1 Corintios 14

Amaꞌt yeñosatsetyes poꞌpoñ ñoñtsopaꞌ ñeñthpaꞌ ama tama sherbeno

1Ñeñthoꞌmarña theꞌpaꞌ añ poktetsa oꞌch yemaꞌyoxhrena atthoch yemorrentannaꞌta eꞌñe poktakma. Ñamha añ pokteꞌ oꞌch yeyeꞌchaprecha Yompor atthoch oꞌch apaꞌyesey eꞌñe Poekamkëñoth atthoch yethorraꞌyesa ñokop. Añña eꞌñe pokteꞌ oꞌch yeyeꞌchaprecha nanak atthoch apoey oꞌch yaꞌpothoñ poꞌñoñ eꞌñe eñotoxhen. 2Tharroꞌmar ñeñth eñets poꞌpoñ ñoñtsopaꞌ añekpa sherben atthoch eñora epoet Yompor, tharroꞌmar añña acheñeneshaꞌ ñeñth eꞌmhñotenawetañpaꞌ amach eseshaꞌ eñotenaye ñeñth ateth oten. Amaꞌt añ yeꞌñoratatsteꞌ Parets Poekamkëñ ñeñth ama eñotpawo ñoñetsñaꞌ ñerraꞌm acheñeneshaꞌpaꞌ ama eñoteñeto ateth yotyenanet, ñeñthpaꞌ eꞌñe Yompora ñapoeth eꞌmoeneꞌ. 3Tharraña ñerraꞌm esempo yaꞌpothoñ Yompor poꞌñoñ eꞌñe eñotoxhenpaꞌ ñeñthpaꞌ poꞌñoxh xhoch es yeñotatenanet atthoch womenk penet poeyoxher Yomporekop. Ñamha xhoch yeñotatanet ñeñth ateth oteney Yompor poꞌñoñ ñeñthchaꞌ ateth yepha eꞌñe kowen. Ñamha xhoch yeñotatanet Yompor poꞌñoñ atthoch ñetpaꞌ koshenet Yomporekop. 4Tharraña ñeñth eñets poꞌpoñ ñoñtsopaꞌ ñeñthpaꞌ amach attheyeꞌ peno. Añekpach eñen eꞌñe ñokpa atthoch womenk phan poeyoxher eꞌñe ñañeña. Tharraña ñerraꞌm esempoña yaꞌpotheññañ Yompor poꞌñoñ eꞌñe eñotoxhenpaꞌ ñeñthpaꞌ xhoch poꞌñoxh es yeñotateñ allowen ñeñth ameꞌñetsa atthoch womenk penet poeyoxher Yomporekop.

5Ñewa, poꞌñoxhpaꞌ pokteꞌ nenteñ oꞌch seños poꞌpoñ ñoñtso allowenes, tharraña ñeñth nanak nemnen oꞌch señospaꞌ ñeñthpaꞌ añ: oꞌch saꞌpothoñ Yompor poꞌñoñ eꞌñe eñotoxhen ñeñth allo yeñen. Tharroꞌmar ñerraꞌm esempo yaꞌpothoñ Yompor poꞌñoñ eꞌñe eñotoxhenpaꞌ nanakchaꞌ yesherben Yomporekop. Tharraña ñerraꞌm esempoña yeñen poꞌpoñ ñoñtsopaꞌ amach tama yesherbeno. Ñewa, pokteꞌ enteñ Yompor ñerraꞌm poꞌñoxh eñall poesheñarr ñeñth aꞌmhteneꞌ ñoñets eꞌñe ya yeñoño, atthoch alloweney ñeñthey ameꞌñetsapaꞌ oꞌch xhaponaya Yompor poꞌñoñ yeyoxhro atthoch womenk yephaꞌ yeyoxher. 6Oꞌch notas masheñneshachaꞌ ñamha noxhaneshachaꞌ amaꞌt napaꞌ ñerraꞌm machayotha nexhap seshopaꞌ ñerraꞌm nañapaꞌ aña neserrpareꞌtatoses poꞌpoñ ñoñtso ñeñth ama yeñenopaꞌ errothenothwatheꞌñakaꞌyeña señoch tharroꞌmar amakaꞌye seꞌmoenoña ñeñth ñoñtsor ñeñth ateth notenes atthoch eꞌñe kowen neyenpas. Tharraña añña pokteꞌ sokop napaꞌ xhokmach naꞌpothonas eꞌñe eñotoxhen amaꞌt koñethaꞌttsa ñeñth ateth eñotatenen Yompor. Ñamha napaꞌ elloña xhochña es neñotatyesas poꞌpoñ ñeñth ama señoteno sa. Ñamha napaꞌ xhochña naꞌpothonas mameshaꞌtets Yompor poꞌñoñ, ñamha xhochña es neyxhatas ñeñth kowentetsa.

7Ñatoꞌ oꞌch netmaꞌntacha ñeñth ateth pena penkoll, amaꞌt penkollpaꞌ ama acheñeyaye. Ateth ñerraꞌm napaꞌ esempo nepenkllaꞌtenñaꞌ ñerraꞌm ama kowenayeꞌ naꞌpoxheꞌteno nepenkollpaꞌ amach eseshaꞌ eñotaye errothentheꞌ nephchateñ. Amapaꞌ ateth ñerraꞌm napaꞌ esempo netokaꞌ yetarra,#14.7 Poꞌñoxh añpaꞌ oten arpa. ñerraꞌ ama attheyeꞌ netoko ateth tokëñetpaꞌ amach eseshaꞌ eñotaye errothentheꞌ nephchateñ. 8Ñewa, ñatoꞌ oꞌch netmaꞌntatererr poꞌpoñ. Ateth ñerraꞌm esempo oꞌch awanmoet kellaratsapaꞌ xhoch ñanom poesheñarr solltarpaꞌ oꞌch korrnetaꞌt kellareñtsorexho, atthoch solltarneshaꞌpaꞌ oꞌch eñoch oꞌ xhap allempoch awanmoet kellaratset. Tharraña ñerraꞌm solltarpaꞌ ama kowen aꞌpoxheꞌtano poꞌkorrnetpaꞌ añña solltarneshaꞌpaꞌ amach eñocheto ñatoꞌ añekoptheꞌ aꞌthoreñet atthoch awanmoet kellaratset. 9Atthekma pena ñamha yokop ñerraꞌm esempo yeserrpareꞌten poꞌpoñ ñoñtso ñeñth ama allo eñeno acheñeneshaꞌ, ñetpaꞌ amach errothenoth xhapaneto poeyoxhreto ñeñth ateth yotenanet. Atethpaꞌ xhach yottena ateththeꞌña ama eñalle acheñeneshaꞌ ñeñth yeꞌmhñoteneꞌ. 10Poꞌñoxhpaꞌ eñalleñchaꞌ shonteꞌ poꞌpoñeꞌttsokma ñoñets ñeñth ateth yeñosyen añ patsro. Ñamha poꞌpoñeꞌttsokmay acheñey ñeñthey eñotyeneꞌ ñeñth eꞌñe yeñoñ allo yeñosyen. 11Tharraña ñerraꞌm poꞌpsheñeñpaꞌ oꞌch serrpareꞌtatey eꞌñe ña poꞌñoño ñeñth ama allo yeñeno yapaꞌ, ñeñthpaꞌ amach yeñoche errothentheꞌ oteney ña poꞌñoño. Yapaꞌ atthach yeꞌmoeñ ñerraꞌmrratheꞌ attha otatsen. Ñamha atthekmay yamha ñerraꞌm yapaꞌ oꞌch yeserrpareꞌtach ñeñth ama eñetso yeñoñopaꞌ amach eñoche errothentheꞌ yoteñ yeñoño. Ñapaꞌxhoꞌña atthach eꞌmoeney ñerraꞌmrratheꞌ attha yotatsen. 12Napaꞌ tharroꞌmar ateth notenes tharroꞌmar sapaꞌ xhokma seyeꞌchyena attho Parets Poekamkëñpaꞌ oꞌch phatyesas ñeñth ateth semnaꞌyen sa. Tharraña napaꞌ añchaꞌña oꞌch notas, añña pokteꞌ oꞌch seyeꞌchena atthoch señot eꞌñe kowen alloch womenk sephoñ poeyoxher allowen ñeñth ameꞌñetsa.

13Ñeñthoꞌmar theꞌpaꞌ oꞌch notas: Ñerraꞌm eseshaꞌ eñosets poꞌpoñ ñoñtsopaꞌ añ pokteꞌ maꞌyochanepaꞌ Yompor atthoch eñotach oꞌch aꞌmhtan ñoñets eꞌñe eñotoxhen añ ñeñthara ñoñtso. 14Tharroꞌmar ñerraꞌm esempo yemaꞌyochena poꞌpoñ ñoñtsopaꞌ amaꞌt eꞌñe Parets Poekamkëñ yemaꞌyochatatsteꞌpaꞌ tharraña allempo poꞌñoxhpaꞌ amach añeyeꞌ yokthapeꞌcheno atthoch yeyenpoeꞌ yamoꞌts. 15Ñewa, ñeñthoꞌmarña theꞌpaꞌ oꞌch notas ñeñthchaꞌ ateth yephaꞌyesa eꞌñe kowen. Poꞌñoxhpaꞌ eꞌñe pokteꞌ oꞌch maꞌyochatey Parets Poekamkëñ poꞌpoñ ñoñtso, tharraña añ eꞌñe pokteꞌ ñamha oꞌch yemaꞌyochena eꞌñe eñotoxhen. Ñamha atthekma eꞌñe pokteꞌ Parets Poekamkëñothpaꞌ oꞌch yemorrecha Yomporekop poꞌpoñ ñoñtso, tharraña añ pokteꞌ ñamha oꞌch yemorrechena allo eꞌñe yeñen. 16Tharroꞌmar ñerraꞌm poꞌpoñ ñoñtsa yaꞌyeꞌchoxhtateññañ Yompor ateth eñoratey Poekamkëñ, tharraña ñerraꞌm alloꞌtsaꞌyen poꞌpoñexhno acheñeneshaꞌ ñeñth eꞌñe errteꞌ eꞌmhñotetspaꞌ amach errothenoth pokteꞌ entapretyeto attho yaꞌyeꞌchoxhtateññañ Yompor, tharroꞌmar ama eꞌmoennayeto yeñoñ. 17Ñamha amaꞌt eꞌñe kowen yeparasyosoꞌteñeñ Yomporpaꞌ tharraña ñerraꞌm poꞌpoñ ñoñtsa yemaꞌyochena, ñeñthpaꞌ ama añekpayaye alloch womenk yephoñ poꞌpsheñeñ poeyoxher, tharroꞌmar ama eñoteñeto errothentheꞌ yoten. 18Napaꞌ atarr neparasyosoꞌteñ Yompor, tharroꞌmar amaꞌt napaꞌxhoꞌ neñoteñ eñosets poꞌpoñ ñoñtso. Ñatoꞌ ñeñthpaꞌ ello metanennas allowenes attho señosyen poꞌpoñ ñoñtso. 19Tharraña allempo yapxhena alloweney ñeñthey ameꞌñetsapaꞌ napaꞌ añña pokteꞌ nenten oꞌch neserrpareꞌt amaꞌt eꞌñe koñeꞌtha ñoñets ñeñth eñotoxhen atthoch eꞌñe yeñotwe. Añña ama tama kowenayeꞌ nenteno amaꞌtchaꞌ neserrpareꞌten shonteꞌ ñoñets, tharraña ñerraꞌm poꞌpoñ ñoñtsa neñenpaꞌ ñeñthpaꞌ amach xhoyeꞌ neyenpoeñe namoꞌts.

20Ñeñthoꞌmarña masheñneshachaꞌ ñamha noxhaneshachaꞌ amach sokthapeꞌchatsto ateth kothapeꞌchen cheshaneshaꞌ ñeñth ama eñotenaye ñeñth ateth kowentetsa. Ñewa, poꞌñoxh ñerraꞌm esempo yokthapeꞌchyen sosyaꞌtsañ allempoña pokteꞌ oꞌch yokthapeꞌchen ñeñth ateth kothapeꞌchen cheshatholl, tharroꞌmar cheshathollpaꞌ ama tama kothapeꞌchenetaꞌ sosyaꞌtsañ. Tharraña allempo yokthapeꞌchen ñeñth kowentetsa Yomporekoppaꞌ allempoña poꞌñoxhpaꞌ oꞌch yokthapeꞌchen ateth kothapeꞌchen poꞌnaneshaꞌ ñeñth atarr es eñotets. 21Añpaꞌ ñeñth Yompor poꞌñoñ ñeñth ateth anareth awathotheñ allempo Yomporpaꞌ ateth otaneꞌth israelenaꞌtarneshaꞌ. Ñeñthpaꞌ ateth otaneteꞌth: “Oꞌch noñmatas poꞌpoñ acheñ ñeñthchaꞌ seserrpareꞌtateneꞌ eꞌñe ñet poꞌñoñeto tharraña amaꞌtchaꞌ ateth nephonaspaꞌ amach eseshaꞌ nameꞌñerraye tharroꞌmar amach eseshayeꞌ eñotaye ñeñth ateth aserrpareꞌtatarethtenet.” Ñeñthpaꞌ Yompor ateth otaweteꞌth awath. 22Ñeñthoꞌmarña theꞌpaꞌ ateth notenes amaꞌt yeserrpareꞌtatset poꞌpoñ ñoñtsopaꞌ ñeñthpaꞌ ama añekpayaye atthoch yameꞌñacha ñeñth ama ameꞌñetso tharroꞌmar añ ñoñets ñeñth awathotheñ anareth ñeñthña yeñotateneꞌña amaꞌtchaꞌ yeserrpareꞌtatatset poꞌpoñ ñoñtso amach eseshaꞌ yameꞌñerrayo. Ñeñthchaꞌña yeñotateꞌña erraꞌtsentheꞌ poꞌñoxh ñeñth ama ameꞌñetso. Tharraña ñerraꞌm esempo yaꞌpotheññañ Yompor poꞌñoñ eꞌñe ya yeñoño ñeñth atarr eñotoxhen, añña ñeñth ameꞌñetsa ñetñapaꞌ eꞌñech kowen eꞌmhñoteñet allochña womenk yepenanet poeyoxhret Yomporekop. Ñeñthchaꞌña yeñotateꞌña ñetpaꞌ poꞌñoxh ameꞌñenet tharroꞌmar ñeñth poꞌñoxh ama ameꞌñetso, ñetpaꞌ amach moeneñeto oꞌch eꞌmhñotet amaꞌt ñeñth atarr eñotoxhen ñoñets. 23Ñamha oꞌch notas, ñerraꞌm esempo sapxhena allowenes ñeñthes ameꞌñetsa, ñerraꞌm allowenespaꞌ attha señosyen poꞌpoñeꞌttsokma ñoñtsopaꞌ ñerraꞌmña machaya wapa ñamha ñeñth ama ameꞌñetso amapaꞌ ñeñth errteꞌ eꞌmhñotetspaꞌ ñetpaꞌ amaꞌttheꞌña xha otaseto xhoꞌtheꞌ semospoena. 24Tharraña ñerraꞌm esempoña saꞌpothen allowenes Yompor poꞌñoñ eꞌñe eñotoxhen ñerraꞌm allempoña wapa ñeñth ama ameꞌñetso amapaꞌ ñeñth errteꞌ eꞌmhñotetspaꞌ ñeñthña ateth seserrpareꞌten Yompor poꞌñoñpaꞌ ñatoꞌ allowenetpaꞌ oꞌch xhapanet poeyoxhro, oꞌch eñotet ñañeñeta ñeñth ateth kothapeꞌchyenet ñetpaꞌ ñeñthpaꞌ ama pokteyaye Yomporekop. 25Allempoñapaꞌ ñatoꞌ oꞌch yoreꞌtanet poꞌchñaret ñeñth kothapeꞌchatyenawet poeyoxhro eꞌñe aꞌnawa ñatoꞌ poellkëñothetpaꞌ oꞌch konkorpoet ñatoꞌ oꞌch agëret ñamet Yompor. Tharroꞌmar ñatoꞌ allempopaꞌ oꞌch ot: “Poꞌñoxhepaꞌt Yompor seꞌñoratyeneꞌ.”

Parets paꞌpakllopaꞌ ama aserrpareꞌtpawo eꞌñe parrokma

26Ñewa, masheñneshachaꞌ ñamha noxhaneshachaꞌ, ñeñthchaꞌ ateth sepha kowen ñeñthpaꞌ ateth: Sapaꞌ allempo sapxhenapaꞌ ñatoꞌ poesheñaꞌttsospaꞌ oꞌch semorrechena, ñatoꞌ poꞌpsheñeñpaꞌ oꞌch yexhatenet, ñatoꞌ poꞌpsheñeñpaꞌ oꞌch aꞌpothan ñeñth ateth eñotateñ Yompor, ñatoꞌ poꞌpsheñeñpaꞌ oꞌch eños poꞌpoñ ñoñtso, ñatoꞌ poꞌpsheñeñpaꞌ oꞌchxhoꞌ aꞌmhtan añ ñoñets. Tharraña ñeñthpaꞌ añekopchaꞌ ateth sepha atthoch womenk sephoñ poꞌpsheñeñ poeyoxher. 27Tharraña ñerraꞌm eseshas eñosets poꞌpoñ ñoñtsopaꞌ ama pokteyaye oꞌch seños eꞌñe allowenes, ñatoꞌ eꞌñech epsheña eñosets amapaꞌ maꞌpsheña allothpaꞌ ñeñthach. Ñamha añ pokteꞌ ñeñthchaꞌ eñosetspaꞌ ñapthepaꞌtetschaꞌ eñoset. Tharraña añ pokteꞌ ñamha eñallchaꞌ ñeñthchaꞌ eñotatenawet ñoñets ñeñth ateth eñenet. 28Tharraña ñerraꞌm ama eñalle ñeñthchaꞌ eñotatawet ñoñetspaꞌ amach eñosatsteto eꞌñe alla allempo sapxhena allowenes ñeñthes ameꞌñetsa. Allempopaꞌ eñoranaꞌchetepaꞌ Yompor eꞌñe ñaptheto eꞌñe poeyoxhreto. 29Ñamha añ pokteꞌ eꞌñech epsheña, amapaꞌ maꞌpsheña ñeñthchaꞌ aꞌpotheꞌ Yompor poꞌñoñ. Poꞌpoñexhno acheñeneshaꞌpaꞌ añ pokteꞌ xhoch eꞌmhñochet, ñamha xhoch kothapeꞌchet poꞌñoxhtheꞌ ateth oteney Yompor. 30Ñamha ñerraꞌm esempo poꞌpsheñeñ moeneñ oꞌch aꞌpothan ñeñth eñotateñ ñamha Yompor Poekamkëñpaꞌ añ pokteꞌ allempopaꞌ amach serrpareꞌtatsto ñeñth ñanom serrpareꞌtets. 31Atthochña oꞌch saꞌpothwoñ allowenes Yompor poꞌñoñ eꞌñe sapthepaꞌtets, ñamha atthoch allowenespaꞌ oꞌch eꞌñe señoch, ñamha atthoch alloꞌna koshatnenes Yompor poꞌñoñ. 32Tharroꞌmar ñeñthey aꞌpotheneꞌ Yompor poꞌñoñpaꞌ xhokmach eñall atthoch yewnata yañeña ñanom atthoch xhokma yemnatannena. 33Yomporpaꞌ ama moeno oꞌch attha yanoꞌtatseꞌten alloweney, añña moenen oꞌch yesen eꞌñe kowen.

Ñamha ateth pena allemeñ anetso ñeñth apxhaꞌyetsa ñeñth poeyochreshaꞌ pen Parets. Ñamha allempo sapxhena allowenes ñeñthes ameꞌñetsapaꞌ 34koyaneshaxhnopaꞌ amach serrpareꞌtatsteto, tharroꞌmar ñeñthpaꞌ ama pokteyaye. Añña pokteꞌ xhoch ameꞌñyet ñeñth amhchaꞌtarethtetsa, ñeñthpaꞌ ateth oteney ñoñets ñeñth ateth anareth awathotheñ. 35Ñewa, ñerraꞌm moeñenet oꞌch es eñotetpaꞌ aꞌphthoꞌchetepaꞌ poerrollaret allempo xherret paꞌpakllo, tharroꞌmar ama pokteyaye koyaneshaꞌpaꞌ oꞌch serrpareꞌt allempo yapxhena ñeñthey ameꞌñetsa.

36Ñewa, ñerraꞌm ama pokteyeꞌ senteñe ñeñth ateth oꞌ notwaspaꞌ ñewa, oꞌch notas ateth: Yompor poꞌñoñpaꞌ ama eꞌñe sa sokthaphñotheyeꞌ weno, ñamha ama eꞌñe sapthekpa weno. 37Ñamha ñerraꞌm eseshaꞌ otats, “napaꞌxhoꞌña naꞌpotheññañ Yompor poꞌñoñ”, ñewa, eñotanepaꞌ ñeñth ateth noten necartothpaꞌ ñeñthpaꞌ poꞌñoxh ateth oteney Yepartseshar ñeñthchaꞌ ateth yepha. Ñamha ñerraꞌm eseshaꞌ otats, “napaꞌxhoꞌña chorrenna Parets Poekamkëñ”, ñewa, ñapaꞌxhoꞌña eñotanepaꞌ ñeñth ateth noten necartoth ñeñthpaꞌ poꞌñoxh ateth oteney Yompor ñeñthchaꞌ ateth yepha. 38Tharraña ñerraꞌm eseshaꞌ ama nameꞌñayo ñeñth ateth oꞌ notwaspaꞌ ñewa, ñapaꞌ amach seꞌmhñotatsche.

39Ñeñthoꞌmarña theꞌ, masheñneshachaꞌ ñamha noxhaneshachaꞌ, oꞌch noterrserr: Añ pokteꞌ oꞌch semaꞌyoxhrena aꞌpotheꞌ Yompor poꞌñoñ eꞌñe eñotoxhen ñoñtso, tharraña pokteꞌ oꞌch semnatanet eñosetepaꞌ poꞌpoñ ñoñtso. 40Tharraña amaꞌt erraꞌtsenchaꞌ sephaꞌyespaꞌ eꞌñech kowen sesen ñeñth poktetsa, ñamha xhokmach semnatannaꞌta oꞌch es sephaꞌyes eꞌñe sapthepaꞌtets.

Currently Selected:

1 Corintios 14: ame

Highlight

Copy