NAI VAKATAKILA I JONI 14
14
Sa tukuni na Lami kei ira na nonai tokani, 1-5; kei na agilose sa vunautaka nai tukutuku-vinaka, 6,7; kei koya sa tukuni Papiloni, 8; kei koya sa tukuni ira na mate, 9-13; kei koya sa tukuna nai otioti kei vuravura, 14-20.
1Ia ka'u a vakaraica, ka raica, e dua na Lami sa tu e na ulu-ni-vanua ko Saioni, a sa tu vata kaya e le dua na drau ka vasagavulu ka va na udolu, sa volai e na yadredra na yacana kei na yaca i Tamana. 2Ia ka'u a rogoca e dua na domo mai lomalagi, e vaka na domo ni wai e vuqa, ia sa vaka na domo ni kurukuru levu: au a rogoca talega na domodra era qiria na nodra api: 3a ra sa meketaka na meke vou e na mata ni tikotiko-vakaturaga, kei na matadratou na ka bula e va, kei na matadra na qase: a sa sega e dua sa kila rawa na meke ko ya, o ira ga na le dua na drau ka vasagavulu ka va na udolu, era sa vakabulai tu mai vuravura. 4O ira oqo era sa sega ni ca kei na yalewa; ni ra sa sega ni veiyacovi kaya e dua. O ira oqo era sa muria na Lami e na veiyasana sa lako kina ko koya. O ira oqo era sa vakabulai maivei ira na tamata, me rai sevu vua na Kalou kei na Lami. 5A sa sega ni kune e gusudra na lasu: ka ra sa sega ni cala.
6IA ka'u a raica e dua tani tale na agilose sa vuka e na maliwa kei lomalagi kei vuravura, a sa taura nai tukutuku-vinaka e sega ni oti rawa, me vunautaka vei ira era sa tiko e vuravura, vei ira kece talega na veimatanitu, kei na veimataqali, kei na duivosavosa, kei ira na tamata, 7ka sa kaya e na domo levu, Dou rerevaka na Kalou, ka vakarokoroko vei koya; ni sa yaco na nona gauna me lewa: ia dou vakarokoroko vei koya ka buli lomalagi, kei vuravura, kei na wasawasa, kei na veivurevure-ni-wai.
8A sa dua tani tale, nai karua ni agilose sa muri, ka kaya, Sa bale, sa bale ko Papiloni, na koro levu, e na vuku ni sa vagunuvi ira kecega na veimatanitu e na waini ni cudru ni nona dautagane.
9A sa muri rau nai katolu ni agilose, a sa kaya e na domo levu, Kevaka sa dua na tamata sa vakarokoroko vua na manumanu kei na nona matakau, ka rawata na nonai vakatakilakila e na yadrena, se na ligana, 10ena gunuva ko koya na waini ni cudru ni Kalou, o koya sa sovaraki ka sega ni vakawai ki na bilo ni nona cudru; ena vakararawataki vakalevu talega e na bukawaqa kei na sulifure e na matadra na agilose yalosavasava, kei na mata ni Lami: 11a sa kuvu cake na kubou ni nodra yaluma ka sega ni mudu: a ra sa sega ni cegu e na siga se na bogi, ko ira sa vakarokoroko vua na manumanu kei na nona matakau, kei ira era sa vakatakilakilataki e nai vakatakilakila ni yacana.
12Oqo gona na nodra vosota na tamata yalosavasava: sa tu eke ko ira era sa vakabauta na vosa ni Kalou, ka taura tikoga na vakabauti Jisu. 13Ia ka'u a rogoca e dua na vosa mai lomalagi, sa kaya mai vei au, Vola, Sa kalougata mai na gauna oqo ko ira na mate era sa mate ni ra sa tu vata kei na Turaga: sa kaya na Yalo Tabu, Io, me ra vakacegu mai na nodra cakacaka; ka sa muri ira na nodra i valavala.
14Ia ka'u a vakaraica, ka raica, sa dua na o vulavula, ia sa dua sa dabe tiko ena o e vaka na Luve ni tamata, a sa dua nai sala koula vakaturaga sa toka e uluna, a sa taura e ligana e dua nai sele-takelo gata. 15A sa dua tani tale na agilose sa lako mai na vale-ni-lotu, a sa kaci e na domo levu vei koya sa tiko ena o, Vakacuruma na nomu i sele-takelo, ka tamusuka: ni sa yaco na gauna ni tamusuki; ni sa rui dreu matua na sila kei vuravura. 16A sa vakacuruma na nonai sele-takelo ki vuravura ko koya sa tiko e na o; a sa tamusuki kina na vuana kei vuravura.
17A sa dua tani tale na agilose sa lako mai na vale-ni-lotu sa tu mai lomalagi, a sa taura talega ko koya e dua nai sele-takelo gata. 18A sa dua tani tale na agilose sa lako mai nai cabocabo-ni-soro, sa lewa rawa na bukawaqa; a sa kaci e na domo levu vei koya sa taura nai sele-takelo gata, ka kaya, Vakacuruma na nomu i sele-takelo gata, ka cebeta nai soso vua ni vaini kei vuravura; ni sa dreu matua sara na vua ni vaini. 19A sa vakacuruma na agilose na nonai sele-takelo ki vuravura, ka cebeta nai soso vua ni vaini kei vuravura, ka biuta ki nai keli-ni-waini levu ni cudru ni kalou. 20A sa butuki nai keli-ni-waini e nai bili ni koro, a sa lako mai nai keli-ni-waini na dra, a sa yala ki na wa-tarovi ni ose, me rua na drau na maili.
Currently Selected:
NAI VAKATAKILA I JONI 14: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
