2 TUI 10
10
Sa vakamatea ko Jeu na tamata sa vo e na nodrau mataqali ko Eapi kei Easaia, 1-17. Sa mokuti ira era sa qaravi Peali, 18-28. Ia sai valavala ca ga ko Jeu, 29-36.
1A sa le vitusagavulu na luvena tagane ko Eapi mai Samaria. A sa vola eso nai vola ko Jeu, ka vakauta ki Samaria, vei ira sa turaga mai Jesirieli, kei ira na qase, kei ira ka susugi ira na luve i Eapi, a sa kaya, 2Ia oqo, ni sa yaco vei kemudou nai vola oqo, ni sa tiko vei kemudou ko ira na luvena na nomudou turaga, sa tiko talega vei kemudou na qiqi-ni-valu, kei na ose, kei na koro vakabai, kei nai yaragi ni valu; 3dou qarai koya sa vinaka ka dodonu maivei ira na luvena na nomudou turaga, ka vakatikora e nai tikotiko vakaturaga i tamana, ka vala e na vuku ni nona mataqali na nomudou turaga. 4A ra sa rere vakalevu sara, ka kaya, Raica, erau sa sega ni tu rawa e matana e le rua na tui: ia eda na tu dei vakaevei? 5A ra sa talaki vei Jeu ko koya sa lewa e na vale, kei koya sa lewa e na koro, kei ira na qase, kei ira ka susugi ira na gone, a sa kaya, Keimami sa nomuni tamata, ia keimami na cakava na ka kecega ko ni na vakarota vei keimami; keimami na sega ni bulia e dua na tui: mo ni kitaka ga na ka e vinaka vei kemuni.
6Sa qai vola tale vei ira ko koya e dua nai vola, ka kaya, Kevaka dou sa totaki au, ka dou na vakarorogo ki na noqu vosa, mo dou taura na uludra na luve ni nomudou turaga, ka lako mai vei au ki Jesirieli e na mataka e na gau-ni-siga vakaoqo. Ia ko ira na luvena na tui, era sa lewe vitusagavulu na tamata, era sa tiko kei ira na turaga ni koro era a susugi ira. 7Ia ni sa yaco vei ira nai vola, era sa tauri ira na luvena na tui, era lewe vitusagavulu ka mokuti ira, ka tugana na uludra ki na sova, ka vakauta vua ki Jesirieli. 8A sa lako e dua na tamata talai, ka tukuna vua, ka kaya, Era sa kauta mai na uludra na luvena na tui. A sa kaya ko koya, Dou binia mai na matamata-ni-koro, me rua nai binibini, ka me mataka mada. 9Ia e na mataka, sa curu yani ko koya, ka la'ki tu, ka kaya vei ira kecega na tamata, Dou sa yalododonu koi kemudou: raica, ka'u a bukiveretaki koya na noqu turaga, ka mokuta: ia ko cei sa mokuti ira kecega oqo? 10Dou kila mada kina, ni na sega ni lutu ki na qele e dua na mala ni vosa i Jiova, ka vosataka ko Jiova e na vuku ni mataqali i Eapi: ni sa cakava oti ko Jiova na ka ka vosataka ko koya, e na gusu i Ilaija na nonai talatala. 11A sa mokuti ira kecega na kena vo ni mataqali i Eapi mai Jesirieli ko Jeu, kei ira kecega na nona tamata turaga, kei ira na wekana, kei ira na nona bete, ka me sega ni vo vua e dua.
12A sa cavu tu ko koya, ka lako yani, ka lako ki Samaria. Ni sa yaco ko koya ki na vale ni dauveikoti sipi sa tu e na sala, 13sa sota ko Jeu kei ira na weka i Easaia na tui Juta; a sa kaya, O cei koi kemudou? A ra sa kaya, Koi keitou na weka i Easaia; ia keitou sa lako sobu me vakacegui ira na luvena na tui kei ira na luvena na ranadi. 14A sa kaya ko koya, Dou tauri ira bula. A ra sa tauri ira bula, ka vakamatei ira mai nai keli-wai mai na vale ni dauveikoti sipi, era lewe vasagavulu ka rua na tamata, ka sega ni vakabula e dua vei ira.
15Ia ni sa lako tani maikeri ko koya, sa la'ki sota kei Jionatapi na luve i Rekapi, ni sa mai tavaki koya: a sa veikidavaki kaya, ka kaya vua, Sa dodonu na yalomu me vaka sa dodonu vei iko na yaloqu, se segai? A sa kaya ko Jionatapi, Sa vakakina. A sa kaya ko Jeu, Kevaka sa vakakina, me daru lululu. A sa lululu kaya; a sa kauti koya cake ki na qiqi-ni-turaga. 16A sa kaya ko koya, Daru lako vata, mo raica na noqu gumatua me'u totaki Jiova. A sa vakavodoki ko koya ki na qiqi-ni-turaga.
17A sa lako ki Samaria ko koya, ka mokuti ira kecega na kena vo nei Eapi mai Samaria, ka me vakaotia sara, me vaka na vosa i Jiova, ka vosataka ko koya vei Ilaija.
18A sa vakasoqoni ira vata na tamata kecega ko Jeu, a sa kaya vei ira, Sa qaravi Peali vakalailai ko Eapi; ia ena qaravi koya vakalevu ko Jeu. 19Ia oqo, dou kacivi ira kecega mai vei au na parofita i Peali, kei ira kecega na tamata sa qaravi koya, kei ira kecega na nona bete; me kakua ni yali e dua; ni sa dua nai soro levu me'u cakava vei Peali: o koya sa yali kina, ena sega ni bula. Ia sa kitaka vakailawaki ga ko Jeu, ni sa nakita me vakawabokotaki ira era qaravi Peali. 20A sa kaya ko Jeu, Dou kacivaka mada e dua na soqoni tabu e na vuku i Peali. A ra sa kacivaka. 21A sa talaki ko Jeu ki Isireli taucoko: a ra sa lako mai ko ira kecega era sa qaravi Peali, a sa sega ni vo e dua na tamata sa sega ni lako kina. A ra sa curuma na bure kalou i Peali; a sa oso na bure kalou i Peali e na veitikina kecega. 22A sa kaya ko koya vua sa lewa na vale ni sulu, Mo kauta mai nai sulu me rauti ira kecega era sa qaravi Peali. A sa kauta yani vei ira nai sulu. 23A sa la'ki curu ki na bure kalou i Peali ko Jeu, kei Jionatapi na luve i Rekapi, a sa kaya vei ira era sa qaravi Peali, Dou qara, ka vakararai de sa tiko kei kemudou eke eso era sa qaravi Jiova, me ra tiko duaduaga ko ira era sa qaravi Peali. 24Era sa qai curu me ra vakacabora nai madrali kei nai soro kama. Ia sa lesia ko Jeu me tiko e tautuba e lewe walusagavulu na tamata, ka kaya, Ke sa dro bula e dua vei ira na tamata ka'u sa kauta mai ki na ligamudou, o koya sa laivi koya me dro ena mate ko koya me kenai sau ni tamata ko ya.
25Ia ni ra sa vakacabora oti nai soro kama, sa kaya ko Jeu vei ira nai vakatawa, kei ira na turaga ni valu, Dou curu; dou mokuti ira; me kakua ni curu ki tuba e dua. A ra sa vakamatei ira e nai seleiwau; a sa biuti ira ki tuba ko ira nai vakatawa kei ira na turaga ni valu, ka qai lako yani ki na rara mai na bure kalou i Peali. 26A ra sa kauta ki tautuba na veimatakau mai na bure kalou i Peali, ka vakama. 27A ra sa basuka na matakau i Peali, ka basuka na bure kalou i Peali, ka lesia me vale ni benu, ka yacova na siga oqo.
28A sa vakarusai Peali ko Jeu maivei ira na Isireli. 29Ia sa sega ni mudu ni muria ko Jeu nai valavala ca i Jeropoami na luve i Nipati, o koya ka vakaivalavalacataki ira na Isireli, io na luve ni pulumokau koula ka tu mai Peceli kei Tani.
30A sa kaya vei Jeu ko Jiova, Ni ko sa caka vinaka ni ko sa ia na ka sa dodonu vei au, ka ni ko sa kitaka ki na mataqali i Eapi, me vaka na ka kecega ka tu e lomaqu; ena tiko na luvemu e nai tikotiko vakaturaga ni Isireli, ka yacova na kenai kava ni tabatamata. 31Ia sa sega ni nanuma ko Jeu me muria na vunau i Jiova na nodra Kalou na Isireli e na yalona taucoko; sa sega ni biuta nai valavala ca i Jeropoami, o koya ka vakaivalavalacataki ira na Isireli.
32E na gauna ko ya, sa vakatekivu kina ko Jiova me vakalailaitaki ira na Isireli: a sa mokuti ira ko Eseeli e nai yalayala kecega kei Isireli; 33mai na Joritani ka vaka ki na tu-i-cake, na vanua taucoko ko Kiliati, ko ira na Kata, kei ira na Rupeni, kei ira na Manasa, mai Aroeri, o koya sa voleka ki na uciwai ko Erinoni, io ko Kiliati kei Pasani.
34Ia na kena vo ni cakacaka i Jeu, kei na ka kecega sa cakava ko koya, kei na nona qaqa kecega, sa sega li ni volai e nai vola ni veika sa caka e na nodra gauna na tui Isireli. 35A sa moce vata kei ira na nona qase ko Jeu: a sa bulu mai Samaria. A sa tui ko Jioaasi na luvena, me kenai sosomi. 36Ia na gauna sa tui Isireli kina mai Samaria ko Jeu, sa yabaki ruasagavulu ka walu.
Currently Selected:
2 TUI 10: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
