JEREMAIA 12
12
Ni sa rarawa ko Jeremaia, e na vukudra na tamata ca ni ra dauyaco, sa raica ni ra daucudruvi talega, 1-4. Na Kalou, sa vakatakila vua ni ra sa daulawakicataki koya na kai nona, 5,6; ka sa tagicaki ira na nona tamata, 7-13. Sa yalataka vei ira era sa veivutuni na bula mai na tiko vakabobula, 14-17.
1Sa yalododonu koi kemuni, Jiova, ni daru sa veilewai kei kemuni: ia me'u vosa mada vei kemuni e na vuku ni nomuni lewa: A cava era sa dauyaco kina ko ira na tamata ca, ka sa tiko vinaka ko ira kecega era ia vakalevu na veivakaisini? 2Ko ni sa tei ira, io, sa ti sobu na wakadra: era sa tubu, io, era sa vua: sa voleka koi kemuni e na gusudra, ka yawa ki na lomadra. 3Ia koi kemuni Jiova, ko ni sa kilai au: ko ni a raici au, ka sa vakatovolea na lomaqu vei kemuni: mo ni yarataki ira me vaka na sipi me vakamatei, ka lesi ira ki na siga ni veivakamatei. 4A cava na kena dede me tagi tiko kina na vanua, ka malai yani na co ni veiwere kecega, e na vuku ni nodra ca era tiko kina? sa oti na manumanu ni vanua kei na manumanu vuka; ni ra sa kaya, Ena sega ni kunea ko koya na kedai otioti.
5Kevaka dou sa cici vata kei ira na tamata, ka ra sa vakaocataki iko, ko na qai veiqati vakaevei kei na ose? ia kevaka ko sa vakacegu e na vanua sa sautu ga ko na qai vakaevei ni sa vuabale na Joritani? 6Ko ira talega na wekamu, kei na mataqali i tamamu, era sa ia na veivakaisini vei iko; era sa kacimuri iko vakadomoilevu talega: ni ra sa vosa vinaka vei iko, kakua ni ko vakadinati ira.
7Au sa biuta na noqu vale, au sa vakalaiva na noqu i votavota; au sa soli koya ka'u sa lomana e na vu ni yaloqu ki na ligadra na nona meca. 8Sa cakacaka vei au na noqu i votavota me vaka e dua na laioni e na veikau; sa mai tagi vakacudru vei au: ka'u sa cati koya kina. 9Sa manumanu tavukadiridiri na noqu i votavota vei au, na manumanu vuka sa voliti koya era sa veivala kaya; dou mai soqoni vata kecega na manumanu ni vanua, dou mai kania. 10Ai vakatawa e vuqa era sa vakacacana na noqu were-ni-vaini, era sa butuka sobu na noqu i votavota, era sa cakava na noqu vanua domoni me veikau lala: 11era sa cakava me tikina rusa, ia ni sa lala, sa tagi mai vei au; sa lala mai na vanua taucoko, ni sa sega na tamata sa nanuma kina: 12era sa lako mai ki na veitikina cecere kecega mai veikau ko ira na dauvakacaca: ia nai seleiwau i Jiova sa kana voli mai nai yalayala ni vanua e dua ki nai yalayala ni vanua kadua: ena sega e dua na tamata me vakacegu. 13Era sa kaburaka na witi, ia era na tamusuka na wa-vakavotona: era sa dauvakaocataki ira, ka na sega ga ni yaga: ia era na maduataka na nomudou vuata e na vuku ni cudru katakata i Jiova.
14Sa kaya vakaoqo ko Jiova vei ira kecega na tamata ca era tiko volekati au, a ra tara nai votavota, ka'u a solia vei ira na Isireli na noqu tamata me ra taukena; Raica, ka'u na cavuti ira tani mai na nodra vanua, ia na mataqali i Juta ka'u na cavuta mai na kedra maliwa: 15ia ena yaco, ni'u sa cavuti ira oti, ka'u na qai lesu mai, ka lomani ira tale, ka kauti ira tale mai, na tamata yadua ki na nona tikina, kei na tamata yadua ki na nona vanua. 16Ia kevaka era na gumatua ni vulica nai valavala ni noqu tamata, me ra bubului e na yacaqu, ka vaka, Sa bula ko Jiova; me vaka era sa dauvakavulici ira na noqu tamata me ra bubului vei Peali; era na qai vakataudeitaki e na kedra maliwa na noqu tamata: 17ia kevaka era bese ni vakarorogo mai, ka'u na cavuta laivi sara ka vakarusa na matanitu ko ya, sa kaya ko Jiova.
Currently Selected:
JEREMAIA 12: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
