2 صَمُوِيل 20
20
شَبَع أتْمرّد ضِدّ دَاوُد
1وَ هِنَاكْ فِي قِلْقَالْ، فِيَّهْ رَاجِلْ وَاحِدْ مَا نَافِعْ أُسْمَهْ شَبَعْ وِلَيْد بِكْرِي مِنْ قَبِيلَةْ بَنْيَامِينْ. وَ هُو ضَرَبْ الْبُوقْ وَ قَالْ: «شُنُو الْيِلِمِّنَا مَعَ ذُرِّيَّةْ دَاوُدْ؟ أَنِحْنَ مَا عِنْدِنَا وَرَثَةْ مَعَ عِيَالْ يَسَّى. يَلَّا، يَا بَنِي إِسْرَائِيلْ، خَلِّي أَيِّ وَاحِدْ يِقَبِّلْ بَيْتَهْ!» 2وَ خَلَاصْ، كُلَّ رُجَالْ بَنِي إِسْرَائِيلْ طَرَّفَوْا مِنْ دَاوُدْ وَ تَابَعَوْا شَبَعْ وِلَيْد بِكْرِي. وَ لَاكِنْ رُجَالْ بَنِي يَهُوذَا أَنْرَبَطَوْا فِي مَلِكْهُمْ وَ مَشَوْا مَعَايَهْ مِنْ الْأُرْدُنْ لَحَدِّي أُورُشَلِيمْ.
3وَ وَكِتْ دَاوُدْ وَصَّلْ بَيْتَهْ فِي أُورُشَلِيمْ، شَالْ سِرِّيَّاتَهْ الْعَشَرَةْ الْخَلَّاهِنْ يَحْفَضَنْ الْبَيْت وَ قَمَّ حَبَسَاهِنْ. وَ أَنْطَاهِنْ كِلْفِتْهِنْ وَ لَاكِنْ مَا قَرَّبَاهِنْ. وَ هِنَّ قَعَدَنْ مَحْبُوسَاتْ طُولْ مُدَّةْ حَيَاتْهِنْ لَحَدِّي الْمَوْت. وَ هِنَّ عَاشَنْ مِثِلْ عَوِينْ الرَّاجِلْهِنْ مَيِّتْ.
يُوَاب كتل عَمَاسَا
4وَ الْمَلِكْ قَالْ لِعَمَاسَا: «فِي تَلَاتَةْ يَوْم دَا، لِمّ لَيِّ كُلَّ رُجَالْ بَنِي يَهُوذَا. وَ إِنْتَ كُلَ تَعَالْ مَعَاهُمْ.» 5وَ خَلَاصْ، عَمَاسَا مَشَى يِلِمّ رُجَالْ بَنِي يَهُوذَا وَ لَاكِنْ هُو فَوَّتْ الْوَكِتْ الْحَدَّدَهْ لَيَّهْ الْمَلِكْ. 6وَ الْمَلِكْ قَالْ لِأَبِشَايْ: «شَبَعْ وِلَيْد بِكْرِي دَا يِسَوِّي لَيْنَا شَيّءْ فَسِلْ زِيَادَةْ مِنْ السَّوَّاهْ أَبْشَلُومْ. هَسَّعْ دَا، شِيلْ عَسْكَرِي هَنَايِ أَنَا سِيدَكْ وَ أَمْشِي وَرَايَهْ قُبَّالْ مَا يَلْحَقْ الْمُدُنْ الْقَوِيِّينْ وَ يَنْجَى مِنِّنَا.»
7وَ مَعَ أَبِشَايْ مَشَوْا عَسْكَرْ يُوَابْ وَ الْكِرِتِيِّينْ وَ الْفِلْتِيِّينْ حُرَّاسْ الْمَلِكْ وَ كُلَّ الرُّجَالْ الْفَحَلِينْ. وَ هُمَّنْ مَرَقَوْا مِنْ أُورُشَلِيمْ وَ مَشَوْا وَرَاءْ شَبَعْ وِلَيْد بِكْرِي. 8وَ وَكِتْ وَصَّلَوْا جَنْب الْحَجَرْ الْكَبِيرْ الْفِي حِلَّةْ قِبْعُونْ، عَمَاسَا لَاقَاهُمْ. وَ يُوَابْ لَابِسْ خُلْقَانَهْ هَنَا الْعَسْكَرْ وَ رَابِطْ سَيْفَهْ بِبَيْتَهْ فِي صُلْبَهْ. وَ وَكِتْ مَاشِي، السَّيْف وَقَعْ. 9وَ يُوَابْ قَالْ لِعَمَاسَا: «كَيْف حَالَكْ، يَا أَخُويِ؟» وَ بِإِيدَهْ الزَّيْنَةْ، كَرَبَهْ لِعَمَاسَا مِنْ دِقْنَهْ لِيِحِبَّهْ. 10وَ عَمَاسَا مَا فَكَّرْ فِي السَّيْف الْفِي إِيدْ يُوَابْ الْإِسْرَةْ. وَ خَلَاصْ، يُوَابْ طَعَنَهْ لِعَمَاسَا فِي بَطْنَهْ وَ دَفَّقْ مُصْرَانَهْ وَ طَوَّالِي، هُو مَاتْ فِي الْبَكَانْ دَا وَ بَتَّانْ يُوَابْ مَا تَنَّى لَيَّهْ كُلَ. وَ يُوَابْ وَ أَخُوهْ أَبِشَايْ فَاتَوْا وَرَاءْ شَبَعْ وِلَيْد بِكْرِي.
11وَ فِي الْبَكَانْ دَا، صَبِي عَسْكَرِي وَاحِدْ هَنَا يُوَابْ وَاقِفْ جَنْب جَنَازَةْ عَمَاسَا وَ يُقُولْ: «النَّاسْ الْمَعَ يُوَابْ وَ دَاوُدْ، خَلِّي يِتَابُعُوا يُوَابْ.» 12وَ عَمَاسَا وَاقْعِ فِي لُبّ دَمَّهْ فِي أُسْط الدَّرِبْ. وَ الصَّبِي كَرَّ جَنَازَةْ عَمَاسَا وَ طَرَّفْهَا فِي زَرَعْ وَ غَطَّاهَا بِخَلَقْ أَشَانْ هُو شَافْ كَدَرْ كُلَّ النَّاسْ الْوَصَّلَوْا جَنْبَهْ يَقِيفُوا. 13وَ بَعَدْ طَرَّفْ الْجَنَازَةْ مِنْ الدَّرِبْ، كُلَّ النَّاسْ تَابَعَوْا يُوَابْ وَ مَشَوْا وَرَاءْ شَبَعْ وِلَيْد بِكْرِي.
يُوَاب كتل شَبَع وِلَيْد بِكْري
14وَ شَبَعْ وَ نَاسَهْ الْفَحَلِينْ شَقَّوْا أَرْض كُلَّ قَبَايِلْ بَنِي إِسْرَائِيلْ وَ وَجَّهَوْا عَلَيْ حِلَّةْ آبِلْ بَيْت مَعَاكَةْ. وَ كُلَّ نَاسْ لَمَّوْا وَ مَشَوْا مَعَايَهْ. 15وَ يُوَابْ وَ نَاسَهْ مَشَوْا حِلَّةْ آبِلْ بَيْت مَعَاكَةْ وَ حَوَّقَوْا الْحِلَّةْ بِرَدْمِيَّةْ لَحَدِّي قِسْمَةْ الدُّرْدُرْ وَ حَاصَرَوْهَا. وَ كُلَّ النَّاسْ الْمَشَوْا مَعَ يُوَابْ قَمَّوْا يَنْكُتُوا قَعَرْ الدُّرْدُرْ أَشَانْ يَرْمُوهْ.
16وَ مِنْ الْحِلَّةْ، مَرَةْ وَاحِدَةْ الْعِنْدَهَا حِكْمَةْ صَرَخَتْ وَ قَالَتْ: «أَسْمَعَوْا! أَسْمَعَوْا! مِنْ فَضُلْكُو، قُولُوا لِيُوَابْ يِقَرِّبْ لَيِّ نِدَوْر نِحَجِّي لَيَّهْ.» 17وَ هُو قَرَّبْ لَيْهَا. وَ الْمَرَةْ سَأَلَتَهْ وَ قَالَتْ: «إِنْتَ يُوَابْ وَلَّا؟» وَ هُو قَالْ: «أَيْوَى، دَا أَنَا.» وَ هِي قَالَتْ لَيَّهْ: «أَسْمَعْ كَلَامْ خَادْمَكْ.» وَ هُو قَالْ: «نَسْمَعْ.» 18وَ الْمَرَةْ قَالَتْ: «زَمَانْ فِي عَادِتْنَا، يُقُولُوا: ‹شَاوُرُوا نَاسْ حِلَّةْ آبِلْ بَيْت مَعَاكَةْ.› وَ بَيْدَا خَلَاصْ، الْكَلَامْ يِكَمِّلْ. 19وَ أَنَا مِنْ النَّاسْ الْهَادِيِينْ وَ أَمِينِينْ فِي بَلَدْ إِسْرَائِيلْ. وَ إِنْتَ قَاعِدْ تِفَتِّشْ دَرِبْ التَّهْلِكْ حِلِّتْنَا الْمُهِمَّةْ فِي إِسْرَائِيلْ. مَالَا تِدَوْر تِدَمِّرْ الْوَرَثَةْ الْأَنْطَاهَا لَيْنَا اللّٰهْ؟»
20وَ يُوَابْ قَالْ: «حَرَامْ، حَرَامْ لَيِّ نَهْلِكْ وَ نِدَمِّرْ! 21الْكَلَامْ دَا مَا كَيْ. لَاكِنْ فِيَّهْ نَادُمْ وَاحِدْ مِنْ جِبَالْ أَفْرَايِمْ أُسْمَهْ شَبَعْ وِلَيْد بِكْرِي وَ هُو أَتْمَرَّدْ ضِدّ الْمَلِكْ دَاوُدْ. هَسَّعْ دَا، سَلُّمُوهْ لَيِّ هُو وِحَيْدَهْ بَسْ وَ أَنَا نِبَعِّدْ مِنْ الْحِلَّةْ.» وَ الْمَرَةْ قَالَتْ لِيُوَابْ: «خَلَاصْ، نَزْقُلُوا لَيْك رَاسَهْ مِنْ الدُّرْدُرْ.»
22وَ الْمَرَةْ مَشَتْ خَبَّرَتْ كُلَّ نَاسْ الْحِلَّةْ بِفِكِرْهَا الْحَكِيمْ دَا. وَ خَلَاصْ، هُمَّنْ قَطَعَوْا رَاسْ شَبَعْ وِلَيْد بِكْرِي وَ زَقَلَوْه لِيُوَابْ. وَ يُوَابْ ضَرَبْ الْبُوقْ وَ عَسْكَرَهْ طَرَّفَوْا مِنْ الْحِلَّةْ وَ أَيِّ وَاحِدْ قَبَّلْ بَيْتَهْ. وَ يُوَابْ كُلَ مَشَى بَكَانْ الْمَلِكْ فِي أُورُشَلِيمْ.
أسامَي مسائيل دَاوُد
23وَ يُوَابْ، هُو قَايِدْ دَيْش بَنِي إِسْرَائِيلْ وَ بَنَايَا وِلَيْد يَهُويَدَعْ، هُو مَسْؤُولْ فِي الْكِرِتِيِّينْ وَ فِي الْفِلْتِيِّينْ حُرَّاسْ الْمَلِكْ. 24وَ أَدُرَامْ، هُو مَسْؤُولْ فِي الْخِدْمَةْ الْإِجْبَارِيَّةْ وَ يَهُوشَفَطْ وِلَيْد أَخِلُودْ، هُو كَاتِبْ الْيِذَكِّرْ الْمَلِكْ. 25وَ شَيْوَا، هُو الْكَاتِبْ وَ صَدُوقْ وَ أَبِيَاتَرْ، هُمَّنْ رُجَالْ دِينْ. 26وَ عِيرَا الْمِنْ حِلَّةْ يَيِيرِيْ، هُو كُلَ رَاجِلْ دِينْ يَخْدِمْ لِدَاوُدْ.
Currently Selected:
2 صَمُوِيل 20: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
