1 Corintios 11

1Ñeñthoꞌmarña napaꞌ notenes: Ateth sentenen ñeñth ateth nepena napaꞌ ñeñthpaꞌ eꞌñe pokteꞌ ñeñthchaꞌ ateth sepha samha, tharroꞌmar napaꞌ añ nepena ñeñth ateth pena ñamha Cristo.

Ñeñth poktetsa ñeñthchaꞌ ateth pha koyaneshaxhno allempo yapxhena Parets paꞌpakllo

2Theꞌpaꞌ oꞌch masheñneshachaꞌ ñamha noxhaneshachaꞌ notas poꞌpoñ. Napaꞌ eꞌñe pokteꞌ nentenes attho sapaꞌ ama sepseno ñeñth ateth neyxhatwanmas ñeñthchaꞌ ateth sepha, ñamha attho xhokma seyerpoenna. 3Theꞌña añmapaꞌ ñeñth nemneñ oꞌch señoch samha, attho ya alloweney ñeñthey asheñorreypaꞌ añ pomnaren yepeneꞌ Cristo. Añña koyaneshaꞌpaꞌ añ pomnaren penawet poerrollar. Cristoñapaꞌ añ pomnaren peneꞌ Pompor. 4Ñeñthoꞌmarña yoten ama pokteyaye ya ñeñthey asheñorreypaꞌ oꞌch yekaꞌmatamhoꞌta allempo yemaꞌyochena, amapaꞌ allempo yaꞌpotheññañ Yompor poꞌñoñ. Tharroꞌmar ñerraꞌm esempo yekaꞌmatamhoꞌtenapaꞌ xhach yottena ñerraꞌmrratheꞌ poꞌpsheñña acheñ pomnaren yepeneꞌ, amach añeyeꞌ pomnaren yepenaye Cristo. Attheñapaꞌ oꞌch xha yepenknaꞌntach Cristo ñeñth poꞌñoxh pomnaren yepeneꞌ. 5Yapaꞌ añña yoten koyaneshaꞌpaꞌ eꞌñe pokteꞌ oꞌch kaꞌmatamhoꞌta ñerraꞌm esempo maꞌyochena, amapaꞌ ñerraꞌm allempo aꞌpothenan Yompor poꞌñoñ. Tharroꞌmar ñerraꞌm ama kaꞌmatamhoꞌtopaꞌ xhach ottena ñerraꞌmrratheꞌ ama poerrollareyeꞌ pomnaren penaye. Ñeñthoꞌmarña yapaꞌ atarrchaꞌ penknaꞌntateney poñ tharroꞌmar ama xhoyeꞌ kaꞌmatamhoꞌteno. Ñerraꞌm ama kaꞌmatamhoꞌtopaꞌ añ poktetsa penkëpaꞌ tharroꞌmar xha ottena ateththeꞌña ñerraꞌm ashopenaꞌtareth. 6Attheña ñerraꞌm koyaneshaꞌ ama moeno oꞌch kaꞌmatamhoꞌtapaꞌ ñewa, amaꞌtpaꞌ shopenaꞌtatepaꞌ. Atthochña ñerraꞌm oꞌch xha penkana attho shopenaꞌtenapaꞌ ñewa, amaꞌtpaꞌ kaꞌmatamhoꞌtepaꞌ. Ñamha ñerraꞌm poetsorrmhoꞌtateñothpaꞌ oꞌch penkapaꞌ ñewa, amaꞌtpaꞌ kaꞌmatamhoꞌtepaꞌ ñamha. 7Yokopña ama pokteyaye ñeñthey asheñorreypaꞌ oꞌch yekaꞌmatamhoꞌta, allempo yeserrpareꞌten Yompor paꞌpakllo tharroꞌmar ya Yomporpaꞌ poetmaꞌntatarey ña, ñamha yapaꞌ xhokma poꞌkowenña peney. Tharraña koyaneshaꞌpaꞌ aña poꞌkowenña peneꞌ poerrollar. 8Ñewa, tharroꞌmar awath Yomporpaꞌ asheñorroth yexhkatan koyaneshaꞌ. Asheñorrpaꞌ ama koyaneshotheyeꞌ yexhkache. 9Ñamha yeñoteñ asheñorrpaꞌ ama añekpayeꞌ yexhkache koyaneshakop. Añekopña yexhkatan koyaneshaꞌ atthoch oꞌch yenpaꞌy ya ñeñthey asheñorrey. 10Ñeñthoꞌmarña añ pokteꞌ koyaneshaꞌpaꞌ oꞌch kaꞌmatamhoꞌtena atthoch amaꞌt Yompor poꞌmhllañotheñnanesharpaꞌ oꞌch eñochet añ poꞌñoxh pomnaren peneꞌ poerrollar. 11Tharraña eꞌñe yameꞌñeñoth Yepartsesharpaꞌ añ pokteꞌ ya ñeñthey asheñorreypaꞌ oꞌch yeyenpoeñ yamha koyaneshaꞌ. Koyaneshaꞌpaꞌxhoꞌña pokteꞌ oꞌch yenpoeney ya ñeñthey asheñorrey. 12Ñeñthoꞌmarña yeñoteñ awath Yomporpaꞌ asheñorroth yexhkatan koyaneshaꞌ. Ñamha eꞌñe allempotheñ amaꞌt ya ñeñthey asheñorreypaꞌ awoꞌt eñalletateney koyaneshaꞌ. Tharraña poꞌñoxhpaꞌ yeñoteñ ñeñthpaꞌ eꞌñe Yomporeshothekma wena.

13Ñewa, oꞌch naꞌphthoꞌtas: Ñeñth ateth seyxhena sa ¿amaꞌt pokteyeꞌ senteñeña koyaneshaꞌpaꞌ oꞌch maꞌyochenana Yompor ñerraꞌm ama kaꞌmatamhoꞌteno? 14Ñeñth ateth yeyxhena yapaꞌ ñeñthpaꞌ añ yeñotateneꞌ ñerraꞌm ya ñeñthey asheñorreypaꞌ esempo ateshaꞌta yechpaꞌ oꞌch penkateney. 15Tharraña ñerraꞌm koyaneshaꞌña ateshaꞌtatsa poeꞌchpaꞌ eꞌñech kowen entapreteñ allowen acheñeneshaꞌ. Ñamha ñerraꞌm ateshet poeꞌchpaꞌ ñeñthpaꞌ alloch kaꞌmatamhoꞌtenet, tharroꞌmar ñetpaꞌ ateth yexhkatanet Yompor. 16Ñewa, ñerraꞌm eseshas ama pokteyeꞌ entaye ñeñth ateth oꞌ notwaspaꞌ ñewa, pokteꞌ oꞌch alla noterrserr, tharroꞌmar ñeñth ateth oꞌ notwaspaꞌ ñeñthpaꞌ atethchaꞌ sepha tharroꞌmar ama eñalle poꞌpoñ ñeñth pokteꞌ yenten. Amaꞌt ñamha allowen ñeñth pameꞌñeñothet Yompor ñeñth apxhaꞌyetsapaꞌ ñetpaꞌxhoꞌña pokteꞌ enteñet ñeñth ateth oꞌ notwas.

Añpaꞌ ñeñth ama aphapawo allempo yorren ñeñth tomaꞌntenaya Cristo poꞌrras

17-18Theꞌpaꞌ oꞌch notas poꞌpoñ ñeñthchaꞌ ateth sepha allempokma sapxhena. Tharraña ñanompaꞌ oꞌch notas, ama pokteyeꞌ nentenso ñeñth ateth sepena theꞌ allempokma sapxhena. Tharroꞌmar ñeñth ateth sepenapaꞌ ama añekpayaye atthoch seyenpannena eꞌñe kowen, elloña ñeñthpaꞌ xha epatenes. Tharroꞌmar napaꞌ oꞌ neꞌmareꞌtas ñeñth ateth sepena. Ñerraꞌm esempo sapxhena eꞌñe sameꞌñeñothpaꞌ amoꞌch pathrrayeꞌ sokthapeꞌcheno. Elloña sapaꞌ atthoꞌch nanak es sotnareꞌtannena. Ñeñthoꞌmarña napaꞌ noten ñatoꞌ poꞌñoxhtheꞌ ateth sepena. 19Poꞌñoxh ñeñthey ameꞌñetsapaꞌ xhokmach eñall ñeñthchaꞌ ama paxharroyeꞌ ameꞌñatso, ñeñthoꞌmarña ya allempopaꞌ oꞌch yeñoch ñeñth eꞌñe paxharr kothapeꞌchets, ñamha oꞌch yeñoch ñeñthchaꞌ ama paxharroyeꞌ kothapeꞌchatso. 20Ñamha ñerraꞌm esempo sapxhenapaꞌ eꞌñe seyerpoeñoth Yepartsesharpaꞌ awoꞌch serrallmeꞌchen, tharraña poꞌñoxhpaꞌ ama Yepartsesharekpayeꞌ serrallmeꞌcheno. 21Tharroꞌmar poesheñaꞌtets eꞌñe paꞌchporrñothetpaꞌ awoꞌchxhoꞌ rrenet ñanmakma, amoꞌchña parrokmayeꞌ serrallmeꞌcheno. Ñeñthoꞌmarña ñatoꞌ poesheñaꞌtetspaꞌ awoꞌch attha nanak cheporrena, ñatoꞌ poꞌpsheñeññapaꞌ awoꞌch xha posaꞌtyes. 22Ñeñth ateth sepenapaꞌ ama pokteyaye tharroꞌmar sapaꞌ sechenkaꞌyeña sepakëll allchaꞌ serren ñamha allchaꞌ es sorryen. Esoꞌmareꞌtña amaña amhchaꞌnaꞌtpawoyeꞌ senteññañeña Yompor paꞌpakëll. Allñapaꞌ oꞌch attha sepenkateñ ñamha ñeñth ama es echetso. Theꞌña poꞌñoxh napaꞌ oꞌch notas, amakaꞌye nokshapretensoña sa ñeñth ateth sepena.

Ateth pha Jesús allempo ñanom tomaꞌntatana poꞌrras orrpapoꞌ

(Mt. 26.26-29; Mr. 14.22-25; Lc. 22.14-20)

23Añmapaꞌ ñeñthña ateth yexhatnerrey Yepartseshar ñeñthchaꞌ atthoch yeyerpoeña. Ñeñthara ñoñets sapaꞌ oꞌ neñotatwas awañakma. Ñeñthpaꞌ ateth oten: Ñeñthe tsaprokma allempo Judaspaꞌ pomoerran Yepartseshar Jesús, ñañapaꞌ chetan pan. Chetan panpaꞌ 24parasyosoꞌtampes allothñapaꞌ shotaꞌchpaꞌ ateth otanet: “Añmapaꞌ ñeñth tomaꞌntenaya nechets ñeñthchaꞌ atserrpharethterrtsa sokop. Añmapaꞌ ñeñthchaꞌ ateth sepha. Ñerraꞌm esempo serren pan atethpaꞌ eꞌñech seyerpoeñothen napaꞌ oꞌch serreꞌ.” 25Allempoña oꞌ rrowetpaꞌ atthekma pha oꞌ chetan ñamha orramets allokma orreteꞌthpaꞌ ateth otanet: “Añ ñeñthchaꞌ sorrpaꞌ ñeñth tomaꞌntenaya nerras ñeñthchaꞌ etserra anareth allochñapaꞌ atthoch aphretnaꞌwarethterra soꞌchñar. Añmapaꞌ ñeñthchaꞌ ateth sepha: Ñerraꞌm esempoch sorren ñeñth tomaꞌntenaya nerraspaꞌ eꞌñech seyerpoeñothen napaꞌ sorreñchaꞌ.” Añpaꞌ allowa ñeñth ateth otnerrey Yepartseshar. 26Ñeñthoꞌmarña theꞌpaꞌ ñerraꞌm esempo yerren añ pan, ñamha yorren añ orrpapoꞌpaꞌ xhokmach yeñotach acheñeneshaꞌ attho rroma Yepartseshar yokop. Ñeñthpaꞌ eꞌñech thayotheñ ateth yepha tharrempowach esempowañenchaꞌ werra.

Añpaꞌ ñeñthchaꞌ ateth yepha allempo yorren ñeñth tomaꞌntenaya Cristo poꞌrras

27Tharraña ñerraꞌm yapaꞌ ama yeyerpoeñotheyeꞌ eꞌñe ña yerreno pan, ñamha oꞌch yorr ñeñth tomaꞌntatana Yepartseshar poꞌrraspaꞌ yapaꞌ xhatheꞌ yeyora yoꞌchñar eꞌñe yaꞌllokchameꞌteñoth Yepartseshar poꞌchets ñamha poꞌrras. 28Ñeñthoꞌmarña theꞌpaꞌ oꞌch notas, amach sorreñaꞌpaꞌ oꞌch sokthapeꞌch ñanom, oꞌch señota sañeña ñeñth ateth oꞌ sephowa. 29Tharraña ñerraꞌm attha ama es yepxheno rreꞌ, ama yokthapeꞌcho ñanom ñeñth tomaꞌntatana Yepartseshar poꞌchetspaꞌ ñerraꞌm attha yerreꞌ ñamha attha yorrpaꞌ eꞌñe yerreñoth ñamha yorreñothpaꞌ atsaꞌtataretheychaꞌ. 30Ñeñthoꞌmarña seshopaꞌ shonteꞌ acheñeneshaꞌ ñeñth ama aꞌñsheꞌmtetso, ñamha poꞌpotantañpaꞌ xha atsnaꞌtyeset, poꞌpotantaññapaꞌ oꞌ rromayeset. 31Tharraña ñerraꞌm xho ñanom yokthapeꞌch eꞌñe kowen, oꞌch yeñota yañeña ñanompaꞌ allempoña poꞌñoxhpaꞌ amach atsaꞌtataretheye. 32Tharraña ñeñthchaꞌ ateth tsaꞌtatya theꞌ Yomporpaꞌ ñeñthpaꞌ añekop atthoch kothapeꞌchaterrey eꞌñe kowen atthoch esempowañenpaꞌ amach aꞌkoñchataretheye epay ñeñth ama ameꞌñetso arr patsro.

33Ñeñthoꞌmarña masheñneshachaꞌ ñamha noxhaneshachaꞌ theꞌpaꞌ oꞌch noterrserr: Ñerraꞌm esempo sapxha allowenes oꞌch serraꞌ ñeñth anareth Yepartsesharekoppaꞌ añ pokteꞌ xhoch ñanom sekwannaꞌta atthoch oꞌch serreñ eꞌñe parrokma. 34Tharraña ñerraꞌm eseshas cheporratsapaꞌ eꞌñe pokteꞌ oꞌch serrerraꞌ sepakllo. Tharroꞌmar ama pokteyaye eꞌñe sapxheñothpaꞌ oꞌch sekoñchatannaꞌta. Ñamha poꞌpoñexhno ñeñth palltetsapaꞌ allach neserrpareꞌtatoses ñerraꞌm esempoch nexhap sesho.

Currently Selected:

1 Corintios 11: ame

Highlight

Copy