ማርቆሳ 5

ዬሱሲ ኢታ ኣያናይ ኦይቄዳ ቢታኒያ ፓዳ

(ማት 8፡28-34፤ ሉቅ 8፡26-39)

1ዬሱሲኔ ኣ ካሊያዋንቱ ኣባፔ ሄፊንው ፒኒዴ፥ ጌርጌሴኖና ጌቴቲያ ጋዲያ ጋኬዲኖ። 2ኣሳ ሞጊያ ዱፉ ዴዒያሳፔ ኢታ ኣያናይ ዴዒያ ኢቲ ቢታኒ ኬሲዴ፥ ዬሱሲ ዎንጊሪያፔ ኬሴዳ ዎዴ፥ ዬሱሳና ጋኬቴዳ። 3ቢታኒ ሄ ዱፉ ዴዒያሳን ኣቂ ፔሺዴ፥ ያኒ ዴዔ፤ ኣ ኦኒኔ ሃራይ ኣቶ፥ ሳንላታን ቃቻናዉካ ዳንዳይቤና። 4ኣዪሲ ጎፔ፥ ኢ ዳሮ ዎዴ ኡቂናኒኔ ሳንላታን ቃሼቲዴ ዴዔ፤ ሺን ሳንላታ ዱሴሬዳ፤ ኡቂናካ ሜንሬዳ፤ ኣ ፆናናው ዳንዳዬዳዌ ኦኒኔ ባዋ። 5ኢ ኡባ ዎዴ ጋላሲኔ ቃማ፥ ሄ ዱፉ ዴዒያሳኒኔ ዴሪያ ቦላ ዋሴ፤ ባሬ ቦላካ ሹቻን ጋሬ።

6ዬሱሳ ሃኩዋን ቤዔዳ ዎዴ፥ ኣኮ ዎፂ ዪዴ ኣው ጎዪኔዳ። 7ሄ ቢታኒ ባሬ ኮሻ ቁ ኦዴ፥ «ኡባፔ ቦላ ፆሳ ናዓው፥ ዬሱሳ፥ ኔናኔ ታና ኣዬ ጋ? ታና ሙሬና ማላ፥ ታኒ ኔና ፆሳ ሱንን ዎሳይ» ያጌዳ። 8ኢ ሄዋ ኣዪሲ ጌዴ ጎፔ፥ ዬሱሲ ኣ፥ «ላ ሃ ኢታ ኣያናው፥ ሃ ቢታኒያፔ ኬሳ» ያጌዳዋሳ።

9ዬሱሲ ኣ፥ «ኔ ሱንይ ኦኔ?» ያጊዴ ኦቼዳ።

ኢ፥ «ኑኒ ጮራ ጊዲያ ዲራው፥ ታ ሱንይ ሌጊዮና» ያጌዳ። 10ኢታ ኣያናቱዋ ሄ ጋዲያፔ ኬሲ ዬዴና ማላ፥ ዬሱሳ ሚኒሲዴ ዎሴዳ።

11ሄ ዴሪያ ቦላን ጮራ ጉዱን ዉዲ ሄሜቴ፤ 12ኢታ ኣያናቱ ዬሱሳ፥ «ኑና ሂኒ ጉዱን ዉዲያኮ ዬዳርኪ፤ ኡንቱንቱን ቢዴ ጌላና» ያጊዴ ዎሲና፥ 13ዬሱሲ፥ «ቢቴ» ያጌዳ። ኢታ ኣያናቱ ቢታኒያፔ ኬሲዴ፥ ጉዱንቱዋን ጌሌዲኖ፤ ላዑ ሻዓ ጊዲያ ጉዱን ዉዲ ካካ ሁጲያና ካጆቲዴ፥ ኣባን ጌሊዴ፥ ሚቴቲ ኣጌዳ።

14ጉዱን ዉዲያ ሄሚያዋንቱ ባቃቲዴ፥ ሃኔዳዋ ካታማኒኔ ካታማፔ ጋፃ ጋዲያን ኦዴዲኖ፤ ሄዋ ቤዓናው ኣሳይ ዬዳ። 15ኣሳይ ዬሱሳኮ ዪዴ፥ ጮራ ኢታ ኣያናቱ ቤኒ ኦይቄዳ ቢታኒ ባሬ ዎዛናይ ሲሚና፥ ማዩዋ ማዪዴ፥ ሄዋን ኡቴዳዋ ቤዒዴ፥ ኡባይ ያዬዳ። 16ሄዋ ቤዔዳ ኣሳቱ ኢታ ኣያናቱ ኦይቄዳ ቢታኒ ሃኔዳዋኔ ቃሲ ጉዱን ዉዲያባ ሄ ኣሳሲ ኦዴዲኖ። 17ሄዋ ዲራው፥ ኣሳይ ባሬንቱ ጋዲያፔ ዬሱሲ ባና ማላ፥ ዎሳ ዶሜዳ።

18ዬሱሲ ዎንጊሪያን ጌሊሺን፥ ኢታ ኣያናቱ ኦይቄዳ ቢታኒ ዬሱሳና ዴዓና ማላ፥ ዬሱሳ ዎሴዳ። 19ሺን ዬሱሲ ኢፂዴ ኣ፥ «ኔ ሶይ ሲማዴ፥ ጎዳይ ኔው ኣይ ማላ ዎልቃማባ ኦዴንቶኔ ቃሲ ኢ ኔው ኣይ ማላ ኬኬንቶ ኔ ሶይ ኣሳው ኦዳ» ያጌዳ። 20ቢታኒ ቢዴ፥ ታሙ ካታማ #5፡20 ታሙ ካታማ፡ ሃዋንቱ ኢቲ ጪታ ጊዴዳ ካታማቱ ሳማሪያፔኔ ጋሊላ ጋዲያ ኣዋይ ዶሊያ ባጋና ዴዒያዋንታ ጊዲዴ፥ ሄዋንቱን ዴዒያ ኣሳቱዋ ኤሻይካ ግሪኬ ኣሳቱዋ ዴዑዋ ኦጊያ ካሊያዋ ቤሴ። ጊያሳን ዩዪዴ፥ ዬሱሲ ባሬው ኣይ ማላ ዎልቃማባ ኦዴንቶ፥ ኦዱዋ ዶሜዳ፤ ኢ ኦዴዳዋ ሲሴዳ ኣሳይ ኡባይ ማላሌቴዳ።

ያዒሮሳ ናቶኔ ዬሱሳ ማዩዋ ቦቼዳ ሚሺራቶ

(ማት 9፡18-26፤ ሉቅ 8፡40-56)

21ዬሱሲ ሲሚዴ፥ ዎንጊሪያን ጌሊዴ፥ ኣባ ፒኔዳዋፔ ጉዪያን፥ ጮራ ኣሳይ ኣባ ማታን ኣኮ ዩዪ ኣዴ ሺቄዲኖ። 22ያዒሮሳ ጊያዌ፥ ኣዪሁዳ ዎሳ ጎሊያ ካፓቱዋፔ ኢቱ፥ ዬሱሳ ቤዔዳ ዎዴ ኣኮ ዪ ኣ ጌዲያን ኩንዲዴ፥ 23«ታ ናታ ሃርጋዴ ሃይቃና ሃናው፤ ኢዛ ፓፃዴ ሎዖ ዴዓና ማላ፥ ያዴ ኔ ኩሺያ ኢዚ ቦላ ዎሪኪ» ያጊዴ ዬሱሳ ሚኒሲዴ ዎሴዳ።

24ዬሱሲ ያዒሮሳና ቤዳ፤ ኢ ቢሺን ጮራ ኣሳይ ኣ ካሊዴ ሜቶዲኖ።

25ታማኔ ላዑ ላይ ኡባ ኢዚ ቦላፔ ሱይ ጎጊያ ኢቲ ሚሺራታ ዴዓው። 26ጮራ ኣኪማቱ ኢዞ ኣኪሚሺንካ፥ ኢዛ ፓፃ ካዔታዱ፤ ባሬ ሚሻ ኡባ ዉርሲናካ ኢዚው ሃ ኢቴዳዋፔ ኣቲን፥ ኣይኔ ኢዞ ማዲቤና። 27ሄ ሚሺራታ ዬሱሳባ ሲሳዴ፥ ኣሳ ጊዶና ዬሱሳፔ ጉዬና ያዴ፥ ኣ ማዩዋ ቦቻዱ። 28ኣዪሲ ጎፔ ኢዛ፥ «ታኒ ሃራይ ኣቶ፥ ኣ ማዩዋ ቦቾፔካ ፓፃና» ያጋዴ ቆፓዱ።

29ኢፔ ጎጊያ ሱይ ኤሌካ ኤቂ ኣጌዳ፤ ኢዛ ባሬ ዋዪያፔ ፓፄዳዋ ባሬ ቦላን ኤራ ኣጋዱ። 30ዬሱሲ ባሬፔ ዎልቃይ ኬሴዳዋ ባሬ ሁጴው ኤሪዴ፥ ኤሌካ ጮራ ኣሳ ጊዶን ጉዬ ሲሚዴ፥ «ታ ማዩዋ ቦቼዳዌ ኦኔ?» ያጌዳ።

31ዬሱሳ ካሊያዋንቱ ኣ፥ «ኣሳይ ኔና ሱጊያ ዎዴ ቤዓዴ፥ ‹ታና ኦኔ ቦቼዳዌ?› ያጋይ?» ጌዲኖ።

32ዬሱሲ ሄዋ ኦኔ ኦዴንቶኔ ቤዓናው ዩሺ ኣዴ ፄሌዳ፤ 33ሺን ሚሺራታ ባሬው ሃኔዳዋ ኤራዴ፥ ያሻ ኮኮራዴ ያዴ ዬሱሳ ሲንን ጉፋናዱ፤ ቃሲ ቱማቴን ሃኔዳዋ ኡባ ኣው ኦዳዱ። 34ዬሱሲ ኢዞ፥ «ታ ናቴ፥ ኔና ኔ ኣማኑ ፓዳ፤ ሳሩዋን ባ፤ ኔ ዋዪያፔኔ ፓፃ» ያጌዳ።

35ዬሱሲ ቢሮ ሄዋ ጊሺን፥ ኣዪሁዳ ዎሳ ጎሊያ ካፑዋ ሶዪፔ ኪቴቴዳ ኣሳቱ ዪዴ፥ «ኔ ናታ ሃይቃዲጋዱ፤ ሲሚ ታማርሲያዋ ኣዪሲ ዳቡርሳይ?» ያጌዲኖ።

36ሺን ዬሱሲ ኡንቱንቱ ጊያዋ ሲሲዴ፥ ኣዪሁዳ ዎሳ ጎሊያ ካፑዋ፥ «ኣማኖ ፃላላ ኣማናፔ ኣቲን፥ ያዮፓ» ያጌዳ። 37ዬሱሲ ጴፂሮሳፔ፥ ያዪቆባፔኔ ያዪቆባ ኢሻ ዮሃኒሳፔ ሃራይ ኦኒኔ ባሬና ካሌና ማላ ዲጌዳ። 38ኡንቱንቱ ኣዪሁዳ ዎሳ ጎሊያ ካፑዋ ሶይ ጋኬዳ ዎዴ፥ ዬሱሲ ኣሳይ ሎይ ዬኪያዋኔ ዚላሊያዋ ቤዔዳ። 39ጌሊዴ ኣሳ፥ «ኣዪሲ ሎይ ዬኪቴ? ናታ ጌሚዒሻዱፔ ኣቲን፥ ሃይቃቤይኩ» ያጌዳ።

40ሄዋፔ ጉዬ ኣሳይ ኣ ቦላ ሚጬዳ፤ ሺን ኣሳ ኡባ ካሬ ኬሲዴ፥ ናቲ ኣዉዋኔ ኣቶ ሄዋን ባሬናና ዴዒያ ኣ ካሊያዋንታኔ ኣኪዴ፥ ናታ ዴዒያሳ ጌሌዳ። 41ዬሱሲ ናቲ ኩሺያ ኦይቂዴ፥ «ፃሊታ፥ ቁሚ» #5፡41 ፃሊታ፥ ቁሚ፡ ሃ ቃላቱ ኣራማዪኬ ጌቴቲያ ቃላን ዬሱሳ ዎዲያን ፓሌስቲኔ ጋዴን ሃሳዬቲያዋ። ፃሊታ ጊያዌኔ ቁሚ ጊያዌ ኣማራዋ ቃላ ጊዴና። ሺን ግሪኪያ ቃላ። ያጌዳ፤ ሄዋ ቢሌይ፥ «ጉ ናቴ፥ ታኒ ኔና ዴንዳ ጋይ» ጊያዋ።

42ናታ ኤሌካ ዴንዳ ኤቃዴ ሃሜታዱ፤ ኢዛ ታማኔ ላዑ ላይ ናቶ፤ ሄዌ ሃኒያዋን ኣሳይ ዳሮ ማላሌቴዳ። 43ዬሱሲ ሄዋ ኡንቱንቱ ኦሲኔ ኦዴና ማላ፥ ኡንቱንታ ሚኒሲ ኣዛዚዴ፥ «ኢዚው ሚያባ ኢሚቴ» ያጌዳ።

Currently Selected:

ማርቆሳ 5: dwrENT

Highlight

Copy