NA SAME 25
25
A masu gumatua vua na Kalou, sa ia vata kei na vakabauta.
A Same i Tevita.
1Kivei kemuni, Jiova, ka'u sa vagolea cake na yaloqu.
2Noqu Kalou, ka'u sa vakararavi vei kemuni:
Kakua ni laivi au me'u madua,
Me ra kakua ni marau na noqu meca e na vukuqu.
3Ena sega talega e dua na waraki kemuni me madua kina:
Ko ira ga era talaidredre walega era na madua.
4Kemuni Jiova, mo ni vakatakila mai vei au na nomuni sala;
Ni vakavulici au e na nomuni lakolako.
5Tuberi au e na nomuni dina, ka vakavulici au:
Ni sai kemuni na Kalou na noqu i vakabula;
Ka'u sa waraki kemuni e na veisiga kecega.
6Ni nanuma, Jiova, na nomuni yalololoma kei na nomuni yalovinaka,
Ni sa ka mailiu sara na ka oqori.
7Kakua ni nanuma na noqu i valavala ca kei na noqu caka cala, ni'u a cauravou:
Me vaka ga na nomuni loloma mo ni nanumi au,
E na vuku ni nomuni yalovinaka, i Jiova.
8Sa yalovinaka ka yalododonu ko Jiova:
O koya oqo ena vakavulici ira kina na tamata ca e na nona sala.
9Ena tuberi ira na yalomalua e na lewa.
Io, ena vakavulici ira na yalomalumalumu e na nona sala.
10A sala kecega i Jiova na loloma kei na ka dina.
Kivei ira era sa muria dina na nona veiyalayalati kei na nonai tukutuku.
11E na vuku ni yacamuni, Jiova,
Mo ni kakua ni cudruvi au e na vuku ni noqu i valavala ca; ni sa ka levu.
12O cei na tamata sa rerevaki Jiova?
Ena vakavulici koya e na sala ena digitaka ko koya.
13Ena tiko vakacegu na yalona;
Ena taukena talega na vanua na nona kawa.
14A vosa vuni nei Jiova sa tu vei ira era rerevaki koya;
Kei na nona veiyalayalati me vakavulici ira.
15Sa rai tikoga vei Jiova na mataqu:
Ni na kaliraka na yavaqu ko koya mai na lawa.
16Mo ni gole mai vei au, ka lomani au;
Ni'u sa luveniyali ka vakararawataki.
17Sa levu mai na rarawa ni yaloqu:
Mo ni kauti au tani mada mai na noqu rarawa.
18Ni vakaraica na noqu rarawa kei na noqu yaluma;
Ka bokoca na noqu i valavala ca kecega.
19Ni vakananuma na noqu meca, ni ra sa lewe vuqa;
A ra sa cati au e na veicati vakaidina.
20Mo ni maroroya na yaloqu, ka vakabulai au;
Me'u kakua kina ni madua; ni'u sa vakararavi vei kemuni.
21Me maroroi au na yalododonu kei nai valavala dodonu;
Ni'u sa dinati kemuni tikoga.
22Mo ni vakabulai ira na Isireli, na Kalou,
Mai na nodra rarawa kecega.
Currently Selected:
NA SAME 25: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
