2 TUI 8
8
Sa vakasuka vua na yalewa ni Sunemi ko koya na tui na nona vanua, 1-6. Sa vakamatea na tui Siria ko Esaeli, ka qai tui ko koya, 7-15. Sa tui Juta ko Jiorami, 16-19. Sa vuki ko Lipina kei Itomi, 20-24. Sa tui Juta ko Easaia, 25-29.
1A sa kaya ko Ilaisa vua na yalewa ka vakabula na luvena ko koya, Mo ia, ka mo dou lako kei ira na nomu lewe-ni-vale, ka la'ki tiko vulagi e na dua na vanua ko sa tiko vulagi rawa kina: ni sa vakayacora na dausiga ko Jiova; ka na dausiga na vanua ka yabaki vitu. 2A sa cavu tu na yalewa, ka sa muria na nona vosa na tamata ni Kalou: a sa lako yani ko koya kei iratou na nona lewe-ni-vale, ka tiko vulagi e na nodra vanua na kai Filisitia ka yabaki vitu.
3Ia ni sa oti e vitu na yabaki, sa qai lesu mai na yalewa mai na nodra vanua na kai Filisitia, ka la'ki tagi vua na tui e na vuku ni nona vale kei na nona vanua. 4A rau sa veivosaki tiko na tui kei Kiesai na nona cauravou na tamata ni Kalou, a sa kaya, Mo tukuna mada mai vei au na ka levu kecega ka cakava ko Ilaisa. 5Ia ni sa tukuna tiko vua na tui ni ka vakabula ko koya e dua sa mate, sa qai lako mai na yalewa, o koya ka vakabula na luvena ko koya, ka mai tagi vua na tui e na vuku ni nona vale kei na nona vanua. A sa kaya ko Kiesai, Kemuni na noqu turaga na tui, oqo na yalewa, oqo talega na luvena ka vakabula ko Ilaisa. 6A sa taroga na yalewa na tui, a sa tukuna vua ko koya. A sa lesia vua e dua na ovisa ko koya na tui, ka kaya, Mo vakasuka na nona ka kecega, kei na vua ni nona vanua kecega mai na siga ka lako tani kina e na vanua, ka yacova na siga oqo.
7A sa lako ki Tamasiko ko Ilaisa; a sa tauvi mate ko Peni-etati na tui Siria; a sa tukuni vua, ka vaka, Sa lako mai ki ke ko koya na tamata ni Kalou. 8A sa kaya vei Eseeli na tui, Mo kauta mada e dua na ka-ni-loloma, ka la'ki tavaki koya na tamata ni Kalou, ka tarogi Jiova vua, ka kaya, Au na bula tale mai na mate oqo, se segai? 9A sa la'ki tavaki koya ko Eseeli, ka kauta e dua na ka-ni-loloma, io na ka eso mai na ka vinaka kecega e Tamasiko, e colata rawa na kameli e vasagavulu, ka la'ki tu e matana, ka kaya, Sa talai au vei iko na luvemu na tui Siria ko Peni-etati, me'u kaya, Au na bula tale mai na mate oqo, se segai? 10A sa kaya vua ko Ilaisa, Mo la'ki kaya vua, E rawa ga mo bula: ia sa vakatakila vei au ko Jiova, ni na mate vakaidina ko koya. 11A sa vakaraici koya matua sara vakadede ka qai madua; a sa tagi ko koya na tamata ni Kalou. 12A sa kaya ko Eseeli, A cava ko sa tagi kina na noqu turaga? A sa kaya ko koya, Ni'u sa kila na ka ca ko na cakava vei ira na Isireli: a nodra veikoro vakabai, ko na vakama, kei ira na nodra cauravou ko na vakamatea e nai seleiwau, kei ira na nodra gone lalai ko na botobotolaki ira vakalalai, ka tavai ira na nodra yalewa era sa bukete tu. 13A sa kaya ko Eseeli, Au sa koli beka koi au na nomu tamata, me'u kitaka na ka levu oqo? A sa kaya ko Ilaisa, Sa vakatakila vei au ko Jiova ni ko na tui Siria. 14Sa qai lako tani vei Ilaisa ko koya, ka lako vua na nona turaga; a sa kaya vua ko koya, A cava sa kaya vei iko ko Ilaisa? A sa kaya ko koya, Sa kaya vei au ni ko na bula vakaidina. 15Ia e na mataka, sa kauta ko koya nai tutuvi, ka tonisua e na wai, ka tevuka ki na matana, a sa mate kina: a sa tui ko Eseeli, me kenai sosomi.
16Ia e na kenai kalima ni yabaki i Jorami na tui Isireli, na luve i Eapi, ni sa tui Juta ko Jiosafati, sa tekivu me lewa ko Jiorami na luve i Jiosafati na tui Juta. 17Sa tolusagavulu ka rua na nona yabaki ni sa buli me tui; a sa tui tiko mai Jerusalemi ka yabaki walu. 18A sa muria ko koya na nodra i valavala na tui Isireli, me vaka sa cakava na mataqali i Eapi: ni sa watina na luve i Eapi: a sa daucaka ca ko koya e na mata i Jiova. 19Ia sa sega ni via vakawabokotaki ira na Juta ko Jiova, e na vuku i Tevita na nonai talatala, me vaka ka kaya vua me solia tikoga vua na cina, vei ira talega na luvena.
20E na nona gauna sa bese ni qaravi ira tiko na Juta ko ira na Itomi, ka bulia e dua tani me nodra tui. 21A sa lako yani ko Jorami ki Sea, ka lako vata kaya na qiqi-ni-valu kecega: a sa tu cake ko koya e na bogi, ka mokuti ira na kai Itomi era sa vakavolivoliti koya, kei ira na kapiteni ni qiqi-ni-valu: a ra sa dui dro ko ira na tamata ki nona vale laca. 22Ia sa bese tiko ni qaravi ira na Juta ko ira na Itomi, ka yacova na gauna oqo. A sa vuki talega ko ira na kai Lipina e na gauna ko ya.
23Ia na kena vo ni cakacaka i Jorami, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta? 24A sa moce vata ko Jorami kei ira na nona qase, ka sa bulu vata kei ira na nona qase e na koro i Tevita: a sa tui ko Easaia na luvena, me kenai sosomi.
25E na kenai katinikarua ni yabaki i Jorami na tui Isireli, na luve i Eapi, sa qai tekivu me lewa ko Easaia na luve i Jiorami na tui Juta. 26E ruasagavulu ka rua na nona yabaki ko Easaia ni sa buli me tui: a sa tui mai Jerusalemi ka yabaki dua. Ia na yaca i tinana ko Acalaia na luve i Omirai na tui Isireli. 27A sa muria nai valavala ni mataqali i Eapi ko koya, ka daucaka ca e na mata i Jiova, me vaka na mataqali i Eapi: ni sa veivugoni ko koya kei na vuvale i Eapi. 28A rau a lako kei Jorami na luve i Eapi ki nai valu kei Eseeli na tui Siria mai Remoci-kiliati; a ra sa vuetaki Jorami na kai Siria. 29A sa lesu tale ki Jesirieli ko Jorami na tui, me bula mai na vue era a vuetaki koya kina mai Rama ko ira na kai Siria, ni rau a veivala kei Eseeli na tui Siria. Ia ko Easaia na luve i Jiorami na tui Juta, sa lako sobu me raici Jorami na luve i Eapi mai Jesirieli, ni sa vuetaki tu ko koya.
Currently Selected:
2 TUI 8: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
