1 JONI 1

Sa tukuni Jisu ko Joni ni sa vu ni bula, ni da sa veivinakati kei na Kalou e na vukuna, 1-10.

1Koya sa tu mai nai vakatekivu, o koya keitou a rogoca, o koya keitou a raica e na mata i keitou, o koya keitou a vakaraica sara, ia ka tara na liga i keitou, e na vuku ni Vosa ni bula; 2(ka sa vakaraitaki na vu-ni-bula, ka keitou a raica, ka dautukuna, ka vakatakila vei kemudou na vu-ni-bula tawa mudu, o koya ka tiko vata kei Tamana, ka sa qai vakaraitaki mai vei keda;) 3o koya keitou a raica ka rogoca, keitou sa tukuna vei kemudou, mo dou veiwekani kina kei keitou; ia keitou sa veiwekani kina kei na Tamada, kei na Luvena ko Jisu Karisito. 4Ia keitou sa vola na veika oqo vei kemudou, me vakayacori sara kina na nomudou marau.

5Ia oqo nai tukutuku keitou a rogoca maivei koya, a sa tukuna vei kemudou, ni sa rarama na Kalou, a sa sega sara vei koya na butobuto. 6Kevaka eda sa kaya eda sa veiwekani kaya, a sa ia nai valavala butobuto, eda sa lasu ga, ka sa sega ni kitaka na dina: 7ia kevaka eda sa ia nai valavala ni rarama, me vaka sa tu e na rarama ko koya, eda sa qai duiveiwekani vata, a sa vakasavasavataki keda mai na ca kecega na dra i Jisu Karisito na Luvena.

8Kevaka eda sa kaya sa sega ni tu vei keda na ca, eda sa vakaisini keda, a sa sega ni tu vei keda na dina. 9Kevaka eda sa vakatusa na nodai valavala ca, sa yalodina ka yalododonu ko koya me bokoca na nodai valavala ca, ka vakasavasavataki keda mai na ka kecega sa sega ni dodonu. 10Kevaka eda sa kaya eda a sega ni valavala ca, eda sa vakalasui koya, a sa sega ni tu vei keda na nona vosa.

Currently Selected:

1 JONI 1: FOV

Highlight

Copy