JEREMAIA 34
34
Ko Jeremaia, sa parofisaitaka na veivakabobulataki i Setekaia kei na koro, 1-7. Ko ira na turaga kei na lewe ni vanua era sa sereki ira na nodra tamata era bobula, ia ni sa lako tani vei ira nai valu, era sa qai vakabobulataki ira tale, 8-11. E na vuku ni ka oqo sa kaya kina na Kalou me lako tale mai na meca sa vakabobulataki ira, 12-22.
1E na gauna sa veivaluti kina kei Jerusalemi, kei na kena veikoro kece, ko Nepukanesa, na tui Papiloni, kei na nonai valu kecega, kei na veiqali kece ni nona matanitu e vuravura, kei ira kece na tamata, sa qai yaco vei Jeremaia e dua na vosa maivei Jiova, ka vaka,
2Sa kaya vakaoqo ko Jiova, na Kalou ni Isireli; Mo la'ki kaya vei Setekaia na tui Juta, ka tukuna vua, Sa kaya vakaoqo ko Jiova; Raica, au na solia na koro oqo ki na liga i tui Papiloni, ia ena vakama ko koya e na bukawaqa: 3ia ko iko, ko na sega ni dro tani rawa mai na ligana, ko na tauri vakaidina ga, ka soli ki ligana; ia drau na veirai mata kei tui Papiloni, ka veivosaki sara kaya e na gusumudrau, ia ko na yaco ga ki Papiloni.
4Ia mo rogoca na vosa i Jiova, ko iko Setekaia na tui Juta, Sa kaya vakaoqo ko Jiova e na vukumu, Ko na sega ni mate e nai seleiwau: 5ko na mate ga e na vakacegu: ia na kama, sa kedrai loloku na nomu qase, era tui eliu ka tarava ko iko, era na vakama vakakina me kemui loloku; a ra na tagicaki iko, ka kaya, Ulei na turaga! ia ka'u sa cavuta koi au na kena vosa, sa kaya ko Jiova.
6A sa tukuna ko Jeremaia na parofita na vosa kecega oqo vei Setekaia na tui Juta mai Jerusalemi: 7ni sa veivala tiko nai valu i tui Papiloni kei Jerusalemi, kei na veikoro vaka-Juta kecega sa vo, kei Lakisi kei Aseka: ni sa vo duaduaga na koro vakabai oqo e na veikoro vaka-Juta.
8Oqo na vosa sa yaco vei Jeremaia maivei Jiova, ni sa cakava oti ko Setekaia na tui na veiyalayalati kei ira na tamata kecega mai Jerusalemi, me kacivaka vei ira na veisereki; 9ia me ra dui vakatala yadua na nona tamata, kei ira yadua na nona vada erau sa Iperiu, me sa sereki wale; me kakua e dua vei ira sa kai Juta ka wekana me qaravi koya tiko. 10Ia ni ra sa rogoca ko ira kece na turaga, kei ira kece na tamata, era sa ia oti na veiyalayalati, me ra dui vakatala yadua na nona tamata, kei na nona vada, me sa sereki sara, ka me kakua e dua me sa qaravi tiko vei ira eso, era sa qai talairawarawa kina, ka sereki ira me ra lako. 11Ia sa oti, sa vuki tale na lomadra, ka ra tauri ira tale na nodra tamata kei na nodra vada, era sa sereka oti me ra lako yani, a ra sa vakabobulataki ira tale me ra nodra tamata kei na nodra vada.
12O koya oqo sa yaco kina na vosa i Jiova vei Jeremaia, ka vaka, 13Sa kaya vakaoqo ko Jiova, na Kalou ni Isireli; Koi au ka'u a cakava na veiyalayalati kei ira na nomudou qase e na siga ka'u a kauti ira tani kina mai na vanua ko Ijipita, mai na vale ni bobula, ka vaka, 14Ni sa oti e vitu na yabaki dou dui vakatala yani na wekana sa Iperiu, ka sa volitaki vei iko; ia ni sa qaravi iko ka yabaki ono, mo qai sereki koya me lako tani vei iko: ia era sa sega ni vakarorogo vei au ko ira na nomudou qase, se vakatu daliga mai. 15Ia koi kemudou dou sa qai saumaki edaidai, ka sa cakava na ka dodonu e mataqu, ni dou sa dui tukuna yadua vua na kai nona na veisereki; dou a ia talega na veiyalayalati e mataqu e na vale sa vakatokai e na yacaqu: 16ia dou sa qai vuki tale ka vakacataka na yacaqu, ka dou sa dui taura tale na nona tamata, kei na tamata yadua na nona vada, ko ira dou a sereka me ra dui veitalia ga, ka sa vakabobulataki ira tale, me ra nomudou tamata kei na nomudou vada.
17O koya oqo sa kaya kina ko Jiova; Koi kemudou, dou sa sega ni vakarorogo vei au, mo dou dui tukuna yadua na veisereki vua na wekana, kei na tamata yadua vua na kai nona: raica, au sa tukuna vei kemudou na veisereki, sa kaya ko Jiova, ki nai seleiwau, kei na mate dauveiveitauvi, kei na viakana, ia ka'u na soli kemudou mo dou kau tani ki na veimatanitu kece e vuravura. 18Ia ka'u na soli ira na tamata era sa vakacataka na noqu veiyalayalati, ka sega ni vakayacora na vosa ni veiyalayalati era sa cakava e mataqu, ni ra a tawasea rua na luve ni pulumokau, ka lako yani e na maliwa ni kena tikina, 19io ko ira na turaga ni Juta, kei na turaga ni Jerusalemi, na matanivanua, kei na bete, kei ira kece na lewe ni vanua, era a lako yani e na maliwa ni tiki ni luve ni pulumokau; 20ia ka'u na soli ira ki na ligadra na nodra meca, kei na ligadra era sa segata me ra vakamatei ira: ia na yagodra ka mate ena yaco me kedra na manumanu vuka, kei na manumanu ni vanua. 21Ia ko Setekaia na tui Juta kei ira na nona tamata turaga, ka'u na solia ki na ligadra na nodra meca, kei na ligadra era segata me ra vakamatea, io ki na ligadra na tamata i valu i tui Papiloni, era a lako tani vei kemudou. 22Raica, au na vakarota, sa kaya ko Jiova, ka vakalesui ira tale mai ki na koro oqo; ka ra na mai kaba, ka rawa, ka vakama e na bukawaqa; ia na veikoro vaka-Juta ka'u na vakalalataka, me sega e dua e tiko kina.
Currently Selected:
JEREMAIA 34: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
