JEREMAIA 32
32
Ko Jeremaia, ni sa vakacuruma ko Setekaia ki na vale ni veivesu, sa volia e dua na tiki ni vanua, ia ni sa volai na kenai vakadinadina, sa solia vei Peruki me maroroya, mei vakatakilakila ni ra na lesu tale mai na Juta ki na nodra vanua, 1-15. Sa ia na masu vua na Kalou, ka sa tukuni koya vua, 16-25. Sa vakadinadinataka na Kalou ni ra na vakabobulataki e na vuku ni nodra i valavala ca, 26-35; ka sa yalataka ni ra na lesu tale mai, me ra tiko vinaka, 36-44.
1A vosa sa yaco vei Jeremaia maivei Jiova e nai katini ni yabaki i Setekaia na tui Juta, oqori nai katinikawalu ni yabaki i Nepukanesa.
2Ni sa qai buku na druadrua ni koro mai Jerusalemi e nai valu i tui Papiloni: ia ko Jeremaia na parofita sa sogolati tiko e na lomanibai ni vale ni veivesu mai na vale i tui Juta. 3Ni sa sogolati koya kina ko Setekaia na tui Juta, ka sa kaya, A cava ko sa ia kina na parofisai, ka vaka, Sa kaya vakaoqo ko Jiova, Raica, au na solia na koro oqo ki na liga i tui Papiloni, ka na rawa talega ko koya; 4ia ko Setekaia na tui Juta ena sega ni dro tani rawa mai na ligadra na kai Kalitia, ena soli dina ga ki na liga i tui Papiloni, ka rau na veivosaki vata kaya e na matanavotu, na matana talega ena raica na matana; 5ia ena kauti Setekaia ko koya ki Papiloni, ka na tiko ga kina ko koya ka yacova na siga ka'u na talevi koya kina, sa kaya ko Jiova: ke dou sa veivala kei ira na kai Kalitia, ke dou na sega ga ni gumatua?
6A sa kaya ko Jeremaia, Sa yaco mai vei au na vosa i Jiova, ka vaka, 7Raica, ko Anameli na luve i Salumi na tamamu lailai ena lako mai vei iko, ka kaya, Mo volia me nomu na noqu tiki ni vanua mai Anacoci: ni sa dodonu mo volia ni ko sa taravi au. 8A sa lako mai vei au ko Anameli na luve i tamaqu lailai ki na lomanibai ni vale ni veivesu me vaka na vosa i Jiova, a sa kaya vei au, Mo volia mada na noqu tiki ni vanua mai Anacoci e na vanua i Penijamini: ni sa dodonu mo taukena, ni sa dodonu mo volia ni ko sa taravi au; mo volia mada me nomu. Au sa qai kila ni sa vosa i Jiova oqo. 9Au sa qai volia na tiki ni vanua i Anameli na luve i tamaqu lailai mai Anacoci, ka sa vakarauta nai lavo me nona, io e tinikavitu na sikeli siliva. 10Ia ka'u a vola na kenai vola, ka dregata, ka kaciva eso na tamata me vakadinadinataka, ka sa vakarauta nai lavo e nai vakarau ni bibi. 11Au sa qai kauta nai vola ni veivoli, ko ya sa dregati me vaka nai valavala ni lawa, ko ya talega sa sega ni dregati: 12ka'u sa solia nai vola ni veivoli vei Peruki na luve i Neraia, na luve i Meesea, e na mata i Anameli na luve i tamaqu lailai, e na matadra talega era a mai vakadinadina era vola na yacadra e nai vola ni veivoli, e na matadra kece talega na Jiu era sa tiko e na lomanibai ni vale ni veivesu. 13Au sa qai vakaroti Peruki e na matadra, ka kaya, 14Sa kaya vakaoqo ko Jiova ni lewe vuqa, na nodra Kalou na Isireli; Mo kauta nai vola oqo, nai vola ni veivoli oqo sa dregati, kei nai vola oqo sa sega ni dregati; ka tugana ki na dua na kuro qele, ka me toka kina ka bogi vuqa. 15Ni sa kaya vakaoqo ko Jiova ni lewe vuqa, na Kalou ni Isireli; Ena taukeni tale na vale, kei na tiki ni vanua, kei na veiwere-ni-vaini e na vanua oqo.
16Ia ni'u sa solia oti nai vola ni veivoli vei Peruki na luve i Neraia, ka'u sa qai masu vei Jiova, ka kaya, 17Kemuni na Turaga ko Jiova! ko ni sa bulia na lomalagi kei vuravura e na nomuni kaukauwa levu kei na ligamuni e dodo yani, ka sa sega ni dredre vei kemuni e dua na ka: 18ko ni sa vakatakila na loloma vei ira nai tabatamata e udolu, ka sauma na nodra caka cala na qase kivei ira na luvedra era sa taravi ira: na Kalou Levu, ka Kaukauwa, ko Jiova ni lewe vuqa na yacana, 19sa uasivi e na vuku, ka kaukauwa e na cakacaka: ia na matamuni sa raica tiko na nodra i valavala kecega na luve ni tamata, mo ni solia vei ira yadua me vaka na nonai valavala, ka vaka na vua ni nonai valavala: 20ko ni sa cakava nai vakatakilakila kei na cakacaka mana mai na vanua ko Ijipita, ka yacova na siga oqo, vei ira talega na Isireli, kei ira na tamata tani; ko ni sa cakava na yacamuni me rogo, me vaka e na siga oqo; 21ko ni sa kauti ira tani na nomuni tamata na Isireli mai na vanua ko Ijipita, e nai vakatakilakila, kei na cakacaka mana, kei na liga kaukauwa, kei na liga e dodo yani, kei na ka rerevaki levu; 22ka sa solia vei ira na vanua oqo, o koya ko ni a bubului kina vei ira na nodra qase mo ni solia vei ira, na vanua sa dave kina na wai-ni-sucu kei na oni; 23ka ra sa mai curu kina, ka taukena; ia era sa sega ni vakarorogo ki na nomuni vosa, era sa sega talega ni muria na nomuni vunau; era sa sega ni cakava e dua na ka ko ni sa vakarota vei ira me ra cakava: ia ko ni sa vakayacora kina vei ira na ca kecega oqo: 24Raica na suva, era sa mai viria ki na koro me ra kaba; ia na koro oqo sa soli ki na ligadra na kai Kalitia, era mai vala kina, e na vuku ni seleiwau, kei na viakana, kei na mate dauveiveitauvi: ia na ka ko ni sa vosataka, sa yaco ga: ka raica, ko ni sa kunea. 25Ia koi kemuni, Turaga Jiova, ko ni kaya vei au, Mo volia na tiki ni vanua e nai lavo; ka kacivi ira na tamata eso me ra vakadinadinataka; ia na koro oqo sa soli ga ki na ligadra na kai Kalitia.
26Sa qai yaco na vosa i Jiova vei Jeremaia, ka vaka, 27Raica, koi au ko Jiova, na nodra Kalou na tamata kecega: e dredre beka vei au e dua na ka? 28O koya oqo sa kaya ko Jiova; Raica, au na solia na koro oqo ki na ligadra na kai Kalitia, kei na liga i Nepukanesa na tui Papiloni, ia ena rawa ko koya: 29a ra na lako mai na kai Kalitia erai valu mai ki na koro oqo, ka visa na koro oqo e na bukawaqa, ka vakama kei na kena veivale, era sa vakacabora kina e dela ni vale nai madrali boi vinaka vei Peali, ka livia nai sevu vei ira na kalou tani, me vakacudrui au. 30Ni ra sa cakava tikoga na ka ca e mataqu ko ira na Isireli kei ira na Juta mai na gauna era sa gone kina: ni ra sa vakacudrui au tikoga e na cakacaka ni ligadra ko ira na Isireli, sa kaya ko Jiova. 31Ni sa vakatubura na noqu rarawa, kei na noqu cudru na koro oqo mai na siga era sa tara ka yacova na siga oqo; me'u sa kauta tani ga e mataqu, 32e na vuku ni nodra ca kece na Isireli kei na Juta, era sa cakava me ra vakacudrui au, ko ira, kei ira na nodra tui, kei na nodra turaga, kei na nodra bete, kei na nodra parofita, kei ira na Juta, kei ira na lewe i Jerusalemi. 33A ra sa vakanadakui au, ka sega ni vakanamata vei au: ia ka'u a vakavulici ira, ka sou e na mataka me'u vakavulica, a ra sa sega ni vakarorogo me ra vakavulici kina: 34ia era sa vakacuruma na nodra ka vakasisila ki na vale sa vakatokai e na yacaqu, me ra vakavelavelataka: 35a ra sa tara na veiyasana cecere i Peali mai na buca ni luve i Inomi, me ra vakacabori ira kina na luvedra tagane kei na luvedra yalewa e loma ni buka vei Moloke; na ka ka'u sa sega ni vakarota, ka sa sega ni tubu e lomaqu, me ra cakava na ka vakasisila oqo, me vakacalai ira kina na Juta.
36Ia ka sa qai kaya kina ko Jiova, na nodra Kalou na Isireli, e na vuku ni koro oqo, dou sa kaya kina, Ena soli ga ki na liga i tui Papiloni e nai seleiwau, kei na viakana, kei na mate dauveiveitauvi: 37Raica, au na vakasoqoni ira mai na veivanua kecega, ka'u sa dui vakasevi ira kina e na noqu cudru, kei na noqu lesa, kei na cudru levu; ia ka'u na kauti ira tale mai ki na yasana oqo, ka lesi ira me ra tiko vinaka: 38a ra na yaco me ra noqu tamata, ia, ka'u na yaco me'u nodra Kalou: 39ia ka'u na solia vei ira me yalovata, ka sala vata, me ra rerevaki au ka sega ni mudu, me ra vinaka kina ko ira kei ira na luvedra era na taravi ira: 40ka'u na cakava talega kei ira na veiyalayalati e sega ni mudu, me'u kakua ni suka tani vei ira, me'u kua kina ni caka vinaka vei ira; ia ka'u na tugana ga ki na lomadra na rerevaki au, me ra kakua ni vuki tani vei au. 41Ia ka'u na rekitaki ira me'u caka vinaka vei ira, ka'u na tei ira vakaidina ga e na vanua oqo, mai na vu ni lomaqu, kei na vu ni yaloqu.
42Ni sa kaya vakaoqo ko Jiova; Me vaka ka'u sa vakayacora vei ira na tamata oqo na ca levu kecega oqo, ka'u na vakayacora vakakina vei ira na ka vinaka kecega ka'u sa yalataka vei ira. 43Ia ena voli tale na veitiki ni vanua e na vanua oqo, dou sa kaya kina, Sa lala ga ka sega kina na tamata se na manumanu; sa soli ga ki na ligadra na kai Kalitia: 44era na volia na veitiki ni vanua ko ira na tamata e nai lavo, ka vola na kenai vola, ka dregata, ka vakadinadinataka e na vanua i Penijamini, kei na yasayasa vaka-Jerusalemi, kei na veikoro vaka-Juta, kei na veikoro mai na ulu-ni-vanua, kei na veikoro mai na buca, kei na veikoro mai na mata ni ceva: ni'u na kauti ira tale mai era sa vakabobulataki, sa kaya ko Jiova.
Currently Selected:
JEREMAIA 32: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
