1 Corintios 16

Añ kellepaꞌ ñeñth apeteꞌth wokchañneshaxhno

1Theꞌpaꞌ oꞌch notas poꞌpoñ. Añ allpon kelle ñeñth xhokma senen wokchañneshaxhnokop ñeñth ameꞌñetsa, ñeñthpaꞌ atthekmach sepha. Tharroꞌmar ñeñth ameꞌñetsa Galaciopaꞌ oꞌ neñotatwanet ñeñthchaꞌ ateth pet, ñeñthoꞌmarña sapaꞌxhoꞌña atethchaꞌ sepha samha. 2Ñeñthpaꞌ atethchaꞌ sepha: Patheꞌtets temenkpaꞌ añ pokteꞌ xhokmach senaꞌyes ellopaꞌtets errponchaꞌ semnaꞌyes oꞌch senaꞌyes Yomporekop. Ñamha errpontheꞌña sechyen ñeñthchaꞌ senaꞌyes Yomporekop, ñatoꞌ aton amapaꞌ ñatoꞌ koñeꞌth. Ñeñthpaꞌ oꞌch saññoꞌtwe eꞌñe ellokma atthothach oꞌch satontatyes. Allochñapaꞌ ñerraꞌm esempoch nexhap seshopaꞌ amach pallteno eꞌñe allempopaꞌ oꞌch thaya senaꞌyes. 3Ñamha ñerraꞌm esempoch nexhap seshopaꞌ oꞌch nekellkaꞌ carta ñeñthchaꞌ nemña Jerusaléño. Ñamha oꞌch nemñe acheñ ñeñthchaꞌ anmoeꞌ kelle, amaꞌt erraꞌtsena acheñ ñeñthchaꞌ pokteꞌ senten sa. 4Ñamha ñerraꞌm pokteꞌ senteñ oꞌch awen namhapaꞌ eꞌñe pokteꞌ oꞌch yawanena eꞌñe parro.

Allempo sechena Pablo oꞌch awoꞌ poꞌpoñ anetsoꞌmar

5Ñamha ñerraꞌm esempoch awen arroth atthoch nexhap seshopaꞌ napaꞌ nokthapeꞌcheñ arrchaꞌ noñem Macedonioꞌmar. 6-7Añ atarr nemnen ñerraꞌm Yompor moenatspaꞌ allatheꞌ naꞌllponmat sesho, ñatoꞌ allatheꞌ necharaꞌpena. Tharroꞌmar napaꞌ ama nemno oꞌch attha nepomoetnom sesho, añña napaꞌ nemneñ ñerraꞌm Yompor moenatspaꞌ allatheꞌ natomat. Ñamha ñatoꞌ eꞌñe allothpaꞌ oꞌtheꞌ sanemyesen errachxhoꞌ neshecha allempo. 8-9Tharraña theꞌpaꞌ amach erra neto. Allanach arr Efeso tharroꞌmar theꞌpaꞌ eñall atthoch oꞌch neserrpareꞌtatyes shonteꞌ Yompor poꞌñoñ. Ñamha theꞌpaꞌ neñoteñ ñatoꞌ oꞌch ameꞌñenna shonteꞌ acheñ, tharraña xhokma eñall ñamha shonteꞌ ñeñthchaꞌ nepatareꞌteneꞌ. Tharraña oꞌch xhap Pentecostepopaꞌ oꞌch awerren arroth.

Ateth otanet Timoteokop

10Ñamha oꞌch notas, ñerraꞌm esempoch xhap masheñ Timoteopaꞌ oꞌch sagaph eꞌñe kowen, allochñapaꞌ amach xha llekoso sesho. Tharroꞌmar ñapaꞌxhoꞌña nanak thorrena Yomporekop ateth ñerraꞌm na. 11Ñamha ñerraꞌm esempoch xhap seshopaꞌ añ pokteꞌ xhokmach seꞌmhñoch eꞌñe kowen. Ñamha eꞌñech kowen seyenpoeꞌ allochñapaꞌ ñerraꞌm esempo poerrerra allothpaꞌ eꞌñech poksheñeshaꞌ xherr nesho. Tharroꞌmar napaꞌ xhokma nekweñ masheñ Timoteo epan poꞌpoñexhno masheñneshaxhno.

12Ñamha masheñ Apolospaꞌ nanak nemñareꞌteñ oꞌch emoꞌtensaꞌ epoet poꞌpoñexhno masheñneshaꞌpaꞌ tharraña theꞌpaꞌ ñapaꞌ ama moeno. Tharraña esempopaꞌ xhomach xhap sesho ñerraꞌm esempoch poktaꞌwoña.

Allempo soꞌterranet poꞌcartoth

13Eꞌñe allowanenpaꞌ oꞌch noterrserr: Theꞌpaꞌ eꞌñech señota, tharroꞌmar xhokma eñall ñeñthchaꞌ yaꞌpsaterreꞌ Yompor. Ñamha eꞌñe sameꞌñeñothpaꞌ womenkëpaꞌch sephaꞌ seyoxher. Ñamha amach semhchaꞌtatsto, xhochña sewmenkta Yomporekop. 14Ñamha ora allpon ñeñth sephaꞌyenpaꞌ eꞌñepaꞌch semorrentannaꞌteñoth es sephaꞌyen.

15Theꞌpaꞌ oꞌch, masheñneshachaꞌ ñamha noxhaneshachaꞌ, notas poꞌpoñ. Sapaꞌ señoteñ ñamha attho masheñ Estéfanaspaꞌ ña ñanom ameꞌñerrtsa awath all Acayo. Ñamha awoꞌt ameꞌñerret epoet pamoꞌtseshaꞌ. Eꞌñe allempotheñ ñetpaꞌ awoꞌt thorraꞌyenet añekop atthoch yenpoet allowen ñeñth poeyochreshaꞌ oꞌ perr theꞌ Parets. 16Ñeñthoꞌmar theꞌpaꞌ oꞌch notas: Eꞌñe pokteꞌ oꞌch seꞌmhñoch Estéfanas, ñamha amaꞌt allowen poꞌpoñexhno acheñ ñeñth xhokma thorrapretetsa Yomporekop. 17Napaꞌ theꞌpaꞌ atarr nokshena tharroꞌmar oꞌ wapa arr nesho masheñ Estéfanas ñamha Fortunato ñamha Acaico. Tharroꞌmar sapaꞌ amaꞌt ama sewapopaꞌ ñetpaꞌ oꞌ wapoet. 18Ñetpaꞌ atarr koshatosnet neyoxhrokmañen. Ñatoꞌ sapaꞌxhoꞌña oꞌtheꞌ koshataset. Kowenepaꞌch señch acheñ ñeñth ateth petsa.

19Ñamha allowen ñeñth ameꞌñaꞌyetsa arr Asioꞌmarpaꞌ moeneñet oꞌch womhchaꞌtaset ñamet añ necartoth. Masheñ Aquilapaꞌxhoꞌña moeneñ oꞌch womhchaꞌtas epoet poethapor Priscila. Ñamha allowen masheñneshaꞌ ñamha noxhaneshaxhno ñeñth pameꞌñeñothet apxhetset Aquilapawo moeneñet oꞌch womhchaꞌtaset ñamet. Tharroꞌmar eꞌñe yeparrokmateñoth epay Yepartsesharpaꞌ oꞌ womhchaꞌtaset añ necartoth. 20Ñamha allowen masheñneshaxhno ñamha noxhaneshaxhno ñeñth arroꞌtsaꞌyenpaꞌ moeneñet oꞌch womhchaꞌtaset ñamet. Eꞌñe semorrentannaꞌteñothpaꞌ atethchaꞌ sewomhchaꞌtannaꞌtena ñeñth ateth poktetsa Partsokop.#16.20 Poꞌñoxh oteney, “Eꞌñe semorrentannaꞌteñoth xhoch setsoꞌtstsaꞌpaꞌtannena ñerraꞌm esempo sewomhchaꞌtannaꞌtena ñeñth ateth poktetsa Partsokop.” Ñeñthpaꞌ ateth yexheteꞌth awath.

21Añ koñeꞌthpaꞌ oꞌch nekellkaꞌ namha eꞌñe na nototh, atthoch oꞌch newomhchaꞌtas namha.

22Ñerraꞌm eseshaꞌ ama morrentenaye Yepartseshar Jesucristo ñeñthña ateth petsa aꞌkoñchatarethtepaꞌch. Theꞌpaꞌ ñeñthach notas, werrnayepaꞌtheꞌ ñeñth Yepartseshar yepen.

23Yepartsesharepaꞌchña Jesucristo saꞌnatenaya allowenes. 24Eꞌñe nameꞌñeñoth Cristo Jesús atarr nemorrentensa. Theꞌpaꞌ ñeñthach notas, ñeñthpaꞌ atthetepaꞌchña Nompore. Allowa.

Pablo

Currently Selected:

1 Corintios 16: ame

Highlight

Copy