2 TUI 9
9
Sa buli me tui Isireli ko Jeu, a sa yaviti rau na tui Isireli kei na tui Juta ko koya, 1-29. Sa biu sobu ko Jesepeli mai na katuba e cake, a sa buturaki, 30-37.
1A sa kaciva e dua vei ira na luvedra na parofita ko Ilaisa, ka kaya vua, Mo vauca na tolomu, ka kauta na tavaya waiwai oqo e ligamu, ka lako ki Remoci-kiliati: 2ia ni ko sa yaco kina, mo qarai Jeu maikea, o koya na luve i Jiosafati na luve i Nimesai, ia mo curu, ka kaya me tu cake ko koya e na kedratou maliwa na wekana, ia mo qai kauti koya ki loqi; 3mo qai taura na tavaya waiwai, ka livia ki na uluna, ka kaya, Sa kaya vakaoqo ko Jiova, Au sa lumuti iko mo tui Isireli. Mo qai dolava na katuba, ka dro, ka kua ni wawa. 4A sa lako yani ki Remoci-kiliati na cauravou, io na parofita cauravou.
5Ia ni sa yaco kina ko koya, raica, eratou sa tiko ko iratou na kapiteni ni valu; a sa kaya ko koya, Sa dua na noqu vosa vei iko, na kapiteni ni valu. A sa kaya ko Jeu, Vei cei vei keitou kecega? A sa kaya ko koya, Vei iko, na kapiteni ni valu. 6A sa tu cake ko koya, ka la'ki curu ki vale: a sa livia ko koya na waiwai ki na uluna, a sa kaya vua, Sa kaya vakaoqo ko Jiova na nodra Kalou na Isireli, Au sa lumuti iko mo nodra tui na tamata i Jiova, io, mo nodra tui na Isireli. 7Ia ko na mokuta na mataqali i Eapi na nomu turaga, ka me'u cudruvaka vei Jesepeli na kedra dra na noqu i talatala na parofita, kei na kedra dra nai talatala kecega i Jiova. 8Ia ena rusa kecega na mataqali i Eapi; ia ka'u na muduka vei Eapi na tagane kecega, io, ko koya sa sogolati kei koya sa lako voli e Isireli: 9ia ka'u na cakava na mataqali i Eapi me tautauvata kei na mataqali i Jeropoami na luve i Nipati, ka tautauvata kei na mataqali i Pasa na luve i Eaija. 10Ia na koli ena kania na yago i Jesepeli, e na tiki ni vanua mai Jesirieli, ka na sega e dua me buluta. Sa qai dolava na katuba ko koya, ka dro.
11A sa curu yani ko Jeu vei ira na tamata ni nona turaga: ka sa tarogi koya e dua, Sa vinaka beka? a cava e lako mai kina vei iko na lialia ko ya? A sa kaya vei ira ko koya, Dou sa kila na tamata, kei na ka sa tukuna. 12A ra sa kaya, E lasu; mo tukuna mada mai vei keitou. A sa kaya ko koya, Sa vosa vakaoqo vei au ko koya, Sa kaya vakaoqo ko Jiova, Au sa lumuti iko mo tui Isireli. 13Era sa qai kusarawa, ka dui taura yadua na nonai sulu, ka tevuka me tiko kina ko koya e cake e nai cabecabe, a ra sa uvu davui, ka kaya, Sa tui ko Jeu. 14A sa bukiveretaki Jorami ko Jeu, na luve i Jiosafati na luve i Nimesai. (Ia sa vakatawai Remoci-kiliati tiko ko Jorami, o koya kei ira kecega na Isireli, e na vuku i Eseeli na tui Siria. 15A sa lesu ko Jorami na tui me vakabulai e Jesirieli mai na vue sa vuetaki koya kina ko ira na kai Siria, ni sa veivala ko koya kei Eseeli na tui Siria.) A sa kaya ko Jeu, Kevaka sa lomamudou oqo, me kakua ni dro e dua mai na koro me la'ki tukuna mai Jesirieli. 16A sa vodo e na qiqi vakaturaga ko Jeu, ka lako ki Jesirieli, ni sa koto maikeri ko Jorami. A sa lako sobu mai me raici Jorami ko Easaia na tui Juta. 17A sa tu nai vakatawa e na dela ni vale-cecere mai Jesirieli, a sa kunea nai vavakoso i Jeu ni sa lako tiko mai, a sa kaya, Au sa raica e dua nai vavakoso. A sa kaya ko Jorami, Me talai mada e dua na tamata sa dauvodo ose, me tavaki ira, ka me taroga, Sa vinaka beka? 18A sa lako ko koya sa vodo ose me tavaki koya, a sa kaya, Sa taroga vakaoqo na tui, Sa vinaka beka? A sa kaya ko Jeu, A cava me nomu kina na vinaka? mo lako ki dakuqu. A sa tukuna nai vakatawa, ka vaka, Sa yaco vei ira ko koya ka talai, a sa sega ni lesu tale mai. 19A sa tala e dua tale sa vodo ose, a sa yaco vei ira, ka kaya, Sa taroga vakaoqo na tui, Sa vinaka beka? A sa kaya ko Jeu, A cava me nomu kina na vinaka? mo lako ki dakuqu. 20A sa tukuna nai vakatawa, ka kaya, Sa yaco vei ira ko koya, ka sega ni lesu tale mai: ia na nona vakacici ose sa vaka na nona vakacici ose ko Jeu na mokubui i Nimesai; ni sa lako vakatotolo sara. 21A sa kaya ko Jorami, Dou vakarau; a ra sa vakarautaka na nona qiqi-ni valu. A rau sa dui lako yani e nona qiqi-ni-valu ko Jorami na tui Isireli, kei Easaia na tui Juta, me rau la'ki tavaki Jeu; a rau sa tavaki koya e na yasana nei Nepoci na kai Jesirieli.
22Ia ni sa raici Jeu ko Jorami, sa kaya, Sa vinaka beka, Jeu? A sa kaya ko koya, A cava mo vinaka kina, ni sa vuqa sara na dautagane i Jesepeli na tinamu, kei na nonai valavala vakatevoro? 23A sa vuki yani ko Jorami, ka dro, ka kaya vei Easaia, Sa dua na vere, Easaia. 24A sa taura na dakai e ligana ko Jeu, ka vanai Jorami e na macawa ni tabana, a sa lauta na utona na gasau, ka basika sara yani, a sa bale ko koya e loma ni nona qiqi-ni-valu. 25Sa qai kaya ko koya vei Pitika na nona turaga ni valu, Mo laveta cake; ka mo biuti koya ki na tiki ni vanua nei Nepoci na kai Jesirieli; mo nanuma ni sa lewa ko Jiova me yaco vua na ka levu oqo, ni daru a vodo lako vata tiko ka muri Eapi na tamana; 26ni sa kaya ko Jiova, Au a kunea vakaidina e na noa na dra i Nepoci, kei na kedratou dra na luvena; ia ka'u na sauma vei iko e na tikina oqo, sa kaya ko Jiova. Ia oqo, mo laveta cake, ka mo biuti koya ki na tikina ko ya me vaka na vosa i Jiova.
27Ia ni sa raica oqo ko Easaia na tui Juta, sa dro ko koya e na sala ni vale ka tu e na were. A sa cicimuri koya ko Jeu, ka kaya, Dou mokuti koya talega e na qiqi-ni-valu. A ra sa kitaka e na sala sa lako cake ki Kuri, ko ya sa voleka ki Ipiliami: a sa dro ko koya ki Mikito, ka mate kina. 28A sa kauti koya ki Jerusalemi ko ira na nona tamata, e na qiqi-ni-valu, ka buluti koya vata kei ira na nona qase e nonai bulubulu mai na koro i Tevita. 29Ia e na kenai katinikadua ni yabaki i Jorami na luve i Eapi, sa tekivu me lewa mai Juta ko Easaia.
30Ia ni sa lako ki Jesirieli ko Jeu, sa rogoca ko Jesepeli, a sa qumuta ruarua na matana ko koya, ka vakaiukuukutaka na uluna, ka iro mai na katuba e cake. 31Ia ni sa curu tiko e na matamata-ni-koro ko Jeu, sa kaya ko koya, Sa vinaka li Simirai, ko iko sa vakamatea na nomu turaga? 32A sa ta cake vaka ki na katuba e cake, a sa kaya, Ko cei sa totaki au? ko cei? A sa irovi koya e le rua se le tolu na matanivanua. 33A sa kaya ko koya, Dou biuti koya sobu. A ra sa biuti koya sobu: a sa sikacake na nona dra ki na bai, ki na ose talega: a sa butubutuki koya ko koya. 34A sa curu ko koya, ka kana ka gunu, a sa kaya, Dou la'ki raica na yalewa oqo sa vu ni ca levu, ka buluta; ni sa luve ni tui ko koya. 35A ra sa la'ki buluta: a ra sa kunea walega eso na tikina, na nona qavokavoka, kei na yavana, kei na qeteqete ni ligana. 36A ra sa lesu tale, ka tukuna vua. A sa kaya ko koya, Oqo na vosa i Jiova, ka vosataka ko koya e na gusu i Ilaija na kai Tisipa na nonai talatala, ni sa kaya, Ena kania na lewe i Jesepeli ko ira na koli e na tiki ni vanua mai Jesirieli: 37ia na yago i Jesepeli ena vaka na de ni manumanu e na dela ni vanua, e na tikina mai Jesirieli; era na sega ni kaya rawa kina Oqo ko Jesepeli.
Currently Selected:
2 TUI 9: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
