ማርቆሳ 4

ዜሬ ዜሪያዋ ሌሚሱዋ

(ማት 13፡1-9፤ ሉቅ 8፡4-8)

1ዬሱሲ ሺሬቲካ ጋሊላ ኣባ ማታን ታማሪሱዋ ዶሜዳ፤ ጮራ ኣሳይ ባሬ ሚዪያን ዩዪ ኣዴ ሺቂ ኡቲና፥ ኣባን ዴዒያ ዎንጊሪያ ጊዶ ጌሊዴ፥ ኣኒ ኡቴዲኖ፤ ቃሲ ሄ ኣሳይ ኡባይ ኣባ ሚዪያን ዴዔ። #ሉቅ 5፡1-3 2ኢ ኡንቱንታ ዳሮባ ሌሚሱዋን ታማሪሲዴ፥

3«ሲሲቴ፤ ኢቲ ቢታኒ ዜሬ ዜራናው ኬሴዳ። 4ኢ ዜሪሺን፥ ኢቲ ኢቲ ዜሬይ ኦጊያ ዶናን ዎዳ፤ ሄዋ ካፉ ዪዴ ሜዳ። 5ኢቲ ኢቲ ዜሬይ ኣንጮ ቢታ ቦላ ዎዳ፤ ዳሮ ቢታይ ባይና ዲራው፥ ሄ ዜሬይ ኤሌካ ሞኬዳ። 6ኣዋይ ኬሴዳ ዎዴ ሹሌዳ፤ ኣዱሳ ፃጱዋ ዬዲቤና ዲራው፥ ሜሊ ኣጌዳ። 7ኢቲ ኢቲ ዜሬይ ኣጉን ጊዶን ዎዳ፤ ሄዋን ሞኬዳዋ ኣጉንይ ዲጪዴ ጩሊና፥ ኣይፌናን ኣቴዳ። 8ኢቲ ኢቲ ዜሬይ ቱዔ ቢታን ዜሬቲዴ ሞኬዳ፤ ዲጪዴ ኢቱ ሃታሙዋ፥ ኢቱ ኡሱፑን ታሙዋ ኣይፊና፥ ኢቱ ፄቱዋ ኣይፌዳ።» 9ቃይካ ዬሱሲ፥ «ሲሳናው ሃይይ ዴዒያ ኡራይ ሲሶ» ያጌዳ።

ዬሱሲ ሌሚሱዋን ኦዴዳ ጋሱዋ

(ማት 13፡10-17፤ ሉቅ 8፡9-10)

10ታማኔ ላዑ ዬሱሳ ካሊያዋንቱኔ ኢ ኦዴዳዋ ሲሴዳ ሃራ ኣሳቱ ኢ ባሬካ ዴዒሺን ኣኮ ሺቂዴ፥ ሄ ሌሚሱዋ ቢሌ ኣ ኦቼዲኖ። 11-12ዬሱሲ ኡንቱንቱሲ፥ «ሂንቴንቶ ፆሳ ካዉቴ ፁራ ዬዉዋ ኤራይ ኢሜቴዳ፤ ሺን ሃራቱ ካዉቴፔ ካሬና ዴዒያዋንቱ፥ ፄላ ፄሊዴ ቤዔና ማላ፥ ቃሲ ሲሳ ሲሲዲካ ኣኬኬና ማላ፥ ኡንቱንቱ ሺሬቲዴ ፆሳኮ ሲሚና፥ ኢ ኡንቱንቱ ናጋራ ኣቶ ጌና ማላ፥ ኡንቱንቶ ኡባባይ ሌሚሱዋን ኦዴቴ» ያጌዳ። #ኢሳ 6፡9-10

ዜሪያዋ ሌሚሱዋ ቢሌ

(ማት 13፡18-23፤ ሉቅ 8፡11-15)

13ዬሱሲ ኡንቱንታ፥ «ሃ ሌሚሱዋ ኤሪኪቴ? ያቲና፥ ሌሚሱዋ ኡባ ዎቲ ኤራኒቴ? 14ዜሪያዌ ፆሳ ቃላ ዜሬ። 15ቃላይ ዜሬቲያ ኦጊያ ዶናን ዴዒያዋንቱ ሃዋንታ፤ ኡንቱንቱ ቃላ ሲሲያ ዎዴ፥ ሴፃናይ ኤሌካ ዪዴ፥ ኡንቱንቱ ዎዛናን ዜሬቴዳ ቃላ ኣፊዲጌዳ። 16ሃዋዳንካ ቃሲ ኣንጮቲያ ቢታን ዜሬቴዳዋንቱ ሃዋንታ፤ ኡንቱንቱ ቃላ ሲሲዴ፥ ኤሌካ ናሼቻን ኣኪኖ። 17ኡንቱንቱ ሃዒው ዴዒኖፔ ኣቲን፥ ኡንቱንቶ ሚኖ ፃጱ ባዋ፤ ጉዬፔ ቃላ ጋሱዋን ዋዪ ዎይ ዬዴርሱ ዪያ ዎዴ፥ ኡንቱንቱ ኤሌካ ቤቲ ኣጊኖ። 18ቃሲ ኣጉን ጊዶን ዜሬቴዳዋንቱ ሃዋንታ፤ ኡንቱንቱ ቃላ ሲሲያዋንታ። 19ሺን ሃ ሳዓ ዴዖ ሂርጊያዌ ዱሬቴ ዶሲያዌኔ ሃራባ ኣሞቲያዌ ኡንቱንቱ ዎዛናን ጌሊዴ፥ ቃላ ጩሊና ኣይፌናን ኣቲ ኣጌዳ። 20ሺን ቱዔ ቢታን ዜሬቴዳዋንቱ ቃላ ሲሲዴ ኣኪያዋንታ፤ ኢቱ ሃታሙዋ፥ ኢቱ ኡሱፑን ታሙዋ ኣይፊና፥ ኢቱ ፄቱዋ ኣይፌዳ» ያጌዳ።

ፆምፒያ ሌሚሱዋ

(ሉቅ 8፡16-18)

21ዬሱሲ ጉጂዴ፥ «ፆምፒያ ኣሂዴ፥ ጊላፔ ዎይ ኣርሳፔ ጋርሳና ዎያ ኣሳይ ዴዒ? ቃሳን ዎኔ? 22ኣዪሲ ጎፔ፥ ቆሴዳባይ ኡባይ ቆንጪያ ኬሳናዋ፤ ቃሲ ጌማን ዎዳባይ ኡባይ ቤቴናን ኣቴና። 23ሲሳናው ሃይይ ዴዒያ ኡራይ ዴዖፔ ሲሶ» ያጌዳ።

24ቃሲካ ኡንቱንታ፥ «ሂንቴንቱ ሲሲያዋ ኣኬኪዴ ሲሲቴ፤ ፆሳይ ሂንቴ ማኬዳ ቁንዓን ሂንቴንቶ ማካናዋ። ኢ ሂንቴንቶ ዳሪሲዴ ኢማና፤ 25ዴዒያ ኡራው ጉጂ ኢማና፤ ባይናዋፔ ሃራይ ኣቶ፥ ኣው ዴዒያ ሄ ጉቶካ ኣኪዲጋና» ያጌዳ።

ዲጪያ ዜሬ ሌሚሱዋ

26ዬሱሲ ቃሲካ፥ «ፆሳ ካዉቴይ ጋዴን ካ ዜሪያ ኣሳ ማላ። 27ሄ ቢታኒ ቃማ ጌሚዒሼ፤ ጉራ ዴንዴ፤ ኢ ባሬ ሁጴው ዋኒንቶ ኤሬናን፥ ሄ ዜሬይ ሞኬኔ ዲጬ። 28ቢታይ ካ ባሬካ ሞኬኔ ኣይፌ፤ ኮይሮ ጫርሻይ ጫሬ፤ ጉዬፔ ኣይፋናው ኩኩሜ፤ ቃሲ ዉርሴን ኩሜን ኣይፊያ ኣይፌ። 29ሺን ካይ ጋኪያ ዎዴ፥ ካ ሺሺያ ዎዲ ጋኬዳ ዲራው፥ ቢታኒ ኤሌካ ባጫን ጫኩዋ ጌሊ ኣጌዳ» ያጌዳ። #ኢዩ 3፡13

ሳናፊጪያ ዜሬ ሌሚሱዋ

(ማት 13፡31-34፤ ሉቅ 13፡18-19)

30ዬሱሲ፥ «ኑኒ ፆሳ ካዉቴ ኣያ ማላቴ ጋኔ? ዎይ ኣያና ሌሚሳኔ? 31ፆሳ ካዉቴይ ሳናፊጪያ ኣይፋቶ ማላቴ። ሄ ኣይፋታ ዜሪያ ዎዴ፥ ሳዓን ዴዒያ ሚ ኣይፊያ ኡባፔካ ጉፃው፤ 32ሄኖ ዜሪና ሞካዴ ሃራ ኣታኪልቲያ ኡባፔ ዳራው፤ ዳሮ ዳሻ ዳሻው። ካፉ ኢዚ ቃንካ ኩዋን ጎሊያ ኬፃና ዳንዳዬ» ያጌዳ።

33ዬሱሲ ሃዋ ማላ ዳሮ ሌሚሱዋን ኣሳይ ሲሳናው ዳንዳዪያዋ ኬና፥ ባሬ ቃላ ኦዴዳ። 34ኣሳው ሌሚሱ ባይናን ኦዴና፤ ሺን ዬሱሲ ባሬና ካሊያዋንቱ ፃላላና ዴዒያ ዎዴ፥ ኡንቱንቶ ኡባባ ቢሊዴ ኦዴ።

ዬሱሲ ቤታ ጮዑ ኦዳ

(ማት 8፡23-27፤ ሉቅ 8፡22-25)

35ሄ ጋላሲ ሳዓይ ኦማርሲና፥ ዬሱሲ ባሬና ካሊያዋንታ «ኣባፔ ሄፊን ፒኖይቴ» ያጌዳ። 36ኣ ካሊያዋንቱ ኣሳ ኣጊዴ፥ ዬሱሲ ካሴ ጌሊ ኡቴዳ ዎንጊሪያን ጌሊዴ፥ ዬሱሳ ባሬንቱና ኣፌዲኖ፤ ሃራ ዎንጊራቱካ ሄዋን ዴዒኖ። 37ዎልቃማ ጎቱ ዴንዲና፥ ቤታይ ዎንጊሪያ ሾጪና፥ ሃይ ኩማና ጋካናው ዎንጊሪያ ጊዶ ጌሌዳ። 38ሄ ዎዴ ዬሱሲ ዎንጊሪያን ጉዬ ባጋና ቦርኮ ቦርኮቲዴ ጌሚዒሼዳ። ዬሱሳ ካሊያዋንቱ ኣ ዴንዴ፥ «ታማሪሲያዎ፥ ኑኒ ዪያ ዎዴ ጮዑ ጋዴ ፄላይ?» ያጌዲኖ።

39ኢ ቤጎቲዴ ጎቱዋ፥ «ጮዑ ጋ» ጊዴ፥ ኣባካ፥ «ዎፑ ጋ» ጌዳ፤ ጎቱካ ጮዑ ጊና፥ ኡባባይካ ዎፑ ጌዳ። 40ዬሱሲ ባሬና ካሊያዋንታ «ኣዪሲ ሃዋዳን ያዪቴ? ሂንቴንቱ ዋኒ ኣማኒኪቴ?» ያጌዳ።

41ኡንቱንቱ ዳሮ ያዪዴ ባሬንቱ ጊዶን፥ «ሃዌ ላ ሃራይ ኣቶ፥ ጎቱኔ ኣባይ ኣዛዜቲያዌ ኦኔ?» ያጌዲኖ።

Currently Selected:

ማርቆሳ 4: dwrENT

Highlight

Copy