1 TUI 20
20
Sa vala kei Samaria na tui Siria, ia sa kaukauwa ga ko Eapi.
1Ia ko Peni-etati na tui Siria, sa vakasoqoni ira vata kecega na nona mataivalu: a ra sa le tolusagavulu ka rua na tui era tiko vata kaya, kei na ose kei na qiqi-ni-valu: a sa lako cake ko koya, ka buku druadrua ki Samaria, ka vala kaya. 2A sa tala ko koya eso na tamata ki loma ni koro kivei Eapi na tui Isireli, a sa kaya vua, Sa vosa vakaoqo ko Peni-etati, 3Sa noqu na nomu siliva kei na nomu koula; a sa noqu ko iratou na watimu kei iratou na luvemu, io ko ira sa vinaka sara vei ira. 4A sa vosa ko koya na tui Isireli, ka kaya, Me sa vaka na nomu vosa, noqu turaga na tui; koi au, kei na noqu ka kecega sa nomu ga.
5A sa lako tale ko ira na tamata, ka kaya, Sa vosa vakaoqo ko Peni-etati, ka kaya, E dina ka'u a talaki vei iko, ka kaya, Mo solia mai vei au na nomu siliva, kei na nomu koula, kei iratou na watimu, kei iratou na luvemu; 6ia ka'u na tala ga vei iko na noqu tamata eso e na mataka e na gau-ni-siga vakaoqo, a ra na qara sara e na nomu vale, kei na nodra veivale na nomu tamata; ia na ka kecega sa vinaka sara vei iko, era na taura, ka ra na kauta mai. 7Sa qai kacivi ira kecega na qase ni vanua na tui Isireli, ka sa kaya vei ira, Ni kila mada, ka raica ni sa nakita na ka ca na tamata oqo; ni sa talaki vei au me nona ko iratou na watiqu, kei iratou na luvequ, kei na noqu siliva, kei na noqu koula; ia ka'u a sega ni bureitaka vua. 8Ia sa kaya vua ko ira kecega na qase, kei ira kecega na tamata, Mo kakua ni vakarorogo vua, se vakadonuya. 9A sa kaya kina ko koya vei iratou na tamata i Peni-etati, Dou kaya vua na noqu turaga na tui, A ka kecega ko a talaki kina eliu vei au na nomu tamata ka'u na cakava; ia na ka oqo au sa sega ni cakava rawa. A ratou sa lako yani na tamata, ka tukuna tale vua na vosa.
10A sa talaki vua ko Peni-etati, ka kaya, Me kitaka vakakina vei au ko ira na kalou, ka vakaikuritaka, kevaka sa levu na kuvu-ni-soso mai Samaria me ra yakuta yadua ko ira me rauti ira na tamata kecega sa muri au. 11A sa kaya na tui Isireli, Dou tukuna vua, Me kakua ni dokai koya ko koya sa vauca vua nai sulu ni valu me vakataki koya sa luvata tani. 12Ia ni sa rogoca na vosa oqo ko koya, ni sa gunu tiko ko koya kei ira na tui e na veivale vakacevaceva, sa kaya vei ira na nona tamata, Dou vakarau: a ra sa vakarau me ra kaba na koro.
13Ka raica, sa toro mai vei Eapi na tui Isireli e dua na parofita, ka kaya, Sa vosa vakaoqo ko Jiova, O sa raici ira na lewe vuqa kecega oqo, se segai? raica, ka'u na solia kece ki na ligamu edaidai: ia ko na kila kina ni sai au ko Jiova. 14A sa taroga ko Eapi, E na liga i cei? A sa kaya ko koya, Sa vosa vakaoqo ko Jiova, E na ligadra ga na cauravou ni turaga ni veiqali. A sa taroga ko koya, O cei ena lewa nai valu? A sa kaya ko koya, Ko iko ga.
15A sa soqoni ira na cauravou ni turaga ni veiqali ko koya, a ra sa le rua na drau ka tolusagavulu ka rua: ka oti sa qai wiliki ira kecega na tamata, io ko ira kecega na Isireli, a ra sa lewe vitu na udolu. 16A ra sa curu yani ni sa siga levu tutu. A sa gunu tiko ko Peni-etati, ka sa mateni e na vale vakacevaceva, o koya kei ira na tui, ko ira na tui e lewe tolusagavulu ka rua sa to vata kaya. 17A ra sa curu yani eliu na cauravou ni turaga ni veiqali; a sa talaki yani ko Peni-etati, a ra sa tukuna vua, ka kaya, Sa ra curu mai eso na tamata mai Samaria. 18A sa kaya ko koya, Kevaka era sa curu mai me ia na sautu, dou taura bula; ia kevaka era sa curu mai me ra vala, dou taura bula. 19A ra sa curu yani e na koro na cauravou ni turaga ni veiqali, kei ira nai valu era muri ira. 20A ra sa dui mokuta na tamata sa donui koya ko ira na tamata yadua: a sa dro ko ira na kai Siria, a sa cicimuri ira ko ira na Isireli; a sa dro bula ko Peni-etati na tui Siria ni sa vodo ose, kei ira vata kaya era sa dauvodo ose. 21A sa curu yani na tui Isireli, ka mokuta na ose, kei na qiqi-ni-valu, a sa mokuti ira na kai Siria e na dua na ravuravu levu.
22A sa lako mai na parofita vua na tui Isireli, ka kaya vua, Mo lako, mo vakaukauwataki iko, ka vakasama, ka lewa vinaka na ka mo cakava: ni na mai vala tale kei iko na tui Siria e na yabaki vou.
23Ia sa kaya vua na tui Siria ko ira na nona tamata, Sa kalou ni veiulu-ni-vanua na nodra veikalou; o koya era sa gumatua kina vei keda; ia me da veivala mada kei ira e na buca, eda na qai gumatua vakaidina vei ira. 24Ia mo ni cakava na ka oqo, Mo ni kauti ira tani na tui, na tamata yadua mai na nona tikina, ka lesi ira na kapiteni ni valu me kedrai sosomi: 25ia mo ni wilika e dua nai valu me tautauvata kei na nomuni matai valu sa bale, kei na ose me tautauvata kei na ose, kei na qiqi-ni-valu me tautauvata kei na qiqi-ni-valu: ia eda na veivala kei ira e na buca, eda na qai gumatua vakaidina vei ira. A sa vakarorogo ki na nodra vosa ko koya, ka kitaka vakakina.
26Ia e na yabaki vou, sa qai soqoni ira na kai Siria ko Peni-etati, ka lako cake ki Efeki, me vala kei ira na Isireli. 27A ra sa soqoni ko ira na Isireli, ka ra kauta na kedrai vaqa, ka lako yani me ra vala kei ira: a ra sa la'ki tiko e matadra ko ira na Isireli me vaka e rua na qele ni me lailai; ia ko ira na kai Siria, era sa robota na vanua.
28A sa lako mai na tamata ni Kalou, ka vosa vua na tui Isireli, ka kaya, Sa kaya vakaoqo ko Jiova, Ni ra sa kaya na kai Siria, Sa Kalou ni veiulu-ni-vanua ga ko Jiova, ka sa sega ni Kalou ni veibuca, au na qai soli ira kecega na lewe vuqa oqo ki na ligamu, ia dou na kila ni sai au ko Jiova.
29A ra sa tiko vakaivalu ka veiqaravi, ka bogi vitu. Ia e na kenai kavitu ni siga sa qai tekivu nai valu: a sa mokuti ira na kai Siria ko ira na Isireli, e le oba vakatini na tamata era sa taubale e na dua bauga na siga. 30Ia sa dro ko ira na kena vo ki Efeki, ki loma ni koro; ia e dua na bai sa baleti ira e le ruasagavulu ka vitu na udolu vei ira na tamata sa vo. A sa dro ko Peni-etati, ka curuma na koro, ka lako ki na loqi e loma ni dua na vale. 31A ra sa kaya vua ko ira na nona tamata, Raica, keitou sa rogoca oti ni ra sa dauyalololoma ko ira na nodra tui na mataqali ni Isireli: me keitou vakaisulutaki keitou mada e nai sulu taga, ka me vauci na ulu i keitou e na dali, ia keitou na curu yani vua na tui Isireli: de sa na vakabulai iko ko koya. 32A ra sa sulumaka nai sulu taga ki na tolodra, ka vauca ki na uludra na dali, ka lako yani vua na tui Isireli, ka ra sa kaya, Sa kaya ko Peni-etati na nomuni tamata, Me'u bula mada. A sa kaya ko koya, Oi, sa bula tiko li ko koya? sa wekaqu ko koya. 33Ia era sa vakarorogo vakavinaka ko ira na tamata, ka sa qara sara e dua nai vakadinadina ni sa maivei koya oqo: a ra sa kaya, Na wekamu, ko Peni-etati. A sa kaya ko koya, Dou la'ki kauti koya mai. A sa lako yani vua ko Peni-etati; a sa kaya vua ko koya me vodo ki na qiqi-ni-valu. 34A sa kaya vua ko Peni-etati, A veikoro sa kauta tani ko tamaqu maivei tamamu, ka'u na vakasuka; ia mo cakava na nomu yatu vale mai Tamasiko, me vaka ka cakava ko tamaqu mai Samaria. A sa kaya ko Eapi, Au na qai sereki iko mo lako yani ka ni sa vakabau na veiyalayalati oqo. A sa veiyalayalati kaya, ka sereki koya me lako yani.
35A sa dua na tamata vei ira na luve ni parofita, sa kaya vua na kai nona e na vosa i Jiova, Mo vakamavoataki au mada. A sa bese ni vakamavoataki koya na tamata. 36A sa kaya vua ko koya, Ni ko a sega ni muria na vosa i Jiova, raica, ni ko sa lako tani vei au, ena vakamatei iko e dua na laioni. Ia ni sa lako tani vua, sa kunei koya e dua na laioni, ka vakamatei koya. 37A sa kunea e dua na tamata tani ko koya, a sa kaya, Mo vakamavoataki au mada. A sa ia sara na tamata, ka sa vakamavoataki koya. 38A sa lako yani na parofita, ka la'ki waraka na tui e na sala, ka liatamata tani, ka tabonaka na matana e nai sala. 39Ia ni sa lako tu kina na tui, sa tagi vua na tui ko koya: ka kaya, Sa lako yani na nomuni tamata ki nai valu; ka raica, sa lako vakatikitiki e dua na tamata, ka kauta vei au e dua na tamata, ka kaya, Mo vakatawa na tamata oqo: ke sa dua na ka e yali kina, ko na mate me kenai sau, se ko na sauma e na dua na taledi siliva. 40Ia ni'u sa oga voli vaka ka vaka na nomuni tamata, raica, sa yali ko koya. A sa kaya vua na tui Isireli, Ko na lewai me vakakina; sai iko ga ka vakadinadinataka. 41A sa kusarawa ko koya, ka luvata nai sala mai na matana; ka sa qai kilai koya na tui Isireli, ni sa dua vei ira na parofita. 42A sa kaya vua ko koya, Sa vosa vakaoqo ko Jiova, Ni ko sa laiva me lako tani e ligamu na tamata ka'u sa lesia me rusa sara, sa na kenai sosomi ni nona mate na nomu mate, ka na nodra i sosomi na nona tamata ko ira na nomu tamata. 43A sa lako yani ki na nona vale na tui Isireli, a sa yalobibi ka yaloca, ka lesu ki Samaria.
Currently Selected:
1 TUI 20: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
