JEREMAIA 31
31
A nodra lesu tale mai na Isireli, 1-9. Ena rogo sara ki na veivanua, 10-14. Sa tagi ko Rejeli, ka sa vakacegui, 15-17. Ni sa veivutuni ko Ifireimi, sa lomani tale, 18-20. Era na lesu mai na Isireli ki na nodra vanua, ka ra na vakalougatataki kina, 21-26. Ena ia na veiyalayalati vou kei ira, 27-34. Ena qai dei na lewe ni lotu, 35-37; ka ra na vakalevutaki, 38-40.
1Sa kaya talega ko Jiova, e na gauna ko ya, ka'u na qai nodra Kalou na veimataqali kecega ni Isireli, ia era na qai noqu tamata. 2Sa kaya talega ko Jiova, Era sa kune loloma mai na veikau ko ira na tamata era sa vo bula mai nai seleiwau, ni'u a la'ki vakacegui ira na Isireli. 3Sa rairai eliu vei au ko Jiova ka kaya; Io, ka'u sa lomani iko e na loloma sa sega ni mudu: o koya oqo ka'u sa vakadedetaka kina na loloma vei iko: 4au na baci tarai iko tale, ia ko na qai tara, ko iko na goneyalewa ni Isireli; ko na baci vakaiukuukutaki tale e na nomu tibereli, ia ko na bau yani e na nodra meke era sa ia na marau: 5ko na baci tea tale na veivaini e na ulu-ni-vanua, mai Samaria: era na tea ko ira na dauteitei, ka kana vakailoa kina. 6Ni na yaco e dua na siga, era na kacivaka kina nai vakatawa mai na ulu-ni-vanua ko Ifireimi, Dou cavu tu ka me da lako cake ki Saioni vei Jiova na noda Kalou.
7Ni sa kaya vakaoqo ko Jiova; Dou meke e na marau e na vuku i Jekope, ka kaikaila e na vuku i koya sa liu e na veimatanitu: dou vakarogoya, dou vakavinavinaka, ka kaya, Mo ni vakabulai ira, Jiova, na nomuni tamata, na Isireli sa vo. 8Raica, au na kauti ira mai na vanua mai na tokalau, ka vakasoqoni ira mai nai yalayala kei vuravura, ko ira vata kei na mataboko kei na lokiloki, kei na yalewa sa bukete kei koya sa taratara: e dua nai vavakoso levu ena lesu mai ki ke. 9Era na lako mai ka tagi tu, ia ka'u na tuberi ira mai ka ni ra vakamamasu tu: au na vakalakovi ira mai e na bati ni wai drodro e na sala dodonu, era na sega ni tarabe kina: ni keirau sa veitamani kei Isireli, ia ko Ifireimi, sa noqu ulumatua.
10Dou rogoca na vosa i Jiova, na veimatanitu, ka tukuna yani ki na veiyanuyanu sa yawa, ka kaya, Ko koya sa vakasevi Isireli ena vakasoqoni koya tale, ka maroroi koya, me vaka nai vakatawa na nona qele ni sipi. 11Ni sa vakabulai Jekope ko Jiova, ka sa kaliraki koya mai na liga i koya sa kaukauwa vei rau. 12O koya oqo era na lako mai kina ka meke e na dela-ni-koro ko Saioni, ka drodro vata mai ki na loloma i Jiova, e na vuku ni witi, kei na waini, kei na waiwai, kei na luve ni sipi kei na pulumokau: ia na yalodra, ena vaka na were sa levu na kena wai; a ra na sega sara ni rarawa tale. 13Ena qai marau na goneyalewa e na meke, ko ira vata na cauravou kei na qase: ia ka'u na vukica na nodra tagi me ra reki, ka vakacegui ira, ka vakamarautaki ira me mudu na nodra rarawa. 14Ia ka'u na vakamamautaka na yalodra na bete e na ka sa uro, ia na noqu tamata era na mamau e na noqu loloma, sa kaya ko Jiova.
15Sa kaya vakaoqo ko Jiova; Sa dua na domo sa rogo mai Rama, na qoqolou, kei na tagi levu; ko Rejeli, sa tagicaki ira na luvena, ka sa bese ni vakacegui ni ra sa yali vua ko ira na luvena.
16Sa kaya vakaoqo ko Jiova; Mo kinoca na domomu, mo kakua ni tagi; ka me kakua ni vakawai na matamu: ni na saumi ga na nomu cakacaka, sa kaya ko Jiova; ia era na lesu tale mai na vanua ni meca: 17ia sa tu na ka mo vakanuinuitaka e na nomu gauna emuri sa kaya ko Jiova, ni ra na lesu tale mai ko ira na luvemu ki na nodra i yalayala.
18Au a rogoci Ifireimi vakaidina ni sa tagicaki koya, ka kaya, Ko ni sa vakanakuitataki au, ia ka'u sa vakanakuitataki, me vaka na pulumokau sa sega ni veilasamaki kei nai vua: ni saumaki au mai, ka'u na qai saumaki; ni sai kemuni Jiova na noqu Kalou. 19E dina ni'u sa saumaki mai, ka'u sa qai veivutuni; ia ni'u sa qai kila, ka'u sa sabica na sagaqu: au sa madua, io ka'u sa taqaya, ni sa luvuci au na ka ka'u sa rogo ca kina ni'u a cauravou. 20Sa noqu gone ni toko ko Ifireimi, se segai? sa gone daulomani, se segai? ni'u a vosataki koya vakaca, ka'u sa daunanumi koya tikoga: o koya oqo sa yavala kina na ketequ e na vukuna; ka'u na lomani koya sara, sa kaya ko Jiova.
21Mo vakaduria na nomu i vakatakilakila ni sala, mo cakava na nomu i tuvatuva cecere: mo vakasara na lomamu ki na salatu, na sala ko a lako yani kina: mo lesu mai, na goneyalewa ni Isireli, mo lesu mai ki na nomu veikoro oqo. 22A cava na kena dede ni nomu dauveilakoyaki tu, ko iko na goneyalewa dauvuki? ni sa bulia ko Jiova e dua na ka vou e vuravura, Ena rawa na tagane e dua na yalewa.
23Sa kaya vakaoqo ko Jiova ni lewe vuqa, na nodra Kalou na Isireli; Era na cavuta tale na vosa oqo e na vanua ko Juta kei na kena veikoro, ni'u na kauti ira tale mai era a vakabobulataki; Mo vakalougatataki iko ko Jiova, nai tikotiko ni lewa dodonu, na ulu-ni-vanua tabu. 24Ia ena tiko ga e Juta, kei na kena veikoro kece talega, ko ira sa daucaka were, kei ira era veilakoyaki kei na qele ni sipi. 25Ni'u sa vakaceguya na yalodra era sa oca, ia ka'u sa vakamamautaka na yalodra kecega sa rarawa.
26Sa oti oqo ka'u a qai yadra, ka vakaraica; ia na noqu moce sa kamikamica vei au.
27Raica, sa kaya ko Jiova ena yaco na gauna, ka'u na kaburaka kina na mataqali i Isireli kei na mataqali i Juta e na kawa ni tamata, kei na kawa ni manumanu. 28Ia ena yaco, me vaka ni'u a dauvakaraici ira, me'u cavuta, ka basuka sobu, ka talaraka, ka vakarusa, ka vakararawataka; ka'u na dauvakaraici ira vakakina me'u tara, ka me'u tea, sa kaya ko Jiova. 29E na gauna ko ya era na sega ni kaya tale, Ko ira na qase era sa kania na vua-ni-vaini wiwi, ia na batidra na luvedra sa rara kina. 30Ni sai ira yadua, era na dui mate ga e na vuku ni dui nona caka cala: na tamata yadua sa kania na vua-ni-vaini wiwi, ena rara ga kina na batina ko koya.
31Raica, sa kaya ko Jiova ena yaco na gauna, ka'u na cakava kina kei na mataqali ni Isireli kei na mataqali ni Juta e dua na veiyalayalati vou: 32ena sega ni vaka na veiyalayalati ka'u a cakava kei ira na nodra qase e na siga ka'u a taura kina na ligadra me'u tuberi ira mai na vanua ko Ijipita; ni ra sa vakacataka na noqu veiyalayalati ko ya, ia koi au ka'u sa watidra ga, sa kaya ko Jiova: 33ia sa vakaoqo na veiyalayalati ka'u na cakava kei ira na mataqali ni Isireli; Ni sa oti na gauna ko ya, sa kaya ko Jiova, ka'u na tugana na noqu vunau ki na lomadra, ka'u na vola talega ki na yalodra: ia ka'u na yaco me'u nodra Kalou, ka ra na yaco ko ira me ra noqu tamata: 34a ra na sega ni dui veivakatavulici tale na tamata kei na kai nona, kei na wekana, ka kaya, Mo kilai Jiova: ni ra na kilai au ga ko ira kece, ko ira sa tamata wale kei ira talega era sa turaga, sa kaya ko Jiova: ni'u na bokoca na nodra caka cala, ia na nodra i valavala ca ka'u na sega ni nanuma tale.
35Sa kaya vakaoqo ko Jiova, ko koya sa solia na mata-ni-siga me kena rarama na siga, ka lesia na vula kei na kalokalo me rarama kina na bogi, ko koya sa vakamaravutaka na wasawasa ni sa vadugu na kena biau: ko Jiova ni lewe vuqa na yacana: 36Ke sa yali e mataqu nai lesilesi oqo, sa kaya ko Jiova, ke sa qai kua ni matanitu tiko e mataqu ka sega ni mudu ko ira talega na kawa i Isireli. 37Sa kaya vakaoqo ko Jiova, Ke sa vakarauti rawa na lomalagi maicake, ka vakadikevi rawa na yavu kei vuravura e ra, ke sa qai rawa talega me'u biuta tani na kawa i Isireli kecega e na vuku ni ka kece era sa cakava, sa kaya ko Jiova.
38Raica, sa kaya ko Jiova ena yaco na gauna, ena tara kina na koro me nei Jiova, mai na vale-cecere i Ananeli ka yacova na matamata-ni-koro mai na tutu-ni-koro. 39Ia ena yaco tale yani na wa i vakarau me vakadodonu ki na dela-ni-koro ko Karepi, ka lako voli yani ki Koaca. 40Ia na buca kecega ni yago mate, kei na dravusa, kei na vanua kecega ka yaco ki na soniwai ko Kitironi, ka yaco sara ki na tutu ni matamata-ni-koro ni ose vaka ki na tu-i-cake, ena tabu me nei Jiova; ena sega ni cavuti tale, se talaraki sobu e na dua na gauna.
Currently Selected:
JEREMAIA 31: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
