JEREMAIA 15
15
Era sa biu, ka lewai me cudruvi ga ko ira na Juta, 1-9. Ko Jeremaia, ni sa vosavakacacataki, sa tagi vua na Kalou, a sa vakacegui koya e na vosa loloma, kei na vosa ni veivakararawataki vei ira, 10-14. Sa masu ko koya, a sa rogoci na nona masu, 15-21.
1Sa qai kaya vei au ko Jiova, Ke rau tu e mataqu ko Mosese kei Samuela, ke sega ni gole rawa kina na lomaqu vei ira na tamata oqo: biuti ira tani me'u kua ni raica, me ra lako tani ga. 2Ia kevaka era taroga vei iko, Me keimami lako yani kivei? mo qai kaya vei ira, Sa kaya vakaoqo ko Jiova; Ko ira sa lesi ki na mate, ki na mate ga; kei ira sa lesi ki nai seleiwau, ki nai seleiwau ga; kei ira sa lesi ki na viakana, ki na viakana ga; kei ira sa la'ki vakabobulataki, ki na veivakabobulataki ga. 3Ia e va na ka ka'u na lesia me rawai ira, sa kaya ko Jiova: nai seleiwau me ia na veivakamatei, kei na koli me ia na veidresulaki, kei na manumanu vuka, kei na manumanu ni vanua, me kania ka vakarusai ira. 4Ia ka'u na soli ira me ra veikauyaki ki na veimatanitu kecega e vuravura, e na vuku i Manasa na luve i Esekaia na tui Juta, e na vuku ni ka sa cakava e Jerusalemi.
5Ia ko cei li ena lomani iko, Jerusalemi? se ko cei me na tagicaki iko? se ko cei me na lesu tani me la'ki taroga, se sa vakaevei na nomu tiko? 6Ko iko ko sa biuti au, sa kaya ko Jiova, ko sa lako ki muri: o koya oqo ka'u na dodoka kina na ligaqu vei iko, ka vakarusai iko; au sa oca e na veivutuni. 7Ia ka'u na irivi ira e nai iri e na matamata-ni-koro ni vanua; ka'u na vakawayalitaki ira, ka'u na vakarusai ira na noqu tamata, ni ra sa sega ni saumaki mai na nodra i valavala. 8Sa ka levu tu na nodra yada, ka lailai na mata ni nuku ni wasawasa; au sa vakayacora vei ira, io, vua na tinadra na cauravou e dua na dauvakacaca e na siga levu: au sa vakavuna na nona sikiti koya vakidacala, kei na ka ni veivakarerei ki na koro. 9Sa malumalumu mai ko koya sa vakasucuma e lewe vitu: sa ciba ko koya: sa dromu na nona mata-ni-siga ni sa siga toka: sa madua ka taqaya ko koya: ia na kedra vo ka'u na solia ki nai seleiwau e na matadra na nodra meca, sa kaya ko Jiova.
10Ulei koi au, na tinaqu, ni ko sa vakasucumi au me'u tamata dauveileti ka tamata dauveivala kei vuravura kecega! au a sega ni soli lavo me saumi, ka me levu talega na kenai kere, a sa sega na tamata me cakava vakakina vei au; ia ko ira kece era sa rukaki au. 11Sa kaya ko Jiova, E dina, na vo ni nomu bula ena vinaka ga; e dina, ka'u na vakauqeti ira na meca me ra caka vinaka vei iko e na gauna ni ca kei na gauna ni rarawa. 12Me dua li na aironi me vorota na aironi vakatokalau kei na parasa? 13na nomu i yau kei na nomu ka talei ka'u na solia ga me tokitaki wale, me sega na kenai voli, io e na vuku ni nomu i valavala ca kecega e na nomu i yalayala kecega: 14ia ka'u na vakauti kemudou kei na nomudou meca ki na vanua dou sa sega ni kila: ni sa dua na buka sa tutuvaki e na noqu cudru, ena kati kemudou.
15Koi kemuni, Jiova, ko ni sa kila: mo ni nanumi au, ka mai raici au, ka cudruvaki au vei ira era vakacacani au; e na vuku ni nomuni dauvosota, kakua ga ni kauti au tani: ni kila ga, ni sai kemuni ka'u sa vakarogocataki kina. 16Sa kune na nomuni vosa, ia ka'u a kania; ka sa yaco na nomuni vosa me ka ni reki kei na ka ni marau ki na lomaqu: ni ka'u sa vakatokai e na yacamuni, Jiova na Kalou ni lewe vuqa: 17ka'u a sega ni tiko e na nodra i soqosoqo na dauveivakalialiai, se'u marau tiko; ka'u a tiko duaduaga e na vuku ni ligamuni: ni kemuni sa vakasinaiti au e na cudru levu. 18A cava sa sega ni mudu kina na noqu rarawa, kei na noqu mavoa me sega ni bula rawa, ka sa sega ni via bula? ko ni na vaka dina sara beka e dua na daulasu vei au, ka vaka na wai sa yali ga?
19O koya oqo sa kaya kina ko Jiova, Kevaka ko na saumaki mai, ka'u na qai vakayacori iko tale, mo mai tu ga e mataqu: ia kevaka ko na wasea tani na ka talei mai na ka sa sega ni yaga, ko na qai vaka ga na gusuqu: me ra saumaki mai vei iko ko ira; ia ko iko mo kakua ni saumaki vei ira. 20Ia ka'u na qisi iko mo bai parasa vei ira na tamata oqo: era na veivala kei iko, ka ra na sega ni gumatua vei iko: ni'u sa tiko vata kei iko me'u vakabulai iko ka kaliraki iko, sa kaya ko Jiova: 21ia ka'u na kaliraki iko mai na ligadra na tamata ca, ka vakabulai iko mai na ligadra na daurerevaki.
Currently Selected:
JEREMAIA 15: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
