1 Corintios 15

Allempo tanterra Cristopaꞌ awoꞌt orrterrana shonteꞌ acheñeneshaꞌ

1Theꞌpaꞌ oꞌch masheñneshachaꞌ ñamha noxhaneshachaꞌ notas poꞌpoñ. Napaꞌ nemneñ ellopaꞌ oꞌch alla neyerpaterrserr eꞌñe errothentheꞌña ñeñth eꞌñe ateth pena kowen ñoñets ñeñth neserrpareꞌtatwanmas, amaꞌt awathotheñ. Ñeñthpaꞌ ñeñthara kowen ñoñets ñeñth oꞌ sameꞌñerra, ñamha ñeñthara ñoñets ñeñth allo oꞌ womenk seperr seyoxher. 2Ñamha ñeñthara ñoñets allo oꞌ saꞌkeshphatarethterra ñerraꞌm amach sekexhpoere, tharraña ñatoꞌ poꞌñoxhpaꞌ ama xhoyeꞌ sameꞌñeno.

3Ñamha ñeñth neserrpareꞌtatas amaꞌt awathotheñpaꞌ ñeñthara kothaphñats ñeñth ateth eñotatennet namha, ñeñth nanak sherbets, ñamha ñeñthara ñoñets ñeñth ateth anwareth Yompor poꞌñoño amaꞌt awathotheñ. Ñeñthpaꞌ ateth oꞌ neserrpareꞌtatwas: Cristopaꞌ rroma yoꞌchñarekop, 4allothpaꞌ apamparethta, tharraña pomaꞌpamtañopaꞌ alla tanterra. Ñeñthpaꞌ atthekma oten ñamha ñeñth ateth anwareth awathotheñ Yompor poꞌñoño. 5Allempo tanterrapaꞌ ñanempaꞌ orrterrana Pedro, allothpaꞌ orrterrana allowen poeyochreshaꞌ. 6Allothpaꞌ orrterrana ñamha shonteꞌ acheñeneshaꞌ ñeñth ameꞌñetsa. Ñatoꞌ metanenantheꞌ quinientos acheñeneshaꞌ ñeñth enterreꞌ allempo eꞌñe parrokmoet. Ñeñth enterreꞌ allempopaꞌ amaꞌt themeꞌttsen shontet korraꞌyenet. Tharraña poesheñaꞌtetspaꞌ oꞌ kollaꞌwenet. 7Allothñapaꞌ orrterrana ñamha Jacobo, allothpaꞌ orrterrana ñamha allowen poꞌpoñexhno ñeñth allsensarethneshaꞌ.

8Eꞌñe chentaꞌñapaꞌ orrtona namha, amaꞌt napaꞌ ama esoyayno. Attha nentena ñerraꞌmrratheꞌ sapeñtsomaꞌthotha neꞌñalleterra Yomporekop. 9Poꞌpoñexhno allsensarethneshaꞌpaꞌ ñetpaꞌ nanak sherbenet, tharraña napaꞌ amaꞌt allsensaretheneñpaꞌ ama tama nesherbeno. Ñamha napaꞌ pokteꞌ nenteñ amach otatsetneto allsensarethen, tharroꞌmar napaꞌ nanak naꞌmoeroxhtacheꞌth ñeñth ameꞌñenaya Yompor. 10Tharraña amaꞌt ateth nepeꞌthpaꞌ Yomporpaꞌ atarr morrentna. Eꞌñe poemoereñothpaꞌ atthoña aꞌpnaserren ñeñth nanak sherbets ñokop. Tharraña ama orrena morrentno Yompor, tharroꞌmar theꞌpaꞌ nanak nethorrena Yomporekop. Poꞌpotantañ allsensarethneshaꞌpaꞌ amaꞌt thorraꞌyenet Yomporekoppaꞌ tharraña napaꞌ ello nanak nethorrena ateth thorrenet ñet. Ñewa, amaꞌt noteneñ napaꞌ nethorrena Yomporekop, poꞌñoxhpaꞌ ama nayeꞌ thorretso, añña Yompor poemoereñothpaꞌ ñeñthña thorretsa na nechtsoth. 11Ñewa, amach yoto ñeñthey nanak sherbets, ñatoꞌ na amapaꞌ poꞌpoñexhno allsensarethneshaꞌ. Añchaꞌña yot ñerraꞌm ya poꞌñoxh yeserrpareꞌteñoth oꞌ sameꞌñaꞌwerrapaꞌ ñeñthña nanak sherbets.

Attho esempowañenpaꞌ yetantwerrach rromoth

12Ñewa, ñerraꞌm poꞌñoxh oꞌ sameꞌñerra ñeñth ateth yeserrpareꞌtatenes attho Cristopaꞌ oꞌ tanterra allempo rroma, esoꞌmareꞌtña soten ñerraꞌm yerromapaꞌ amach errothenoth yetanterro. Poꞌñoxh ñeñthpaꞌ ateth oten poesheñaꞌtets ñeñth seshoꞌtsen. 13Ñewa, ñerraꞌm poꞌñoxh ama eñalle atthoch yetanterra yapaꞌ, Cristopaꞌxhoꞌña amatheꞌ tanterrañe amaꞌt themeꞌttsen. 14Ñerraꞌm poꞌñoxh Cristopaꞌ themeꞌttsen rromoeneñpaꞌ ñeñth ateth yeserrpareꞌtatenes theꞌpaꞌ amatheꞌ es sherbenñe. Ñamha ñerraꞌm poꞌñoxh ama tanterrañe Cristopaꞌ theꞌpaꞌ eꞌñetheꞌ orrena yeyemteñañ. 15Ñamha ñerraꞌm poꞌñoxh ama tanterrañe Cristopaꞌ yapaꞌ atthatheꞌ yeshkënsoñ atthoꞌ pena poꞌñoxh Yompor, tharroꞌmar yapaꞌ oꞌ yeserrpareꞌtwoñ Yompor attho ñapaꞌ oꞌ tantaterran Poechemer Cristo. Tharraña ñerraꞌm poꞌñoxh ama eñallñe atthoch yetanterra rromothpaꞌ ñeñthña ateth oꞌ yeserrpareꞌtatwas attho Yomporpaꞌ oꞌ tantaterran Poechemer Cristo, ñeñthpaꞌ amatheꞌ poꞌñoxhoyayñe. 16Poꞌñoxhpaꞌ ñerraꞌm amach yetanterro yapaꞌ, Cristopaꞌxhoꞌña themeꞌttsentheꞌ ama tanterrañe. 17Ñamha ñerraꞌm poꞌñoxh themeꞌttsen amach tanterrañe Cristopaꞌ eꞌñetheꞌ orrena seyemteñañ, ñamha soꞌchñarpaꞌ amatheꞌ aphretnaretheñe themeꞌttsen. 18Ñamha allowen ñeñth oꞌ kollaꞌwena ñeñth ameꞌñaꞌnmaya Cristopaꞌ ñetpaꞌ oꞌtheꞌ eꞌñe poktakma chenkaꞌwerretañ. 19Ñamha ñerraꞌm añekpa yeyemteñañ Cristo allempo womhchenyaꞌ, ñamha ñerraꞌm poꞌñoxh amach yetanterro, ñerraꞌm attheñpaꞌ nanaktheꞌ llekëñtsoꞌtsenyeñ. Ñeñth llekëñetspaꞌ ellotheꞌ metanenaneñ ñeñth ateth yellkatyeneꞌ añe patsro.

20Tharraña ñeñthpaꞌ ama attheyaye, tharroꞌmar poꞌñoxh Cristopaꞌ oꞌ tanterra ñanom. Attho tanterrapaꞌ amach alla rromoerreꞌthe allochñapaꞌ esempowañen alloweney ñeñthey ameꞌñaꞌnmaya Cristopaꞌ yapaꞌxhoꞌña atthekmach yetanterra. 21Ateth pha ñamha awath Adán eꞌñe ña poꞌchñaroth oꞌ anarethta atthoch yerroma, amaꞌt eꞌñe poesheñarrotha. Theꞌpaꞌxhoꞌña eꞌñe poesheñarrothpaꞌ oꞌ orrterra atthoch yetanterra amaꞌt esempoch yerroma. 22Tharroꞌmar eꞌñe poꞌchñaroth Adán ñeñthey pamoꞌtsnaꞌtareypaꞌ yokoppaꞌxhoꞌña oꞌ anarethta atthoch yerroma yamha alloweney. Tharraña theꞌpaꞌ eꞌñe yeparrokmateñoth Cristopaꞌ elloch alla yokrraꞌwerra alloweney. 23Tharraña ñeñthpaꞌ atethchaꞌ perra: Cristo ñanom oꞌ tanterra allochñapaꞌ ñerraꞌm esempoch werra, yapaꞌxhoꞌña ñeñthey ameꞌñenayapaꞌ atthekmach yokrraꞌwerra alloweney. 24-28Allempoña Cristopaꞌ oꞌch poerratampeswan poꞌwamenk allowen ñeñth amhchaꞌtarethetyetsa, amaꞌt ñamha ñeñth amhchaꞌnoxhetyetsa, ñamha ñeñth awamenkathetyetsa. Tharroꞌmar añ poktetsa Cristopaꞌ ñach amhchaꞌtarethterrtsa eꞌñe ñapoeth esempowañenchaꞌ yorampeswan poꞌwamenk allowen ñeñth eꞌmoñeꞌteneꞌ. Ñamha esempowañen eꞌñe chentaꞌpaꞌ oꞌch aꞌwañamperrey rromoeñets ñeñth oꞌpatatarethey theꞌ alloweney. Tharroꞌmar Cristopaꞌ oꞌ apwe Pompor poꞌwamenk atthoch pomnaren penan allowen esokmañen. Ñewa, amaꞌt oteneñ Yompor poꞌñoñ Cristopaꞌ pomnaren penanoꞌ allowen esokmañenpaꞌ tharraña yeñoteñ amach pomnaren phano Pompor, tharroꞌmar Pomporpaꞌ ña apoeneꞌ poꞌwamenk. Esempowañenchaꞌña pomnaren phowan allowen esokmañen allempoña Cristopaꞌ oꞌch apwerran Pompor ñeñth nanak Parets attho amhchaꞌtarethtena. Allempoña Pomporpaꞌ oꞌch alla pomnaren perran Cristo ñeñthara Pompor ñeñth oꞌ awamenkath oꞌ phowe. Allempoña Pomporpaꞌ ñach amhchaꞌtarethterrtsa, ñamha allempopaꞌ ñach pomnaren perreꞌ allowen esokmañen. Allempopaꞌ oꞌch mellapoterra.

29Theꞌpaꞌ oꞌch alla noterrserr poꞌpoñ. Ñerraꞌm poꞌñoxh ama eñalle atthoch yetanterra esempowañenpaꞌ esoꞌmareꞌtña poesheñaꞌtets acheñpaꞌ apatarethtenaña añekop ñeñth oꞌ rroma. Poꞌñoxh ñerraꞌm amach errothenoth tanterro ñeñth oꞌ rromapaꞌ esoꞌmareꞌtña apatarethtenetña ñeñthekop.

30Ñamha ñerraꞌm poꞌñoxh amach errothenoth yetanterropaꞌ esoꞌmareꞌtña pokteꞌ nenteñ eꞌñe nameꞌñeñothpaꞌ amaꞌt xhokma nemoeroxhtena ñokoppaꞌ eꞌñe pokteꞌ nenteñ. 31Napaꞌ ateth noten tharroꞌmar patheꞌtets yethpaꞌ eꞌñe naꞌllpoepñotha ama moetsayenneto. Ñewa, neñoteñ ñeñthpaꞌ atthekmach phaꞌnet. Tharraña masheñneshachaꞌ ñamha noxhaneshachaꞌ errponchaꞌ nemoeroxhtapaꞌ allponchaꞌ nokshapretensa samha, tharroꞌmar eꞌñe yeparrokmateñoth epay Yepartseshar Jesucristo. 32Ñamha arr Efesopaꞌ eꞌñe naꞌllpoepñotha aꞌkeshphatnet ateth ñerraꞌmrratheꞌ xho norrotena epan maꞌyarr. Tharraña ñerraꞌm amach errothenoth yetanterropaꞌ ñeñthña attho naꞌllpoepñotha aꞌkeshphatyennetpaꞌ amach es sherbhaꞌno, tharroꞌmar ñeñth patsoꞌmarekpapaꞌ ama sherbeno. Poꞌñoxhpaꞌ ñerraꞌm amach eñallñe atthoch yetanterrañpaꞌ eꞌñe pokteꞌ oꞌch yoteneñ: “Theꞌpaꞌ akshaꞌyespawepaꞌch, ñamha oꞌch yotannaꞌta arrallmeꞌchapretyespawepaꞌch, ñamha oꞌch yotannaꞌta orrareꞌtyespawepaꞌch thayepaꞌtñapaꞌ womhchay. Tsapathonethña oꞌch yerromapaꞌ amach alloꞌna ateth yephaꞌneno.”

33Tharraña amach sotaphsaꞌtatso ateth, tharroꞌmar yeñoteñ “ñerraꞌm esempo yeyemteña ñeñth attha kothapeꞌchatseꞌtyets ñeñth ama kowenayaye Yomporekop yapaꞌxhoꞌña xhach shekënyet tharroꞌmar tsapathonethpaꞌ ñatoꞌ oꞌch alla ateth yeperra yamha ateth phaꞌyenet ñet, amaꞌt theꞌ yapaꞌ eꞌñe kowen yokthapeꞌchen Yomporekop.” 34Añña pokteꞌ oꞌch sokthapeꞌcherr ello, ñamha oꞌch sekexhpoerr ñeñth ateth sephaꞌyeseꞌth ñeñth ama pokteyaye Yomporekop. Theꞌpaꞌ sepenkëpaꞌ tharroꞌmar ñatoꞌ poꞌñoxh ama señoteñe Yompor allowenes.

Atethchaꞌ yepoꞌpoñet allempoch yetanterra rromoth

35Theꞌpaꞌ oꞌch notas poꞌpoñ. Ñewa, ñatoꞌ poesheñarrothespaꞌ ateth sotenen: “Amatheꞌ errothenoth yetanterroña rromoth. Ñerraꞌm poꞌñoxh atanterrapoꞌ rromoth, yechetsña allempopaꞌ ¿errothenaꞌtchaꞌña orrterra?” 36Sapaꞌ areꞌtña es señoteno. Ñewa, ñatoꞌ oꞌch netmaꞌntacha ateth: Yeñoteñ ñerraꞌm es yenareꞌt poeꞌllomerpaꞌ amach awen chopo. Xhoch ñanom poetsaꞌ paꞌtall eshekchaꞌña chop. 37Ñamha ama añeyeꞌ yenareꞌteno narmets ora ñeñth eꞌñe ateth chopoets. Ateth ñerraꞌm xhop#15.37 Poꞌñoxh añpaꞌ oten trigo. yenareꞌtpaꞌ poeꞌllomhrach yenareꞌteññañ. 38Ñamha ñeñthpaꞌ Yomporchaꞌ aꞌchpateꞌ, tharraña ñeñthchaꞌña chopatspaꞌ oꞌch poꞌpoñet ñeñth ateth orrtena awaña poeꞌllomer. Ñeñthpaꞌxhoꞌ Yompor aꞌpoꞌpoñetateneꞌ tharroꞌmar ateth moenen ña. Ñamha ñerraꞌm poꞌpoñeꞌttsokma es yenareꞌt poeꞌllomerpaꞌ eꞌñech poꞌpoñeꞌttsokma chopyes ñamha narmets ñeñth eꞌñe ateth anareth. 39Añpaꞌxhoꞌ chetsotspaꞌ eꞌñe poꞌpoñeꞌttsokma chetsots, ama eꞌñe atthekmayaye. Ateth ñerraꞌm ya acheñeypaꞌ poꞌpoñxhoꞌ yechets yechen. Ñamha es berroxhnopaꞌ poꞌpoñxhoꞌ poꞌchets pen. Ñamha othexhnopaꞌxhoꞌ poꞌpoñ poꞌchets pen ñamha. Kakaxhnopaꞌxhoꞌña poꞌpoñxhoꞌ poꞌchets pen ñamha. 40Ñamha ñeñth allpon entoꞌmarneshaꞌ ama eꞌñe atthekmayayeto ñerraꞌm patsoꞌmarneshaꞌ. Tharraña ñeñth entoꞌtsaꞌyenpaꞌ ellonethxhoꞌ koxhneshaꞌtyenet tharroꞌmar ateth anarethet. Ñeñth patsoꞌtsaꞌyenpaꞌxhoꞌña ellonethxhoꞌ kowenetyenet ñamet tharroꞌmar ñetpaꞌxhoꞌña ateth anarethet. 41Ñamha ateth kowentena atsneꞌpaꞌ ñeñthpaꞌ poꞌpoñ poptena tharroꞌmar ateth anareth ñamha. Arrorrpaꞌxhoꞌña poꞌpoñonethxhoꞌ kowentena tharroꞌmar ateth anareth. Rantoxhnopaꞌxhoꞌña poꞌpoñonethxhoꞌ kowenetyenet. Ñamha patheꞌtets rantopaꞌ poꞌpoñeꞌttsokma kowenetyenet ñamet tharroꞌmar ateth anarethet. 42Atthekmach yeperra yamha ñerraꞌm esempowañenchaꞌ yetanterra. Ñeñth ateth orrtena theꞌ yechetspaꞌ allempoch yetanterrapaꞌ amach attherayeꞌ yorrterro. Theꞌpaꞌ arromñathayapaꞌ xhokmach yerroma allothpaꞌ oꞌchxhoꞌ pampaꞌyet allchaꞌ poetsowerr yechets. Tharraña esempoch yetanterrapaꞌ amach alla yaꞌrromñathterreꞌthe. 43Ñamha theꞌ yechetspaꞌ atarr penknaꞌntateney tharroꞌmar xhokmach yatsnaꞌten. Ñerraꞌm yatsnaꞌtpaꞌ oꞌchxhoꞌ yerroma, allothñapaꞌ oꞌchxhoꞌ pampaꞌyet. Tharraña ñerraꞌm esempoch yetanterrapaꞌ allempo yechetspaꞌ amach alla penknaꞌntaterryeꞌthe. Allempopaꞌ eꞌñech kowen yorretyena. Ñamha theꞌpaꞌ ama awamenkatheye ñeñthoꞌmarña xhokma yerromoen, allothñapaꞌ oꞌchxhoꞌ pampaꞌyet. Tharraña ñerraꞌm esempoch yetanterrapaꞌ allempopaꞌ nanakchaꞌ awamenkathey. 44Ateth yeyexhkëna theꞌ arr patsoꞌmarpaꞌ ñeñthpaꞌ xhokmach yerroma, allothñapaꞌ oꞌchxhoꞌ pampaꞌyet. Tharraña ñerraꞌm esempoch yetanterrapaꞌ allempopaꞌ kamoekñetsothach yorrterra. Poꞌñoxh yeñoteñ ateth yorrtena theꞌ yechtsothpaꞌ yeñoteñ ñamha yekamkëñothpaꞌxhoꞌña yorrterrach esempowañen.

45Ñeñthoꞌmarña amaꞌt Yompor poꞌñoño ateth anwareth awathotheñ, ñeñthpaꞌ ateth oten: “Allempo Adánpaꞌ yexhkach Yompor allempoñapaꞌ awoꞌt aph poꞌrrerrña atthoch korra eꞌñe poꞌchtsoth. Ñeñthoꞌmar Adánpaꞌ ñeñth ñanom acheñetats.” Tharraña chentaꞌñapaꞌ acheñetos ñamha Cristo atthoch ñach yapoerreꞌ ello oꞌch alla yokrraꞌwerra yekamkëñoth. 46Tharroꞌmar Yomporpaꞌ ateth naꞌy. Ñanompaꞌ oꞌch yokrra eꞌñe yechtsoth, esempowañenñapaꞌ oꞌch alla yokrraꞌwerra ñamha yekamkëñoth. 47Tharroꞌmar ñeñth ñanom acheñ ñeñthara Adánpaꞌ patsa ayexhkatareth, ñeñthoꞌmarña ñapaꞌ attha patsoꞌmarneshat. Tharraña poepañ ñeñth acheñetosets ñeñthara Yepartseshar Jesucristo ñeñthpaꞌ entoth wapa. 48Ñamha ñeñthey arromñatheneshaypaꞌ yapaꞌxhoꞌña atthaya ñerraꞌmrratheꞌ Adán ñeñth ayexhkatareth pats. Tharraña ñeñthey ameꞌñenaya Cristo ñeñth waptsa entothpaꞌ yapaꞌxhoꞌña yokrraꞌwerrach yekamkëñoth ento ateth ñerraꞌmrratheꞌ Cristo ñeñth waptsa entoth. 49Attheña theꞌpaꞌ attha yeyexhkëna yechtsoth ateth ñerraꞌmrratheꞌ Adán ñeñth ñanom ayexhkatareth pats tharraña esempowañenpaꞌ yeyexhkërrach ello ateth ñerraꞌmrratheꞌ Cristo ñeñth waptsa entoth.

50Ñeñthoꞌmarña masheñneshachaꞌ ñamha noxhaneshachaꞌ notenes: Eꞌñe yechtsothpaꞌ amach es yoꞌpato all amhchaꞌtarethtena Yompor. Tharroꞌmar allempo arromñathayapaꞌ amatheꞌ errothenoth es yoꞌpatoña ñeñth ama awañaño. 51Ñewa, oꞌch neñotatas ñeñthchaꞌ ateth perra esempo, ñeñth ñaptha eñoteñ theꞌ Yompor. Poꞌñoxhpaꞌ amach eꞌñe alloweney yerromwo. Tharroꞌmar ñeñthey orameñ korretsa allempoch werra Cristopaꞌ amach yerromo. Allempopaꞌ atthach yepoꞌpoñet 52eꞌñech machayotha eꞌñe allempokma esempoch eꞌmorrterra Yompor poꞌpoktor eꞌñe allowanen. Ñewa, ñeñthpaꞌ atethchaꞌ perra allempo. Ñanompaꞌ oꞌch eꞌmorrterra Yompor poꞌpoktor. Allempoñapaꞌ oꞌch tantrraꞌtwena ñeñth kollaꞌwatsa awathotheñ. Allempochña tanterretpaꞌ amach alla arromñathterreteꞌthe. Yaña ñeñthey orameñ korretsapaꞌ yapaꞌxhoꞌña oꞌch yepoꞌpoñet eꞌñe allempokma. 53Tharroꞌmar yechets ñeñth aptsañapaꞌ añ palltetsa oꞌch poenasa ñeñth ama aptsaño. Tharroꞌmar ñeñthey arromñatheypaꞌ añ palltetsa oꞌch yepnasa ñeñth ama arromñatheyaye. 54Ñerraꞌm esempo yechets ñeñth aptsañapaꞌ ñerraꞌm oꞌch poenasa ñeñth ama aptsaño, ñamha ñerraꞌm esempoch ñeñthey arromñatheypaꞌ oꞌch yepnasa ñeñth ama arromñatheyayepaꞌ eꞌñe allempopaꞌ oꞌch eꞌñe etsotwa ñoñets ñeñth ateth anareth awathotheñ, ñeñthpaꞌ ateth oten: “Allempo oꞌch wañerrña ñeñth attho oꞌpatenya rromoeñets. 55Ñeñthoꞌmarña allempopaꞌ amach yerromoerreꞌthe, tharroꞌmar amach eñalleterreꞌtheña ñeñthchaꞌ alla yaꞌtserrperrayerr amaꞌt yerromñotha.”

56Tharroꞌmar theꞌpaꞌ yoꞌchñaroth oꞌpatenyaña rromoeñets, tharraña allempopaꞌ amach eñalle yoꞌchñar. Ñamha yathpareꞌteñoth ñoñets ñeñth ateth anarethpaꞌ ñeñthña yoꞌpatatayeꞌthña rromoeñets allempo nanak yeyoreꞌth yoꞌchñar. 57Ñeñthoꞌmarña theꞌpaꞌ yeparasyosoꞌchepaꞌch Yompor tharroꞌmar attho apoey Poechemer ñeñthara Yepartseshar Jesucristo ñeñthchaꞌ xhokma yaꞌpoktateneꞌ allowen paꞌnamen ñeñth yokop.

58Ñeñthoꞌmar eꞌñe nemorrenteñothpaꞌ oꞌch, masheñneshachaꞌ ñamha noxhaneshachaꞌ, noterrserr: Theꞌpaꞌ womenkëpaꞌch sephaꞌ seyoxher, amach sekexhpatstere. Ñamha xhokmoepaꞌch sethorrena Yomporekop. Ñamha sapaꞌ señochepaꞌch ñeñth attho yethorrena Yomporekoppaꞌ ama orrena yethorreno.

Currently Selected:

1 Corintios 15: ame

Highlight

Copy