amaꞌtoxhtanaꞌtenyet paꞌtsrreꞌmoeñothet, attho atarr nanak yetarwasen, attho yarepen thorratsa Yomporekop, attho yemoeroxhtena yachporrñoth, ñeñthña eñotateneꞌña allowen acheñeneshaꞌ attho yapaꞌ eꞌñe kowen yethorrena Yomporekop. 6Ñamha attho yeñmañeshaꞌ yokrrena, ama sosyaꞌtsañeyeꞌ yokthapeꞌchyeno, ñamha attho yeñoten ñeñth eꞌñe poꞌñoxh Yompor poꞌñoñ ñeñth ama shekëñtsoyaye, ñamha attho es yaꞌwantaꞌyen, amachña xha atsrreꞌmatenye, ñamha atthochña eꞌñe yaꞌmoerañtena, ñamha attho chorrenya Parets Poekamkëñ, ñamha attho eꞌñe kowen yemorrenteña allowen masheñneshaxhno, ñeñthpaꞌxhoꞌña ñeñthña eñotateneꞌña acheñeneshaꞌ attho yapaꞌ eꞌñe kowen yethorrena Yomporekop. 7Ñamha attho yeꞌñorena ñeñthpaꞌ eꞌñe poꞌñoxh ateth. Yomporña poꞌwamenk ñeñth awamenkath yepeneꞌ. Ñamha ñeñth eꞌñe pokteꞌ enten Yompor, ñeñthpaꞌ ñeñthña allo xhokma es yephaꞌyen, alloña yekhllarena Yomporekop, ñeñthpaꞌ alloña yemoñeññaña Yompor pokthaphña. 8Errotheno eꞌñech kowen entapretenyet, tharraña errothenoñapaꞌ amach kowenayeꞌ entapretenyeto; errotheno eꞌñech kowen eñosyenet yokop, errothenoñapaꞌ xhach sasareꞌtenyet. Errothenopaꞌ atthach entenyet ñerraꞌmrratheꞌ attha yeshkën, amaꞌt amach xhoyeꞌ yeshkëno. 9Errothenopaꞌ eꞌñech kowen emchorrenyet, errothenoñapaꞌ amach akwaꞌphsenayeꞌ entenyeto. Errothenopaꞌ awtsaychaꞌ rromoets, tharraña xhokmach alloꞌna yesen womhchetsa. Errotheno amaꞌtchaꞌ aꞌkoñchatarethey, yañapaꞌ korretsayach. 10Ñamha errotheno amaꞌtchaꞌ yellkënañpaꞌ tharraña xhokmach alla yoksherra. Ñamha amaꞌt eꞌñe wokchañeypaꞌ shonteꞌch koxhneshaꞌ kothaphñats yapaꞌyes poꞌpotantañ. Amaꞌt ama es yechenñe arr patsro, tharraña shonteꞌ esokmañen es yechen Yomporeshoth.

Attho Pablopaꞌ eꞌñe poeyoxhrokmañen morrentenana allowen ñeñth ameꞌñenaya Yompor

11Theꞌpaꞌ masheñneshachaꞌ corintoꞌmarnesha oꞌ neñotatwas ora allpon ñeñth ateth nokthapeꞌchen neyoxhro. Eꞌñe neyoxhrokmañen nemorrentensa. 12Nokoppaꞌ ama palltenmeñe amaꞌt mamesha atthoch nemorrenterrsa eꞌñe poktakma. Añña sapaꞌ xhokmatheꞌ sepalltena atthoch semorrenterrna namha. 13Napaꞌ eꞌñe nechemereshaꞌ nepenes. Ñeñthoꞌmarña oꞌch nenamas, oꞌch notas, attho napaꞌ eꞌñe neyoxhrokmañen nemorrentensa sa, sapaꞌxhoꞌña añ poktetsa eꞌñe seyoxhrokmañenpaꞌ oꞌch semorrenterrna namha.

Attho ama ayemoetpawo ñeñth ama ameꞌñetso

14Theꞌpaꞌ oꞌch noterrserr poꞌpoñ, amach eꞌñe seyemtatsche ñeñth ama ameꞌñetso, tharroꞌmar amach pathrrayeꞌ sokthapeꞌchweno. Acheñ ñeñth eꞌñe pokteꞌ es phaꞌyetspaꞌ amatheꞌ errothenoth yemtanoña acheñ ñeñth ama kowenayeꞌ es phaꞌyetso, tharroꞌmar ama atthekmayeꞌ es phaꞌyeneto. Ñatoꞌ oꞌch netmaꞌntacha ateth ñerraꞌmrratheꞌ chekmeteꞌpaꞌ amatheꞌ errothenoth alla epteto parro epoet poetareꞌ. 15Ñeñth ateth pena Cristo ñamha oneñeth amatheꞌ errothenoth kowen amoꞌtstannaꞌteto. Atthekma ñamha ñeñth ameꞌñetsapaꞌ amach pathrrayeꞌ kothapeꞌchweneto epoet ñeñth ama ameꞌñetso.

Attho yapaꞌ paꞌpakëll peney Yompor

16Ñamha ñeñth paꞌpakëll pen Yomporpaꞌ ama attheyaye ñerraꞌmrratheꞌ ñeñth ayexhkatareth ñeñth poꞌyomporer phaꞌyen poꞌpotantañ acheñeneshaꞌ arr patsro. Tharroꞌmar amaꞌt yapaꞌ alloweney ñeñthey ameꞌñenaya, yañapaꞌ paꞌpakëll peney Yompor ñeñth ama arromñatheshayaye. Añpaꞌ ñeñth ateth oten Yompor:

Napaꞌ xhokmach neyxhena eꞌñe ñesheto parro allchaꞌ nechopeñeꞌchen. Napaꞌ Poꞌyomporer pennet, ñetpaꞌxhoꞌña eꞌñe neyochreneshaꞌ nepenanet.

17Ñeñthoꞌmarña Yomporpaꞌ oteney:

Añ poktetsa oꞌch seswanemh ñeñth ama ameꞌñetso, allochñapaꞌ oꞌch sellopaꞌtetstatwa sokthaphña. Amach seyxhapretatsto sosyaꞌtsañ ñeñth orrtatyenet. Allochñapaꞌ atthochña napaꞌ oꞌch nagërres eꞌñe noksheñeshaꞌ.

18Allochña sapaꞌ atthochña eꞌñe Sompor seperren na, napaꞌxhoꞌña oꞌch nechemereshaꞌ nephowerres amaꞌt ñamha allowen nesñeneshowen. Ñeñthpaꞌ ateth ot Yompor ñeñth nanak partsotets.

Currently Selected:

2 Corintios 6: ame

Highlight

Copy