NA SAME 44
44
A nodra masu na tamata yalododonu, ni ra nanuma na cakacaka ni Kalou eliu kivei ira na nona tamata.
Vua na Domo-ni-sere. A nodra na luve i Kora. A Masikili.
1Kemuni na Kalou, keimami a rogoca e na daliga i keimami, a ra sa tukuna vei keimami na neimami qase,
Na cakacaka ko ni a cakava e na nodra gauna, e na gauna sa oti makawa.
2Ni kemuni a vakasevi ira tani e na ligamuni na lewe ni veimatanitu, ka sa tei ira ga kina;
Kemuni sa vakararawataki ira na tamata, ka sa vakasevi ira tani.
3Ni ra a sega ni rawata na vanua e na nodra i seleiwau,
Se vakabulai ira na ligadra:
A ligamuni matau duaduaga, kei na tabamuni, kei nai serau ni matamuni,
Ni kemuni a lomani ira.
4Sai kemuni ga na noqu Tui, na Kalou:
Mo ni vakarota na nodra veivakabulai na Jekope.
5E na vukumuni ga keimami na vakabalei ira sobu na neimami meca:
E na vuku ni yacamuni keimami na butuki ira sobu era sa tu cake vakaivalu vei keimami.
6Ni'u na sega ni vakararavi ki na noqu dakai,
Ia na noqu i seleiwau ena sega ni vakabulai au.
7Kemuni a vakabulai keimami maivei ira na neimami meca,
Ia ko ira sa cati keimami ko ni sa vakamaduataka.
8A Kalou ga keimami doka e na siga taucoko,
Ka vakamolimoli ki na yacamuni ka sega ni mudu. Sela.
9Ia oqo ko ni sa biuti keimami tani ka vakamaduataki keimami;
O ni sa sega talega ni lako vata kei na neimami mataivalu.
10O ni sa vakavuna na neimami vakanadakui ira na neimami meca:
Ia ko ira sa cati keimami era sa tokia na neimami ka me nodra.
11O ni sa soli keimami me keimami vaka na sipi sa lewai me laukana;
O ni sa vakasevi keimami ki na veimatanitu.
12O ni sa volitaki ira na nomuni tamata ka sa sega na kedrai voli,
O ni sa sega ni vakavutuniyautaki kemuni e na kedrai voli.
13O ni sa soli keimami me vakarogocataki vei ira era sa tiko voleka vei keimami,
Me vakalialiai talega ka veiwalitaki vei ira sa tiko voliti keimami:
14O ni sa soli keimami me vosabecitaki e na veimatanitu,
Me ra kuretaka na uludra vei keimami ko ira na tamata.
15Sa tu vakadua e mataqu na noqu veiseseyaki,
Ka sa luvuci au sara na madua ni mataqu,
16E na vuku ni domona sa dauveivakawai ka vosavakacaca;
E na vuku i koya na meca sa dauveisausaumitaka na ca.
17Sa yacovi keimami na ka kecega oqo; ia keimami sa sega ni guilecavi kemuni,
Se keimami cakacaka vakailasu e na nomuni veiyalayalati.
18Sa sega ni vuki tani na yalo i keimami,
Se keimami lesu tani mai na nomuni sala e na neimami lako voli.
19Ia ko ni sa vakamavoataki keimami e na vanua ni gata,
O ni sa ubi keimami talega e na yaloyalo ni mate.
20Kevaka keimami sa guilecava na yaca ni neimami Kalou,
Se dodoka na liga i keimami vua na kalou tani;
21Ena sega beka ni qaqa oqo na Kalou?
Ni sa kila ko koya na ka ni yalo sa vuni tu.
22Io, e na vukumuni keimami sa vakamatei e na siga taucoko ka bogi;
Keimami sa vakatauvatani kei na sipi ena vakamatei.
23Mo ni yadra mai, Kemuni sa moce, na Turaga, e na vuku ni cava?
Mo ni tu cake mai, kakua ni biuti keimami vakadua.
24E na vuku ni cava ko ni sa vunia kina na matamuni,
Ka guilecava na neimami rarawa kei na neimami vakacacani?
25Sa vakamalumalumutaki sobu ki na kuvu-ni-soso na yalo i keimami:
Ka sa kabita na qele na kete i keimami.
26Mo ni tu cake me vukei keimami,
Mo ni vakabulai keimami e na vuku ni nomuni yalololoma.
Currently Selected:
NA SAME 44: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
