LUKE 10

Sa talai ira na tisaipeli e lewe vitusagavulu ko Jisu, me ra vunau ka kitaka na cakacaka-mana eso, 1—16. Sa vakavulici ira me ra yalomalumalumu, 17—20. Sa reki ko Jisu e na vuku ni lewa nei Tamana, 21—24. Sa vakavulica e dua na vu-ni-vunau, 25—37. Sa vunauci Marica, ka dokai Meri, 38—42.

1Sa oti na veika oqo, sa qai lesia na Turaga e lewe vitusagavulu tani, ka talai ira me ra lako yayarua ka liu vua ki na veikoro kecega kei na veitikina sa via lako kina ko koya.

2Ka sa kaya vei ira, E dina sa vakalewe na yabaki, a ra sa lewe lailai ga nai vakatau-ni-were; o koya mo dou qai masuti koya nai Taukei ni were, me tala yani eso nai vakatau-ni-were ki na nona were. 3Dou lako: raica, au sa talai kemudou yani me vaka na lami e na kedra maliwa na wolifa. 4Kakua ni kauta na taga ni lavo, se na taga ni kakana, se nai vava: ka kakua ni veikidavaki kaya e dua e na gau-ni-sala.

5Ia e na veivale yadua dou sa curu kina, kaya mada eliu, Me yaco na vakacegu ki na vale oqo. 6Ia kevaka sa tiko kina na tamata sa yaga me vakacegui, ena toka vei koya na nomudou veivakacegui; ia kevaka e sega, ena lesu tale vei kemudou. 7Ia e na vale ko ya dou tiko kina, dou kania ka gunuva na veika era sa solia; ni sa dodonu me soli vua na tamata daucakacaka na kenai sau. Dou kakua ni veitokiyaki ki na veivale.

8Ia e na koro kecega dou curu kina, a ra sa vakacegui kemudou, dou kania na veika sa tau ki matamudou: 9ka vakabulai ira na tauvi-mate era sa tiko kina, ka kaya vei ira, Sa volekati kemudou na matanitu ni Kalou. 10Ia na koro kecega dou sa curu kina, a ra sa sega ni vakacegui kemudou, dou lako ki na kena veisala, ka kaya, 11A kuvu-ni-soso ni nomudou koro, sa kabita na yavai keimami, keimami sa quaraka tale vei kemudou; ia dou kila dina ga na ka oqo, sa volekati kemudou na matanitu ni Kalou. 12Ia ka’u sa kaya vei kemudou, ena ca vakalailai ko Sotoma e na siga ko ya, ena ca vakalevu na koro ko ya.

13E ca vei iko, Koresini! e ca vei iko, Peciseita! ia ke sa caka mai Taia kei Saitoni na cakacaka-mana ka caka vei kemudrau, ke rau sa veivutuni makawa, ka tiko sobu e nai sulu taga kei na dravusa: 14ia ena ca vakalailai ko Taia kei Saitoni e na veilewai, koi kemudrau, drau na ca vakalevu. 15Ko iko talega, Kapenaumi, ko sa laveti cake ki lomalagi? ko na biu sobu ki etesi.

16O koya sa rogoci kemudou, sa rogoci au; ia ko koya sa beci kemudou, sa beci au; ia ko koya sa beci au, sa beci koya sa talai au mai.

17A ra sa tale mai ko ira na lewe vitusagavulu e na marau, ka kaya, Kemuni na Turaga, era sa guca vei keimami na tevoro, e na vuku ni yacamuni. 18A sa kaya vei ira ko koya, Au a raici Setani ni sa lutu sobu mai lomalagi me vaka na livaliva. 19Raica, au sa solia vei kemudou na kaukauwa mo dou butuki ira loa na gata kei na batibasaga, ka mo dou rawa na kaukauwa kecega ni meca; ia ena sega sara e dua na ka me vakacacani kemudou. 20Ia dou kakua ni reki e na ka oqo, ni sa guca vei kemudou ko ira na yalo; oqo ga mo dou reki kina, ni sa volai na yacamudou mai lomalagi.

21E na tiki-ni-siga ko ya, sa reki sara kina ko Jisu e na yalona, ka kaya, Au sa vakavinavinaka vei kemuni, Tamaqu, na Turaga ni lomalagi kei vuravura, ni ko sa vunia na veika oqo vei ira na vuku kei na yalomatua, ko ni sa vakatakila ga vei ira na gone lalai: sa vakaoqo, Tamaqu, ni sa vinaka e matamuni me vakakina. 22Sa solia mai vei au ko Tamaqu na ka kecega; ia ka sega e dua tale e kila se ko cei na Luvena, a Tamaqu duaduaga; se ko cei na Tamaqu, a Luvena duaduaga, kei koya sa vinakata na Luvena me vakatakilai koya.

23A sa vuki vei ira na tisaipeli, ka kaya lo, Sa kalougata na mata sa raica na veika dou sa raica; 24ni’u sa kaya vei kemudou, era lewe vuqa na parofita kei na tui era a via raica na veika dou sa raica, a ra sa sega ni raica; me ra rogoca talega na veika dou sa rogoca, a ra sa sega ni rogoca.

25Ka raica, sa dua na vu-ni-vunau sa tu cake, ka vakatovolei koya, ka taroga, Vakavuvuli, a cava me’u kitaka me’u rawata kina na bula tawa mudu? 26A sa kaya vua ko koya, A cava sa volai e na vunau? a cava ko sa wilika?

27A sa vosa ko koya, ka kaya, Mo lomani Jiova na nomu Kalou e na lomamu taucoko, kei na yalomu taucoko, kei na nomu kaukauwa taucoko, kei na nomu nanuma kecega; kei na kai nomu me vakataki iko. 28A sa kaya vua ko koya, O sa vosa vakadodonu; kitaka oqo, ko na bula kina.

29Ia ko koya, ni sa via vakadonui koya, sa tarogi Jisu, Ko cei na kai noqu? 30A sa vosa ko Jisu, ka kaya, Sa dua na tamata sa lako sobu mai Jerusalemi ki Jeriko, a sa sikabotea na daubutako eso, a ra sa luvata tani na nonai sulu, ka vakamavoataka, ka lako tani, a ra biuta ka sa voleka ni mate. 31A sa lako walega mai e na sala ko ya e dua na bete; ia ni sa raica, sa lako vakatikitiki tani. 32Sa vaka talega kina e dua na luve i Livai, ni sa yaco ki na yasana ko ya, sa lako mai ka raica, a sa qai lako vakatikitiki tani. 33A sa dua na kai Samaria, ni sa lako tu, sa yaco vua; ia ni sa raica, sa lomana sara, 34a sa lako mai, ka vauca na tikina sa mavoa, ka livia kina na waiwai kei na waini, ka vakavodoka ki na nona manumanu, ka kauta ki na bure ni vulagi, ka sa maroroi koya. 35Ia e na mataka ni sa lako tani, sa taura e rua na pene, ka solia vua nai taukei ni bure, ka kaya vua, Mo vakaraici koya; ia na ka tale ko na kuria, au na sauma vei iko ni’u sa lako tale mai. 36Mo lewa mai, se ko cei vei iratou na lewe tolu oqo, sa kai nona ka sikabotei ira na daubutako? 37A sa kaya ko koya, O koya ga sa lomana. Sa qai kaya vua ko Jisu, Mo lako ko iko, ka kitaka vakakina.

38A sa yaco, ni ra sa lako tu, sa curu ko koya ki na dua na koro lailai: a sa kauti koya ki na nona vale e dua na yalewa na yacana ko Marica. 39A sa dua na tacina na yacana ko Meri, sa tiko talega ki na yava i Jisu, ka rogoca na nona vosa. 40Ia ko Marica sa veidreyaki na lomana, ni sa vakarau vakalevu; a sa lako mai, ka kaya, Kemuni na Turaga, ko ni sa wele ga ni sa laivi au na taciqu me’u vakarau duaduaga koi au? ni kaya mada vua me mai vukei au. 41A sa vosa ko Jisu, ka kaya vua, I Marica, I Marica, ko sa lomaocaoca ka veinanumayaka na ka e vuqa: 42ia sa dua bauga na ka e yaga: a sa digitaka ko Meri nai votavota vinaka, o koya ena sega ni kau tani mai vua.

Currently Selected:

LUKE 10: FOV

Highlight

Copy