JEREMAIA 35
35
Ni sa talairawarawa ko ira na Rekapaiti vua na tamadra ko Jionatapi, 1-11; sa vakacalai ira kina na Juta ko Jeremaia e na vuku ni nodra talaidredre vua na Kalou, 12-17. Sa vosaveivakalougatataki ira na Rekapaiti na Kalou e na vuku ni nodra talairawarawa, 18,19.
1A vosa sa yaco vei Jeremaia maivei Jiova e na gauna i Jioiakimi na luve i Josaia na tui Juta, ka vaka, 2Mo lako ki na nodra vale na Rekapaiti, ka vosa vei ira, ka kauti ira ki na vale i Jiova, ki na dua na vale eloma, ka vagunuvi ira e na waini.
3Au a qai kauti Jeesanaia na luve i Jeremaia, na luve i Epasinaia, kei ira na wekana, kei na luvena tagane kecega, kei na mataqali kece ni Rekapaiti; 4ka kauti ira ki na vale i Jiova, ki na nodra tikina na luve i Anani, na luve i Ikitalaia, e dua na tamata ni Kalou, ka voleka ki na nodra tikina na turaga, a sa toka e cake ka toka era na tikina nei Meesea na luve i Salumi, nai vakatawa ni katuba: 5ia ka'u sa tauca e matadra na gone ni mataqali ni Rekapaiti eso na saqa waini, kei na bilo ni gunu, ka kaya vei ira, Dou gunu waini.
6A ra sa kaya, Keitou na sega ni gunu waini: ko Jionatapi na tama i keitou na Rekapaiti sa vakaroti keitou, ka kaya, Dou kakua ni gunu waini, koi kemudou, se ko ira na luvemudou, ka sega ni mudu: 7dou kakua talega ni tara vale; dou kakua ni kaburaka na sila; kei na were-ni-vaini, dou kakua ni tea, se taukena: ia mo dou tiko ga e na vale laca e na veisiga kece ni nomudou bula; mo dou bula vakadede e na vanua dou sa vulagi kina. 8Ia keitou sa vakarorogo tiko ki na domo i Jionatapi na tama i keitou na Rekapaiti e na ka kecega ka vakarota vei keitou, me kakua ni gunu waini e na veisiga kece ni neitou bula, koi keitou, kei na wati i keitou, kei na luve i keitou tagane, kei na luve i keitou yalewa; 9se tara vale me keitou tiko kina: ia na were-ni-vaini, kei na were, kei na sila, sa sega vei keitou: 10ia keitou sa tiko ga e na vale laca, ka sa vakarorogo, ka cakacaka me vaka na ka kece ka vakarota vei keitou ko Jionatapi na tama i keitou: 11ia sa yaco ni sa lako cake mai ko Nepukanesa na tui Papiloni ki na vanua oqo, keitou sa kaya, Tou mai lako yani ki Jerusalemi e na vuku ni nodra i valu na kai Kalatia, kei na nodra i valu talega na kai Siria: ia keitou sa mai tiko kina e Jerusalemi.
12Sa qai yaco na vosa i Jiova vei Jeremaia, ka vaka, 13Sa kaya vakaoqo ko Jiova ni lewe vuqa, na Kalou ni Isireli; mo la'ki kaya vei ira na Juta kei na lewe i Jerusalemi, Dou na bese li ni vakavulici mo dou vakarorogo ki na noqu vosa? sa kaya ko Jiova. 14Sa vakayacori na vosa i Jionatapi na Rekapaiti, ka vakarota vei ira na luvena me ra kakua ni gunu waini; ia era sa sega ni gunuva ka yacova na siga oqo, ni ra sa vakarorogo ki nai vakaro ni tamadra: ia koi au ka'u a vosa tikoga vei kemudou, ka sou e na mataka me'u vosa; ia dou a sega ga ni vakarogoci au. 15Au a talai ira talega vei kemudou na noqu i talatala kecega na parofita, ka sou e na mataka me'u tala, ka kaya, Dou dui lesu mada na tamata yadua mai na nona sala ca, ka dou ia mada me vinaka na nomudou i valavala, ia dou kakua ni muria na kalou tani me qaravi ira, dou na qai tiko ga e na vanua ka'u sa solia vei kemudou kei ira na nomudou qase: ia dou sa sega ga ni vakatu daligamudou, se vakarorogo vei au. 16Ka ni ra sa vakayacora na luve i Jionatapi na luve i Rekapi nai vakaro ni tamadra, ka vakarota vei ira ko koya; ia na tamata oqo era sa sega ni vakarorogo vei au: 17o koya oqo sa kaya kina ko Jiova ni lewe vuqa, na Kalou ni Isireli; Raica, au na vakayacora kivei ira na Juta kei ira kece na kai Jerusalemi na ca kecega ka'u sa cavuta me yaco vei ira; ni'u sa vosa vei ira, ka ra sa sega ni goleva; ka'u sa kacivi ira, ka ra sa sega ni rogo mai.
18Ia ki na mataqali ni Rekapaiti sa kaya ko Jeremaia, Sa kaya vakaoqo ko Jiova ni lewe vuqa, na Kalou ni Isireli; Ni dou sa vakarorogo ki nai vakaro i Jionatapi na tamamudou, ka sa vakabauta na nona vunau kecega, ka sa cakava me vaka na ka kece sa vakarota vei kemudou; 19o koya oqo sa kaya kina ko Jiova ni lewe vuqa, na Kalou ni Isireli; Ena sega ni yali na tagane e na kawa i Jionatapi na luve i Rekapi me tu e mataqu ka sega ni mudu.
Currently Selected:
JEREMAIA 35: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
