2 Corintios 5

Attho Yomporpaꞌ oꞌ aññoꞌterrnay ñeñthchaꞌ yepakëll yeperr all poeꞌntaño

1Yapaꞌ yeñoteñ ñeñthey arromñathey, yechetspaꞌ xhokmach wañerr. Eꞌñe mamekpa sherbeney añe patsro, ateth ñerraꞌmrratheꞌ yekërpachet ñeñth pokollasheꞌm all yemanatena. Ñeñth pokollasheꞌmpaꞌ mamekpach sherbhaꞌy. Yechetspaꞌxhoꞌña mamekpa sherbeney attho yokrrena añe patsro ñeñth yepakllasheꞌm yepen. Tharraña yapaꞌ oꞌ yeñoter ñerraꞌm esempoch yerroma, Yomporpaꞌ oꞌ aññoꞌterrnay ñeñthchaꞌ yepakëll yeperr all poeꞌntaño allchaꞌ yeyxhaꞌwerra, ñeñthpaꞌ amach awañañathterro. Ñeñthchaꞌ yepakëll yeperr allpaꞌ ama arromñatheshayeꞌ yexhkatenaye, Yomporña yexhkateneꞌ. 2Poꞌñoxh arr patsro yechets ñeñth yepakëll yepenpaꞌ xhokmach es eꞌmnatatweneꞌ. Ñeñthoꞌmarña yapaꞌ atarr yemneñ oꞌch yechorrerra ñeñthchaꞌ yepakëll yeperr Yompor poeꞌntaño. 3Tharroꞌmar yemneñ yekamkëñpaꞌ oꞌch chorrerrana ñeñthchaꞌ paꞌshtam perr Yompor poeꞌntaño, allochñapaꞌ yekamkëñpaꞌ amach attha wokchapoterro xhokmach eñall ñeñthchaꞌ chorrena. 4Tharraña ateth ñerraꞌm theꞌ orameñ yechets ñeñth yepakëll yepen attho yokrrena arr patsro, xhokmach eñall ñeñthchaꞌ eꞌmnatatweneꞌ. Ñeñthoꞌmarña yapaꞌ atarr yemneñ amaꞌt ama yerromoenaꞌ, yechetspaꞌ oꞌch aꞌpoꞌpoñeterrnay Yompor thayotheñ amaꞌt esempo werra, ñeñthchaꞌña paꞌshtam perr yekamkëñ. Allochñapaꞌ atthoch yokrrerra etserra korreñets ñeñth amach awañañathterro, ñeñthchaꞌña aꞌwañaterreꞌña ñeñth attho yaꞌrromñathteꞌth. Ñatoꞌ oꞌch netmaꞌntacha ateth ñerraꞌmrratheꞌ oꞌch yechorra shetamoets ñeñth eꞌñe etserra emarr ñeñthchaꞌ yenaꞌ enoth oꞌch yepmata. Allochñapaꞌ ñeñthchaꞌ yenaꞌ enoth, ñeñthchaꞌña aꞌnatweꞌña mellashañ ñeñth yechorreꞌth awañotheñ. Allochñapaꞌ atthoch eñall ñeñthchaꞌ yechorratenaya. 5Ñeñth yemnateneꞌ eꞌñe ateth ñeñthpaꞌ Yompor ña ateth yephateneꞌ, tharroꞌmar ñapaꞌ chorrenya Poekamkëñ ñeñthña yeñotateneꞌ orameñ eñall kowenñats ñeñth oꞌpatatenya ñeñthchaꞌ apwerrey Yompor.

6Ñeñthoꞌmarña eꞌñe yeyemteñoth Yompor xhokmach yekweñ ñeñthchaꞌ ateth perrnay esempo. Yeñoteñ yechets yepakëll yepenmeñ arr patsro allapharoꞌtsenmeñey atthoch yeyxhaꞌwerra Yepartsesharesho. 7Eꞌñe yeyemteñoth Yomporpaꞌ alloꞌnach yesen eñotnomoeꞌ ñeñthchaꞌ ateth perrnay ña, ama añeyeꞌ es yeñotatenaye ñeñth yentyen arr patsro. 8Eꞌñe yeyemteñoth Yompor xhokmach yekwen ñeñthchaꞌ ateth perrnay ña. Ñamha yapaꞌ añ atarr kowen yenten oꞌch wañ attho yokrrena arr patsro, oꞌch yesaꞌnom yechets ñeñth yepakëll yepen arr atthoch yexhap allchaꞌ yokrraꞌwerra Yepartsesharesho. 9Yapaꞌ ñeñthach patherr yemaꞌyoxhrena xhokmoepaꞌchña yokshateñ Yepartseshar, amaꞌt allempo orameñ yokrrena eꞌñe yechtso arr patsro, ñamha amaꞌt allempoch yerroma oꞌch yesaꞌnom yechets eꞌñepaꞌch Yepartseshareshoꞌtseney atthoch yokshateñ eꞌñe all poeꞌntaño. 10Tharroꞌmar oꞌ anarethta allowenakpay yewapoepaꞌtoꞌ Cristesho allchaꞌ eñotatarethey eꞌñe poesheñaꞌttsoy. Allochñapaꞌ allchaꞌña ateth phaꞌyesey errothenchaꞌ entapretwerrey, ñatoꞌ eꞌñech kowen entapretwerrey attho eꞌñe kowen es yephaꞌyen eꞌñe yechtsoth allempo yokrrena arr patsro, ñatoꞌ amach kowenayeꞌ entapretwerrye.

Attho Pablopaꞌ eꞌñe poeñmañeshaꞌ eꞌñe kowen es orrtatyen

11Ñeñthpaꞌ amaꞌt atarr yoroxhen yenteñeñña Yompor, tharraña nokoppaꞌ ama yoroxhenayaye tharroꞌmar Yomporpaꞌ entenen eꞌñe kowen ñeñth ateth nepena. Theꞌpaꞌ aña palltetsa oꞌch nokthapeꞌchater allowen acheñeneshaꞌ atthoch ñetpaꞌxhoꞌña eꞌñech kowen entapretennet. Amaꞌt sapaꞌxhoꞌña theꞌpaꞌ nekwenes, nemneñ oꞌch señoter samha eꞌñe seyoxhro attho eꞌñe neñmañeshaꞌ kowen es nephaꞌyen. 12Ñeñth ateth notenes theꞌpaꞌ ñeñthpaꞌ ama añekpayaye oꞌch alla neñerrerr kowen ñeñth eꞌñe nokpa. Añekopña oꞌ alla neñerrerr ateth allochñapaꞌ oꞌch alla sokshapreterrna, allochñapaꞌ atthoch señoch oteꞌ ñeñth eꞌñe ñañeña kowen entetsa eꞌñe pokthaphñoꞌmara. Ama añeyeꞌ eñoteno poeyoxhro ñeñth kowentetsa Yomporekop. 13Ñewa, sapaꞌ xhatheꞌ sotenen napaꞌ xhoꞌ moeneꞌ nemospoena. Ñerraꞌm poꞌñoxh xha nemospoenapaꞌ ñeñthpaꞌ eꞌñe pokteꞌ Yomporekop. Ñamha ñerraꞌm ama xhoyeꞌ nemospoeno attho eꞌñe kowenareꞌ es nokthapeꞌchen ñeñthpaꞌxhoꞌña eꞌñe pokteꞌ allo nesherbenes sa. 14-15Ñamha attho Cristopaꞌ atarr morrentenya ñeñthña ama yemnatenaye oꞌch alloꞌna yesen korratsa eꞌñe yokpa. Ñamha attho theꞌpaꞌ yeñoteñ Cristo awoꞌt rroma allowenakpay, allochñapaꞌ attho yokrrena yapaꞌ oꞌwañchaꞌ yokrra eꞌñe yokpa. Ñeñthpaꞌ ñeñthara yoten oꞌ yerromaprecha Cristo, alloweney ñeñthey ameꞌñenaya. Añchaꞌña ateth yokrrena eꞌñe ñokop, ñeñth rromats yokop, elloñapaꞌ alla tanterra yokop. 16Ñeñthoꞌmarña napaꞌ amaꞌt poesheñarrapaꞌ oꞌwañchaꞌ kowen nenteñ ñeñth eꞌñe kowen enten poꞌpotantañ acheñeneshaꞌ arr patsro eꞌñe ñet pokthaphñoꞌmaret, ñeñthpaꞌ arromñatha pokthaphña. Tharraña amaꞌt na awathpaꞌ kowen nentapretaneteꞌth pokthaphña. Ñeñthoꞌmarña napaꞌxhoꞌña tsenaꞌtatneteꞌth Cristo allempo, tharraña theꞌpaꞌ oꞌwañ ateth neñch Cristo. 17Ñeñthoꞌmarña ñeñthey oꞌ yeyemtera Cristo, Yomporpaꞌ oꞌ etserrataterrnay yokthaphña eꞌñe poktakma. Ñeñth ateth yokthapeꞌcheꞌth awath, ñeñthpaꞌ oꞌ wañerr, theꞌñapaꞌ oꞌ eꞌñe yokthapeꞌcherr ñeñth eꞌñe kowenareꞌ etserra.

18Ñeñthña oꞌ ateth perrnay Yompor ñeñth moenatan Poechemer Cristo, ñachña yamoꞌtstaterreꞌ Pomporesho. Ñeñthara Yompor amaꞌt napaꞌ awoꞌt llesensaꞌn atthoch neñotach acheñeneshaꞌ allochñapaꞌ ñetpaꞌxhoꞌña oꞌch amoꞌtsterranet ñamet Yompor. 19Ñamha attho Yomporpaꞌ moenatan Poechemer Cristo allempopaꞌ ñachña alloꞌna sets yamoꞌtstataya alloweney acheñeneshay Pomporesho. Allochñapaꞌ oꞌwañchaꞌ alloꞌna ochñatheneshaꞌ enteney Yompor. Atthoña yapaꞌ apoerrey llesens elloneth atthoch yach eñotatyeseꞌ paꞌnamen acheñeneshaꞌ allochñapaꞌ ñetpaꞌxhoꞌña atthoch eꞌñe amoꞌtsterranet Yompor. 20Ñeñthoꞌmarña yapaꞌ allsensarethey ñeñthchaꞌ yetarwas yeperr ñeñtheychaꞌ eñosets kowen Cristokop atthoch yameꞌñacha allowen acheñeneshaꞌ. Ñeñthpaꞌ attho Yomporpaꞌ oꞌ waꞌñerres oꞌch sameꞌñera, tharraña ñeñthpaꞌ eꞌñe ya yeserrpareꞌtateñothes oꞌ waꞌñerres Yompor. Ñeñthoꞌmar theꞌpaꞌ oꞌch notas Cristokop, ñach sameꞌñerra allochñapaꞌ atthoch eꞌñe amoꞌtsterrsa Yompor eꞌñe poktakma. 21Añ ñeñthara Cristo ñapaꞌ amaꞌt parrochapaꞌ ama phano ñeñth ama pokteyeꞌ enteno Pompor Parets, tharraña Pomporñapaꞌ awoꞌt moenateñ oꞌch ateth apharethta ñerraꞌmrratheꞌ acheñ ñeñth atarr ochñath. Tharraña ñeñth attho apharethtapaꞌ ñeñthpaꞌ eꞌñe yokop. Allochñapaꞌ eꞌñe yeyemteñoth Poechemer Cristo, Pomporña yapoerreꞌ alloch eꞌñe pokteꞌ enterrey.

Currently Selected:

2 Corintios 5: ame

Highlight

Copy