1 JONI 2

Ai bulubulu ni valavala ca ko Jisu, 1,2. Sa qai tukuni ko ira era sa kila na Kalou, 3-17. Me da qarauni keda mai nai vakavuvuli ca, ni da sa gumatua e na vakabauti Jisu, kei nai valavala vinaka, 18-29.

1Na luvequ lomani, au sa vola yani vei kemudou na veika oqo, mo dou kakua kina ni valavala ca. Ia kevaka sai valavala ca e dua, sa dua na noda Dautataro vei Tamada, ko Jisu Karisito, na yalododonu: 2ia sai bulubulu ni nodai valavala ca ko koya; a sa sega e na vuku ni noda walega, e na vuku talega ni nodra na kai vuravura kecega.

3Ia na ka oqo eda sa kila kina ni da sa kilai koya, kevaka eda sa muria na nona vunau. 4O koya sa kaya, Au sa kilai koya, ia ka sega ni muria na nona vunau, sa vosa lasu, a sa sega ni tu vei koya na dina. 5Ia ko koya yadua sa muria na nona vosa, sa dina sa qai levu sara na nona loloma vua na Kalou: e na ka oqo eda sa kila ni da sa tu vata kaya. 6O koya sa kaya erau sa tu vata kaya, e kilikili kaya me ia nai valavala sa vaka na nonai valavala.

7Oi kemudou na veiwekani, sa sega ni dua na vunau vou kau sa vola vei kemudou, na vunau makawa ga ka tu vei kemudou mai nai vakatekivu. A vunau makawa na vosa dou a rogoca mai nai vakatekivu. 8E dua tale, na vunau vou kau sa vola vei kemudou, ia na ka oqo sa dina vua, vei kemudou talega: ni sa qai takali na butobuto, a sa cila mai na rarama dina. 9O koya sa kaya sa tu e na rarama, ka sa cata ga na wekana, sa tu ga e na butobuto ka yacova na siga oqo. 10Sa tu e na rarama ko koya sa lomana na wekana, a sa sega vua na ka me tarabe kina. 11Ia sa tu e na butobuto ko koya sa cata na wekana, a sa ia nai valavala ni butobuto, a sa sega ni kila na vanua sa lako kina, ni sa vakabutobutotaka na matana na butobuto.

12Au sa vola vei kemudou, na luvequ lomani, ni sa bokoci na nomudou i valavala ca e na vuku ni yacana. 13Au sa vola vei kemudou, na qase, ni dou sa kilai koya sa bula mai nai vakatekivu. Au sa vola vei kemudou, na cauravou, ni dou a rawai koya na vu-ni-ca. Au sa volavola vei kemudou, na gone lomani, ni dou sa kilai koya na Tamada. 14Au a volavola vei kemudou, na qase, ni dou a kilai koya sa bula mai nai vakatekivu. Au a volavola vei kemudou, na cauravou, ni dou sa kaukauwa, a sa tu vei kemudou na vosa ni Kalou, ia dou a rawai koya na vu-ni-ca.

15Dou kakua ni lomani vuravura, se na veika sa vakavuravura. Kevaka sa lomani vuravura e dua, sa sega e na lomana na loloma vua na Tamada. 16Na ka kecega sa tu e vuravura, na gagadre ca ni yago, na gagadre ca ni mata, kei na dokadokai keda e na ka ni bula oqo, sa sega ni tubu maivei Tamada, mai vuravura ga. 17Ia ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.

18Oi kemudou na luvequ lomani, sa gauna emuri sara oqo: ia me vaka dou a rogoca ni na lako mai ko koya na meca i Karisito sa qai lewe vuqa na meca i Karisito edaidai; sai koya eda sa kila kina ni sa gauna emuri sara oqo. 19Era a lako tani vei keda ko ira oqori, ia era a sega ga ni nodai tokani; ke ra sa nodai tokani, ke ra sa tiko ga kei keda: ia era sa lako tani me ra vakaraitaki ni ra a sega ni nodai tokani ko ira kecega ko ya. 20Ia sa tu vei kemudou nai lumu mai vua na Yalosavasava, ia dou sa kila kina na ka kecega. 21Au sa sega ni volavola vei kemudou ni dou sa lecava nai vakavuvuli dina, o koya ga ni dou sa kila, ia ka sa sega sara ni tubu mai nai vakavuvuli dina na lasulasu. 22O cei na daulasu, o koya ga sa cakitaka ni sa Karisito ko Jisu? Sai koya na meca i Karisito, o koya sa cakitaka na Tamada kei na Luvena. 23O koya yadua sa cakitaka na Luvena, sa sega ni tu vua ko Tamada; ko koya sa vakatusa na Luvena sa tu talega vua ko Tamana.

24O koya oqo me qai tu dei, e na lomamudou, na ka dou a rogoca mai nai vakatekivu. Kevaka sa tu ga vei kemudou na ka dou a rogoca mai nai vakatekivu, dou na tu ga vua na Luvena, vua talega na Tamada. 25Ia oqo na ka ni yalayala sa yalataka vei keda ko koya, na bula tawa mudu. 26A veika oqo kau sa volavola kina vei kemudou e na vukudra era sa vakacalai kemudou. 27Ia sa tu vei kemudou nai lumu dou a rawata maivei koya, a sa sega ni yaga me vakavulici kemudou e dua: ia me vaka sa vakavulici kemudou e na ka kecega na nona lumuti kemudou, a sa dina ga, ka sa sega ni lasu, io me vaka sa vakatavulici kemudou, dou tu dei vakakina vei koya.

28Ia oqo, na luvequ lomani, mo dou tu dei vua; me da doudou kina, ni na rairai mai ko koya, ka me da kakua ni madua vua e na nona lako mai. 29Kevaka dou sa kila sa yalododonu ko koya, dou sa kila sa sucu vei koya ko koya yadua sa caka dodonu.

Currently Selected:

1 JONI 2: FOV

Highlight

Copy