2 TUI 4
4
A ka mana eso ka cakava ko Ilaisa.
1Sa dua na yalewa sa vakawati kei na dua vei ira na luve ni parofita, a sa mai tagi vei Ilaisa, ka kaya, Sa mate na nomu tamata na watiqu; ia ko sa kila ni sa rerevaki Jiova ko koya na nomu tamata: a sa lako mai na tamata ka'u sa sega ni sauma rawa vua na noqu dinau, ka me kauta na luvequ tagane ruarua me rau bobula. 2A sa kaya vua ko Ilaisa, A cava me'u cakava vei iko? tukuna mai vei au, se cava sa tu vei iko mai vale? A sa kaya ko koya, Sa sega ni tu vei au na nomu vada e dua na ka e vale, e dua ga na tavaya waiwai. 3A sa kaya ko koya, Mo la'ki kerea mada na saqa lala eso maivei ira kecega na kai nomu; me kakua ni vica walega: 4ia ni ko sa curu, mo sogota na katuba mo dou sogolati kei rau na luvemu, ka livia yani ki na saqa kecega oqori, ia me tu yani ko ya sa sinai. 5A sa lako tani vua na yalewa, a sa sogota na katuba, me sogotubutaki vata kei rau na luvena; erau sa kauta vua na saqa; a sa livia kina ko koya. 6Ia ni sa sinai na saqa, sa kaya vua na luvena ko koya, Mo kauta mai vei au e dua tale na saqa. A sa kaya vua ko koya, Sa sega tale na saqa e vo. Sa qai mudu na waiwai. 7A sa lako ko koya, ka tukuna vua na tamata ni Kalou; a sa kaya ko koya, Mo lako, mo volitaka na waiwai, ka sauma na nomu dinau; dou qai bula kei rau na luvemu e na kena ka vo.
8A sa dua na siga sa lako yani kina ko Ilaisa ki Sunemi, a sa tiko maikea e dua na marama vutuniyau; a sa cikevi koya ko koya me kana. Ia e na veisiga sa lako tu kina ko koya, sa daucuru ki nona vale me kana.
9A sa kaya vua na watina ko koya na marama, Raica, au sa kila sa tamata yalosavasava ni Kalou ko koya sa daulako tiko oqo: 10me daru tara mada e dua na loqi lailai e cake, e na dela ni bai vatu, ka kauta kina e dua na nonai mocemoce, ka dua na tepeli, ka dua nai tikotiko, ka dua nai tutu-ni-cina: ia ni sa lako mai vei kedaru, me qai curu kina ko koya. 11Ia sa dua na siga sa lako kina ki kea ko koya, a sa curu ki na loqi e cake, ka koto kina. 12A sa kaya vei Kiesai na nona cauravou, Mo kaciva mada na marama ni Sunemi oqo. A sa kaciva, ka sa mai tu ko koya e matana. 13Sa qai vaka, Mo kaya mada vua na marama, Raica, ko sa oga vakalevu vei keirau e na oga kecega oqo: a cava na ka me caka vei iko? e vinaka li me'u cavuti iko vua na tui? se vua na kapiteni ni valu? A sa kaya ko koya, Au sa tiko e na kedra maliwa na kai noqu. 14A sa kaya ko koya, A cava beka me caka vua? A sa kaya ko Kiesai, Sa sega dina na luvena, a sa qase mai na watina. 15A sa kaya ko koya, Mo tei kacivi koya mada. A sa kaciva ko koya, ka sa mai tu na marama mai katuba. 16A sa kaya ko koya, E na gauna vakaoqo, e na yabaki kadua, ko na mokota e dua na luvemu tagane. A sa kaya ko koya, Ni kakua mada noqu turaga, na tamata ni Kalou; ni kakua ni lasu vei au na nomuni vada. 17A sa kunekune na marama, ka vakasucuma na gonetagane e na yabaki kadua, e na gauna ka kaya kina vua ko Ilaisa.
18Ia ni sa tubu me levu na gone, sa lako yani e na dua na siga vei tamana, kivei ira na tamata era tamusuki sila. 19A sa kaya vei tamana, Isa! Na uluqu, na uluqu! A sa kaya ko koya vua na cauravou, Mo kauti koya mada vei tinana. 20A sa keveta cake ko koya, ka kauta vei tinana, a sa tenea ko koya, ka sigalevuvaka, a sa qai mate: 21a sa lako cake ko koya, ka kotori koya e na nonai mocemoce na tamata ni Kalou, ka sogolati koya, ka lako tani. 22A sa kaci vua na watina, ka kaya, Mo tala mai vei au e dua vei ira na cauravou, ka dua na asa, me'u vakatotolo vua na tamata ni Kalou, ka lako tale mai. 23A sa kaya ko koya, A cava ko via lako kina vua edaidai? sa sega ni vula vou, se siga ni vakacecegu. A sa kaya ko koya, Ena vinaka ga. 24Sa vauca talega nai vodovodo ki na asa, a sa kaya vua na nona cauravou, Mo vakacici asa, ka lako sara: mo kakua ni vakaberabera e na vukuqu, kevaka ka'u sa sega ni kaya vei iko. 25A sa lako yani ko koya, ka yaco vua na tamata ni Kalou mai na ulu-ni-vanua ko Kameli. Ia ni sa kunei koya na tamata ni Kalou, ni sa tiko vakayawa, sa kaya ko koya vei Kiesai na nona cauravou, Raica, ko ya na marama ni Sunemi: 26mo cici mada, mo tavaki koya, ka kaya vua, O sa bau vinaka? sa bau vinaka na watimu? sa bau vinaka na gone? A sa kaya ko koya, Sa vinaka. 27Ia ni sa yaco vua na tamata ni Kalou ko koya na marama ki na ulu-ni-vanua, sa mokota na yavana. A sa toro ko Kiesai, me biliga tani. A sa kaya na tamata ni Kalou, Mo laiva ga; ni sa rarawa na yalona, a sa vunia vei au ko Jiova, ka sega ni tukuna vei au. 28A sa kaya na marama, Au a kerea li vei iko na noqu turaga e dua na gone? au sa sega beka ni kaya, Mo kakua ni vakaisini au? 29Sa qai kaya vei Kiesai ko koya, Mo vauca na tolomu, ka kauta na noqu i titoko e ligamu, ka lako yani: kevaka drau sota kaya e dua na tamata, mo kakua ni veikidavaki kaya; ia kevaka sa veikidavaki kei iko, mo kakua ni vosa vua: ia mo la'ki vakotora na noqu i titoko e na mata ni gone. 30A sa kaya na tina ni gone, Me vaka sa bula ko Jiova, ka me vaka sa bula na yalomu, ka'u na sega ni lako tani vei iko. A sa cavu tu ko koya, ka muri koya. 31A sa lako yani ko Kiesai, ka liu vei iratou, ka vakotora nai titoko e na mata ni gone; a sa sega ni vosa, se rogo rawa. A sa lesu tale me tavaki koya, a sa tukuna vua, ka kaya, Sa sega ni yadra na gone. 32A sa yaco ki na vale ko Ilaisa, ka raica, sa mate no na gone, ka sa koto e na nonai mocemoce. 33Sa curu kina ko koya, ka sogolati rau e loma, a sa vakamamasu vei Jiova. 34A sa lako cake, ka davo e dela ni gone, na gusuna ki na gusu ni gone, kei na matana ki na mata ni gone, kei na qeteqete ni ligana ki na qeteqete ni liga ni gone: a sa davo e delana; a sa katakata mai na lewe ni gone. 35A sa curu, ka veilakoyaki e loma ni vale vakadua; a sa baci lako cake, ka cuva tale e delana: a sa suru vakavitu na gone, a sa rai na gone. 36A sa kacivi Kiesai ko koya, ka kaya, Mo kaciva na marama ni Sunemi oqo. A sa kacivi koya. Ia ni sa curu mai, sa kaya ko koya, Mo keveta cake na luvemu. 37A sa lako ko koya, ka cuva sobu sara ki na yavana, ka qai keveta cake na luvena, ka curu yani.
38A sa lesu tale ki Kilikali ko Ilaisa: a sa dausiga na vanua; a ra sa tiko vata kaya ko ira na luvedra na parofita: a sa kaya ko koya vua na nona cauravou, Me toka mada na kuro levu, ka vakaririga na rourou me kedra na luvedra na parofita. 39A sa lako yani e dua ki na were, me minika na rourou, a sa kunea e dua na wa sa tubu wale, ka vetia maikina eso na timo ni veikau, ka vakasinaita kina na nonai sulu, a sa lako mai ka roverovea ki loma ni kuro ni rourou: ni ra sa sega ni kila na ka ko ya. 40A ra sa sova yani, me ra kania ko ira na tamata. Ia ni ra sa kania tiko na rourou, era sa qoqolou, ka kaya, Isa! na tamata ni Kalou, sa gaga na lewe ni kuro. A ra sa sega ni kania rawa. 41A sa kaya ko koya, Dou kauta mai na madrai droka. A sa biuta ko koya ki loma ni kuro, a sa kaya ko koya, Dou sova yani vei ira na tamata, me ra kania. A sa qai sega tale ni gaga na lewe ni kuro.
42A sa lako mai e dua na tamata mai Peali-salisa, a sa kauta mai vua na tamata ni Kalou na madrai nai sevu, e ruasagavulu nai buli madrai parile, kei na sola ni sila kei na qana. A sa kaya ko koya, Solia vei ira na tamata, me ra kania. 43A sa kaya na tamata sa qaravi koya, Sa vakaevei, me'u tauca li na ka oqo vei ira na tamata e le dua na drau? A sa kaya ko koya, Mo tauca ga vei ira na tamata me ra kana: ni sa kaya vakaoqo ko Jiova, Era na kana, ka na vo tiko. 44A sa tauca ko koya e matadra, a ra sa kana, ka sa vo tiko, me vaka na vosa i Jiova.
Currently Selected:
2 TUI 4: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
