JEREMAIA 11
11
Sa tukuna ko Jeremaia na veiyalayalati ni Kalou, kei na nodra talaidredre kina na Juta, 1-8; o koya oqo era sa ca kina, 9-17. Era na ca na kai Anacoci ni ra sa buki vere kei Jeremaia, 18-23.
1E dua na vosa sa yaco vei Jeremaia maivei Jiova, ka vaka,
2Dou rogoca mada na vosa ni veiyalayalati oqo ka tukuna vei ira na Juta, kei na kai Jerusalemi; 3ia mo kaya vei ira, Sa kaya vakaoqo ko Jiova na nodra Kalou na Isireli; Ena ca na tamata sa sega ni vakarorogo ki na vosa ni veiyalayalati oqo, 4ka'u a vakarota vei ira na nomudou qase e na siga ka'u a kauti ira kina mai na vanua ko Ijipita, mai na lovo kaukamea, ka kaya, Dou vakarogoca na noqu vosa, ka muria me vaka na ka kecega ka'u sa vakarota vei kemudou: dou na yaco kina mo dou noqu tamata, ia koi au ka'u na yaco me'u nomudou Kalou: 5me'u vakayacora kina na bubului ka'u a bubului kina vei ira na nomudou qase, me'u solia vei ira na vanua sa dave kina na wai-ni-sucu kei na oni, me vaka e na siga oqo. Au a qai kaya, Me vakakina, Kemuni Jiova.
6A sa kaya vei au ko Jiova, Mo vunautaka kecega na vosa oqo e na veikoro vaka-Juta, e na saqata talega ni koro ko Jerusalemi, ka kaya, Dou rogoca na vosa ni veiyalayalati oqo, ka muria. 7Ni'u a vakadreta sara vei ira na nomudou qase e na siga ka'u a kauti ira cake kina mai na vanua ko Ijipita, ka yacova na siga oqo, ka'u sa sou e na mataka ka vakadreta ka kaya, Dou vakarogoca na noqu vosa. 8A ra sa sega ni vakarorogo, se vakatu daligadra, era sa dui muria kecega na nodra yalokaukauwa: o koya oqo ka'u na vakayacora kina vei ira na vosa kecega ni veiyalayalati oqo, ka'u a vakarota vei ira me ra cakava; ka ra sa sega ni muria.
9A sa kaya vei au ko Jiova, Sa votu na nodra vere na Juta, kei na kai Jerusalemi: 10era sa lesu tani ki nai valavala ca ni nodra qase eliu, era sa bese ni vakarogoca na noqu vosa, ka ra sa muria ga na kalou tani, me ra qaravi ira: era sa vakacacataka, ko ira na mataqali i Isireli kei na mataqali i Juta, na noqu veiyalayalati o koya ka'u a cakava kei ira na nodra qase. 11O koya oqo sa kaya kina ko Jiova, Raica, au na vakayacora vei ira na ca, ka ra na sega ni dro tani rawa maikina, era na qai tagi vei au, ia ka'u na sega ga ni rogoci ira. 12Ena qai lako na veikoro i Juta kei na kai Jerusalemi, ka tagi vei ira na kalou era vakama kina na ka boi vinaka: ia era na sega sara ni vakabulai ira e na gauna ni nodra rarawa. 13Ni sa tautauvata na kenai wiliwili ni nomu veikoro kei nai wiliwili ni nomu kalou, ko iko Juta; ka sa tautauvata nai wiliwili ni sala ni koro mai Jerusalemi kei nai wiliwili ni cabocabo-ni-soro dou sa vakaduria ki na ka ni veivakamaduataki ko ya, io nai cabocabo-ni-soro me vakama kina na ka boi vinaka vei Peali. 14Ia ko iko, mo kakua ni masulaki ira na tamata oqo, mo kakua talega ni tagi se masu e na vukudra: ni'u na sega ni rogoci ira e na siga era sa tagi kina vei au e na nodra rarawa.
15A cava sa mai kitaka e na noqu vale ko koya ka'u sa lomana, ni sa ia ko koya nai valavala ca levu, ia na yago savasava sa yali sara vei iko? ni ko sa caka ca, ko sa qai reki. 16Sa vakatoka na yacamu ko Jiova na olive bulabula, ka matavinaka, ka vuavuai vinaka: ia na rorogo ni ue levu, sa tutuvaka ko koya na buka e delana, ka sa raramusumusu na tabana. 17Ia ko Jiova ni lewe vuqa ko koya ka tei iko, sa kaya me yacovi iko na ca, e na vuku ni nodra ca na mataqali i Isireli kei na mataqali i Juta, o koya era sa cakava vei ira me vakacudrui au, ni ra sa vakama na ka boi vinaka vei Peali.
18Ia ko Jiova sa vakatakila vei au, na ka oqori, ia ka'u sa kila: ko sa qai vakaraitaka mai vei au na nodra i valavala. 19Ia koi au ka'u a vaka na lami se na pulumokau sa kau mai me vakamatei; ka'u a sega ni kila ni ra sa buki qau vere, ka vaka, Me da vakacataka na kau kei na vuana, ia me da muduki koya tani mai na vanua ni bula, me kakua ni nanumi tale na yacana. 20Ia koi kemuni, Jiova ni lewe vuqa, ka lewa vakadodonu, ka vakatovolea nai ivi kei na loma ni tamata, me'u sa raica mada na nomuni cudruvi ira: ni'u sa tukuni au vei kemuni.
21O koya oqo sa kaya kina ko Jiova e na vukudra na kai Anacoci, era sa segata me ra vakamatei iko, ka kaya, Mo kakua ni ia na parofisai e na yaca i Jiova, de ko mate e na liga i keimami; 22o koya sa kaya kina ko Jiova ni lewe vuqa, Raica, koi au ka'u na cudruvi ira: a cauravou, era na mate e nai seleiwau; a luvedra tagane kei na luvedra yalewa, era na mate e na viakana: 23ia ena sega na kedra vo; ni'u na vakayacora na ka ca vei ira na kai Anacoci, io na kena yabaki me ra cudruvi kina.
Currently Selected:
JEREMAIA 11: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
