NAI VAKATEKIVU 29

Sa yaco ki nai keli-wai mai Karana ko Jekope, 1-8. Sa qai lako mai ko Rejeli, a sa vukea ko Jekope, 9-12, ka qai lako ki na vale i Lepani, 13,14. Sa musuki Rejeli me watina, 15-20. Sa vakaisini Jekope ko Lepani, ka soli Lia vua, 21-26. Sa qaravi Lepani tale me nona ko Rejeli, 28-30. Sa vakasucu ko Lia, 31-35.

1Sa qai lako tu yani ko Jekope, ka yacova na nodra vanua ko ira mai na tu-i-cake. 2A sa rai yani, ka raica, sa dua nai keli-wai e na tiki ni vanua ko ya, ka raica, sa tolu na qele ni sipi sa koto voleka kina; ni ra sa dauvagunuva na qele ni sipi mai nai keli-wai ko ya: a sa sogo na gusu ni keli-wai e na dua na vatu levu. 3A sa dausoqoni vata ki kea na qele ni sipi kecega: a ra sa dauvaqiqica tani na vatu mai na gusu ni keli-wai, ka vagunuva na sipi, a qai vakasuka tale na vatu ki na kena tikina ki na gusu ni keli-wai. 4A sa kaya vei ira ko Jekope, Kemudou maivei, na wekaqu? A ra sa kaya, Koi keitou mai Karana. 5A sa kaya vei ira, Dou sa kilai Lepani na luve i Neori, se segai? A ra sa kaya, Keitou sa kila. 6A sa kaya vei ira, Sa bula vinaka, se segai? A ra sa kaya, Sa bula vinaka; ka raica, sa lako tiko mai ko Rejeli na luvena yalewa kei na sipi. 7A sa kaya ko koya, Raica, sa siga levu toka, ka sa bera na gauna me soqoni vata kina na manumanu: dou vagunuva mada na sipi, ka la'ki vakania. 8A ra sa kaya, E dredre, me sa soqoni vata kece mada na qele ni sipi, ka vaqiqici tani na vatu mai na gusu ni keli-wai; keitou qai vagunuva na sipi.

9Ni sa veivosaki tiko kei ira, sa lako mai ko Rejeli kei na sipi nei tamana: ni sa dauvakatawa ko koya. 10Ia ni sa kunei Rejeli ko Jekope, ko koya na luve i Lepani na gane i tinana, kei na sipi nei Lepani na gane i tinana, sa qai toro ko Jekope, ka vaqiqica na vatu mai na gusu ni keli-wai, ka vagunuva na qele ni sipi nei Lepani na gane i tinana. 11A sa reguci Rejeli ko Jekope, ka tabalaka na domona, ka tagi: 12a sa tukuna vei Rejeli ko Jekope ni sa taci i tamana, ka ni sa luve i Repeka: a sa cici yani ko koya, ka tukuna vei tamana. 13Ia ni sa rogoca ko Lepani nai tukutuku kei Jekope na luve i ganena, sa qai cici yani me la'ki veitata kaya, a sa mokota, ka reguca, ka kauti koya ki na nona vale. A sa mani tukuna vei Lepani na ka kecega oqo. 14A sa kaya vua ko Lepani, E dina ko sa suiqu ka lewequ. A sa tiko kaya ka vula dua.

15A sa kaya vei Jekope ko Lepani, E dodonu li mo qaravi au walega ni ko sa wekaqu? mo tukuna vei au se cava me kemui voli. 16A sa le rua na luvena yalewa ko Lepani: a yacana ka qase ko Lia, ia sa yacana ka gone ko Rejeli; 17sa mata malumalumu ko Lia; ia ko Rejeli, sa yago vinaka, ka matavinaka. 18A sa lomani Rejeli ko Jekope; a sa kaya, Au na qaravi iko ka yabaki vitu me noqu ko Rejeli na luvemu ka gone. 19A sa kaya ko Lepani, E vinaka me'u solia vei iko, ka ca me'u solia vua e dua na tamata tani: tiko mada vei au. 20A sa qaravi koya ko Jekope ka yabaki vitu me nona ko Rejeli; a sa vaka sa bogi vica walega vua e na vuku ni nona loloma vua.

21A sa kaya vei Lepani ko Jekope, Mo solia mada na watiqu, ni sa oti na noqu cakacaka, ka me'u la'ki curu vua. 22A sa vakasoqoni ira vata ko Lepani na tamata kecega e na yasana ko ya, ka cakava e dua na magiti. 23Ia e na yakavi, sa tuberi Lia na luvena, ka kauta vua; a rau sa veiyacovi kaya. 24A sa soli Silipa na nona vada ko Lepani kivei Lia na luvena, me nona vada. 25Ia e na mataka, raica, sai koya ko Lia: a sa kaya ko koya vei Lepani, A cava oqo ko sa cakava vei au? au a sega li ni qaravi iko me watiqu ko Rejeli? a cava ko sa qai vakaisini au kina? 26A sa kaya ko Lepani, E sega ni kenai valavala e na neimami vanua, me soli koya eliu na gone, ka soli koya emuri na qase: 27mo vakaotia mada na kena wiki, keitou na qai soli koya talega oqo vei iko, e na vuku ni nomu cakacaka vei au ka yabaki vitu tale.

28A sa kitaka vakakina, ko Jekope, ka vakaotia na kena wiki: ka sa soli Rejeli na luvena ko koya vua me watina. 29A sa soli Pila na nona vada ko Lepani kivei Rejeli na luvena, me nona vada. 30A sa curu talega vei Rejeli ko Jekope, a sa lomani Rejeli ga ka cati Lia, a sa qaravi koya ka vitu tale na yabaki.

31A sa raica ko Jiova ni sa cati ko Lia, a sa vakarawarawataka vua me vakasucu: ia sa yava ga ko Rejeli. 32A sa kunekune ko Lia, a sa vakasucuma na luvena tagane, a sa vakayacani koya ko Rupeni: ni sa kaya, Sa kunea dina ko Jiova na noqu rarawa: o koya oqo sa na qai lomani au na watiqu. 33A sa kunekune tale, ka vakasucuma na gonetagane; a sa kaya, Ni sa rogoca ko Jiova ni'u a cati, sa solia kina vei au na gone tagane talega oqo: a sa vakayacani koya ko Simioni. 34A sa kunekune tale, ka vakasucuma na gonetagane; a sa kaya, Sa na qai vakabiti vei au na watiqu, ni'u sa vakasucuma e le tolu na luvena tagane: ka sa vakayacani koya kina ko Livai. 35A sa kunekune tale, a sa vakasucuma na gonetagane; a sa kaya, Au na qai ia na vakavinavinaka vei Jiova: a sa vakayacani koya kina ko Juta: a sa qai cegu ni vakasucu.

Currently Selected:

NAI VAKATEKIVU 29: FOV

Highlight

Copy