JEREMAIA 16
16
Sa ia na parofisai ko Jeremaia, me vakatakila vei ira na Juta, ni ra ca sara, 1-9, ka ni ra sa uasivi vei ira na nodra qase e na ca, 10-13. Ena ka levu na nodra vakabulai emuri mai Papiloni, ka ka lailai na nodra vakabulai eliu mai Ijipita, 14,15. Ena cudruvi ira ko Jiova ni ra qarava na kalou lasu, 16-21.
1A sa yaco vei au na vosa i Jiova, ka vaka,
2Mo kakua ni kauta vei iko e dua me watimu, ia me kakua na luvemu tagane, se na luvemu yalewa e na yasana oqo. 3Ni sa kaya vakaoqo ko Jiova e na vuku ni gonetagane kei na vuku ni goneyalewa era sa sucu e na yasana oqo, e na vuku ni tinadra sa vakasucumi ira, kei na vuku ni tamadra talega sa vakatuburi ira e na vanua oqo: 4Era na mate e na mate ca; era na sega ni tagicaki; era na sega talega ni bulu; era na vaka na de-ni-manumanu e dela ni soso: ena vakaoti ira sara nai seleiwau, kei na viakana; ia na yagodra ena kedra na manumanu vuka, kei na manumanu ni vanua. 5Ni sa kaya vakaoqo ko Jiova, Kakua ni ko curu ki na vale ni tagi yaso, kakua talega ni la'ki tagicaki ira se vakacegui ira: ni'u sa kauta tani na noqu vakacegu maivei ira na tamata oqo, sa kaya ko Jiova, io na yalololoma kei nai valavala loloma. 6A ra na mate na turaga kei na tamata wale e na vanua oqo: era na sega ni buluti, ena sega e tagicaki ira, se tavalaki ira, se tasi ira e na vukudra: 7era na sega talega ni ia na dovi madrai e na vukudra e na somate, me vakacegui ira e na vuku ni mate; era na sega talega ni solia vei ira na bilo ni veivakacegui me ra gunuva e na vuku ni tamadra se na tinadra.
8Kakua talega ni ko curu ki na vale era soqoni kina, mo kana ka gunu vata kei ira. 9Ni sa kaya vakaoqo ko Jiova ni lewe vuqa, na Kalou ni Isireli; Raica, au na muduka tani e na yasana oqo e na matamudou, io, e na nomudou gauna, na domo ni marau, kei na domo ni reki, na domo ni tagane kei na domo ni yalewa, sa qai vakawati.
10Ia ena yaco, ni ko sa tukuna vei ira na tamata oqo na vosa kecega oqo, ka ra sa kaya vei iko, A cava sa cavuta kina ko Jiova vei keimami na ka ca levu kece oqo? se cava beka na neimami caka cala? se cava na neimami valavala ca keimami sai valavala ca kina vei Jiova na neimami Kalou? 11ia mo kaya vei ira, E na vukudra na nomudou qase ni ra sa biuti au, sa kaya ko Jiova, ka ra sa muria na kalou tani, ka qaravi ira, ka sorovi ira, ia era sa biuti au, ka ra sa sega ni vakabauta na noqu vunau; 12ia koi kemudou dou sa caka ca vakalevu ka vakalailai ko ira na nomudou qase; ka raica, dou sa dui muria yadua na nona yalokaukauwa kei na nona loma ca, me ra kakua kina ni vakarorogo vei au: 13o koya oqo ka'u na biuti kemudou tani kina e na vanua oqo ki na vanua dou sa sega ni kila, se koi kemudou se ko ira na nomudou qase; ia dou na qaravi ira na kalou tani maikea e na siga kei na bogi; ka'u na sega ni lomani kemudou maikina.
14Ia ka sa kaya vakaoqo ko Jiova, Raica, ena yaco na gauna, ena sega ni kainaki tale kina, Sa bula ko Jiova, ko koya ka kauti ira cake na Isireli mai na vanua ko Ijipita; 15ia, ena kainaki ga, Sa bula ko Jiova, ko koya ka kauti ira na Isireli mai na vanua mai na tokalau, mai na veivanua talega sa dui vakasevi ira kina ko koya: ia ka'u na kauti ira tale mai ki na nodra vanua ka'u a solia vei ira na nodra qase.
16Raica, au na talakitaki ira e le vuqa na dausiwa, sa kaya ko Jiova, ka ra na siwati ira; ka oti, ka'u na talakitaki ira e le vuqa na dauvakasasa manumanu, ka ra na vakasavi ira mai na veiulu-ni-vanua kecega, kei na veiulu-ni-koro kecega, kei na qara-vatu. 17Ia na mataqu sa qarava na nodra i valavala kecega: sa sega ni vunitaki vei au, ka sa sega talega ni tabonaki na nodra caka cala, me'u kakua ni kunea. 18Ia ka'u na sauma eliu me rauta vakarua na nodra caka cala kei na nodra i valavala ca; ni ra sa vakadukadukalitaka na noqu vanua e na yago mate ni nodra ka velavela, io ena nodra ka vakasisila era sa vakasinaita kina na noqu i tikotiko.
19Kemuni Jiova, na noqu kaukauwa, kei na noqu koro ni valu, kei na noqu i vakaruru e na siga ni rarawa, era na lako mai kivei kemuni ko ira na veimatanitu mai na veiyalayala kei vuravura, ka ra na kaya, E dina, era sa taukena ko ira na neimami qase na ka lasu, kei na ka wale, kei na ka sa sega ni yaga.
20Sa na dua beka na tamata me cakava me nona kalou na ka sa sega ni kalou? 21O koya oqo, raica, ka'u na vakatakila kina vei ira me vakaduaga oqo, ka'u na vakatakila vei ira na ligaqu, kei na noqu kaukauwa; ka ra na kila ni sa yacaqu ko Jiova.
Currently Selected:
JEREMAIA 16: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
