1 Corintios 12

Attho Parets Poekamkëñpaꞌ apaꞌyeney poꞌpoñeꞌttsokma atthoch yethorraꞌyesa Yomporekop

1Theꞌpaꞌ masheñneshachaꞌ ñamha noxhaneshachaꞌ oꞌch yeserrpareꞌt ñamha attho Parets Poekamkëñpaꞌ ñach awamenkath yephaꞌyeseꞌ atthoch yethorraꞌyesa poꞌpoñeꞌttsokma Yomporekop. Tharroꞌmar napaꞌ nemneñ oꞌch señoch ñeñth eꞌñe ateth pennay Parets Poekamkëñ.

2Amaꞌt sapaꞌ señoteñ awañmoꞌcha allempo ama sameꞌñerraꞌpaꞌ attha semaꞌyochatseꞌtyeseꞌth ayexhkatarethexhno. Ñamha ayexhkatarethexhnopaꞌ amaꞌt ama eñorenopaꞌ attha nanak ameꞌñataseteꞌth, amaꞌt all setaꞌyeseꞌth. 3Tharraña ñerraꞌm machaya eseshaꞌ eñoratsa, napaꞌ nemneñ xhochña eꞌñe señoch ñatoꞌ poꞌñoxhtheꞌ añ eñorateneꞌ Parets Poekamkëñ, ñatoꞌ amatheꞌ. Ñeñthoꞌmarña oꞌch neñotatas ateth atthoch sapaꞌ señoch: Ñerraꞌm eseshaꞌ achmhareꞌteneꞌ Jesúspaꞌ ñeñthña sapaꞌ oꞌch señoch ama añeyeꞌ eñoratenaye Yompor Poekamkëñ. Tharraña ñerraꞌm eseshaꞌña otets: “Jesúspaꞌ ñeñth poꞌñoxh Yepartseshar yepen”, ñeñthña poꞌñoxhpaꞌ oꞌch señoch añ eñorateneꞌ Parets Poekamkëñ.

4Ñamha Yomporpaꞌ amaꞌt eꞌñe pathrra Poekamkëñpaꞌ tharraña ñapaꞌ oꞌch awamenkath phaꞌyesey atthoch yethorraꞌyesa eꞌñe poꞌpoñeꞌttsokma Yomporekop. 5Amaꞌtchaꞌ poꞌpoñeꞌttsokma yethorraꞌyesañpaꞌ tharraña ñeñtharach patherr Yepartseshar yesherbhaꞌwen alloweney. 6Ñamha amaꞌt eñalleñ poꞌpoñeꞌttsokma attho awamenkath phoweney alloweney tharraña eꞌñe pathrra Yompor ñeñth awamenkath yepeneꞌ alloweney. 7Ñamha alloweney Parets Poekamkëñpaꞌ awoꞌt apaꞌyesey atthoch yorrtatyesoñ Yompor poꞌwamenk. Ñeñthpaꞌ añekop aparethey atthoch yeyenpannaꞌta alloch womenk yephaꞌyes yeyoxher Yomporekop. 8Ateth ñerraꞌm ñatoꞌ poesheñarr Parets Poekamkëñothpaꞌ oꞌch aph atthoch eꞌñe eñotan ñeñth kowentetsa Yomporekop, atthoch ñapaꞌ oꞌch kothapeꞌchatan pamoꞌtseshaꞌ. Ñatoꞌ poꞌpsheñeñ añ Parets Poekamkëñpaꞌ oꞌch nanak xhapatoñ poeyoxhro ñeñth kowentetsa Yomporekop, atthoch ñapaꞌxhoꞌña oꞌch yenpan pamoꞌtseshaꞌ. Tharraña ñeñthara Parets Poekamkëñ ñeñthña eñotatenawet. 9Ñatoꞌ poꞌpsheñeñpaꞌ nanakchaꞌ yemtenana Yompor. Ñeñthara Parets Poekamkëñpaꞌ oꞌch aph atthoch yemcha nanak. Ñatoꞌ poꞌpsheñeñpaꞌ oꞌch aph poꞌwamenk atthoch aꞌkrratyesan atsnañethexhno. Tharraña ñeñthara Parets Poekamkëñ ñeñthña apoeneꞌ atthoch aꞌkrratyes. 10Ñatoꞌ poꞌpsheñeñpaꞌ oꞌch aph atthoch orrtatyesan Yompor poꞌpartsoña. Ñatoꞌ poꞌpsheñeñpaꞌ nanakchaꞌ kowen aꞌpothan Yompor poꞌñoñ. Ñatoꞌ poꞌpsheñeñpaꞌ oꞌch eñotyesan paꞌnamen kothaphñats, atthoch ñapaꞌ oꞌch eñoch erroththeꞌ wena ñeñth kothaphñats, ñatoꞌ Parets Poekamkëñoth amapaꞌ oneñethatheꞌ pokthaphña. Ñatoꞌ poꞌpsheñeñpaꞌ Parets Poekamkëñchaꞌ eñotateneꞌ eñosyesets poꞌpoñ ñoñtso. Amapaꞌ ñatoꞌ poꞌpsheñeñpaꞌ oꞌch aꞌmhtan ñoñets ateth eñenet poꞌpoñ ñoñtso. 11Tharraña alloweneypaꞌ eꞌñe pathrra Parets Poekamkëñ ñeñthchaꞌ yeñotateneꞌ ñeñthara ñeñthchaꞌ yapaꞌyeseꞌ poesheñaꞌttsoy erraꞌtsenchaꞌ moenaꞌ ña atthoch yethorraꞌyesa paꞌnamen ñokop.

Amaꞌt eꞌñe poꞌpoñeꞌttsokma yethorraꞌyena Yomporekoppaꞌ tharraña ñapaꞌ eꞌñe atthekma kowen enteney

12Ñatoꞌ oꞌch netmaꞌntacha ñeñth ateth yexhkëna yechets. Ñewa, allemeñ yechetspaꞌ amaꞌtchaꞌ ellopaꞌtetstenañpaꞌ tharraña allowenpaꞌ eꞌñe pathrra yechtsoth. Atthekma yepena yamha alloweney ñeñthey ameꞌñaꞌyenaya Cristo. Amaꞌt shonteyeñ poꞌpoñeꞌttsokmaypaꞌ tharraña eꞌñe yameꞌñeñoth Cristopaꞌ oꞌch yeparrokmatwawa alloweney. 13Tharroꞌmar allempo oꞌ yapatarethetwapaꞌ Parets Poekamkëñpaꞌ oꞌch parrokmatatwerrey alloweney. Amaꞌt ñamha poꞌpoñeꞌttsokmay acheñey ateth ñerraꞌm patantaꞌttsoypaꞌ judioneshay, ñatoꞌ poꞌpotantañpaꞌ amach judioneshayaye. Tharraña alloweney eꞌñe poechorreñothey Parets Poekamkëñpaꞌ eꞌñe allempotheñpaꞌ oꞌch yeparrokmatwa alloweney. Amaꞌt ñamha acheñ ñeñth atarwasatareth eꞌñe attha ñeñth ama esoyeꞌ enteñeto ñamha acheñ ñeñth eꞌñe kowenoꞌtsen. Tharraña eꞌñe poechorreñothey Parets Poekamkëñ ñeñth eꞌñe pathrrapaꞌ eꞌñe allempotheñpaꞌ oꞌch yeparrokmatwa alloweney.

14Oꞌch alla netmaꞌntatererr ñeñth ateth yexhkëna yechets. Ñewa, ateth ñerraꞌm allemeñ yechetspaꞌ ama pathrrayeꞌ yexhkëtso, shonteꞌkaꞌye yexhkëtsa. Tharraña amaꞌt shonteꞌ yexhkënañ yechetspaꞌ eꞌñe pathrra yechets ottetsa. Atthekma yepena yamha alloweney ñeñthey ameꞌñaꞌyenaya Cristo. Amaꞌt shonteyeñ poꞌpoñeꞌttsokmaypaꞌ tharraña eꞌñe yameꞌñeñoth Cristopaꞌ oꞌch yeparrokmatwawa. 15Ñewa, oꞌch netmaꞌntatererr poꞌpoñ: Ñatoꞌ ateth ñerraꞌm yetakpaꞌ oꞌch ot: “Napaꞌ ama es nesherbeno ateth sherben otats, ñeñthoꞌmarña ama pokteyeꞌ nenteñe oꞌch neparrokmat epan yeꞌnar.” Tharraña amaꞌt ateth oteneñ yetakpaꞌ ñeñthpaꞌ ama attheyaye, xhokma parrokmaten. 16Amapaꞌ ñatoꞌ ateth ñerraꞌm yetpaꞌ oꞌch ot: “Napaꞌ ama es nesherbeno ateth sherben këlloꞌyets ñeñthoꞌmarña napaꞌ ama pokteyeꞌ nenteñe oꞌch neparrokmat epan yeꞌnar.” Tharraña amaꞌt ateth oteneñ yetpaꞌ ñeñthpaꞌ ama attheyaye, xhokma parrokmaten ñamha. 17Ñerraꞌm yechetspaꞌ eꞌñe yeklloyochayapaꞌ amatheꞌ errotheno yeꞌmoeno. Ñamha ñerraꞌm yechetspaꞌ eꞌñe yetochayapaꞌ amatheꞌ errotheno es yemosyeno. 18Tharraña poꞌñoxhpaꞌ ama attheyeꞌ yexhkatye Yompor. Ñapaꞌ awoꞌt neꞌ atthoch yexhkaꞌyesa allemeñ yechets ñeñth ateth pokteꞌ ent ña. Ñeñthoꞌmarña yeñoteñ amaꞌt errothenxhoꞌ yethorraꞌyesa Yomporekop poesheñaꞌttsoypaꞌ ñeñthpaꞌ xhokma sherbhaꞌyen. 19Poꞌñoxhpaꞌ ñerraꞌm yechetspaꞌ aña yexhkatsa patherr ateth ñerraꞌm eꞌñe yeklloyochayapaꞌ amatheꞌ errothenoth orrtoña eꞌñe kowen ora yechets. 20Tharraña poꞌñoxhpaꞌ ama attheyeꞌ ayexhkataretheye. Añña xhokma eñalletyesa allemeñ yechets. Tharraña amaꞌt ellopaꞌtetstenañpaꞌ eꞌñe pathrra yechets ottetsa. Ñeñthpaꞌ atthekma yepena yamha alloweney ñeñthey ameꞌñaꞌyenaya Cristo. Amaꞌt poꞌpoñeꞌttsokma yethorraꞌyesa Yomporekoppaꞌ tharraña eꞌñe yameꞌñeñoth Cristopaꞌ oꞌch yeparrokmatwawa alloweney.

21Ñatoꞌ oꞌch netmaꞌntatererr poꞌpoñ: Ateth ñerraꞌm yeklleꞌpaꞌ ama pokteyaye oꞌch otan yot: “Napaꞌ ama nepallteno ñeñth ateth pesherben pha.” Ñamha yoñpaꞌ ama pokteyaye oꞌch otan yetak: “Napaꞌ ama nepallteno ñeñth ateth pesherben pha.” 22Ñeñthoꞌmarña ama pokteyaye oꞌch yokthapeꞌchyes ateth, tharroꞌmar ora allowen yechetspaꞌ eꞌñe sherbhaꞌwen. Ñatoꞌ yapaꞌ xhach yotenapañ ñatoꞌ erraꞌtsen yechetspaꞌ amatheꞌ es sherbeno. Tharraña ñatoꞌ ñeñthara yechetspaꞌ ello metanaꞌtwenan attho sherben poꞌpoñexhno yechets. Atthekma yepena yamha alloweney ñeñthey ameꞌñaꞌyenaya Cristo. Ñatoꞌ yapaꞌ xhach yotenapañ ñatoꞌ erraꞌtsen acheñpaꞌ amatheꞌ es sherbeno. Tharraña ñatoꞌ ñeñthña acheñpaꞌ ello metanaꞌtwenan attho sherben poꞌpoñexhno acheñ. 23Ñamha ñerraꞌm erraꞌtsen yechets ama tama kowenayeꞌ yentenopaꞌ ñatoꞌ oꞌch yechorrateña eꞌñe kowen atthoch ellopaꞌ oꞌch yorrta nanak kowen. Ñamha ñatoꞌ erraꞌtsen yechets ñeñth yepenkateneꞌpaꞌ ñatoꞌ oꞌch yaꞌnach eꞌñe kowen. 24Tharraña ñeñth eꞌñe kowen yechetspaꞌ amach yemno oꞌch yaꞌnach, añña xhochña yorrtateñ. Ateth yexhkatonay Yompor yechets atthoch amaꞌt ñeñth ama tama kowenayeꞌ yentenopaꞌ oꞌch yaññoꞌteñ eꞌñe kowen atthoch ellopaꞌ oꞌch orrta nanak kowen. 25Allempoña allemeñ yechetspaꞌ oꞌch parrokmatet eꞌñe kowen, ñamha allempopaꞌ oꞌch eꞌñe kowen yenpannenet. 26Ñeñthoꞌmarña ñerraꞌm esempo patherr yechetspaꞌ atserrtena allowen yechetspaꞌxhoꞌ oꞌch atsotapretannenet. Ñamha ñerraꞌm patherr yechetspaꞌ oꞌch orrta eꞌñe kowen allowen yechetspaꞌxhoꞌ oꞌch koshapretannenet. Atthekma yepena yamha ñeñthey ameꞌñaꞌyenaya Cristo. Eꞌñe yeparrokmatannaꞌteñoth ñerraꞌm poesheñarr yamoꞌts xha llekëna ñeñth parro yameꞌñenapaꞌ alloweney ñeñthey ameꞌñetsapaꞌ oꞌch yellkapretannena. Amapaꞌ ñerraꞌm poesheñarrotheypaꞌ nanak yokshenapaꞌ alloweneypaꞌxhoꞌña oꞌch yokshapretannena.

27Ñewa, añ yechets ñeñth oꞌ notwapaꞌ añ tomaꞌntena ya alloweney ñeñthey oꞌ yameꞌñera, Cristopaꞌ oꞌ enterrey ateth ñerraꞌm eꞌñe ña poꞌchtsoy, tharroꞌmar oꞌ yeparrokmat epay Cristo. Ñamha amaꞌt shonteyeñ eꞌñe poꞌpoñeꞌttsokmaypaꞌ tharraña eꞌñe yeparrokmateñothpaꞌ oꞌ ateth yeperra ateth ñerraꞌm Cristo poꞌchtsoy. 28Ñamha alloweney eꞌñe yameꞌñeñoth Yomporpaꞌ eꞌñe poꞌpoñeꞌttsokma yethorraꞌyena Yomporekop. Tharroꞌmar Yomporpaꞌ attho naꞌyesonay paꞌnamen atthoch yethorraꞌyesa ñokop. Ñanompaꞌ awoꞌt nan poesheñaꞌtets allsensarethneshaꞌ. Allothpaꞌ awoꞌt nan poꞌpoñexhno ñeñthchaꞌ aꞌpotheꞌ poꞌñoñ. Allothpaꞌ awoꞌt nan ñamha poꞌpotantañ ñeñthchaꞌ yexhatenawet Yompor poꞌñoñ. Allothpaꞌ awoꞌt nan poꞌpotantañ ñeñthchaꞌ orrtateꞌ poꞌpartsoña. Allothpaꞌ awoꞌt nan poꞌpotantañ ñeñthchaꞌ thorratsa atthoch aꞌkrratyeset ñeñth atsnaꞌtyets. Poꞌpotantaññapaꞌ awoꞌt neꞌ ñeñthchaꞌ thorratsa yenpoeꞌ allowen acheñeneshaꞌ. Poꞌpotantaññapaꞌ awoꞌt neꞌ ñeñthchaꞌ yechenawet allowenet. Poꞌpotantaññapaꞌ awoꞌt neꞌ ñeñthchaꞌ eñosyesets paꞌnamen ñoñtso. 29Poꞌñoxhpaꞌ ama allowenakmayeꞌ allsensaretheye. Ñamha ama allowenakmayeꞌ yaꞌpotheno Yompor poꞌñoñ. Ñamha ama allowenakmayeꞌ yeyxhateno. Ñamha ama allowenakmayeꞌ yorrtateññañe Yompor poꞌpartsoña. 30Ñamha ama allowenakmayeꞌ yaꞌkrratyeñe atsnañethexhno. Ñamha ama allowenakmayeꞌ yeñosyeno poꞌpoñ ñoñtso. Ñamha ama allowenakmayeꞌ yaꞌmhteno ñoñets ñeñth eñets poꞌpoñ ñoñtso. 31Tharraña amaꞌt ama allowenakma attheyepaꞌ eꞌñe pokteꞌ oꞌch yeyeꞌchena ñeñthchaꞌ yethorraꞌyena eꞌñe kowen poesheñaꞌttsoy Yomporekop. Tharraña ellopaꞌ oꞌch neñotatas poꞌpoñ ñeñth nanak sherbets Yomporekop.

Currently Selected:

1 Corintios 12: ame

Highlight

Copy