2 TUI 3
3
Sa to vata ko iratou na tui Isireli, kei na tui Juta, kei na tui Itomi, me ratou vala kei ira na Moapi.
1Ia sa tekivu me lewa vei ira na Isireli mai Samaria ko Jiorami na luve i Eapi, e na kenai katinikawalu ni yabaki i Jiosafati na tui Juta, a sa lewa tiko ka yabaki tinikarua. 2A sa daucaka ca e na mata i Jiova; ia ka sega ni vakataki tamana kei tinana: ni sa biuta tani na matakau i Peali ka cakava ko tamana. 3Ia sa kabita ga nai valavala ca i Jeropoami na luve i Nipati, o koya ka vakaivalavalacataki ira na Isireli; sa sega ni biuta tani ko koya.
4Ia sai taukei ni sipi ko Mesa na tui Moapi, a sa daukauta vua na tui Isireli e tini na oba na lami, ka tini na oba na sipi tagane, kei na vutikadra. 5Ia ni sa mate ko Eapi, sa qai bese ni qarava tiko na tui Isireli ko koya na tui Moapi.
6A sa lako tani mai Samaria e na gauna ko ya ko Jiorami na tui, ka soqoni ira kecega na Isireli. 7A sa lako ko koya ka talaki vei Jiosafati na tui Juta, ka kaya, Sa bese ni qaravi au tiko na tui Moapi: ko na lako vata beka kei au me veivala kei ira na Moapi? A sa kaya ko koya, Au na lako cake: edaru sa dua vata ga; sa vakataki ira na nomu tamata ko ira na noqu tamata; sa vakataki ira na nomu ose na noqu ose. 8A sa kaya ko koya, A sala cava eda na lako cake kina? A sa kaya ko koya, A sala mai na veikau mai Itomi. 9A sa lako yani na tui Isireli, kei na tui Juta, kei na tui Itomi: a ra sa lako voli e na sala ka bogi vitu: ia sa sega na medra wai nai valu, se na medra wai na manumanu ka muri ira.
10A sa kaya na tui Isireli, Isa! ni sa kacivi iratou vata ko Jiova na tui tolutolu oqo, me soli iratou ki na ligadra na Moapi! 11A sa kaya ko Jiosafati, Sa sega beka eke e dua na parofita i Jiova, me datou tarogi Jiova kina? A sa vosa e dua vei ira na nona tamata na tui Isireli, ka kaya, Sa tiko eke ko Ilaisa na luve i Safati, o koya ka daulivi wai ki na liga i Ilaija. 12A sa kaya ko Jiosafati, Sa tiko kaya na vosa i Jiova. A ratou sa lako sobu vua ko iratou na tui Isireli, kei Jiosafati, kei na tui Itomi. 13A sa kaya vua na tui Isireli ko Ilaisa, A cava vei kedaru? mo lako yani vei ira na parofita i tamamu, kei ira na parofita i tinamu. A sa kaya vei koya na tui Isireli, Me kakua mada; ni sa kacivi iratou vata ko Jiova na tui tolutolu oqo, me soli iratou ki na ligadra na Moapi. 14A sa kaya ko Ilaisa, Me vaka sa bula ko Jiova ni lewe vuqa, o koya ka'u sa tu e matana, kevaka ka'u sa sega ni dokai Jiosafati na tui Juta, au sa sega ni gole vei iko, se raici iko; 15ia oqo, dou kauta mai vei au e dua na dauqiriqiri. Ia ni sa qiriqiri tiko na dauqiriqiri, sa yaco vei koya na liga i Jiova; 16a sa kaya ko koya, Sa vosa vakaoqo ko Jiova, Mo kelia nai keli e vuqa e na buca oqo: 17ni sa kaya vakaoqo ko Jiova, Dou na sega ni raica e dua na cagi, dou na sega talega ni raica na uca; ia ena sinai ga e na wai na buca ko ya, mo dou gunu kina, oi kemudou, kei na nomudou manumanu laukana, kei na nomudou manumanu daucolai yaya. 18Ia sa ka lailai wale oqo vei Jiova: ena soli ira talega na Moapi ko koya ki na ligamudou: 19ia dou na samuta na koro vakabai kecega, kei na koro vinaka kecega, ka taya sobu na kau vinaka kecega, ka vakasosoga na mata ni wai kecega, ka vakacacana kecega na tiki ni vanua vinaka e na veivatu.
20Ia e na mataka, ni sa vakacabori tiko nai madrali laukana, raica sa drodro mai na wai e na sala mai Itomi, a sa luvu na vanua e na wai. 21Ia ni ra sa rogoca ko ira kecega na Moapi, ni ratou sa lako cake na tui me veivala kei ira, era sa soqoni vata ko ira kecega sa vauca rawa nai sulu ni valu, kei ira sa levu cake, a ra sa la'ki tu e nai yalayala. 22A ra sa sou e na mataka, a sa cilava na wai na mata-ni-siga, a ra sa raica na wai ko ira na Moapi ka donui ira, a sa damudamu me vaka na dra: 23a ra sa kaya, Oqori na dra: sa moku vakaidina ko iratou na tui, ia era sa veiraravui vakataki ira: ia oqo, tou ia ki nai toki ni valu, oi keda na Moapi. 24A ra sa lako ki na nodra i tikotiko ni valu na Isireli, era sa qai tu cake na Isireli ka mokuti ira na Moapi, a ra sa dro e matadra: a ra sa mokuti ira tiko na Moapi, io ki na nodra vanua. 25A ra sa basuraka na veikoro, ka dui biuta ko ira na tamata yadua na nona vatu ki na tiki ni vanua vinaka kecega, ka vakacacana; a ra sa vakasosoga kecega na mata ni wai, ka taya sobu na kau vinaka kecega: a sa vo walega mai Kiri-ereseci na kena veivatu; ia era sa lako vakavolivolita ko ira na tamata daurabo, ka rabota.
26Ia ni sa raica ko tui Moapi ni ra sa gumatua vua ko ira nai valu, sa kauta vua e le vitu na drau na tamata era vakaiseleiwau, me la'ki curu vakaukauwa yani vua na tui Itomi: a ra sa sega ni rawata. 27Sa qai taura ko koya na luvena tagane, na ulumatua, o koya me nonai sosomi na tui, a sa vakacabori koya mei soro kama e na dela ni bai vatu: a sa ka levu na cudru vei ira na Isireli: ia era sa lako tani vua, ka lesu ki na nodra vanua.
Currently Selected:
2 TUI 3: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
