IPERIU 9
9
Sa tukuna ko koya na ka eso sai vakatakarakara eliu kei Karisito; ia ka sa uasivi cake sara kina ko koya, 1-28.
1Sa dina ga sa tu kei na veiyalayalati ka taumada eso nai vakaro ni lotu, kei na vale-ni-soro vakavuravura. 2Ni sa caka ga na vale tabu; o koya sa taumada, sa tu kina nai tutu-ni-cina, kei na tepeli, kei na madrai dauraici; a yacana oqo na tikina tabu. 3Ia sa sivi nai karua ni lati, sa qai tu na vale tabu sa vakatokai na loqi tabu sara; 4sa tu kina na miqa koula, kei na kato ni veiyalayalati sa botani na yasana kece e na koula, sa tu kina na bilo koula sa tawa e na mana, kei nai titoko talega i Eroni o koya sa kubu, kei na vatu raraba ni veiyalayalati; 5sa tu ga e cake koi rau na jerupi vakaiukuuku sa vakaruruga nai cabocabo-ni-bulubulu; ia ka sa dredre edaidai me tukuni yadua na veika oqo.
6Ia ni sa vakarautaki oti na veika oqo, sa curu ko ira na bete e na veisiga ki nai matai ni vale tabu, ka ia kina na lotu: 7ia sa curu ki na kenai karua na bete levu duaduaga vakaduaga e na veiyabaki, ka kauta na dra, a sa vakacabora e na vukuna, e na vuku talega ni nodra vakacala ka na tamata: 8a sa vakatakila na Yalo Tabu na ka oqo, ni sa sega ni vakarairaitaki mai na sala ki na loqi tabu sara, e na gauna sa tu ga kina na vale tabu ka taumada. 9A kenai vakatakarakara walega oqori, ka yacova na gauna oqo, sa vakacabori kina nai madrali kei nai soro, o koya sa sega ni vakasavasavataka rawa na nona lewa-eloma ko koya sa mai lotu; 10(e na kakana kei na ka-ni-gunu, kei na vuivui vakavuqa) kei na veivakaro vakavuravura, sa lesi me yaco mada na gauna ni veivakadodonutaki.
11Ia sa lako mai na Karisito, a sa bete levu e na ka vinaka ena muri mai, e na vale tabu levu ka uasivi cake na kena vinaka, e sega ni tara e na liga, ni sa sega ni caka vakakina; 12e sega talega e na dra ni me kei na luve ni pulumokau, e na nona dra ga sa curu vakadua ki na loqi tabu sara, ni sa rawata me solia na bula tawa mudu. 13Ia kevaka sa yaga na dra ni pulumokau kei na me, kei na dravusa ni pulumokau yalewa ni sa kureitaki vei ira sa dukadukali, me savasava kina na yagodra: 14ena vakatanievei na dra nei Karisito, o koya ka vakacabori koya vua na Kalou e na vuku ni Yalo Tabu tawa mudu ia ka sega vua na ca, ena sega beka ni rawarawa sara me vui laivi kina na nomudou lewa-eloma mai na cakacaka sa ka ni mate, mo dou qarava na Kalou bula?
15O koya oqo sa yaco kina ko koya me dautataro e na veiyalayalati vou, me ra rawata kina ko ira ka kacivi nai votavota tawa mudu ka yalataki, e na vuku ni nona mate, sai soro ni valavala ca ka caka oti e na gauna ni veiyalayalati taumada. 16Ia kevaka sa dua na veiyalayalati, sa yaga me mate o koya sa ia kina na veiyalayalati: 17ni sa mate sa vakataudeitaki kina na veiyalayalati; ia ka sa sega ni yaga vakalailai ni sa bula tiko ko koya sa ia na veiyalayalati. 18O koya oqo sa sega kina ni vakatabui wale na veiyalayalati sa taumada, sa caka ga e na dra: 19io, ni sa cavuta oti ko Mosese nai vakavuvuli kecega ni vunau vei ira kecega na tamata, sa qai kauta ko koya na kedra dra na luve ni pulumokau kei na me, kei na wai, kei na vuti ni sipi sa vakadamudamutaki, kei na isopa, ka kureitaka ki nai vola, kivei ira kece talega na tamata, 20ka kaya, Oqo na dra ni veiyalayalati sa kitaka vei kemudou na Kalou. 21Sa kureitaka vaka talega kina na dra ki na vale tabu, kei na bilo kecega ni lotu. 22Ia ka vica na ka sa sega ni vakasavasavataki e na dra me vaka na vunau; ia kevaka sa sega ni vakadavei na dra, sa sega ni bokoci nai valavala ca.
23Ia sa dodonu kina me vakasavasavataki nai vakatakarakara ni veika mai lomalagi e na veika oqo; ia na veika dina sa vakalomalagi sa vakasavasavataki e nai soro e uasivi cake vei ira. 24Ni sa sega ni curu na Karisito ki na loqi tabu sa caka e na liga, oqori sai vakatakarakara ga ni ka dina; sa curu ki na lomalagi dina ga, me rairai edaidai e na mata ni Kalou e na vukuda; 25sa sega talega ni vakacabori koya vakavuqa, me vaka sa curu na bete levu ki na loqi tabu e na veiyabaki, ka kauta na dra ni ka tani; 26ia ke sa vakakina ke sa dodonu me mate vakavuqa mai nai vakatekivu kei vuravura: sa qai vakarairaitaki vakadua ko koya e nai vakataotioti ni veigauna sa loku me kauta tani nai valavala ca ni sa vakacabori koya. 27Ia me vaka sa lesi me mate vakadua ko ira na tamata, ka me qai muri na siga ni lewa: 28sa vakacabori vakadua vaka talega kina na Karisito me cudruvi e na vuku ni valavala ca ni lewe vuqa; ka na rairai mai vakarua ko koya kivei ira sa waraki koya me ra bula, ia ena sega ga mei soro.
Currently Selected:
IPERIU 9: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
