NA SAME 21
21
A vakavinavinaka ni sa gumatua e nai valu na tui.
Vua na Domo-ni-sere. A Same i Tevita.
1I Jiova, ena reki na tui e na nomuni kaukauwa;
Ena marau vakalevu sara ni kemuni sa ia na veivakabulai!
2O ni sa solia vua na gagadre ni yalona,
O ni sa sega ni bureitaka na masumasu ni tebenigusuna. Sela.
3Kemuni sa taumadataki koya e na nomuni loloma e veivakalougatataki:
O ni sa vakaisalataki koya e nai sala vakaturaga sa koula dina.
4Sa kere bula vei kemuni, o ni sa solia vua,
Io, na bula dede ena sega ni mudu.
5Sa vue na nona totoka ni kemuni sa vakabulai koya:
O ni sa solia vua na vakarokoroko kei na ka vakaturaga.
6Kemuni sa vakalougatataki koya vakaidina ka sega ni mudu;
O ni sa vakamarautaki koya sara e na matamuni.
7Ni sa vakararavi vei Jiova ko koya na tui;
Ia e na vuku ni loloma i Koya sa Cecere sara ena sega ni yavalati kina ko koya.
8Ena tarai ira kecega na nomuni meca na ligamuni:
Ena tarai ira sa cati kemuni na ligamuni matau.
9O ni na biuti ira ki na lovo sa waqawaqa sara e na gauna ni nomuni cudru:
Ena tilomi ira ko Jiova e na nona cudru,
Ena kani ira sara na bukawaqa.
10O ni na vakarusa tani na luvedra mai vuravura,
Kei na nodra kawa maivei ira na luve ni tamata.
11Ni ra sa nakita me ra vakacacani kemuni;
Era sa vakananuma na vere ca, a ra sa sega ni rawata:
12Ni kemuni na qai vakasavi ira,
Kemuni sa qai vakarautaka e matadra na nomuni gasau e na kena wa.
13Kemuni Jiova, mo ni vakaceceretaki, mada e na nomuni qaqa:
Keitou na sere kina ka vakamolimoli e na nomuni kaukauwa.
Currently Selected:
NA SAME 21: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
