NAI VAKATAKILA I JONI 15
15
E lewe vitu na agilose sa tu vei iratou na mate ca e vitu: era sa reki ko ira sa sega ni rawai ira na manumanu, 1-4. Sa soli vei iratou na agilose na bilo e vitu, 5-8.
1Ia ka'u a raica e dua tani tale nai vakatakilakila mai lomalagi, na ka levu e veivakidacalataki, e le vitu na agilose sa taura e vitu na mate ca sa kenai otioti sara; ni sa vakayacori sara vei ira na cudru ni Kalou.
2Ia ka'u a raica e dua na ka e vaka na wasa iloilo sa veiwaki vata kei na bukawaqa; ia ko ira era sa gumatua vua na manumanu, kei na nona matakau, kei nai wiliwili ni yacana, era sa tu e na wasa iloilo, a ra sa taura na veiapi ni Kalou. 3A ra sa meketaka na meke i Mosese nai talatala ni Kalou, kei na meke ni Lami, ka kaya, A ka levu ka veivakurabuitaki na nomuni cakacaka, na Turaga na Kalou Kaukauwa; sa dodonu ka dina na nomuni valavala, oi kemuni na Tui ni veigauna kecega. 4O cei me sega ni rerevaki kemuni, na Turaga, ka vakarokorokotaka na yacamuni? ni sai kemuni ga sa yalosavasava: ko ira kecega na veivanua era na lako mai ka cuva e matamuni; ni sa vakatakilai mai na nomuni cakacaka dodonu.
5Ia ka oti ka'u sa vakaraica, ka raica, sa dola tu na vale ni tikina tabu ni veiyalayalati mai lomalagi: 6ia ko iratou na agilose e le vitu eratou sa lako mai na vale ni lotu, eratou sa taura na mate ca e vitu, eratou vakaisulu e na lineni savasava sara ka vulavula, a sa vau na lomaseredratou e na wa koula. 7A sa dua vei iratou na ka bula e le va sa solia vei iratou na agilose e le vitu na bilo koula e vitu sa sinai e na cudru ni Kalou, ko koya sa bula ga ka tawa mudu. 8A sa sinai na vale-ni-lotu e na kubou mai nai ukuuku ni Kalou, mai na nona kaukauwa talega; a sa sega na tamata sa curu rawa ki na vale-ni-lotu, ena vakayacori mada eliu na mate ca e vitu sa taura ko iratou na agilose e le vitu.
Currently Selected:
NAI VAKATAKILA I JONI 15: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
