NAI VAKATEKIVU 28

Sa talai Jekope ko Aisake me la'ki vakawati kei na dua vei ira na wekana, 1-5. Sa la'ki taura e dua tale na watina ko Iso vei ira na luve i Isimeli, 6-9. A tadra i Jekope, 10-22.

1A sa kacivi Jekope ko Aisake, a sa vosavakalougatataka, ka vakarota, ka vaka vua, Mo kakua ni vakawati kei na dua na goneyalewa ni Kenani: 2mo cavu tu, mo lako ki Petani-erama, ki na vale i Pecueli, na tama i tinamu; ka vakawati kei na dua maikea, maivei ira na luvena yalewa ko Lepani, na gane i tinamu. 3Ia me vakalougatataki iko na Kalou Kaukauwa, ka qisi iko mo vakaivakawa, ka vakalewevuqataki iko, mo tubu me tamata lewe vuqa sara; 4ka vakayacora vei iko na veivakalougatataki i Eparaama, io, vei iko, kei ira talega na nomu kawa; mo taukena na vanua ko sa tiko vulagi kina, ka solia vei Eparaama na Kalou. 5A sa talai Jekope yani ko Aisake: a sa lako ki Petani-erama, kivei Lepani, na luve i Pecueli na kai Siria, na gane i Repeka, na tina i Jekope kei Iso.

6Ia sa kunea ko Iso ni sa vosavakalougatataki Jekope ko Aisake, a sa talai koya ki Petani-erama, ka me kauta maikina e dua na watina; ia ni sa vosavakalougatataka, sa vakarota, ka vaka, Mo kakua ni vakawati kei na dua na goneyalewa ni Kenani; 7ia sa vakarorogo talega ko Jekope vei tamana kei tinana, a sa lako ki Petani-erama; 8ka sa kunea ko Iso ni sa sega ni vinakata na goneyalewa ni Kenani ko Aisake na tamana; 9sa qai lako ko Iso kivei Isimeli, a sa vakaikuritaka na watina sa tiko vua, ni sa tauri Meelaci, na gane i Nepeioci, me watina, ko koya na luve i Isimeli, na luve i Eparaama.

10A sa lako tani mai Pieri-sepa ko Jekope, ka lako vaka ki Karana. 11A sa donuya e dua na yasana, a sa moce kina, ni sa dromu na mata-ni-siga: a sa taura e dua na vatu e na yasana ko ya, ka tauca me nona kali, a sa koto sobu e na yasana ko ya. 12A sa tadra, ka raica, e dua nai kabakaba sa tu e vuravura, a sa yacovi lomalagi na muana: ka raica, sa kaba cake ka kevu sobu tiko kina ko ira na agilose ni Kalou: 13Ka, raica, sa tu mai muana ko Jiova, a sa kaya, Koi au ko Jiova na Kalou i Eparaama na tamamu, kei na Kalou i Aisake: a vanua ko sa koto kina ka'u na solia vei iko, kei ira na nomu kawa; 14ia na nomu kawa ena vaka na kuvu ni qele; ia ko na tete yani vaka ki ra, ka vaka ki na tu-i-cake, ka vaka ki na tokalau, ka vaka ki na ceva; ia ena kalougata vei iko kei na nomu kawa na veimataqali kecega e vuravura: 15Ka, raica, ka'u na tiko vata kei iko, ka vakabulai iko e na nomu i lakolako kecega, au na vakalesui iko talega ki na vanua oqo; ni'u na sega ni biuti iko, ka me'u cakava mada vei iko na ka ka'u a vosa kina vei iko.

16A sa yadra mai na nona moce ko Jekope, ka sa kaya, Sa tiko vakaidina ko Jiova e na yasana oqo, ia ka'u a sega ni kila. 17A sa rere ko koya, a sa kaya, A kena rerevaki na tikina oqo! sa sega ni ka tani oqo, a vale ga ni Kalou, kei na matamata-ni-koro kei lomalagi oqo. 18A sa sou e na mataka ko Jekope, a sa taura na vatu ka tauca oti me nona kali, a sa vakaduria me duru, a sa livia na waiwai ki delana: 19a sa vakatoka na yaca ni tikina ko ya ko Peceli [A vale ni Kalou]: ia na yaca ni koro ko ya eliu ko Lusa. 20A sa bubului ko Jekope, ka kaya, Kevaka sa na tiko vata kei au na Kalou, ka vakabulai au e na sala oqo ka'u sa lako kina, ka solia vei au na kakana me'u kania, kei nai sulu me'u vakaisulu kina, 21ka'u sa lesu vakavinaka tale kina ki na vale i tamaqu; ena qai noqu Kalou ko Jiova: 22ia na vatu oqo, ka'u sa vakaduria me duru, sa na vale ni Kalou: ia na ka kecega ko sa solia vei au, au na solia vakaidina na kenai katini vei kemuni.

Currently Selected:

NAI VAKATEKIVU 28: FOV

Highlight

Copy